1 ኦላይነ ዋላሳይ ህንተ ግዱዋ ሀቃፐ ዪ? ኡንቱንቱ ዬዳሳይ ህንተ ቦላ ግዶን ኦለትያ ህንተ ናሸታናዉ ዎልቃማ አሙዋ አሞትያዋፐ ግደኔ? 2 ህንተ አሞቲታ፤ ሽን ደምክታ፤ ዎꬊታ። ሎይꬅ ኮዪታ፤ ሽን ደማናዉ ዳንዳይክታ፤ ዋላቀቲታነ ኦለቲታ። ሽን ጾሳ ዎሰና ድራዉ፥ ህንተ ኮይያዋ ደምክታ። 3 ጾሳ ዎሲታ፥ ሽን ደምክታ፤ ጋሱካ ባላ ኦግያን ዎሲታ። ሄዋ ህንተና ናሸችያዋን ፔሻናዉ ኮይያ ድራሳ። 4 ስም ዎሹምያዋንቶ፥ ሀ አላምያና ዳቦትያዌ ጾሳዉ ሞርከ ግድያዋ ኤርክቴ? አያዉ ጎፐ፥ ሀ አላምያና ዳቦታናዉ ኮይያዌ ኦንነ ጾሳና ሞርከቴ። 5 ዎይ ጾሳ ማጻፋይ፥ “ጾሳይ ኑናን ዎꬄዳ አያናይ ዎልቃማ አሙዋ ኑዉ አሞቴ” ግያዋ ህንተንቶ ጮ ግያዋ ማላቲ? 6 ሽን ጾሳይ አꬎ ኬካተꬃ አꬂደ እሜ። ሄዋ ድራዉ፥ ጾሳ ማጻፋይ፥ “ጾሳይ ኦቶረትያዋንታ እጼ፤ ሽን ባረና ካዉሽያዋንቶ አꬎ ኬካተꬃ እሜ” ያጌ። ሌም. 3:34

7 ስም፥ ህንተ ጾሳዉ ሞደትተ። ያቲደ ጻላህያና ኤቀትተ፤ እ ህንተፐ ባቃታና። 8 ጾሳኮ ሺቅተ፤ እካ ህንተኮ ሺቃና። ህንተኖ ናጋራንቻቶ፥ ህንተ ኩሽያ ሜጨትተ። ላኡ ቆፋይ ደእያዋንቶ፥ ህንተ ዎዛና ጌሽተ። 9 ቱጋትተ፤ ካዮትተነ ዬክተ። ህንተ ሚቻ ዬኮ ላምተ፤ ህንተ ናሸቻካ ካዮ ላምተ። 10 ጎዳ ስንꬃን ህንተ ሁጲያ ቶችተ፤ ቃይ እ ህንተና ꬎቁ ꬎቁ ኦꬃና።

11 ታናዳን ጾሳ ካልያዋንቶ፥ እቱ እቱዋ ዝግሮፕተ። ባረ እሻ ዝግርያዌነ አ ቦላ ፕርድያዌ ህግያ ዝግሬነ ህግያ ቦላ ፕርዴ። ኔን ህግያ ቦላ ፕርዶፐ፥ ህግያ ቦላ ፕርድያዋ ግዳሳፐ አትን፥ ህገዉ አዛዘትያዋ ግዳካ። 12 ህግያ እምያዌነ ፕርድያዌ ጾሳ ጻላላ፤ እ አሻናዉነ ꬋይሳናዉ ዳንዳዬ፤ ሽን ነ ሾሩዋ ቦላ ፕርድያዌ ኔን ኦኔ?

13 ህንተኖ፥ “ኑን ሀቼ ዎይ ዎንት ሄ ካታማ ባና፤ ሄዋን ላይꬃ ኡታና፤ ዛልአናነ ቃይ ሚሻ ዎꬍሳና” ግያዋንቶ፥ በእተ። ሌም. 27:1 14 ዎንት ህንተ ደኡ አያ ሀናነንቶነ ኤርክታ፤ ጉꬃ ዎደዉ ህንተ ቤቲደ፥ ጉየፐ ꬋይያ ፔኑዋ ማላ። 15 ሄዋ አጊደ፥ “ጎዳይ ጎፐ፥ ኑን ደአና፤ ሀዋ ዎይ ሄዋ ኦꬃና” ጋናዉ በሴ። 16 ሽን ህንተ ሀእ ህንተንቱ ꬎቃተꬃን ጬቀቲታ፤ ሄዋ ማላ ጬቁ ኡባይ ኢታ።

17 ሄዋ ድራዉ፥ ሎኦባ ኦꬃናዉ ኤሪደ ኦና ኡራዉ ሄዌ ናጋራ።