1 ሄዋ ድራዉ፥ ክርስቶስ ባረ አሹዋን ኑዉ ዋየቴዳ ድራዉ፥ ህንተካ ሄ ቆፋን ዳንጨትተ። አያዉ ጎፐ፥ ባረ አሹዋን ዋየቴዳ ኡራይ ናጋራ ኦꬅያዋ አጌዳ። 2 ሀዋፐ ስንꬃን፥ ሀ ሳኣን ሸምፑዋና ደአናዉ አቴዳ ዎድያን፥ ጾሳይ ኮይያዋዳን ደአናዉ በስያዋፐ አትን፥ አሳ አሙዋዳን ደአናዉ በሰና። 3 አያዉ ጎፐ፥ አማነና አሳይ ኦꬃናዉ ዶስያዋ ህንተ ኦꬂደ፥ ዎሹማናዉ ካጄልያዋን፥ አሙዋን፥ ማꬁዋን፥ የꬃን፥ ኡሻን፥ ፖክያ ኤቃዉ ጎይንያዋን፥ ደኤዳ ካሰ አꬌዳ ዎዲ ህንተንቶ ግዳናዋ። 4 አማነና አሳና ህንተ ሾራይ ባይና ኦሱዋ እትፐ ኦና ድራዉ ማላለቲደ፥ ህንተና ቦሪኖ። 5 ሽን ኡንቱንቱ ፓጻ ደእያ አሳ ቦላነ ሀይቄዳ አሳ ቦላ ፕርዳናዉ ጊግ ኡቴዳ ጾሳዉ ዛሩዋ እማና። 6 ሀይቄዳ አሳይ *ሀይቄዳ አሳይ፦ የሱሳ አማናናፐ ካሰና ሀይቄዳዋንታ ዎይ ኖሄ ዎደ አሳቱዋ። 3:19 ጼልተ። ባረ አሳተꬃን አሳይ ፕርደትያዋዳን ፕርደታናዉነ ቃይ አያናን ጾሳይ ደእያዋዳን ደአናዉ፥ ዎንጋላ ምሽራቹ ኡንቱንቶ ሄዎ ኦደቴዳ።

7 ኡባባዉካ ዉርሰꬃይ ማታቴዳ። ሄዋ ድራዉ፥ ጾሳ ዎሳናዉ ቆፋን ጌዪደ፥ ህንተና ናግተነ ምንተ። 8 ሲቁ ዳሮ ናጋራ ካምያ ድራዉ፥ ኡባባፐ አꬂደ እቱ እቱዋና ዎዛናፐ ሲቀትተ። ሌም. 10:12 9 ዙዙመናን እቱ እቱዋ እማꬃተꬃን ሞክተ። 10 ህንተ ሁጲያን ሁጲያን ጾሳፐ ዱማ ዱማ አꬎ ኬካተꬃ አኬዳዋዳንካ፥ ጾሳ ዱማ እሙዋ ሀዳራ ሎይꬅ ከስያዋንቱዳን፥ እቱ እቶ ኦꬅተ። 11 የሱስ ክርስቶሳ ባጋና ኡባባን ጾሳይ ጋላተታና ማላ፥ ኦንነ ኦድያዋ ግዶፐ፥ ቃላ ጾሳፐ አኪደ ኦድያዋዳን ኦዶ። ቃይ ኦንነ ማድያዋ ግዶፐ፥ ጾሳይ አዉ እምያ ዎልቃን ማዶ። ቦንቹነ ጎዳተꬃይ ጾሳዉ መꬍናፐ መꬍናዉ ግዶ። አመንእ።

12 ታ ሲቃቶ፥ ህንተ ግዶን ታማዳን ጉዲደ ፓጭያ ዋዪ ይያዋ ኦራꬃባይ ሀንያዋዳን ማላለቶፕተ። 13 ሽን ክርስቶሳ ቦንቹ ቤትያ ዎደ ህንተ ናሸታና ማላ፥ አናና ዋየትያዋን ናሸትተ። 14 አሳይ ህንተና ክርስቶሳ ሱንꬃ ድራዉ ቦርያዋ ግዶፐ፥ ህንተ አንጀቴዳዋንታ፤ አያዉ ጎፐ፥ ቦንቾ አያናይ፥ ጾሳ አያናይ፥ ህንተ ቦላ ሸምፓና። 15 ህንተፐ ኦንነ ሸምፑዋ ዎꬌዳዋዳን፥ ዎይ ካይሱዋዳን፥ ዎይ ኢታባ ኦꬄዳ አሳዳን፥ ዎይ ሀራ አሳ የዉዋ ገሌዳዋዳን ዋየቶፖ። 16 ሽን ኦንነ ክርስታንያ ግድያ ድራዉ ዋየቶፐ፥ ክርስቶሳ ሱንꬃ ድራዉ፥ ጾሳ ጋላታናፐ አትን፥ ዬላቶፖ።

17 አያዉ ጎፐ፥ ፕርዳይ ጾሳ ጎልያን ዶመትያ ዎዲ ጋኬዳ። ቃይ ሄ ፕርዳይ ኮይሮ ኑ ቦላ ዶመትያዋ ግዶፐ፥ አ ዎንጋላዉ አዛዘተናዋንቱ ዉርሰꬃይ አያ ግዳኔ? 18 ጽሎ አሳይ ቱጋን አትያዋ ግዶፐ፥ ማካላንቻይነ ናጋራንቻይ ያትና ዋናኔ?ሌም. 11:31 19 ሄዋ ድራዉ ቃይ፥ ጾሳይ ጌዳዋዳን ዋየትያዋንቱ ሎኦባ ኦꬂደ፥ ባረንቱ ሸምፑዋ ሀዳራ ባረና መꬌዳ አማነትያ ጾሳዉ እምኖ።