1 ታን ስሞን ጰጽሮስ፥ የሱስ ክርስቶሳ ጽሎተꬃ ባጋና ኑዋ ማላ አማኑዋ አኬዳዋንቶ፥ ሀ ዳብዳቢያ ጻፋይ።

2 ጾሳነ ኑ ጎዳ የሱሳ ህንተ ኤርያዋን አꬎ ኬካተꬃይነ ሳሮተꬃይ ህንተንቶ ፓላሂደ ግዶ።

3 ኑን ጾሳ ቦንቹዋነ ሎኦተꬃ ላታና ማላ፥ ኑና ጼሴዳዋ ኑን ኤርያዋን፥ ደኡዋስነ ጾሳ ማላቱሳዉ ኑና ኮሽያዋ ኡባ ጾሳ ዎልቃይ ኑዉ እሜዳ። 4 ህንተ አ እሙዋ ባጋና ሳኣን ደእያ ባይዝያ አሙዋፐ ከስ አካናዳንነ ጾሳ ጾሳተꬃ ላታናዳን፥ እ ባረ እማና ጌዳ ዳሮ ዎልቃማነ አልኦ እሙዋ ኑዉ እሜዳ። 5 ሄዋ ድራዉ፥ ህንተና በስያዋ ኡባ ምን ኦꬂደ፥ ህንተ አማኑዋ ቦላ ሎኦተꬃ፥ ሎኦተꬃ ቦላ ኤራተꬃ፥ 6 ኤራተꬃ ቦላ ህንተና ናግያዋ፥ ህንተና ናግያዋ ቦላ ገንጫ፥ ገንጫ ቦላ ጾሳ ማላትያዋ፥ 7 ጾሳ ማላትያዋ ቦላ እሻተꬃ ሲቁዋ፥ እሻተꬃ ሲቁዋ ቦላ ሲቁዋ ጉጅተ። 8 አያዉ ጎፐ፥ ሀዋንቱ ህንተንቶ ሎይꬅ ዳርያዋ ግዶፐ፥ ህንተና ጎዳ የሱስ ክርስቶሳ ኤራተꬃን ትሻነ አይፍያና ደእያዋንታ ኦꬃና። 9 ሽን ሄዋንቱ ባይና ኡራይ ባረ ማታን ደእያዋ ጻላላ ደሜ፤ ቃይ እ ቆቃ፤ እ ካሰ ኦꬄዳ ናጋራይ አቶ ጌተቴዳዋ ዶጌዳ።

10 ሄዋ ድራዉ፥ ታናዳን ጾሳ ካልያዋንቶ፥ ህንተና ጾሳይ ጼሴዳዋነ ዶሬዳዋ ሎይꬅ ኤርሳናዉ፥ ካሰዋፐ አꬍ ምንተ፤ አያዉ ጎፐ፥ ህንተ ሄዋ ኦꬅያዋ ግዶፐ፥ ꬉበትክታ።*ꬉበትክታ፦ ናጋራን ኩንድክታ። 11 ሄዋዳን ቃይ ኑ ጎዳነ ኑና አሽያ የሱስ ክርስቶሳ መꬍና ካዉተꬃ ገልያ ኩመንꬃ ማታይ ህንተንቶ እመታና።

12 ሄዋ ድራዉ፥ ህንተ ሀ የዋቱዋ ኤርያዋ ግዶፐካ፥ ቃይ ህንተ ኦይቄዳ ቱሙዋን ምኔዳዋንታ ግዶፐካ፥ ታን ህንተና ሀ የዋቱዋ ኡባ ዎደ ሀሳይስያዋ አግከ። 13 ታን ፓጻ ደኤዳ ኬናን፥ ህንተና ሀሳይሳደ ቃሰꬃናዉ ኮሽያዋ ታዉ ማላቴ። 14 ኑ ጎዳይ የሱስ ክርስቶስ ታዉ ቆንጭያን ኦዴዳዋዳን፥ ታን ሀ ሀይቂያ አሳተꬃ ጋምኤናን ቃራ ኦላናዋ ኤራይ። 15 ታን ሀይቄዳዋፐ ጉይያን ግድናካ፥ ህንተ ሀ የዋቱዋ ኡባ ዎደ ቆፓናዉ ዳንዳያና ማላ፥ ታዉ ዳንዳየቴዳዋ ኡባ ኦꬃና።

16 ኑን አ ዎልቃማ ቦንቹዋ ኑ አይፍያን በኢደ ኦደቶፐ አትን፥ መꬍ አኬዳ ቶሳን ኑ ጎዳ ክርስቶሳ ዎልቃነ ዩሳ ህንተንቶ ኦድበይኮ። 17 አያዉ ጎፐ፥ ዳሮ ዎልቃማ ቦንቹዋፐ፥ “ታን አን ዳሮ ናሸትያ ታ ሲቆ ናአይ ሀዋ” ያግያ ኮሻይ ዬዳ ዎደ፥ ጾሳ አዉዋፐ ቦንቹዋነ ጋላታ እ አኬዳ። 18 ቃይ ኑንካ ጌሻ ደርያ ቦላን አናና ደኢደ፥ ሄ ኮሻይ ሳሉዋፐ ዬዳዋ ስሴዶ።

19 አሳይ ሄዋፐ ሎይꬅ አꬍያ ትምቢትያ ኦድያዋንቱ ሃሳዬዳ ኑና ሎይꬅ አማንꬅያ ቃላይ ኑዉ ደኤ፤ ህንተ ሄ ቃላ ናግያዋ ግዶፐ ሎይꬄድታ። አያዉ ጎፐ፥ ሄዌ ሳአይ ዎንታና ጋካናስነ ዎንታ ጾልንትያ ፖኡ ህንተ ዎዛናን ፖአና ጋካናዉ፥ ꬉማን ፖእያ ፖኡዋ ማላ። 20 ኡባፐ ካሰቲደ፥ ሀዋ ኤርተ፤ ጾሳ ማጻፋን ጻፈቴዳ ትምቢትያ ኦዴዳዋ ኦንነ ባረካ ብላናዉ ዳንዳየና። 21 አያዉ ጎፐ፥ ትምቢትያ ኦዴዳዌ ኡባይ ጌሻ አሳቱ ጌሻ አያናይ ካለꬅና፥ ጾሳ ቃላ ሃሳዬድኖፐ አትን፥ አሳ ሸንያን ሃሳየትቤና።