1 እት ጋላስ ኑሃማ ባረ ናኣ ማቻቶ፥ “ታ ናተ፥ ኔን ጊግና ደአናዉ፥ ታን ነዉ አስና ኮይንቶ ኢታኔ? 2 ኔን ኡንቱንቱና ጋምኤዳ ማጫ ቆማቱ አዉ ኪተትያ ቦኤዝ ኑዉ ማታ ዳቦ ግደኔ? ስሳ፥ እ ሀቼ ቃማ ኡዱማን ባንጋ ቡካናዋ። 3 ኔን ሜጨታ፤ ሽቱዋ ኦከታ። ያታደ ነ ሎኦ ማዩዋ ማያደ፥ ዱገ ኡዱማ ባ፤ ሽን ባደ ቦኤዝ ሚድነ ኡሽደ ስማና ጋካናዉ፥ አ አይፍያን ቤቶፓ። 4 እ ግስያ ዎደ፥ ሀቃን እ ግስንቶነ በኣደ፥ እ ገምእሾንን አ አፍላ ቃራደ፥ አ ገድሳና ግሳ ባሻ። ኔን ሀናናባ እ ነዉ ኦዳናዋ” ያጋዱ።

5 ኡሩታ፥ “ኔን ጌዳዋ ኡባ ታ ሀናና” ያጋዱ። 6 ሄዎ ኡሩታ ዱገ ኡዱማ ባደ፥ እዝ ቦሎታታ እዝዉ ኦዴዳባ ኡባ ሀናዱ።

7 ቦኤዝ ሚደ ኡሽደ ባረ ቦላ ፓሽክሴዳዋፐ ጉየ፥ ካꬃ ኡልያ ማታን አꬊደ ግሴዳ። ኡሩታ ሎዳን ሺቃደ፥ አ ገድያ ቃራደ፥ ገድሳና ግሳ አጋዱ። 8 ሄካ ብላሄ ግድያ ዎደ፥ ብታንያ እትባይ ዳጋንꬅና ቤጎቲደ፥ አꬍ ዎꬊደ፥ እት ማጫውና አ ገድሳና ግሴዳኖ ደሜዳ።

9 “ሀኔ፥ ኔን ኦኔ?” ያጊደ ኦቼዳ።

እዛ፥ “ታን ነ ቆማቶ ኡሩቶ፤ ኔን ታ አስናዉ ማታ ዳቦ ግድያ ድራዉ፥ ታና አካ” ያጋዱ።

10 ቦኤዝ ዛሪደ፥ “ታ ናተ፥ መꬍና ጎዳይ ኔና አንጆ! ሀዌ ነ ኦሻይ ኔን ካሰ ነ ቦሎታትዉ ኦꬄዳ ኬካተꬃፐካ አꬌ፤ ኔን ማንቆ ዎይ ዱረ ግዴዳ ያላጋ አቱማ አሳ ኮያባካ። 11 ሀእ ስም ታ ናተ፥ ያዮፓ። ኔን ኦቼዳ ኡባ ነዉ ታን ኦꬃና። አያዉ ጎፐ፥ ታ ካታማን ደእያ አሳይ ኡባይ ኔን ሎኦባ ሀንያ ማጫ አሳ ግድያዋ ኤሬዳ። 12 ታን ማታ ዳቦ ግድያዌ ቱማ፤ ሽን ታፐ ማታ ዳርያዌ ደኤ። ኡሩቶ 2:20 13 ሀቼ ቃማ ሀዋን አቃ። ዎንትና እ ኔና አይሳናዉ ኮዮፐ፥ ሎአ፤ አኮ። ሽን እ አይሳናዉ ኮየናን እጾፐ፥ መꬍና ጎዳይ ኤሮ፥ ታን ኔና አካና። ሳአይ ዎንታናዉ ሀዋን ግሳሻ” ያጌዳ።

14 እዛ ቦኤዛ ገድሳና ሳአይ ዎንታናዉ ግሳዱ፤ ቦኤዝ፥ “ማጫውና ካꬃ ኡዱማ ዬዳዋ ኦንነ ኤሮፖ” ጌዳ ድራዉ፥ ኡሩታ አሳይ አሳ በኤና ዎድያን ደንዳዱ። 15 ቦኤዝ ኦ፥ “ነ ማዬዳ ቃምሽያ ሃ አሀዴ፥ ፕድ ኦꬃ ኦይቃ” ያጌዳ። አ ኦይቂና ላታሙ ኪሎ ግራመ ባንጋ ማክ ቆሊደ፥ ኦ ባእሴዳ። አ ባአደ ጉየ ካታማ ባዱ።

16 ኡሩታ ባረ ቦሎታትኮ ዪና፥ ኑሃማ ኦ፥ “ታ ናተ፥ ነባይ ዋኔዴ?” ያጋደ ኦቻዱ። ብታኒ እዚው ኦꬄዳባ ኡባ ኦዳዱ፤ 17 “ ‘ነ ቦሎታትኮ መላ ኩሸ ቦፓ’ ጊደ ሀዋ ላታሙ ኪሎ ግራመ ባንጋ እሜዳ” ያጋዱ።

18 ያትና፥ ኑሃማ፥ “ታ ናተ፥ አይዴ ሀናናዌንቶ በአና ጋካናዉ ናጋ። ብታኒ ሀቼ ሀ የዉዋ ዉርሰናን ሸምፐና” ያጋዱ።