1 መꬍና ጎዳይ ኤላሳ ጎትያን ሳሉዋ አፋናዉ ሀንያ ዎደ፥ ኤላስነ ኤልሳእ ገልጋላፐ ደንዲደ ቤድኖ። 2 ኤላስ ኤልሳአ፥ “መꬍና ጎዳይ ታና ቤቴለ ካታማ ኪቴዳ ድራዉ፥ ሀያና ኔን ሀዋን ታካሻ” ያጌዳ።

ሽን ኤልሳእ፥ “መꬍና ጎዳይ ኤሮ! ነ ሸምፑ ኤሮ! ታን ኔፐ ሻከትከ” ያጌዳ። ኡንቱንቱካ ዱገ ቤቴለ ዎꬌድኖ።

3 ቤቴለን ደእያ ትምቢትያ ኦድያዋንቱ ጭታይ ኤልሳአኮ ከሲደ፥ “መꬍና ጎዳይ ሀቼ ነ ጎዳ ኔፐ ሻክ አፋናዋ ኔን ኤራይ?” ያጊደ ኦቼድኖ።

ኤልሳእ፥ “ኤ ኤራይ። ሽን ህንተንቱ ጮኡ ጊተ” ያጊደ ዛሬዳ።

4 ሄዋፐ ጉይያን፥ ኤላስ ኤልሳአ፥ “መꬍና ጎዳይ ታና ያርኮ ኪቴዳ ድራዉ፥ ሀያና ኔን ሀዋን ታካሻ” ያጌዳ።

ሽን ኤልሳእ፥ “መꬍና ጎዳይ ኤሮ! ነ ሸምፑ ኤሮ! ታን ኔፐ ሻከትከ” ያጊደ ዛሬዳ። ሄዋ ድራዉ፥ ኡንቱንቱ ያርኮ ቤድኖ።

5 ያርኮን ደእያ ትምቢትያ ኦድያዋንቱ ጭታይ ኤልሳአኮ ከሲደ፥ “መꬍና ጎዳይ ሀቼ ነ ጎዳ ኔፐ ሻክ አፋናዋ ኔን ኤራይ?” ያጊደ ኦቼድኖ።

እ፥ “ኤ ኤራይ። ሽን ህንተንቱ ጮኡ ጊተ” ያጊደ ዛሬዳ።

6 ሄዋፐ ጉይያን፥ ኤላስ ኤልሳአ፥ “መꬍና ጎዳይ ታና ዮርዳኖሳ ሻፋ ኪቴዳ ድራዉ፥ ሀያና ኔን ሀዋን ታካሻ” ያጌዳ።

ኤልሳእ፥ “መꬍና ጎዳይ ኤሮ! ነ ሸምፑ ኤሮ! ታን ኔፐ ሻከትከ” ያጌዳ። ኡንቱንቱ ላአቱካ እትፐ ቤድኖ።

7 ትምቢትያ ኦድያዋንቱፐ እሻታሙ አሳቱ ኡንቱንታ ካሊደ፥ ዮርዳኖሳ ሻፋ ጋካናዉ ቤድኖ። ኤላስነ ኤልሳእ ሻፋ ዶናን ኤቂደእሽን፥ ትምቢትያ ኦድያዋንቱ ኡንቱንቱፐ ላፋ ሃኪደ ኤቄድኖ። 8 ሄ ዎደ ኤላስ ባረ ካባ አኪደ ጻጺደ፥ አን ሃꬃ ሾጬዳ። ሃꬃይ ያነ ሃነ ሻከቴዳ፤ መላ ቢታ የꬊደ ፕኔድኖ። 9 ኤላስ ኤልሳአ፥ “ታን ኔፐ አከታክቻናፐ ካሰታደ፥ ነዉ አያ ኦꬃና ማላ ኮያይ? አነ ኦዳ” ያጌዳ። ዛረ. 21:17

ኤልሳእ፥ “ታን ኔና ኮችያ ዎደ፥ ነ አያናይ ታዉ ላኡ ዳኩዋ ግዳና ማላ፥ ታን ኔና ዎሳይ” ያጊደ ዛሬዳ።

10 ኤልሳአ፥ “ኔን መትያ ኦሻ ኦቻዳ። ሽን ታን ኔፐ ሻከታ ሳሉዋ ብያ ዎደ ኔን ታና ጼልያዋ ግዶፐ፥ ሄዌ ነዉ ሀናና። ሄዌ ꬋዮፐ ሀነና” ያጌዳ።

11 ሄዋፐ ጉይያን፥ ኡንቱንቱ እትፐ ሃሳዪድ ሀመትሽን፥ ታማ ፓራቱነ ኡንቱንቱ ጎችያ ታማ ጋሪ አኬከናን ፑቱ ጊደ፥ ኡንቱንቱ ላኡዋፐ ግዱዋን ገሊደ፥ ሻኬዳ። ኤላስ ጎትያን ሳሉዋ ከሴዳ። 12 ኤልሳእ ሄዋ በኢደ፥ “ታ አዎ፥ ታ አዎ! ኔን እስራኤልያ አሳዉ ዎልቃነ ጎንዳለ ሽን!” ያጊደ ዋሴዳ። ሄዋፐ ስሚደ፥ እ ኤላሳ ኡባካ በእቤና። 2 ካታ. 13:14

ኤልሳእ ሄዋን ካዮቲደ፥ ባረ ማዩዋ ላኡ ከሲደ፥ ፖሽ ኦሌዳ። 13 ያቲደ ኤላሳፐ ዎꬌዳ ካባ እ ደንꬂደ፥ ጉየ ስሜዳ፤ ዮርዳኖሳ ሻፋ ዶናን ኤቄዳ። 14 ኤላሳፐ ዎꬌዳ ካባ አኪደ፥ ሃꬃ አን ሾጪደ፥ “መꬍና ጎዳይ ኤላሳ ጾሳይ ሀቃን ደኢ?” ያጌዳ። ኤልሳእ ሃꬃ ሾጬዳ ዎደ፥ ሃꬃይ ያነ ሃነ ሻከቴዳ፤ ሻፋ ፕኔዳ።

15 ያርኮፐ ዬዳ ትምቢትያ ኦድያዋንቱ ጭታይ ኤልሳአ በኤዳ ዎደ፥ “ኤላሳ አያናይ ኤልሳአ ቦላ ሸምፔዳ” ያጌድኖ። ኡንቱንቱ አናና ጋከታናዉ ዪደ፥ አ ስንꬃን ሳኣን ጉፋኔድኖ። 16 ያቲደ ኡንቱንቱ አ፥ “በአ፥ ኑን ነ ቆማቱ እሻታሙ ምኖ አሳቱ ሀዋን ደኤቶ። ሀያና ኑን ነ ጎዳ ኮያናዉ ባና። ኦን ኤሪ፥ መꬍና ጎዳ አያናይ አ አኪደ፥ እት ደርያ ሁጲያን ዎይ ዛንጋራ ግዶን የጌደንቶነ” ያጌድኖ።

ኤልሳእ፥ “ሀነና፥ ቦፕተ!” ያጌዳ።

17 ሽን እጻድ ጋናዌ አ ዬላያና ጋካናዉ፥ ኡንቱንቱ አ ዎሲደ አገናን እጽና፥ “ቢተ” ያጌዳ። ኡንቱንቱ እሻታሙ ቤድኖ። ሄዙ ጋላሳ ኮዪደ፥ አ ደምቤይክኖ። 18 ኤልሳእ ያርኮን ታክ ደእሽን፥ ኡንቱንቱ አኮ ስሚደ ዪና፥ “ዎን ታን ህንተንታ ‘ቦፕተ’ ያጋበይክታ?” ያጌዳ።

19 ሄዋፐ ጉይያን፥ ያርኮ ካታማን ደእያ አሳቱ ኤልሳአ፥ “ኔን ኑ ጎዳይ በእያዋዳን ሀ ካታማይ ደእያ ሳአይ ሎአ። ሽን ሃꬃይ ኢታ፤ ቃይ ቢታይካ አይፈና” ያጌድኖ።

20 እ ኡንቱንታ፥ “አነ ኦራꬃ ከርያን ማጽንያ ቆሊደ፥ ታዉ አኪደ ዪተ” ያጊደ አዛዜዳ፤ አዉ አሄድኖ። 21 ኤልሳእ ፑልትያ ቢደ፥ ማጽንያ አን የጊደ፥ “መꬍና ጎዳይ፥ ‘ታን ሀ ሃꬃ ፓꬃድ፤ ሀዋፐ ስንꬃናዉ ሀ ሃꬃይ ሀይቁዋስ ጋሶ ግደና፤ ቢታይካ አይፋናዋ’ ያጌ” ያጌዳ። 22 ኤልሳእ ሃሳዬዳዋዳንካ ሀቼ ጋካናዉ፥ ሄ ሃꬃይ ጽሎ ግዴዳ።

23 ኤልሳእ ያፐ ደንዲደ፥ ፑደ ቤቴለ ከሴዳ። እ ኦግያን ቢሽን፥ ያላጋ አቱማ ናናይ ካታማፐ ከሲደ፥ “ላ ሀ ሁጲያና ቦአዉ፥ ፑደ ከሳ! ላ ሀ ሁጲያና ቦአዉ፥ ፑደ ከሳ!” ያጊደ አ ቦላ ቅሊጬድኖ።

24 ጉየ ስም ጼሊደ፥ ኡንቱንታ መꬍና ጎዳ ሱንꬃን ሸቄዳ። ያትና ባባንꬃ ጌተትያ ላኡ ማጫ ዶአቱ ዎራፐ ከሲደ፥ ናናቱዋፐ ኦይታማነ ላኡ ያላጋቱዋ ፑዘረꬂደ ዎꬌድኖ። 25 ኤልሳእ ሄዋፐ ደንዲደ፥ ቃርመሎሳ ደርያ ቤዳ፤ ቃይ ሄዋፐካ ሳማርያ ስሜዳ።