1 ሄዋፐ ጉይያን፥ ሳመል እስራኤልያ ኡባ ሀዋዳን ያጌዳ፤ “ህንተንቱ ታዉ ኦዴዳ ኡባባ ታን ስሳደ፥ ህንተንቱ ቦላ ካትያ ካተያድ። 2 ሀእ ዛር ህንተንታ ካለꬃናዉ ካቲ ደኤ። ታና ግዶፐ፥ ታን ዳሮ ደኣድነ ጭማድ፤ ታ ናናይ ህንተናና ደኢኖ። ታን ታ ያላጋተꬃፐ ሀቼ ጋካናዉ ህንተንታ ካለꬃድ። 3 ሄኮ ታን ሀዋን ኤቃድ፤ መꬍና ጎዳ ስንꬃንነ እ ኦኬዳ ካትያ ስንꬃን ታ ቦላ ማርካትተ። ታን ኦ ቦራ አካድታ? ኦ ሀርያ አካድታ? ኦና ጭማድታ? ኦና ኡቁናድታ? ታ አይፍያ ቆቅሳናዉ ኦ ኩሽያፐ ማጋንጻ ማድታ? ሀዋንቱፐ እቱዋነ ታን ኦꬄዳዋ ግዶፐ፥ ታን ጭጋና” ያጌዳ።

4 ሄዋፐ ጉየ ኡንቱንቱ ዛሪደ፥ “ኔን ኑና ጭማባካ፤ ዎይ ኑና ኡቁናባካ፤ ኔን አሳ ኩሽያፐ አያነ ማጋንጻ ማባካ” ያጌድኖ።

5 ሳመል ኡንቱንታ፥ “ህንተንቱ ታ ኩሽያን አያነ ደምቤናዎ መꬍና ጎዳይነ እ ኦኬዳ ካቲነ ሀቼ ህንተንቱ ቦላን ማርካ” ያጌዳ።

ኡንቱንቱካ፥ “ኤ፥ እ ማርካ” ያጌድኖ።

6 ሳመል አሳ፥ “ሙሳነ አሮና ዶሬዳዌነ ህንተንቱ አዎቱዋ ግብጼፐ ከሴዳዌ መꬍና ጎዳ። ከሳ 6:26 7 ሀእ ስም ህንተንቱነ ህንተንቱ አዋቶ መꬍና ጎዳይ ኦꬄዳ ጽሎ ኦሶ ኡባዉ ታን ህንተናና መꬍና ጎዳ ስንꬃን ሞተታናዳን፥ ሀዋን ኤቂተ። 8 ያቆብነ አ ሶ አሳይ ግብጼ ቢደ ደእሽን፥ ግብጼ አሳቱ ኡንቱንታ ናቄዳ ዎደ፥ ህንተንቱ አዎቱ መꬍና ጎዳዉ ዋሴድኖ፤ መꬍና ጎዳይ ሙሳነ አሮና ኪቴዳ፤ ኡንቱንቱ ህንተንቱ አዎቱዋ ግብጼፐ ከሲደ፥ ሀዋን ዎꬄድኖ።ከሳ 2:23

9 “ሽን እስራኤልያ አሳቱ መꬍና ጎዳ ባረንቱ ጾሳ ዶጌድኖ፤ ጾሳይ ኡንቱንታ ሀጾራ ኦላንቻቱ ጋዳዋ ሲሳራ ኩሽያን፥ ፕልስጼማ አሳቱዋ ኩሽያንነ ሞኣበ ካትያ ኩሽያን አꬂደ እምና ኡንቱንታ ኦሌድኖ። ዳና. 3:12፤ 4:2፤ 13:1 10 ኡንቱንቱ መꬍና ጎዳዉ፥ ‘ኑን ናጋራ ኦꬄዶ፤ ኑን መꬍና ጎዳ አጊደ፥ ባኣላዉነ አስታሮታዉ ጎይኔዶ። ሽን ሀእ ኔን ኑና ኑ ሞርከቱዋ ኩሽያፐ አሻ፤ ኑን ነዉ ጎይናና’ ያጊደ ዋሴድኖ። ዳና. 10:10-15 11 መꬍና ጎዳይ ጌዶና፥ ባራቃ፥ ዮፍታሀነ ሳመላ ኪቲደ፥ ህንተንቱ ዩሹዋ ኡባን ደእያ ሞርከቱዋ ኩሽያፐ ህንተንታ አሼዳ፤ ያትና፥ ህንተንቱ ሳሮ ደኤድታ። 1 ሳሜላ 3:20፤ ዳና. 4:6፤ 7:1፤ 11:29

12 “አሞና አሳ ካትያ ናኦስ ህንተንቱኮ ዬዳዋ በኤዳ ዎደ፥ መꬍና ጎዳይ ህንተንቱ ጾሳይ ህንተንቱ ካትያ ግዶፐነ፥ ህንተንቱ ታና፥ ቱይት፥ ኑን ኑና ሞዳናዉ ካትያ ኮዬቶ ያጌድታ። 1 ሳሜላ 8:19 13 ሀእካ ህንተንቱ ዶሪደ ኦቼዳ ካቲ ሀዌሽ! በእተ፤ መꬍና ጎዳይ ህንተንቱ ቦላ ካትያ ዎꬄዳ። 14 መꬍና ጎዳዉ ህንተንቱ ያዮፐ፥ አዉ ኪተቶፐ፥ አ ቃላዉ አዛዘቶፐ፥ አ አዛዞ ማካለናን አጎፐነ ህንተንቱካ ህንተንቱ ቦላ ካተትያ ካቲካ ጾሳ ህንተንቱ ጾሳ ካሎፐ፥ ያቶፐ ሎአ። 15 ሽን መꬍና ጎዳ ቃላዉ ህንተንቱ አዛዘተናን ꬋዮፐነ አ አዛዞ ማካሎፐ፥ ጾሳ ፕርዳይ ካሰ ህንተንቱ አዎቱዋ ቦላ ዬዳዋዳን፥ ህንተንቱ ቦላካ ያናዋ።

16 “ስም ሀእ ኤቂ ባሽተ፤ መꬍና ጎዳይ ህንተንቱ አይፍያ ስንꬃን ኦꬅያ ሀ ግታባ በእተ! 17 ዛርጋ ጫካ ዎዲ ሀአ ግደኔየ? መꬍና ጎዳይ ጉጉንꬃነ እራ የዳና ማላ፥ ታን ጾሳዉ ዋሳና። ያትያዋ ግዶፐ፥ ካትያ ህንተንቱ ኦቼዳዌ መꬍና ጎዳ ስንꬃን ዎልቃማ ኢታተꬃ ግድያዋ ህንተንቱ ኤራናነ በአና” ያጌዳ።

18 ሳመል መꬍና ጎዳዉ ዋሴዳ፤ መꬍና ጎዳይ ሄ ጋላስ ጉጉንꬃነ እራ የዴዳ፤ ሄዋ ድራዉ፥ አሳይ ኡባይ መꬍና ጎዳነ ሳመላ ሎይꬅ ያዬዳ።

19 አሳይ ኡባይ ሳመላ፥ “ኑን ካትያ ኦቺደ፥ ኑ ናጋራ ኡባ ቦላ ሀ ኢታተꬃ ጉጄዳ ድራዉ፥ ኑን ነ ቆማቱ ሀይቀናዳን ኑዉ መꬍና ጎዳ ነ ጾሳ ዎሳርኪ” ያጌዳ።

20 ሄዋፐ ጉየ ሳመል አሳዉ ሀዋዳን ያጌዳ፤ “ያዮፕተ፤ ቱሙካ ህንተንቱ ሀ ኢታተꬃ ኡባ ኦꬄድታ፤ ሽን ህንተንቱ ኩመንꬃ ዎዛናፐ መꬍና ጎዳዉ ኪተትተፐ አትና፥ መꬍና ጎዳ ካልያዋ አጎፕተ። 21 ማደና፥ አሸናነ ፓꬄና ኤቃቱዋ ካሎፕተ፤ አያዉ ጎፐ፥ ሄዌ ፓናዋ። 22 መꬍና ጎዳይ ባረ ዎልቃማ ሱንꬃ ድራዉ ባረ አሳ አገና፤ አያዉ ጎፐ፥ መꬍና ጎዳይ ህንተንታ ባረ አሳ ኦꬃናዉ ናሸቴ። 23 ህንተንቱ ድራዉ ዎስያዋ አጋደ መꬍና ጎዳ ቦላ ናጋራ ኦꬃናዌ ታፐ ሃኮ፤ ታን ህንተንታ ሎኦነ ሱረ ኦግያ ታማርሳና። 24 መꬍና ጎዳዉ ያይተ፤ ህንተንቱ ኩመንꬃ ዎዛናፐ አማነቲደ፥ አዉ ኪተትተ፤ ህንተንቶ እ ኦꬄዳ ግታባ ሀሳይተ። 25 ሽን ህንተንቱ ኢታባ ዛር ዛሪደ ኦꬆፐ፥ ህንተንቱካ ህንተንቱ ካቲካ ꬋያና” ያጌዳ።