1 ቦኤዝ ካታማ ፐንግያ ማታን ደእያ ጉታራ ፑደ ከሲደ፥ ያን ኡቴዳ። እ ኦዴዳ ማታ ዳቡ ያና አꬌ። ቦኤዝ “ታ እሻዉ፥ ሃ ስማደ ሀዋን ኡታ” ያጌዳ። እ ስሚደ ኡቴዳ። 2 ቦኤዝ ሄ ካታማ ጭማቱዋፐ ታሙ አሳ ዶሪደ፥ “ሀዋን ኡትተ” ያጌዳ፤ ኡንቱንቱ ኡቴድኖ። 3 ቦኤዝ ባረ ማታ ዳቡዋ ሀዋዳን ያጌዳ፤ “ሞኣበ ጋድያፐ ስማደ ዬዳ ኑሃማ፥ ኑ እሻ ኤልመሌካ ጋድያ ባይዛዉ። 4 ሄዋ ድራዉ፥ ታን ነዉ፥ ሀዋን ኡቴዳ አሳ ስንꬃንነ ታ ካታማ ጭማቱዋ ስንꬃን፥ ‘ሻማ’ ጋደ ኦዳናዉ ቆፓድ። ኔን ዎዛናዉ ኮዮፐ ዎዛ፤ ኮያና ꬋዮፐ፥ ታን ኤራናዉ ታዉ ኦዳ። አያዉ ጎፐ፥ ዎዛናዉ ማታይ ደእያዌ ኔፐ ሀራ አሳይ ባዋ፤ ኔፐ ካላደ ታን ደአይ” ያጌዳ።

እ፥ “ታን ዎዛና” ያጌዳ።

5 ቦኤዝ፥ “ጋድያ ናኦምፐ ሻምያ ጋላስ፥ አምአቶ ኡሩቶ አካሳ፤ ያቶፐ፥ ሀይቄዳዋ ሱንꬃይ አ ላታ ጋድያን ጼሰታናዋ” ያጌዳ።

6 ሀ ማታ ዳቡ፥ “ሄዋ ግዶፐ፥ ታን ዎዛናዉ ዳንዳይከ፤ አያዉ ጎፐ፥ ሄዌ ታና ታ ቡዞ ላታ ጋድያ ባይዝሳና። ሄዋ ኔን ነዉ ዎዛ፤ ታን ዳንዳይከ” ያጌዳ።

7 በን ዎደ እስራኤልያ ጋድያን ኦንነ አቁዋ ዎዞፐ ዎይ ላሞፐ፥ ዛልእያ ዱꬃናዉ እት ባጋይ ባረ ጫማ ገድያፐ ሾዲደ፥ ህንኮ ባጋዋ እሜዳ። እስራኤልያ ጋድያን እትባ እቱዋፐ እቶ ሼꬍያ ማራይ ሄዋ። ዛረ. 25:9 8 ሄዋ ድራዉ፥ ሄ ማታ ዳቡ ቦኤዛ፥ “ኔን ሻማ” ያጊደ፥ ባረ ጫማ ገድያፐ ሾዴዳ።

9 ያትና፥ ቦኤዝ ጭማቱዋነ አሳ ኡባ፥ “ታን ኤልመሌካዉነ ከልዎናዉነ ማእሎናዉ ደእያዋ ኡባ ናኦምፐ ሻሜዳዎ ሀቼ ህንተንቱ ማርካ። 10 ቃይ ሀይቄዳዋ ሱንꬃይ ኡንቱንቱ ሶ አሳ ሱንꬃ ግዶፐ ዎይ ካታማ አሳ ማዝጎባፐ ꬋየናዳን፥ አ ሱንꬃ አ ላታ ጋድያን ጼስሳናዉ ማእሎና አምአቶ ኡሩቶካ ታን አክያዎ ሀቼ ህንተንቱ ማርካ” ያጌዳ። ዛረ. 25:5-6

11 ፐንገ ጉታራን ደእያ ጭማቱነ አሳይ ኡባይ፥ “ኤ፥ ሀዎ ኑን ማርካ! መꬍና ጎዳይ ሀኖ ነ ሶ ይያ ማቻቶ፥ እስራኤልያ አሳዉ ማይዛ አቶ ግዴዳ ራሄልዳንነ ልያዳን ኦꬆ። ኔንካ ኤፍራታን ዱረ ግዴዳ ነ ሱንꬃይ ቤተሌመን ኤረቶ። ዶመꬃ 29:31 12 መꬍና ጎዳይ ሀ ሎአ ያላጋ ማቻትፐ ነዉ እምያ ዛርያን፥ ትእማራ ይሁዳዉ የሌዳ ፓሬሳ ጎለን ሀኖ” ያጌዳ። ዶመꬃ 38:27-30

13 ሄዋዳን ኦꬂደ፥ ቦኤዝ ኡሩቶ አኬዳ፤ አዉ ማቻቶ ግዳዱ። መꬍና ጎዳይ እዝዉ ኡሉዋን የሉዋ እምና፥ አቱማ ናኣ የላዱ። 14 ማጫ አሳቱ ኑሃሞ፥ “ሀቼ ኔና ሄማናዉ ነዉ ናኣ ናኣ ꬋይስቤና መꬍና ጎዳይ ጋላተቶ! አ ሱንꬃይ እስራኤልያን ኤረቶ! 15 እ ነዉ ሳኣ ኬክሳና፤ ኔን ኤጭያ ዎድያን ኔና እ ሄማና። አያዉ ጎፐ፥ ኔና ዶስያና፥ ላፑን አቱማ ናናፐካ አꬋ ነዉ ኬክያኖ፥ ነ ናኣ ማቻታ አ የላዱ” ያጌድኖ።

16 ኑሃማ ዬራ አካደ እድማዱ፤ ያታደ አ ድቻዱ። 17 እ ሾሩዋን ደእያ ማጫ አሳቱ፥ “ኑሃሚው አቱማ ናአይ የለቴዳ” ያጊደ አ ዮቤዳ ሱንꬄድኖ። ዮቤድ ዳዊተ አዉዋ እሰያ የሌዳዋ።

18 ፓሬሳ የለታይ ሀዋፐ ካሊደ ጻፈቴዳዋዳን: ፓሬስ ሄጽሮና የሌዳ፤ 19 ሄጽሮን ራማ የሌዳ፤ ራም አምናዳባ የሌዳ፤ 20 አምናዳበ ናአሶና የሌዳ፤ ናአሶነ ሳልሞና የሌዳ፤ 21 ሳልሞነ ቦኤዛ የሌዳ፤ ቦኤዝ ዮቤዳ የሌዳ፤ 22 ዮቤድ እሰያ የሌዳ፤ እሰይ ዳዊታ የሌዳ።