1 ታናዳን ጾሳ ካልያዋንቶ፥ ኑን ሀራቱዋፐ አꬍያ ፕርዳ አካናዋ ህንተ ኤርያ ድራዉ፥ ህንተፐ ጮራቱ ታማርስያዋንታ ግዶፕተ። 2 ኑን ኡባይካ ዳሮባን ባሌቶ፤ እት ኡራይ ባረ ሃሳያን ሙለካ ባላና ꬋዮፐ፥ እ ባረና ናጋናዉ ዳንዳይያ ባል ባይና አሳ። 3 ፓራቱ ኑዉ አዛዘታና ማላ፥ ብጻላ ባርሲደ፥ ኑን ኮይያሳ ኡባ ኡንቱንታ አፌቶ። 4 በእተ፥ ማርካባቱካ ቃይ ሄዋ ኬና ዎልቃማ ግዲደ፥ ጎቱዋ ጫርኩዋን ላገቶፐካ፥ ኡንቱንታ ላግያዌ ባረዋ ኮይያሳ ዛሪደ ላግያ ቄር ጉꬃ ምꬃን ላገቲደ ቢኖ። 5 ሄዋዳን እንጻርሳይ ቦላ ግዶን ጉꬃ አሳተꬃ ግዶፐካ፥ ዳሮ ዎልቃማባን ጬቀቴ።

ጉꬃ ታማይ ዋኒደ ዎልቃማ ዎራ ጉዲ! አኬክተ። 6 እንጻርሳይካ ታማ ማላ። እ ኑ አሳተꬃ ግዶን ኢታባ ኡባ ኦꬃና ዳንዳዬ፤ አሳተꬃ ኡባ ቱንሴ። ቃይ ኑ ደኡዋ ዎꬃካ ታማን ጉዴ፤ ጋናምያ ታማን እ ጉደታናዋ። 7 አያዉ ጎፐ፥ ዶአቱዋ፥ ካፋቱዋ ዛርያ፥ ትራን ጎሸትያ ሾሻቱ ዛርያነ አባን ደእያ መታቱዋ ዛርያ ኡባ አሳይ አድሴዳ፤ ቃይ ኡንቱንቱካ አዴድኖ። 8 ሽን ኦንነ እንጻርሳ አድሳናዉ ዳንዳይቤና፤ እንጻርሳይ ዎꬍያ ማርዚ ኩሜዳ ጮኡ ጌና ኢታ መታ። 9 ኑን እንጻርሳን ኑ ጎዳነ አዉዋ ጋላቴቶ፤ ቃይ አንካ ጾሳ ማላቲደ መቴዳ አሳ ሸቄቶ። ዶመꬃ 1:26 10 እት ዶናፐ ጋላታይነ ሸቃይ ከሴ። ታናዳን ጾሳ ካልያዋንቶ፥ ሄዌ ሄዋዳን ሀናናዉ በሰና። 11 ፑልቱ እት ኦላፐ ማልእያ ሃꬃነ ጫምያ ሃꬃ ፑልታናዉ ዳንዳዪ? 12 ታናዳን ጾሳ ካልያዋንቶ፥ ባላስያ ግያ ምꬃይ ዎጋራ አይፋናዉ ዳንዳዪ? ዎይ ዎይንያ ቱራይ ባላስያ ግያ ምꬃ አይፋናዉ ዳንዳዪ? ማጽነ ማጽነ ግያ ሃꬃፐካ ማልኦ ሃꬃይ ከሳና ዳንዳየና።

13 ህንተ ግዶን አꬌዳ ኤራንቻይነ አኬካንቻይ ኦኔ? ባረ ሎኦ ደኡዋን ኦሰቴዳ ባረ ኦሱዋ አꬌዳ ኤራተꬃፐ ይያ አሽከተꬃን በሶ። 14 ሽን ህንተ ዎዛናን ጫምያ ቃናቲነ ይርጊ ደኦፖ። ቃይ ቱማተꬃ ቦላካ ዎርዶቶፕተነ ኦቶረቶፕተ። 15 ሄዋ ማላ አꬌዳ ኤራተꬃይ ሳሉዋፐ ዎꬍያዋ ግደና፤ ሽን ሄዌ ሳኣባ፥ አሳዋ፥ ጻላሀቱዋ። 16 አያዉ ጎፐ፥ ቃናቲነ ይርጊ ደእያ ሳን ዋላሳይነ ኢታ ኦሶ ኡባይ ደኤ። 17 ሽን ቦላፐ ይያ አꬌዳ ኤራተꬃይ ኡባፐ ካሰ ጌሻ። ቃይ ሳሮተꬃ ዶስያዋ፥ አሽከነ ኤኖ ግያዋ፤ ቃይ ማሮተꬃይነ ሎኦ አይፊ ኩሜዳዋ። ስꬊነ ሎኦ ማላትያ ኢታተꬃይ ባይናዋ። 18 ጽሎተꬃ አይፊ ሳሮተꬃ ኦꬅያዋንቱ ሳሮተꬃን ዘሬዳ ዘረꬃፐ ቤቴዳ።