1 ሽን ትምቢትያ ኦድያ ዎርዳቱ አሳ ግዶን ካሰ ደእያዋዳን፥ ህንተ ግዶንካ ዎርዱዋ ታማርስያዋንቱ ደአና። ኡንቱንቱ ባረና ዎዜዳ፥ ጎዳ ካዲደ፥ ባይዝያ ዎርዶ ትምርትያ አሀና፤ ቃይ ኡንቱንቱ አኬከና ባሻ ባረንቱ ቦላ አሀና። 2 ቃይ ዳሮ አሳይ ዬላይያ ኡንቱንቱ ኢታ ኦግያ ካላና፤ ኡንቱንቱ ጋሱዋን ቱሙዋ ኦጊ ቦረታና። 3 ዎርዱዋ ታማርስያ ሄዋንቱ ሻሎ ያረትያዋን ባረንቱ መꬍ አኬዳ ቶሳን ህንተና ቦንቃና፤ በንፐ ዶሚደ፥ ኡንቱንቱ ፕርዳይ ጊግ ኡቴዳ፤ ኡንቱንታ ꬋይስያዌ ቤጎቲደ ናጌ።

4 ናጋራ ኦꬄዳ ኪታንቻቶ ጾሳይ ቃረተናን፥ ፕርዳ ጋላሳይ ጋካናዉ ꬉማ ኦላን ኡንቱንቱ ቃሸት ኡቴዳ ጋናምያን የጌዳ። 5 ጾሳይ ናጋራንቻቱዋ ቦላ ባሻ ሃꬃ የዴዳፐ አትን፥ በን አሳዉ ኬክቤና፤ ሽን ጽሎተꬃባ ኦዴዳ ኖሀነ ሀራ ላፑ አሳቱዋ አሼዳ። ዶመꬃ 6:1—7:24 6 ጾሳይ ሶዶማነ ጋሞራ ግያ ካታማቱዋ ቢታ ብድንꬃ ኦꬂደ፥ ጉድ ꬋይሲደ፥ ናጋራንቻ ግድያዋንታ ጋካናባዉ ሌምሱዋ ኦꬄዳ።ዶመꬃ 19:24 7 ህገዉ አዛዘተና ቱናተꬃ ኦꬅያ አሳቱዋ ግዶን ቱጋቲደ ደእያ ጽሉዋ ሎጻ ጾሳይ አሼዳ። ዶመꬃ 19:1-16 8 ሄ ሎኦ ብታኒ ኡንቱንቱ ግዶን ደኢደ፥ ኡንቱንቱ ኦꬅያ ኢታ ኦሱዋ ጋላስ ጋላስ በኤዳ ዎደነ ስሴዳ ዎደ አ ሎኦ ዎዛናይ ኡንኤቴዳ። 9-10 ሄዋ ግዶፐ፥ ጎዳይ ጾሳዉ ጎይንያ አሳቱዋ ፓጭያፐ ዎት አሻነንቶ ኤሬ፤ ናጋራንቻቱዋ ቃይ ኡባፐ አꬂደ፥ ቱና አሙዋን አሹዋ አሙዋ ካልያዋንታነ ቃይ ጾሳ ዎልቃ ካꬍያዋንታ፥ ፕርዳ ጋላሳይ ጋካናዉ ጎዳይ ሙሪደ ዎꬃናዋካ ኤሬ።

ዎርዱዋ ታማርስያ ሄዋንቱ ጻላነ ኦቶራንቻ ግዴዳዋን፥ ቦላን ደእያ ቦንቾ መታ ቦሪኖፐ አትን፥ ቦንችክኖ። 11 ሄ ዎርዱዋ ታማርስያ አሳቱዋፐ ዳሮ ምኖነ ዎልቃማ ግድያ ኪታንቻቱካ ኡንቱንታ ጎዳ ስንꬃን ቦርያን ሞታናዉ ኮይክኖ። 12 ሽን ሄ አሳቱ ኦይቀቲደ ꬋያናዉ የለቴዳ ባረንቱ መታን ዎዛናይ ባይና ዎራ ዶአቱዋዳን ሀኒኖ፤ ኡንቱንቱ ኤረናባ ቦሪኖ፤ ቃይ ባረንቱ ባይዙዋን፥ ኡንቱንቱ ጮ ꬋያና። 13 ኡንቱንቱ ባረንቱ መꬌዳ መቱዋን መቶታና፤ ጋላስ የጺደ ዱርያዋ ናሸችያባ ጊደ ቆፒኖ፤ ኡንቱንቱ ካዉሽስያዋንታነ ቱናቱዋ ግድ ኡቲደ፥ ህንተናና ምያ ቁማ ሙሳን ናሸቲኖ። 14 ጫራትያ ማጫ አሳ ጼልያዋ አገና አይፊ ኡንቱንቶ ደኤ፤ ቃይ ናጋራ ኦꬅያዋካ አግክኖ። አማኑዋን ምንቤና አሳ ጭሚኖ። አሙዋ ዶዬዳ ዎዛናይ ኡንቱንቶ ደኤ፤ ኡንቱንቱ ሸቀቴዳዋንታ። 15 ሱረ ኦግያ አጊደ ባሌድኖ። ብኦራ ናኣ ባላማ ኦግያና ቤድኖ፤ ባላም ማካላን ሚሻ አካናዉ ኮዬዳ። ፓይ. 22:4-35 16 እ ትምቢትያ ኦድያዋ፤ ሽን አ ናጋራ ድራዉ፥ አ ሀሪ አሳዳን ሃሳያን ሴሪደ፥ ጎሻ ማላ ሀኑዋፐ አ ተኤዳ።

17 ሄ አሳቱ መል ድጌዳ ፑልቱዋ ማላ፤ ቃይ ጎቱ ቶኪደ አፍያ ሻርያ ማላ፤ ጾሳይ ኡንቱንቶ ሳካና ꬉማ ጊግስ ዎꬄዳ። 18 አያዉ ጎፐ፥ ኡንቱንቱ መላነ ኦቶሮ ሃሳያ ሃሳዪኖ፤ ባሊደ ደእያ አሳፐ ከስ ዬዳዋንታ ዎልቃማ አሹዋ አሙዋን ጭሚኖ። 19 ኡንቱንቱ ባረዉ ባሻ አሙዋና ደኢደ ኡንቱንታ፥ “ህንተ አይለተꬃፐ ከሳና” ያጊኖ፤ አያዉ ጎፐ፥ እት አሳይ ባረና ጾኔዳባዉ አያዉነ አይልያ። 20 ኡንቱንቱ ኑ ጎዳነ ኑና አሽያ የሱስ ክርስቶሳ ኤራተꬃን ሀ ሳኣ ቱናተꬃፐ ከስ አኬዳዋፐ ጉይያን፥ ጉየ ስሚደ፥ አን ꬉበቲደ ጾነትያዋ ግዶፐ፥ ካሰ ደእያ ደኡዋፐ ጉየዌ ኡንቱንቶ ኢታና። 21 አያዉ ጎፐ፥ ኡንቱንቶ እመቴዳ ጌሻ አዛዙዋ ኤሪደ አግያዋፐ ኡንቱንቱ ጽሎተꬃ ኦግያ ኤረናን አግንቶ ሎአ ሽን። 22 “ካናይ ባረ ጮሻኮ ጉየ ስሜ” ግያ ሌምሱነ ቃይ፥ “ሜጨቴዳ ጉዱንꬃይ ጉየ ስሚደ፥ ኡርቃን ጎንዶረቴ” ግያ ሌምሱ ቱማ ግድያዋ ኡንቱንታ ጋኬዳዌ በሴ። ሌም. 26:11