1 ሳኦል እስራኤልያ ቦላ ላኡ ላይꬃ ካተ ግዶዋፐ ጉይያን፥ 2 እስራኤላቱ ግዶፐ ሄዙ አሳ ዶሬዳ፤ ላኡ ሻአይ ምክማሳን፥ ቤቴለ ገዝያን ሳኦላና ደኤ፤ እት ሻአይ ቃይ ቢንያማን ደእያ ግብአን ዮናታናና ደኤ፤ አቴዳ አሳ ሳኦል ኡንቱንቱ ሶ ሶ የዴዳ።

3 ዮናታን ገባአን ደእያ ፕልስጼማ ኦላንቻቱ ጭታ ቦላ ዎራጄዳ፤ ፕልስጼማ አሳቱ ሄዋ ስሴድኖ። ሄዋፐ ጉይያን ሳኦል፥ “እብራዌቱ ሀዋ ስሲኖ” ጊደ፥ ቢታ ኡባን ማላካታ ፑንሴዳ። 4 እስራኤልያ አሳይ ኡባይ፥ “ሳኦል ፕልስጼማ ኦላንቻቱ ጭታ ቦላ ዎራጄዳ፤ ሀእ እስራኤልያ አሳይ ፕልስጼማ አሳዉ ሸነይያባ ግዴዳ” ያግያ ኦዱዋ ስሴዳ። አሳይ ሳኦላኮ ገልጋላ ጼሰቲደ ሺቄዳ።

5 ፕልስጼማ አሳቱ እስራኤላቱዋ ኦላናዉ ሀታሙ ሻአ ፓራ ጋረቱዋና፥ ኡሱፑን ሻአ ፓራ አሳቱዋናነ አባ ዶናን ደእያ ሻፍያ ኬሻ ኦላንቻቱዋና ሺቄድኖ፤ ኡንቱንቱ ፑደ ቢደ፥ ቤት-አዌናፐ አዋይ ዶልያ ባጋና ደእያ ምክማሳን ሺቄድኖ። 6 እስራኤልያ ኦላንቻቱ ባረንቶ ሌሌዳዋነ ኡንቱንቱ ጭታይካ ሎይꬅ ኡንኤቴዳዋ በኢደ፥ ጎንጎሉዋ ግዶን፥ ቡራ ግዱዋን፥ ዛላቱ ግዱዋን፥ ካካ ግዶንነ ሃꬃዉ ቦኮ ኦላ ግዶን ቆሰቴድኖ። 7 እብራዋቱዋፐ አማሬዳዋንቱ ዮርዳኖሳ ሻፋ ፕኒደ፥ ጋዳነ ጋላኣደ ጋድያ ቤድኖ። ሽን ሳኦል ገልጋላን አቴዳ፤ አናና ደእያ ኦላንቻቱ ኡባይ ያሻዉ ኮኮሬድኖ።

8 ሳኦል ሳመል ኬሬዳ ላፑን ጋላሳ ጋምኤዳ፤ ሽን ሳመል ገልጋል ይቤና፤ ያትና፥ ሳኦላ አሳይ ላለትያዋ ዶሜዳ። 1 ሳሜላ 10:8 9 ሄዋ ድራዉ፥ ሳኦል፥ “ጹግያ ያርሹዋነ እትፐተꬃ ያርሹዋ ታዉ ሀምተ” ያጌዳ፤ አህና ሳኦል ጹግያ ያርሹዋ ያርሼዳ። 10 ሳኦል ጹግያ ያርሹዋ ፖሎ ሳናካ ሳመል ጋክ ዎꬌዳ። ያትና፥ ሳኦል ሳመላ ሞካናዉ ካረ ከሴዳ።

11 ሳመል ሳኦላ፥ “ሀዌ ኔን ኦꬄዳዌ አዬ?” ያጌዳ።

ሳኦል፥ “አሳይ ላለትያዋ፥ ኔንካ ጌዳ ዎደ ያቤናዋነ ፕልስጼማቱ ምክማሳን ሺቄዳዋ ታን በኣደ፥ 12 ‘ፕልስጼማቱ ታናና ኦለታናዉ ሀእ ገልጋላ ዎꬋናዋንታ፤ ታን መꬍና ጎዳ ማዱዋ ኦቻበይከ፤ ሄዋ ድራዉ፥ ጹግያ ያርሹዋ ታን ያርሻናዉ ኮሸ’ ጋደ ቆፓድ” ያጊደ ዛሬዳ።

13 ሳመል ሳኦላ፥ “ኔን ኤያባ ኦꬃዳ፤ መꬍና ጎዳይ ነ ጾሳይ ነዉ እሜዳ አዛዙዋ ናጋባካ። እ ሀቼ ነ ካዉተꬃ እስራኤልያ ቦላ መꬍናዉ ምንሳናዋሽን። 14 ስም ሀእ ነ ካዉተꬃይ ጋምኤና፤ ኔን መꬍና ጎዳ አዛዙዋ ናጋቤና ድራዉ፥ መꬍና ጎዳይ ባረ ዎዛናዳን ኦꬅያ አሳ ኮዬዳ፤ አ ባረ አሳ ሞዳናዳን ሱንꬄዳ” ያጌዳ። ኪታ 13:22

15 ሄዋፐ ጉይያን፥ ሳመል ገልጋላፐ ደንዲደ፥ ቢንያማን ደእያ ግብኣ ቤዳ። ሳኦል ባረናና ደእያ አሳ ፓይዴዳ፤ አሳይ ኡሱፑን ጼቱ ኬሻ ግዴዳ። 16 ሳኦል፥ አ ናኣ ዮናታንነ ኡንቱንቱና ደእያ አሳይ ቢንያማን ደእያ ገባአን ሺቄድኖ፤ ፕልስጼማ አሳቱካ ምክማሳን ሺቄድኖ። 17 ፕልስጼማቱ ሺቄዳ ሳኣፐ ዎራጅያዋንቱ ሄዙ ጩጎ ግዲደ ከሴድኖ፤ ኡንቱቱፐ እት ጩጉ ሹኣላ ቢታን ደእያ ኦፍራኮ ስሚደ ቤዳ፤ ላኤንꬁ ቤት-ሆሮን ቤዳ፤ 18 ሄዘንꬆ ጩጉ ባዙዋ ስንꬃዬዳ፥ ጻቦኢማ ዎምባ ዱገ ጼልያ ዛዋ ኦግያ ኦይቂደ ቤዳ።

19 ፕልስጼማ አሳቱ፥ “እብራዌቱ አዳነ ቶራ ቆጾፕኖ” ጌዳ ድራዉ፥ እስራኤልያ ቢታ ኡባን ብራታ ቆጽያዌ ቤትቤና። 20 ሄዋ ድራዉ፥ እስራኤልያ ኡባይ ባረንቱ ማራሻ ጼራ፥ ጎማ፥ ካልታነ ባጫ ፖሽሳናዉ ፕልስጼማ አሳቱዋኮ ቢኖ። 21 ማራሻ ጼራነ ሻልክያ ፖሽሳናዉ ሆስፑን ግራመ ዴጽያ ብራ ቃንጺኖ፤ ካልታ፥ ጎማነ ጲልጹዋ ፖሽሳናዉ ሄዎ ባጋ ቃንጺኖ። 22 ሄዋ ድራዉ፥ ሳኦላናነ ዮናታናና ደእያ አሳ ኡባ ኩሽያን ኦላ ጋላስ ቶራይነ ማሻይ ባዋ፤ ሽን ሳኦላዉነ አ ናኣ ዮናታናዉ ደኤ። 23 ፕልስጼማቱዋ ጩጉ ምክማሳ ፕኑዋ ባናዉ ከሴዳ።