1 ኤፍሬማ ገዝያን፥ ራማ ጌተትያ ካታማን ደእያ፥ ኤፍሬማ ዛረነ ጹፋ ያራ ግዴዳ፥ ኤልቃና ጌተትያ እት ብታኒ ደኤ፤ እ ይሮሃማ ናኣ፤ ይሮሃም ኤልሁ ናኣ፤ ኤልሁ ቶሁ ናኣ፤ ቶሁ ጹፋ ናኣ። 2 ኤልቃናዉ ላኡ ማቻቱ ደኢኖ፤ እትን ሱንꬃይ ሃኖ፤ የንኮር ሱንꬃይ ፕኒኖ። ፕኒናዉ ናናይ ደኢኖ፤ ሽን ሃንዉ እት ናእካ ባዋ።

3 ኡባፐ ዎልቃማ መꬍና ጎዳዉ ጎይናናዉነ ያርሻናዉ ኤልቃን ላይꬃን ላይꬃን ባረ ካታማፐ ሴሎ ቤ። ኤልያ ናናይ ላኡ፥ ሆፍኒንነ ፒንሃስ ያን መꬍና ጎዳ ቄሳቱ ዋ። 4 ኤልቃን ያርሹዋ ያርሽያ ዎደ አዉደነ አሹዋፐ እት ኩሽያ ባረ ማቻት ፕኒንዉ፥ ቃይ እት እት ኩሽያ እ አቱማ ናናዉነ ማጫ ናናቶ ሁጲያን ሁጲያን እሜ። 5 መꬍና ጎዳይ ሃኖ የሉዋ ድግንቶካ፥ ኤልቃን እዞ ዶስያ ድራዉ፥ እዝዉ ላኡ ኩሽያ እሜ። 6 መꬍና ጎዳይ ሃንዉ ኡባና የሉዋ ድጌዳ ድራዉ፥ እዝ ላጋታ እዞ ሀንቀꬃዉነ ይሎያዉ። 7 ሀዌ ላይꬃፐ ላይꬃን ሀንያዋ፤ ሃና መꬍና ጎዳ ጎለ ቤዳ ዎደ አዉደነ እዝ ላጋታ እዞ ዬካና ጋካናዉ ቁማ ሙሳ እጻና ጋካናዉ ይሎያዉ። 8 እዝ አስናይ ኤልቃን እዞ፥ “ሃኔ፥ ኔን አያዉ ዬካይ? አያዉ ቁማ ሚኪ? ነ ዎዛናይ አያዉ ካዮቲ? ታን ነዉ ታሙ ናናቱዋፐ አꬍክታየ?” ያጌ።

9 እት ጋላስ ኡንቱንቱ ሴሎን ሜዳዋፐነ ኡሼዳዋፐ ጉይያን፥ ሃና ደንዳ ኤቃዱ። ኤቂያ ዎደ፥ መꬍና ጎዳ ጎልያ ፐንግያ ማታን ደእያ ኦይድያን ቄስያ ኤል ኡቴዳ። 10 ሃና ሎይꬃ ሴለታደ፥ ጫሞ ዬኩዋ ዬካደ መꬍና ጎዳ ዎሳዱ። 11 እዛ ሀዋዳን ያጋደ ቃንገꬃ ቃንገታዱ፤ “ኡባፐ ዎልቃማ መꬍና ጎዳዉ፥ ታና ነ ቆማቶ ጼላ! ታ ምሹዋ በኣደ፥ ታና ሀሳያ፤ ታና ነ ቆማቶ ዶጎፓ። ኔን ታዉ ነ ቆማትዉ አቱማ ናኣ እሞፐ፥ አ ደኡዋ ላይꬃ ኡባን ታን አ ነዉ እማና፤ አ ሁጲ ኡባካ ሜደተና” ያጋዱ። ፓይ. 6:5

12 ሃና መꬍና ጎዳ ዎሳ አዱሴዳ ዎደ፥ ኤል እ ዶና ጼሌ። 13 ሃና ባረ ዎዛና ግዶን ጾሳ ዎስያ ዎደ፥ እ መተርሻይ ቃጽያዋፐ አትና፥ እዝ ቃላይ ስሰተና፤ ሄዋ ድራዉ፥ ኤል እዞ ማꬆቴዳዋዳን ቆፔዳ። 14 ሄዋፐ እዞ፥ “ኔን አዉደ ጋካናዉ ማꬆታይ? ዎይንያ ኤሳ ነ ዶናፐ ድጋ” ያጌዳ።

15 ሄዋፐ ጉየ ሃና ሀዋዳን ያጋደ አዉ ዛራዱ፤ “ቱይት፥ ታ ጎዳዉ፥ ታን ሎይꬅ መቶታንቻ ማጫ አሳ፤ ታን ታ ሸምፑዋፐ መꬍና ጎዳ ዎሳይፐ አትና፥ ዎይንያ ኤሳ ዎይ ማꬆይያ ኡሻ ኡሻበይከ። 16 ታን ታ ቱጋነ ታ ምሹዋ ዳሩዋ ሀዋን ሃሳዬዳ ድራዉ፥ ታና ነ ቆማቶ ‘ፓና ማጫ አሳ’ ጋደ ቆፖፓ” ያጋዱ።

17 ሄዋፐ ጉየ ኤል እዝዉ ዛሪደ፥ “ሳሮተꬃን ባ፤ ኔን አ ዎሴዳዋ እስራኤልያ ጾሳይ ነዉ እሞ” ያጌዳ።

18 ሄዋፐ ጉየ ሃና፥ “ነ ቆማታ ነ ስንꬃን ናሹዋ ደሙ” ያጋዱ። ሄዋፐ ጉይያን፥ አ ባረ ኦግያ ባደ፥ ቁማ ማዱ፤ ሄዋፐ ስምና ሙለካ ካዮታበይኩ።

19 ዎንተꬃ ጋላስ ጉራና ደንዲደ፥ ኤልቃንነ አ ሶ አሳይ መꬍና ጎዳዉ ጎይኔዳዋፐ ጉይያን፥ ባረንቱ ሶ፥ ራማ ካታማ ስሜድኖ። ኤልቃን ባረ ማቻት ሃንና አቄዳ፤ መꬍና ጎዳይ እዞ ቆፔዳ፤ 20 አ ሻሃሮ ዎደ ዎዲ ዉርና አቱማ ናኣ የላዱ። ሃና፥ “ታን መꬍና ጎዳ ዎስና ስሴዳ” ጋደ አ ሱንꬃ ሳሙኤኤላ ሱንꬃዱ።*ሳሙኤኤላ፦ ሀ ሱንꬃ ብለꬃይ “ጾሳይ ስሴዳ” ግያዋ።

21 ኤልቃን ባረ ሶ አሳ ኡባና ላይꬃ ያርሹዋ መꬍና ጎዳዉ ያርሻናዉነ ቃንጌዳዋ ጋꬃናዉ ሴሎ ቤዳ፤ 22 ሽን ሃና ባበይኩ። አ ባረ አስና፥ “ታ ናአይ ꬋንꬃ ዱꬄዳዋፐ ጉይያን፥ ታን አ አፋደ፥ መꬍና ጎዳዉ እማና፤ መꬍናዉ እ ያን ደአናዋ” ያጋዱ።

23 እ አስናይ ኤልቃን፥ “ኔና ሎኦዋ ኦꬃ፤ አ ኔን ꬋንꬃ ዱꬃና ጋካናዉ ሶን ጋምአሻ፤ ያንናካ መꬍና ጎዳይ ባረ ቃላ ፖሎ” ያጌዳ። ሄዋፐ ጉየ ሃና ꬋንꬃ ዱꬃና ጋካናዉ ባረ ናኣ ꬋንꬃደ ሶን ጋምኣዱ።

24 ሃና እዝ ናአይ ꬋንꬃ ዱꬄዳዋፐ ጉይያን፥ ሳመላነ ሄዙ ላይꬃ ኮሩማ፥ ታሙ ኪሎ ግራመ ꬊልያነ ኦጎሩዋ ኩመንꬃ ዎይንያ ኤሳ አካደ መꬍና ጎዳ ጎልያ ሴሎ ባዱ፤ ናአይ ሄ ዎደ ጉꬃ። 25 ኡንቱንቱ ኮሩማ ሹኬዳዋፐ ጉይያን፥ ናኣ ኤልያኮ አፌድኖ። 26 ሃና ኤልያ፥ “ታ ጎዳዉ፥ ነ ደኡ ኤሮ! ነ ስንꬃን ኤቃደ መꬍና ጎዳ ዎሴዳ ምሽራታ ቱሙ ታናቴ። 27 ታን ሀ ናኣ የላናዉ ዎስና፥ መꬍና ጎዳይ ታን አ ዎሴዳዋ እሜዳ። 28 ሄዋ ድራዉ፥ ታን መꬍና ጎዳዉ አ እማድ፤ እ ባረ ደኦ ላይꬃ ኡባን መꬍና ጎዳዉ እመቴዳ” ያጋዱ። ሄዋፐ ጉይያን፥ ኡንቱንቱ መꬍና ጎዳዉ ያት ጎይኔድኖ።