1 ቂርያት-ይኣሪማ አሳቱ ዪደ፥ መꬍና ጎዳ ታቦታ አፊደ ደርያ ሁጲያን ደእያ አብናዳባ ሶይ አሄድኖ። መꬍና ጎዳ ታቦታ ናጋናዳን፥ አብናዳባ ናኣ ኤልኣዛራ ዱማዪደ ሱንꬄድኖ።2 ሳሜላ 6:2-4፤ 1 ኦዱዋ 13:5-7

2 ታቦታይ ቂርያት-ይኣሪማን ዳሮ ዎድያ ጋምኤዳ፤ ሄዌነ፥ ላታሙ ላይꬃ ኬሻ ግድያዋ። እስራኤልያ አሳይ ኡባይ ካዮቲደ፥ መꬍና ጎዳኮ ዋሴድኖ።

3 ሳመል እስራኤልያ አሳዉ ኡባዉ፥ “ኩመንꬃ ዎዛናፐ ህንተንቱ መꬍና ጎዳኮ ስሞፐ፥ አላጋ ጾሳቱዋነ አስታሮታ ግያ ጾሳ ህንተንቱ ግዶፐ ድግተ፤ ህንተንቱ ሁጲያ መꬍና ጎዳዉ ሼꬍተ፤ አ ጻላላዉ ኪተትተ፤ ያቶፐ፥ እ ህንተንታ ፕልስጼማቱዋ ኩሽያፐ አሻናዋ” ያጊደ ሃሳዬዳ። 4 ሄዋ ድራዉ፥ እስራኤልያ አሳቱ ባኣላነ አስታሮታ ባረንቱ ግዶፐ ድጊደ፥ መꬍና ጎዳ ጻላላዉ ጎይኔድኖ።

5 ሄዋፐ ጉይያን፥ ሳመል እስራኤላቱዋ፥ “ኡባይካ ምጽጳ ሺቅተ፤ ታን ህንተንቶ ያን መꬍና ጎዳ ጋናታና” ያጌዳ። 6 ኡንቱንቱ ምጽጳ ሺቂደ ሃꬃ ዱቂደ፥ መꬍና ጎዳ ስንꬃን ትጌድኖ፤ ሄ ጋላስ ኡንቱንቱ ጾሚደ ሄ ሳኣን፥ “ኑን መꬍና ጎዳ ቦላ ናጋራ ኦꬄዶ” ያጊደ ፓጼድኖ። ምጽጳን ሳመል እስራኤልያ አሳ ቦላ ዳናቴዳ።

7 እስራኤላቱ ምጽጳን ሺቄዳዋ ፕልስጼማ አሳቱ ስሴዳ ዎደ፥ ኡንቱንቱ ካፓቱ እስራኤላቱዋ ኦላናዉ ፑደ ከሴድኖ። እስራኤላቱ ሄዋ ስሲደ፥ ፕልስጼማቶ ያዬድኖ። 8 እስራኤላቱ ሳመላ፥ “እ ፕልስጼማ አሳ ኩሽያፐ ኑና አሻና ማላ፥ ኔን ኑዉ መꬍና ጎዳኮ፥ ኑ ጾሳኮ፥ ዎስያዋ አጎፓ” ያጌድኖ። 9 ሳመል እት ꬋምያ ዶርሳ ማራ አኪደ፥ አሹዋ ዉርስ ጹግያ ያርሹዋዳን መꬍና ጎዳዉ ያርሺደ እስራኤላቱ ድራዉ መꬍና ጎዳዉ ዎስና መꬍና ጎዳይ አዉ ስሴዳ።

10 ሳመል ጹግያ ያርሹዋ ያርሽያ ዎደ፥ ፕልስጼማቱ እስራኤላቱዋና ኦለታናዉ ሺቄድኖ። ሽን ሄ ጋላስ ፕልስጼማቱዋ ቦላ መꬍና ጎዳይ ዎልቃማ ጉጉንꬃ ጉንꬂደ ዳጋንꬅና፥ ኡንቱንቱ እስራኤላቱ ስንꬃፐ ባቃቴድኖ። 11 እስራኤላቱ ምጽጳፐ ዎጽ ከሲደ፥ ፕልስጼማቱዋ የደርሲደ፥ ቤትካራፐ ጋርሳ ጋካናዉ ኦግያን ዎꬌድኖ።

12 ሄዋፐ ጉይያን፥ ሳመል እት ሹቻ አኪደ፥ ምጽጳፐነ ሼናፐ ግዱዋን ኤሲደ፥ “መꬍና ጎዳይ ሀእ ጋካናዉ ኑና ማዴዳ” ያጊደ ሄ ሳኣ ኤበንኤዜራ ሱንꬄዳ።*ኤበንኤዜራ፦ ሀ ሱንꬃ ብለꬃይ “ማድያ ሹቻ” ግያዋ። 13 ፕልስጼማ አሳቱካ ጾነቴድኖ፤ ኡንቱንቱ እስራኤልያ ጋድያ ቦላ ላኤንꬁዋ ዎራጅበይክኖ። ሳመል ደኤዳ ላይꬃ ኡባን መꬍና ጎዳ ኩሺ ፕልስጼማ አሳ ቦላ ዎልቃሜዳ። 14 ፕልስጼማ አሳቱ ኤቅሮናፐ ጋተ ጋካናዉ እስራኤላቱዋፐ ኦሞዴዳ ካታማቱ እስራኤላቶ ስሜድኖ፤ እስራኤላቱካ ባረንቱ ካሰ ዛዋ ፕልስጼማ አሳቱዋ ኩሽያፐ ዎꬅ አኬድኖ። ቃይ እስራኤልያ አሳይነ አሞረ አሳይ ሳሮ ደኤዳ።

15 ሳመል ባረ ደኡዋ ላይꬃ ኡባን እስራኤልያ ቦላን ዳናቴዳ። 16 ሳመል ላይꬃን ላይꬃን ቤቴለ፥ ገልገላነ ምጽጳ እ ዩይያ ሳአቱዋ ኡባን እስራኤልያ ቦላን ዳናቴ። 17 አ ጎሊ ራማን ደእያ ድራዉ፥ ያ ስሚደ ሄ ሳኣን እስራኤልያ ቦላን ዳናቴ። እ ሄ ሳኣን መꬍና ጎዳዉ ያርሽያ ሳኣ ኪተቴዳ።