1 ስም ታን ዎሳ ጎልያ ጭማቱዋና ጭማ ግድያዌነ፥ ክርስቶሳ ዋይያ ማርካትያዌ፥ ቃይ ቆንጫና ቦንቹዋ ሻካናዌ ህንተ ግዶን ደእያ ጭማቱዋ ዞራይ። 2 ህንተ ግዶን ደእያ ጾሳ ዉድያ ጾሳይ ኮይያዋዳን ሄምተ። ዶሱዋናፐ አትን፥ ዎልቃን ግደና። ቃይ ህንተ ጎአ ጻላላ ጼለናን፥ ሎኦ ቆፋን ሄምተ። 3 ዉደዉ ህንተ ሌምሱዋ ግድተፐ አትን፥ ህንተ ሄምያዋንታ ዎልቃን ሄሞፕተ። 4 ቃይ ሄምያዋንቱ ካፑ ቆንጭያ ዎደ፥ ባየና ቦንቾ ካላቻ ህንተ አካና።

5 ሄዋዳንካ ያላጋ አሳቶ፥ ጭማቶ ሞደትተ። ኡባይካ እቱ እቶ ኦꬃናዉ ህንተ ሁጲያ ካዉሽያዋ አፍላዳን ማይተ። አያዉ ጎፐ፥ ጾሳይ ኦቶረትያዋንታ እጼ፤ ሽን ባረና ካዉሽያዋንቶ አꬎ ኬካተꬃ እሜ። ሌም. 3:34 6 ጾሳይ ባረ ሎኦ ዎድያን ህንተና ꬎቁ ኦꬃና ማላ፥ ዎልቃማ ጾሳ ኩሽያፐ ጋርሳና ህንተና ቶችተ። 7 እ ህንተንቶ ቆፕያ ድራዉ፥ ህንተና ህርግስያ ኡባባ አ ቦላ ኦልተ።

8 ጻላህያ ካፑ፥ ህንተ ሞርኪ፥ ምትያ ኡራ ኮዪደ፥ ጉድያ ጋሙዋዳን ህንተ ዩሹዋን ዩይያ ድራዉ ናገትተነ ቤጎትተ። 9 ሳኣን ደእያ ህንተ እሻቱ ሄዋዳን ዋየትያዋ ኤሪደ፥ አማኑዋን ምኒደ፥ አናና ኤቀትተ። 10 አꬎ ኬካተꬃ ኡባ ጾሳይ፥ ባረ መꬍና ቦንቾ ክርስቶስ የሱሳ ባጋና ህንተና ጼሴዳዌ፥ አማሬዳ ዎድያ ህንተ ዋየቴዳዋፐ ጉይያን፥ እ ባረ ሁጰዉ ህንተና ሽር ኦራꬃናነ ምንሳና። ቃይ እ ህንተና ማዳናነ ባስ ኤሳና። 11 ዎልቃይ መꬍናፐ መꬍና ጋካናዉ አዉ ግዶ። አመንእ።

12 ሀዌ ጾሳ ቱሙ አꬎ ኬካተꬃ ግድያዋ ታን ህንተንቶ ማርካታደነ ህንተና ዞራደ፥ ህንተንቶ ቃንꬃን ጻፌዳ ዳብዳቢያ አማነትያ እሻ ጋደ ታን ቆፕያ ስላሰ ቦላ ኪታድ፤ ሄ አꬎ ኬካተꬃን ምኔድታ።

13 ህንተናና እትፐ ዶረቴዳ ባብሎነን *ባብሎነ፦ ሳፃ ማጻፋ ቆፋዳን፥ ሀ ሱንꬃይ ሮመ ጉሳ ግደናን አገና። ደእያ ዎሳ ጎልያ አሳይነ ታ ናአይ ማርቆስ ህንተና “ሳሮ ሳሮ” ጊኖ። 14 ሲቁዋ የረታ የረቲደ፥ እቱ እቱዋ ሳሮትተ።

ህንተዉ፥ ክርስቶሳና እቱዋ ግዴዳዋንቶ ኡባቶ ሳሮተꬃይ ግዶ። አመንእ።