ጰጽሮስ
ጻፌዳ ኮይሮ ኪታ
ገሉዋ
የሱስ ኪቴዳ ጰጽሮስ ጻፌዳ ኮይሮ ኪታይ ጻፈቴዳዌ፥ ሄ ኪታ ግዶን “ዶረቴዳ ጾሳ አሳቱዋ” ጌተቲደ ጼሰትያነ ቄር ኢስያን ሁጲሳ ባጋ ሻኩዋን ላለቴዳ አማንያዋንቱሳ። ሀ ኪታ ዋና ቆፋይ፥ አማኑዋ ጋሱዋን መቱነ ዋዪ ጋኬዳዋንታ ምንሳናሳነ መንꬃናሳ። ጻፊ ሀዋ ኦꬅያዌ አ ሀይቁዋ፥ አ ደንዱዋ፥ አ ላኤንꬆ ዩሳ ኦድያ የሱስ ክርስቶሳ ምሽራቹዋ ቃላ ናባብያዋንታ ሀሳይስያዋና። ኡንቱንቱ የሱስ ክርስቶሳ ደኡዋ ሌምሱዋዳን አኪደ፥ መቱዋ ገንጪደ አꬋናዳን ሀሳይሴ። ሀዋና እትፐ ጋꬅያ ዎደ፥ መቱ ኡንቱንቱ አማኑዋ ጻልታተꬃ ፓጭያዋነ የሱስ ክርስቶስ ቆንጭያ ጋላስ ኡንቱንቱ በስያ ጋትያ አካናዉ ደእያዋ ኡንቱንታ ሀሳይሴ።
ጻፊ፥ ኡንቱንቱ መቱዋን ገንጫና ማላ መንꬅያዋ ቦላካ፥ ክርስቶሳ ካልያዋንቱ ደእያዋዳን ኡንቱንቱ ደአናዳን ቆፍሴ።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ 1:1-2
ጾሳ አሹዋባ 1:3-12
ጌዬዳ ደኡዋ ደአናዳን እመቴዳ ማቁዋ 1:13—2:10
መቱዋ ዎደ አማንያ አሳይ ኦꬃና በስያ አዎተꬃ 2:11—4:19
አማንያ አሳ አሽከተꬃነ ኦሱዋ 5:1-11
ዉርሰꬃ ቁትያ 5:12-14
1
1 ታን፥ የሱስ ክርስቶስ ኪቴዳ ጰጽሮስ፥ ጾሳይ ዶሬዳ አሳቶ ጳንጾሳ ጋድያን፥ ጋላትያ ጋድያን፥ ቃጳዶቅያ ጋድያን፥ ኢስያ ቢታንነ ቢታንያ ጋድያን በትያን ደእያዋንቶ ዳብዳቢያ ጻፋይ። 2 የሱስ ክርስቶሳዉ ህንተ አዛዘታና ማላነ አ ሱꬃን ጌያና ማላ፥ ጾሳይ አዉ ዶሬዳ ህንተንቶ ባረ አያናን ጌሼዳዋንቶ፥ አꬎ ኬካተꬃይነ ሳሮተꬃይ ግዶ።
ደኡዋ እማና ጌዳ ህዶታ
3 ኑን ጾሳ፥ ኑ ጎዳ የሱስ ክርስቶሳ አዉዋ፥ ባረ ማሮተꬃ ዳሩዋዳንካ ኑና ላኤንꬁዋ የሌዳዋ፥ የሱስ ክርስቶሳ ሀይቁዋፐ ደንꬄዳዋን ኑዉ ደኡዋ ህዶታ እሜዳዋ ጋላቴቶ። 4 ቃይ ጾሳይ ህንተንቶ እማና ዳሮ ላታይ ዎቀናዌ፥ ባየናዌነ ꬋየናዌ ሳሉዋን ናጌ። 5 ሄዌካ ህንተንቶ፥ ጾሳ ዎልቃን አማኑዋን ናገት ኡቲደ፥ አቶተꬃዉ ጊጌዳዋንቶ ዉርሰꬃ ዎድያን ቆንጫናዋ።
6 ሀእ ጉꬃ ዎደዉ ሀራይ አቶ ዱማ ዱማ ፓጭያን ህንተ ፓጨታናዉ ኮሾፐካ፥ ሀዋን ዳሮ ናሸትተ። 7 ሄዌ ሀራይ አቶ፥ ታማን የግና ꬋይያ ዎርቃፐካ ህንተ አማኑ ዳሮ አልኦነ ባል ባይናዋ ግድያዋ በሳናሳ፤ ያቲደ የሱስ ክርስቶስ ቤትያ ዎደ፥ ጋላታ፥ ቦንቹዋነ ሳባ ህንተ አካና። 8-9 ህንተ አ ኤራና ꬋዮፐካ፥ ሲቂታ፤ ህንተ ሀእ አ በአና ꬋዮፐካ፥ አማኒታ። ቃይ ህንተ ህንተ አማኖ ፖሎ ግድያ ህንተ ሸምፑዋ አቶተꬃ አክያ ድራዉ፥ ኦዳናዉ ዳንዳየተና ቦንቹ ኩሜዳ ናሸቻ ናሸቲታ።
10 ጾሳይ ህንተንቶ እማና አꬎ ኬካተꬃባዉ ትምቢትያ ኦዴዳ ናባቱ ሎይꬅ ብዲደ፥ ሀ አቶተꬃባ ኮዬድኖ። 11 ኡንቱንቱን ደእያ ክርስቶሳ አያናይ ክርስቶሳ ቱጋባነ ሄዋፐ ጉይያን ያና ቦንቹዋባ ካሰቲደ ማርካቲደ፥ አዉደ ዎይ ዋኔዳ ዎድያን ያነንቶነ አኬክሴዳዋዳን፥ ኡንቱንቱ ኮዬድኖ። 12 ሄ ትምቢትያ ኦድያዋንቱ ኦꬄዳ ኦሱ ህንተሳፐ አትን፥ ኡንቱንቱ ሁጲያሳ ግደናዋ ጾሳይ ኡንቱንቶ ቆንጭሴዳ፤ ሀእ ህንተ ስሴዳ ምሽራቹዋ ቃላ ህንተንቶ ኦዴዳ አሳቱ፥ ባረዉ ሳሉዋፐ ኪተቴዳ ጌሻ አያና ዎልቃን ኦዴድኖ። ሄዋ ኪታንቻቱካ በአናዉ አሞቲኖ።
ጌሻተꬃን ደእያዋ
13 ሄዋ ድራዉ፥ ኦሱዋ ኦꬃናዉ ህንተ ዎዛናን ቆፋ ጊግሲደ ህንተ ሁጲያ ናግተ። የሱስ ክርስቶስ ቆንጭያ ዎደ አꬎ ኬካተꬃ ህንተ አክያ ድራዉ፥ ኩመንꬃ ህዶታን ናግተ። 14 ጾሳዉ አዛዘትያ ናናዳን፤ ህንተ ካሰ ኤረናን አሞቴዳ አሙዋ ካሎፕተ። 15-16 ሽን ህንተና ጼሴዳ ጾሳይ ጌሻ ግዴዳዋዳን፥ ህንተካ ህንተ ኦሱዋ ኡባን ጌሻ ግድተ። ጾሳ ማጻፋን፥ “ታን ጌሻ ግድያ ድራዉ፥ ህንተካ ጌሻ ግድተ” ጌተቲደ ጻፈቴዳ። ዎጋ 11:44-45፤ 19:2
17 አሳ ሁጲያን ሁጲያን ዴሙዋ ጼለናን አ ኦሱዋዳን ፕርድያ ጾሳ ዎሲደ ህንተ፥ “ኑ አቦ” ጊደ አ ጼስያዋ ግዶፐ፥ ሀ አላምያን በተ ግዲደ ህንተ ደእያ ዎድያን ያሻተꬃን ደእተ። 18-19 ህንተ ህንተ አዎቱዋፐ ላቴዳ ፓና ደኡዋፐ ዎዘቴዳዌ፥ ꬋይያ ብራ ዎይ ዎርቃ ማላና ግደናዋ ኤሪታ፤ ቦርስያባይ ዎይ ቅታይ ባይና ዶርሳ ሱꬃዳን፥ አልኦ ክርስቶሳ ሱꬃን ህንተ ዎዘቴድታ። 20 ጾሳይ ሳአይ መታናፐ ካሰ ክርስቶሳ ዶር ዎꬄዳ፤ ሽን ህንተ ድራዉ፥ ሀ ዎድያ ዉርሰꬃን እ ቤቴዳ። 21 ህንተ አማኑነ ህንተ አካና ጊደ ናሸቻን ናግ ኡቴዳባይ ጾሳን ደአና ማላ፥ ጾሳይ ሀይቁዋፐ አ ደንꬂደ፥ አዉ ቦንቹዋ እሜዳዋ አን አማኒታ።
22 ቱማተꬃዉ ህንተ አዛዘትያዋን፥ ሎአ ማላትያ ኢታተꬃይ ባይናን ህንተ እሻቱዋ ሲቃናዉ ህንተ ሁጲያ ጌሺደ፥ እቱ እቱዋና ምንሲደ ዎዛናፐ ሲቀትተ።
23 ህንተ ሀይቂያ ዘረꬃፐ ላኤንꬁዋ የለትበይክታ፤ ሽን መꬍናዉ ደእያዋነ ስንꬃዉካ ደአና ጾሳ ቃላን ሀይቀና ዘረꬃፐ የለቴድታ። 24 አያዉ ጎፐ፥ ጾሳ ማጻፋይ፥ “አሳይ ኡባይ ማታ ማላ፤ አ ቦንቹ ኡባይካ ማታ ጪሻ ማላ። ማታይ መሌ፤ ጪሻይካ ቆቆፈቴ። ኢሳ. 40:6-8 25 ሽን ጎዳ ቃላይ መꬍናዉ ደኤ” ያጌ። ሀዌ ህንተንቶ ጎዳይ ኦዴዳ ምሽራቹዋ ቃላ።