1 እት አግናፐ ጉይያን፥ አሞና ጋድያ ካቲ ናኦስ ደንዲደ፥ ጋላኣደን ደእያ ያቤሻ ካታማ ዶዲደ ኡቴዳ። ያቤሻ አሳይ ኡባይ አ፥ “ኔን ኑናና ቃላ ጫቁዋ ዎꬃ፤ ኑን ነዉ ሞደታና” ያጌዳ።

2 ናኦስ፥ “ታን እትባ ኦꬃናዉ ህንተንቱ ኤኖ ጎፐ፥ ህንተናና ቃላ ጫቁዋ ዎꬃና፤ ሄዌነ፥ ታን ህንተንቶ ኡባዉ ኡሸቻ አይፍያ ዎጫደ ከሳና፤ ያታደ እስራኤልያ ኡባ ካዉሻና” ያጌዳ።

3 ያቤሻ ጭማቱ ኡባይ ናኦሳ፥ “እስራኤልያ ቢታ ኡባዉ ኑን ኪታ የዳና ማላ፥ ላፑን ጋላሳ ታካሻርኪ፤ ኑና አሽያዌ ኦንነ ꬋዮፐ፥ ኑን ነዉ ኩሽያ እማና” ያጌድኖ።

4 ኪተቴዳዋንቱ ሳኦል ደኢያሳ ግብኣ ቢደ፥ ሀ የዉዋ አሳዉ ኦዴድኖ፤ አሳይ ኡባይ ባረ ቃላ ꬎቂሲደ ዬኬዳ። 5 ሄ ዎደ ሳኦል ባረ ቦራቱዋ ላጊደ ጎሻፐ ይያዌ፥ “አሳይ ዋኔዴ? አያዉ ዬኪ?” ያጊደ ኦቼዳ፤ ያቤሻ አሳይ ጌዳዋ አዉ ኦዴድኖ።

6 ሀ ቃላ ሳኦል ስሴዳ ዎደ፥ ጾሳ አያናይ አ ቦላን ዎልቃን ዎꬌዳ፤ ሳኦል ሀንቁዋ ፐንቴዳ። 7 ሳኦል ዋꬃ ቦራቱዋ አኪደ ሙጸሬꬂደ፥ ኪተቴዳዋንቱን እስራኤልያ ቢታ ኡባዉ የዲደ፥ “ሳኦላነ ሳመላ ካሊደ፥ ከሰና ኦ ቦራቱነ ሀዋዳን ሙጸታና” ያጌዳ።

ሄዋፐ ጉይያን፥ መꬍና ጎዳ ዳጋማይ አሳ ቦላ ዎꬍና፥ ኡንቱንቱ እት አሳዳን ከሴድኖ። 8 ሳኦል በዜቃን ኡንቱንታ ሺሺደ ፓይዴዳ ዎደ፥ እስራኤልያ አሳይ ሄዙ ጼቱ ሻአ፤ ይሁዳ አሳይ ሀታሙ ሻአ። 9 ኡንቱንቱ ኪተት ዬዳዋንታ ሀዋዳን ያጌድኖ፤ “ቢደ ያቤሻ ጋላኣደ አሳቶ፥ ‘ዎንት አዋ ካዉቶ ዎደ፥ ኑን ህንተንታ አሻና’ ያጊደ ኦድተ” ያጌድኖ። ኪተቴዳዋንቱ ቢደ፥ ያቤሻ አሳቶ ሄዋ ኦዴድኖ፤ ኡንቱንቱካ ሎይꬅ ናሸቴድኖ።

10 ያቤሻ አሳቱ አሞና አሳቶ፥ “ኑን ዎንት ህንተንቶ ኩሽያ እማና፤ ህንተንቱ ኑና ዶስያዋዳን ኦꬃና ዳንዳዪታ” ያጌድኖ።

11 ዎንተꬃ ጋላስ ሳኦል ባረ አሳ ሄዙ ጩጉዋን ሻኬዳ፤ ኡንቱንቱ ሳአይ ዎንትያ ዎደ፥ አሞና አሳቱ ሺቄዳ ሳኣ ገሊደ፥ አዋይ ካዉታና ጋካናዉ አሞና አሳቱዋ ጎራኤድኖ፤ ጎራኤቱሳፐ አቴዳዋንቱ ላኡ አሳይ እትፐ ደኤናዳን ኡባይ ባረዉ ባረዉ ላለቴዳ።

12 ሄዋፐ ጉይያን፥ እስራኤልያ አሳይ ሳመላ፥ “ሳኦል ኑ ቦላ ካተታኔ? ያጌዳ አሳቱ ኦኔ? ኡንቱንቱ ኦነንቶ ከስተ፤ ኑን ኡንቱንታ ዎꬋና” ያጌዳ።

13 ሽን ሳኦል ኡንቱንታ፥ “እት አሳይነ ሀቼ ሀይቀና፤ አያዉ ጎፐ፥ መꬍና ጎዳይ እስራኤልያ አሼዳ ጋላሳይ ሀቻ” ያጊደ ዛሬዳ።

14 ሄዋፐ ጉይያን፥ ሳመል አሳ፥ “ሃይተ፤ ገልጋላ ቦይተ፤ ያን ሳኦል ካትያ ግድያዋ ዛረꬂደ ኤርሴቶ” ያጌዳ። 15 ሄዋ ድራዉ፥ አሳቱ ኡባይ ገልጋላ ቢደ፥ ገልጋላን፥ መꬍና ጎዳ ስንꬃን ሳኦል ካትያ ግድያዋ ኤርሴድኖ። ያን ሳሮተꬃ ያርሹዋ መꬍና ጎዳ ስንꬃን ያርሼድኖ፤ ሳኦልነ እስራኤልያ አሳይ ኡባይ ሄ ሳኣን ጾኑዋ ባላ ዎልቃማ ናሸቻን ቦንቼድኖ።