1 ሳመል ጭሜዳ ዎደ፥ ባረ ናና እስራኤልያ ቦላ ዳና ኦꬂደ ሱንꬄዳ። 2 አ ባይራ ናኣ ሱንꬃይ ዩኤላ፤ ቴፋ ናኣ ሱንꬃይ አቢያ፤ ሄ ናናይ በርሳቤሀን ዳናቲኖ። 3 አ ናናይ አ ኦግያን ሀመትበይክኖ። ኡንቱንቱ በሰና ጎኣ ደማናዉ ዎራ ስሜድኖ፤ ማታይያ አኪደ፥ ጽሎ ፕርዳ ምርቄድኖ።

4 ሄዋ ድራዉ፥ እስራኤልያ ጭማቱ ኡባይ እትፐ ሺቂደ፥ ሳመላኮ ራማ ካታማ ዪደ፥ 5 “ሄኮ ኔን ጭማዳ፤ ነ ናናይ ነ ኦግያ ሀመትክኖ፤ ሀራ ካዉተꬃ ኡባዳን ኑና አይሳናዉ ካትያ ሀእ ኑዉ ሱንꬃ” ያጌድኖ። ዛረ. 17:14

6 ኡንቱንቱ፥ “ኑና አይሳናዉ ካትያ ኑዉ እማ” ጌዳ የዉ ሳመላ ናሸችቤና። ሄዋ ድራዉ፥ ሳመል መꬍና ጎዳ ዎሴዳ። 7 መꬍና ጎዳይ ሳመላ፥ “አሳይ ኔና ግያ ቃላ ኡባ ስሳ፤ አያዉ ጎፐ፥ ታን ኡንቱንቱ ቦላ ካተተናዳን፥ ኡንቱንቱ ታና እጼድኖፐ አትና፥ ኔና እጽበይክኖ። 8 ኡንቱንቱ ታን ግብጼፐ ከሴዳ ጋላሳፐ ዶሚደ፥ ሀቼ ጋካናዉ ታና አጊደ፥ ሀራ ጾሳቶ ጎይኒደ ደኤድኖ፤ ስም ሀእ ኡንቱንቱ ታ ቦላ ኦꬄዳዋ ኡባ ነ ቦላካ ኦꬅኖ። 9 ሀእካ ኡንቱንቱ ቃላ ስሳ፤ ሽን ኡንቱንታ ምንሳደ ሴራ፤ ኡንቱንቱ ቦላን ካተታና ካትያ ዎጋ ኡንቱንታ ኤርሳ” ያጌዳ።

10 ካትያ ኦቼዳ አሳዉ መꬍና ጎዳይ ኦዴዳ ቃላ ኡባ ሳመል ኦዴዳ። 11 እ ኡንቱንቶ ሀዋዳን ያጌዳ፤ “ህንተንቱ ቦላ ካተታና ካቲ ህንተንታ ኦꬃናባይ ሀዋ: ህንተንቱ አቱማ ናና አኪደ፥ ጋርያ አሳቱዋነ ፓራ አሳቱዋ ከሳና፤ ኡንቱንቱ አ ጋርያ ስንꬃን ዎጻና። 12 ኡንቱንቱፐ ሄዋ ሻላቃቱዋነ እሻታሙዋ ካፓቱዋ፥ ሀራቱዋ አ ጋድያ ጎሽያዋንታነ አ ካꬃ ጫክያዋንታ፥ ቃይ ሀራቱዋ አ ኦላ ሚሻነ አ ፓራ ጋረቱዋ ሚሻ ኦꬅያዋንታ ከሳና። 13 ህንተንቱ ማጫ ናናካ አፊደ፥ ባረዉ ሽቱዋ ጊግስያዋንታ፥ ካꬅያዋንታነ ኡክያዋንታ ከሳና። 14 ህንተንቱ ጎሻፐ፥ ዎይንያ ቱራ ሳፐነ ዎጋራ ሳፐ ኡባፐ ሎእያዋ አኪደ፥ ባረ ኦሳንቻቶ እማና። 15 ካꬃፐነ ዎይንያፐ ታሙዋፐ እት ኩሽያ እ አኪደ፥ ባረ ሱንꬃቶነ ባረ ኦሳንቻቶ እማና። 16 ህንተንቱ አቱማ ቆማቱዋፐነ ማጫ ቆማቱዋፐ፥ ቃይ ህንተንቱ ሚዛፐነ ሀርያፐ ሎእያዋንታ አኪደ፥ ባረ ኦሱዋ ኦስሳናዋንታ። 17 ህንተንቱ ዶርሳፐነ ዴሻፐ ታሙዋፐ እት ኩሽያ እ አካና፤ ህንተንቱካ አ ቆማቱዋ ግዳና። 18 ሄ ጋላስ ህንተንቱ ህንተንቶ ዶሬዳ ካትያፐ ዋሳና፤ ሽን ሄ ጋላስ መꬍና ጎዳይ ህንተንቱ ዋሱዋ ስሰና” ያጌዳ።

19 አሳይ ሳሜላ ቃላ ስሰናን እጺደ፥ “ቱይት! ቱይት! ኑዉ ካቲ ደኦ። 20 ያቶፐ፥ ኑንካ ሀራ ካዉተꬃቱ ኡባ ማላ ግዳና። ኑ ካቲ ኑና አይሳና፤ ኑ ስንꬃ አꬊደ፥ እ ኑ ድራዉ ኦለታናዋ” ያጌድኖ።

21 ሳመል አሳ ቃላ ኡባ ስሲደ መꬍና ጎዳዉ ኦዴዳ። 22 መꬍና ጎዳይ ሳመላ፥ “ኡንቱንቱ ቃላ ስሳ፤ ኡንቱንቱ ቦላ ካትያ ካዉꬃ” ያጌዳ።

ሳመል እስራኤልያ አሳ፥ “አሳይ ኡባይ ባረ ካታማ ካታማ ስሞ” ያጌዳ።