1 ሀእካ ህንተኖ ዱረ አሳቶ፥ ህንተ ቦላ ይያ ቱጋዉ “አየ! አየ!” ያጊደ ዬክተነ ዝላልተ። 2 ህንተ ዱረተꬃይ ባይ ድጌዳ፤ ቃይ ህንተ አፍላካ ብልአይ ም ድጌዳ። 3 ህንተ ዎርቃይነ ህንተ ብራይ ሽእ ድጌዳ። ቃይ ሄ ሽአይ ህንተ ቦላ ማርካታና፤ ህንተ ቦላካ ታማዳን ማና። ህንተ ህንተ ሚሻ ስንꬃዉ ዳጋይ ደኢታ። 4 አኬክተ፤ ህንተ ጋደን ካꬃ ቆይጬዳ አሳቶ ጭግቤና ክራ ሚሻይ ዋሴ፤ ኡንቱንቱ ዋሱ ዎልቃማ ጎዳ ሀይꬃን ስሰቴዳ። ዛረ. 24:14-15 5 ህንተዉ እንጀትና፥ ሳኣን እሻሊደ ደኤድታ፤ ሹካ ጋላሳዉ ꬊክያዋዳን፥ ህንተ ቦላ ꬊኬድታ። 6 ጽሎ አሳ ቦላ ፕርዴድታ፤ ቃይ አ ዎꬌድታ፤ እ ህንተናና ኤቀተና።

7 ሄዋ ድራዉ፥ ታናዳን ጾሳ ካልያዋንቶ፥ ጎዳይ ያና ጋካናዉ ገንጭተ፤ ቢታ ጎሽያዌ አድልያ እራይነ አሱራ እራይ ያና ጋካናዉ ገንጪደ፥ አልኦ ካꬃ እ ዎት ናጊደ ጋꬅ አክንቶ በእተ። 8 ህንተካ ቃይ ገንጭተ፤ ህንተ ዎዛና ምንስተ። አያዉ ጎፐ፥ ጎዳ ዩሳይ ማታቴዳ።

9 ታናዳን ጾሳ ካልያዋንቶ፥ ጾሳይ ህንተ ቦላ ፕርደና ማላ፥ እቱ እቱዋ ቦላ ዙዙሞፕተ። በእተ፥ ፕርድያዌ ፐንግያን ኤቄዳ። 10 ታናዳን ጾሳ ካልያዋንቶ፥ ዋይያስነ ገንጫዉ ሌምሱዋ ግዴዳዋንታ፥ ጎዳ ሱንꬃን ሃሳዬዳ ናባቱዋ ሀሳይተ። 11 በእተ፥ ዳንዳዪደ ገንጬዳዋንታ ኑን አንጀቴዳዋንታ ጌቶ። ኢዮባ ገንጫ ህንተ ስሴድታ፤ ቃይ ጎዳይ አዉ ዉርሰꬃን እሜዳዋካ ቤድታ። አያዉ ጎፐ፥ ጎዳይ ማሮታይነ ቃረታይ ኩሜዳዋ። ኢዮባ 1:21-22፤ 2:10፤ ማዝ. 103:8

12 ሽን ኡባፐ ካሰ፥ ታናዳን ጾሳ ካልያዋንቶ፥ ሳሉዋን ግድና፥ ዎይ ሳኣን ግድና፥ ዎይ ሀራ ጫቁዋን ግድና፥ አያንካ ጫቆፕተ። ሽን ጾሳ ፕርዳን ህንተ ገለናዳን፥ ህንተ የዉ ኤ ግያዋ ግዶፐ፥ “ኤ” ጊተ፤ ግደና ግያዋ ግዶፐ፥ “ግደና” ጊተ።

13 ህንተ ግዶን ዋየትያ ኡራይ ኦንነ ደኦፐ፥ ጾሳ ዎሶ፤ ናሸትያ ኡራይ ኦንነ ደኦፐ፥ የጺደ ጋላቶ። 14 ህንተፐ ሳከትያ ኡራይ ኦንነ ደኦፐ፥ አማንያ አሳ ካለꬅያ ጭማቱዋ ባረኮ ጼሶ፤ ኡንቱንቱ ጎዳ ሱንꬃን ዛይትያ አ ኦኪደ፥ አዉ ጾሳ ዎስኖ። 15 አማኑዋን ጾሳ ዎሴዳ ዎሳይ ሀርጋንቻ ፓꬃና፤ ጎዳይካ አ ሀርግያፐ ደንꬃና፤ ቃይ ናጋራ እ ኦꬄዳዋ ግዶፐካ ጎዳይ አዉ አቶ ጋና። 16 ሄዋ ድራዉ፥ ህንተ ፓጻና ማላ፥ ህንተ ናጋራ እቱ እቶ ፓጽተነ እቱ እቶ ጾሳ ዎስተ፤ ጽሎ አሳ ዎሳይ ዎልቃማ ኦሱዋ ኦꬄ። 17 ኤላስ ኑ ማላ አሳ። እራይ ሳኣን ቡከናዳን፥ እ ምንሲደ፥ ጾሳ ዎስና ሄዙ ላይꬃነ ኡሱፑን አገና ሳኣን እራይ ቡክቤና። 1 ካታ. 17:1፤ 18:1 18 ላኤንꬁዋ ጾሳ እ ዎስና፥ ሳሉዋፐ እራይ ቡኬዳ፤ ሳአይካ ባረ ካꬃ ሞኬዳ። 1 ካታ. 18:42-45

19 ታናዳን ጾሳ ካልያዋንቶ፥ ህንተፐ ኦንነ ቱሙዋፐ ዎራ ቦፐ፥ ቃይ እቱ አ ጉየ ሄ ቱሙዋኮ ዛሮፐ፥ 20 ናጋራንቻ አ ባላ ኦግያፐ ዛርያ ኦንነ አ ሸምፑዋ ሀይቁዋፐ አሻናዋነ ዳሮ ናጋራ ካማናዋ ኤሮ። ሌም. 10:12፤ 1 ጰጽ. 4:8