1 ቢንያማ ዛርያፐ ቂሳ ግያ እት ብታኒ ደኤ፤ እ አቢኤላ ናኣ፤ አቢኤል ጻሮራ ናኣ፤ ጻሮር ባኮራታ ናኣ፤ ባኮራት ቢንያማ ዛርያ አፊሀ ናኣ፤ ሄ ብታኒ ዎልቃማ አሳ። 2 አዉ ሳኦላ ጌተትያ እት ዎዳላ ሎኦ ናአይ ደኤ፤ እስራኤላቱዋ ግዶን አፐ አꬍ ሎእያ አሳይ ባዋ፤ እ ሀሽያፐ ቆሞ ባጋን አሳ ኡባፐ አዱቄ።

3 እት ጋላስ ሳኦላ አዉዋ ቂሰ ሀረቱ ባይና ቂስ ባረ ናኣ ሳኦላ፥ “ቆማቱዋፐ እቱዋ አካደ፥ ሀረቱዋ ኮያናዉ ባ” ያጌዳ። 4 ኡንቱንቱ ኤፍሬማ ገዝያናነ ሻሊሻ ቢታና ኮዪደ አꬌድኖ፤ ሽን ሀረቱዋ ደምበይክኖ። ቃይ ሻእሊማ ቢታና አꬌድኖ፤ ሽን ሄዋንካ ሀረቱ ባዋ። ቢንያማ ቢታናካ አꬌድኖ፤ ሽን ያንካ ደምበይክኖ።

5 ኡንቱንቱ ጹፋ ቢታ ጋኬዳ ዎደ፥ ሳኦል ባረናና ደእያ ቆማ፥ “ሃያ፤ አነ ጉየ ስሞይተ፤ ሄዌ ꬋዮፐ፥ ታ አዉ ሀረቱዋባ ቆፕያዋ አጊደ፥ ኑዉ ህርጋናዋ” ያጌዳ።

6 ሽን ቆማይ፥ “በአ! ጾሳ አሳ እቱ ሀ ካታማን ደኤ። እ ቦንቼቴዳ አሳ፤ እ ኦድያ ኡባባይ ቱማቴ። አነ ሀእ ኑን ያ ቦይተ፤ ኦን ኤሪ ኑን ባና ኦግያ እ ኑዉ ኦዳነንቶነ” ያጌዳ።

7 ሳኦል ባረ ቆማ፥ “ኑን ብያዋ ግዶፐ፥ አዉ አይ እማኔ? ኮሮጁዋፐ ቁማይ ዉሬዳ፤ ኑን ጾሳ አሳዉ እምያባይ ባዋ። ኑዉ አያይ ደኢ?” ያጌዳ።

8 ሄዋፐ ጉየ ቆማይ ሳኦላዉ፥ “በአ፤ ታ ኩሽያን እት ጻጋራ ብራዉ ምሳይ ደኤ፤ ኑን ባና ኦግያ ጾሳ አሳይ ኑዉ ኦዳናዳን ሀ ብራ አዉ እማና” ያጊደ ዛሬዳ።

9 (በን ዎደ እስራኤልያ ቢታን እት አሳይ ጾሳ ኦቻናዉ ቢደ፥ “ሃይተ፤ አነ ጼልያዋኮ ቦይተ” ያጌ። አያዉ ጎፐ፥ ሀ ዎድያን ትምቢትያ ኦድያዌ በን ዎድያን ጼልያዋ ጌተቴ።) 10 ሳኦል ባረ ቆማ፥ “ሎአ፤ ደንዳ” ያግና፥ ጾሳ አሳይ ደእያ ካታማ ቤድኖ። 11 ካታማ ፑደꬃ ኡንቱንቱ ከስሽን፥ ሃꬃ ትካናዉ ይያ ዎዶራቱዋና ኦግያን ጋከቲደ ሄ ጌላዮቱዋ፥ “ጼልያዌ ሀዋን ደኢ?” ያጊደ ኦቼድኖ።

12 ኡንቱንቱ፥ “ኤ ደኤ፤ ሄዋ በእተ፤ እ ህንተፐ ስንꬃና ደኤ፤ ኤለካ አኮ ቢተ። አሳይ ሀቼ ጎይንያ ꬎቃ ሳኣን ያርሽያ ድራዉ፥ እ ኑ ካታማ ዬዳ። 13 ካታማ ኡንቱንቱ ገሌዳ ሳና፥ እ ማናዉ ጎይንያ ꬎቃ ሳኣ ከሰናን ደእሽን ደማና። እ ጋከናን ደእሽን፥ አሳይ ሙሳ ዶመና፤ አያዉ ጎፐ፥ ያርሹዋ እ አንጃናዉ ኮሼ። እ አንጄዳዋፐ ጉይያን፥ ሾበቴዳዋንቱ ማና። ፑደ ቢተ፤ ህንተንቱ አ ሀእ ደማና” ያጌድኖ። 14 ሄዋፐ ጉየ ኡንቱንቱ ካታማ ቤድኖ፤ ኡንቱንቱ ካታማ ገልያ ዎደ፥ ሳመል ጎይንያ ꬎቃ ሳኣ ፑደ ቢደ፥ ኡንቱንቱና ጋከታናዉ ይያዋ በኤድኖ።

15 ሳኦል ያናፐ ካሰ ጋላስ፥ ሳመላዉ መꬍና ጎዳይ ሀዋዳን ያጊደ ቆንጭስ ዎꬄዳ፤ 16 “ዎንታ ሀኖደ ቢንያማ ጋድያፐ እት ብታንያ ታን ኔኮ የዳና፤ እ ታ አሳ እስራኤልያ ካለꬃና ማላ አ ኦካ፤ ታ አሳ ፕልስጼማ አሳቱዋ ኩሽያፐ እ አሻናዋ፤ አያዉ ጎፐ፥ ታ አሳ ዋሱ ታኮ ጋክና፥ ታን ኡንቱንታ ጼላድ” ያጌዳ።

17 ሳመል ሳኦላ በኤዳ ዎደ፥ መꬍና ጎዳይ ሳመላ፥ “በአ! ታን ነዉ ኦዴዳ ብታኒ ሀዋ፤ እ ታ አሳ ሞዳናዋ” ያጌዳ።

18 ሳኦል ፐንግያ ማታን ደእያ ሳመላኮ ሺቂደ፥ “ጼልያዋ ጎሊ ሀቃነንቶ ሀይ ታዉ ኦዳርኪ?” ያጌዳ።

19 ሳመል ሳኦላዉ፥ “ጼልያዌ ታና። ሀቼ ህንተንቱ ታናና ምያ ድራዉ፥ ታፐ ስንꬃቲደ፥ ፑደ ጎይንያ ꬎቃ ሳኣ ቢተ። ታን ኔና ዎንት ጉራና የዳና፤ ነ ዎዛናን ደእያ ኡባባ ታን ኦዳና። 20 ሄዙ ጋላሳፐ ካሰ ባዬዳ ነ ሀረቱዋ ግዶፐ፥ ኡንቱንቱ ቤቴዳ ድራዉ፥ ህርጎፓ። እስራኤልያ አሳይ ኡባይ አሞትያዌ ኦኔ? ኔናነ ነ አዉዋ ሶይ አሳ ግደኔ?” ያጌዳ።

21 ሳኦል ዛሪደ፥ “ሽን ታን እስራኤልያ ዛርያ ኡባፐ ላፍያ ቢንያማ ዛርያ ግድክታ? ታ ሶይ አሳይካ ቢንያማ ዛርያ ግዶን ጉጽያዋ ግደኔ? ኔን አያዉ ታዉ ሀዋ ማላ ሃሳያይ?” ያጌዳ።

22 ሄዋፐ ጉይያን፥ ሳመል ሳኦላነ አ ቆማ አፊደ፥ አኮ ዉይግያ ገልሲደ ሄ ሳኣን ሾበቴዳ ሀታሙ ግድያ አሳፐ ቆሞ ባጋና አራታን ኡትሴዳ። 23 ሳመል ቁማ ካꬅያዋ፥ “ነ ማታን ዎꬃሻ ጋደ ታን ነዉ እሜዳ አሹዋ ሀማ” ያጌዳ።

24 ሄዋፐ ጉየ ካꬅያዌ ሎኡዋነ አ ቦላን ደእያዋ አክ አሂደ፥ ሳኦላ ስንꬃን ዎꬄዳ። ሳመል ሳኦላ፥ “ነዉ አሼዳዌ ሀዋ፤ አካደ ማ። አያዉ ጎፐ፥ ታን እማꬃቱዋ ሾቦደፐ ዶማደ፥ ሀዋ ነዉ አሻድ” ያጌዳ። ሄ ጋላስ ሳኦል ሳመላና ሜዳ። 25 ኡንቱንቱ ጎይንያ ꬎቃ ሳፐ ዱገ ካታማ ዎꬍና፥ ሳመል ሳኦላዉ ጎልያ ቦላን ደምባዪደ ኦꬄዳ ሳኣን ግሱዋ ሂጽና ግሴዳ።

26 ኡንቱንቱ ጉራና ደንዴድኖ፤ ሳአይ ዎንትና፥ ሳመል ሳኦላ ሄ ጎልያ ቦላፐ ጼሲደ፥ “ጊጋ፤ ታን ኔና ሞይዛና” ያጌዳ። ሳኦል ጊግና፥ እነ ሳመልነ ላኡ እትፐ ኦግያ ከሴድኖ። 27 ኡንቱንቱ ካታማ ጋጻ ዎꬍሽን፥ ሳመል ሳኦላ፥ “ቆማይ ኑፐ ስንꬃዉ አꬋና ማላ ኦዳ” ያጌዳ፤ ቆማይ ስንꬃዉ አꬌዳ። ሳመል ሳኦላ፥ “ታን ነዉ ጾሳይ ጌዳዋ ኦዳና ማላ፥ ሀዋን ላፋ ታካሻ” ያጌዳ።