1 ታ ሲቃቶ፥ ሀዌ ታን ህንተንቶ ጻፌዳ ላኤንꬆ ዳብዳቢያ፤ ታን ሄ ላኡ ዳብዳበቱዋካ ህንተ ሱረ ቆፋ ቆፓናዳን ደንꬃናዉ ህንተና ሀሳይሳናዳን ጻፋድ። 2 ጌሻ ግዴዳ ናባቱ በን ኦዴዳ ቃላ ህንተ ሀሳያና ማላነ ጎዳይ ህንተና አሽያዌ፥ ባረ ኪቴዳዋንቱ ባጋና ህንተና አዛዜዳ አዛዙዋ ህንተ ሀሳያና ማላ ኮያይ። 3 ዎድያ ዉርሰꬃን፥ አሳ ቶችያ ባረንቱ አሙዋዳን ደእያዋንቱ አሳ ቶቺደ ደንዳናዋ ኡባፐ ካሰቲደ ኤርተ። 4 ኡንቱንቱ፥ “እ ‘ያና’ ያጌዳ። ግቤኔ? ያትና ሀቃን ደኢ? አያዉ ጎፐ፥ ኑ አዎቱ ሀይቂ ድጌድኖ፤ ሽን ኡባባይካ ሳአይ መቶደፐ ዶሚደ ደእያዋዳንካ ደኤ” ያጋና። 5 ዳሮ ዎድያፐ ካሰ ጾሳይ ሃሳይና፥ ሳሉነ ሳአይ መቴዳዋ ኤሪደ፥ ኡንቱንቱ አኬከናን እጼድኖ። ሳአይ ሃꬃፐነ ሃꬃን መቴዳ።ዶመꬃ 1:6-9 6 ቃይ ሄዋ ጋሱዋን፥ ሄ ዎደ ደእያ ሳአይ ሄ ሃꬃን ምተት ꬋዬዳ።ዶመꬃ 7:11 7 ሽን ሀእ ደእያ ሳሉነ ሳአይ፥ ጾሳዉ ጎይነና አሳቱ ፕርደትያ ጋላሳይነ ꬋይያ ጋላሳይ ጋካናዉ ታኪደ፥ ሄ ቃላን ታማ ናጊኖ።

8 ሽን ታ ሲቃቶ፥ ሀ እት የዋቶ ዶጎፕተ፤ ጎዳ ማታን፥ እት ጋላሳይ ሻአ ላይꬃ ማላ ግድያዋነ፥ ቃይ ሻአ ላይꬃይ እት ጋላሳ ማላ ግድያዋ ዶጎፕተ። ማዝ. 90:4 9 እቱ እቱ ቆፕያዋዳን፥ ጎዳይ ባረ ኦꬃና ጌዳዋ ኦꬃናዉ ታከና፤ ሽን ኦንነ ባረ ናጋራፐ ስማናዳን ኮዬፐ አትን፥ ኦንነ ꬋያና ማላ ኮየና ድራዉ፥ ህንተዉ ጊደ ዳንዳያን ጋምኤ።

10 ሽን ጎዳ ጋላሳይ ካይሱዋዳን ያና። ሄ ጋላስ ሳሎቱ ዎልቃማ ጉንꬃን ꬋያና፤ ሳሉዋ መታቱ ዎልቃማ ሴላን ሲላና፤ ሳአይነ አ ቦላን ደእያ ኡባባይ ꬋያና። 11 ኡባባይካ ሄዋዳን ꬋይያዋ ግዶፐ፥ ህንተ አይ ማላ አሳ ግዳናዉ በሲ? ህንተ ደኡ ጌሻነ ጾሳ ማላትያዋ ግዳናዉ ኮሼ። 12 ህንተ ጾሳ ጋላሳ ናግሽና፥ ሄ ጋላሳይ ኤለካ ጋካናዳን፥ ህንተንቶ ዳንዳየትያዋ ኦꬅተ፤ ሄ ጋላስ ሳሎቱ ጉደቲደ ꬋያናነ ሳሉዋ መታቱካ ዎልቃማ ሴላን ሲላና። 13 ሽን ኑን ጾሳይ እማና ጌዳ ኦራꬃ ሳሉዋነ ኦራꬃ ሳኣ ጽሉ ደአናሳ ናጌቶ። ኢሳ. 65:17፤ 66:22፤ ሳፃ 21:1

14 ሄዋ ድራዉ፥ ታ ሲቃቶ፥ ሄ ጋላሳ ናጊደ፥ ፖኩነ ዬላይያባይ ባይናዋንታ ግዲደ፥ አናና ሳሮተꬃን ደአና ማላ ሎኦባ ኡባ ኦꬅተ። 15 ጎዳ ዳንዳያይ አቶተꬃ ግድያዋ ህንተ ዎዛናን ቆፕተ፤ ሄዋዳን ቃይ ኑ ሲቆ እሻይ ጳዉሎስ፥ ጾሳይ ባረዉ እሜዳ አꬌዳ ኤራተꬃን ህንተንቶ ጻፌዳ። 16 ባረ ጻፍያ ዳብዳቢያን፥ ሄ የዉዋባ ጻፍያ ዎደ፥ ታማርቤና አሳቱነ ምንቤና አሳቱ ሀራ ጾሳ ማጻፋቱዋ ጌላይያዋዳንካ፥ ሄ ዳብዳቢያ ግዶን ደእያ አኬካናዉ ዋይስያ የዉዋ ጌላዪኖ። ኡንቱንቱ ሄዋ ኦꬅያዋን ባረንቱ ቦላ ባሻ አሂኖ።

17 ሄዋ ድራዉ፥ ታ ሲቃቶ፥ ህንተ ሄዋ ኤርያ ድራዉ፥ ማካላንቻቱዋ ባላን ጭመቲደ፥ ዎራ ቤና ማላነ፥ ቃይ ምኒደ ደእያ ሳኣፐ ኩንደና ማላ ናገትተ። 18 ሽን ህንተ ኑ ጎዳ፥ ኑና አሽያ የሱስ ክርስቶሳ አꬎ ኬካተꬃንነ ኤራተꬃን ድጭተ። አዉ ሀእነ መꬍና ጋላሳይ ጋካናዉ ጋላታይ ጋኮ። አመንእ።