1 እት ጋላስ ሳኦላ ናአይ ዮናታን ባረ ኦላ ሚሻ ቶክያ ዎዳላ ሀዋዳን ያጌዳ፤ “ሃያ፤ ሄፍንꬃ ባጋን ደእያ ፕልስጼማቱ ሺቄዳ ሳኣ አነ ቦይተ” ያጌዳ። ሽን ባረ አዎ ሀ የዉዋ ኦድቤና።

2 ሄ ዎደ ሳኦል ግብኣ ማታን ምግሮናን፥ ሮማነ ጌተትያ ምꬃ ጋርሳን ደኤ። አናና ኡሱፑን ጼቱ አሳቱነ 3 ኤፉድያ ማዬዳ ቄሲ፥ አኪይ ደኢኖ። አኪይ እካቦዳ እሻነ አህጹባ ናኣ፤ አህጹብ ሴሎን መꬍና ጎዳ ቄሰ ግዴዳ ኤላ ናአይ ፒንሃስ የሌዳዋ። ዮናታን ብ ክቼዳዋ አሳይ ኤርቤና።

4 ዮናታን ፕልስጼማቱ ሺቄዳ ሳኣ ጋካናዉ ፕናናዉ ቆፕያ ፕኑዋስ ላኡ ባጋናካ ጼራይ ጽንእ ጌዳ ዎልቃማ ዛላቱ ደኢኖ፤ እቱዋ ሱንꬃይ ቦዴጻ፤ ላኤንꬁዋ ሱንꬃይ ሴና። 5 ዛላቱዋፐ እቱ ፕንያ ሳ ሁጲሳ ባጋና ምክማሳዉ ስንꬃና ደእያ ዎደ፥ እቱ ቃይ ገድሳ ባጋና ገባአዉ ስንꬃና ደኤ።

6 ዮናታን ባረ ኦላ ሚሻ ቶክያ ዎዳላ ሀዋዳን ያጌዳ፤ “ሃያ፤ ሀ ቃጻረትቤናዋንቱ ሺቄዳ ሳኣ አነ ሄፍንꬃ ቦይተ። ኦን ኤሪ፥ መꬍና ጎዳይ ኑ ድራዉ ኦꬃነንቶነ፤ መꬍና ጎዳይ ዳሮ አሳን ግድና፥ ጉꬃ አሳን ግድና፥ አሻናዋ አ ድግያባይ አያይነ ባዋ” ያጌዳ።

7 አ ኦላ ሚሻ ቶክያዌ፥ “ኔን ቆፔዳዋ ኡባ ኦꬃ፤ ባ፤ ታ ኩመንꬃ ዎዛናፐ ታን ኔናና ደአይ” ያጌዳ።

8 ሄዋፐ ጉየ ዮናታን፥ “ያኖፐ ሃያ፤ ሄፍንꬃ አሳኮ ፕኒደ፥ አሳን በኤታና። 9 ኡንቱንቱ ኑና፥ ‘ኑን ህንተንቱኮ ባናዉ ሄዋን ናግተ’ ያጎፐ፥ ኑን ደእያ ሳኣን ታካናፐ አትና፥ ኡንቱንቱኮ ቦኮ። 10 ሽን ኡንቱንቱ፥ ‘ሃ ኑኮ ፑደ ከስተ ጎፐ፥ ኑን ፑደ ከሳና፤ አያዉ ጎፐ፥ ሄዌ መꬍና ጎዳይ ኡንቱንታ ኑ ኩሽያን አꬂደ እሜዳዎ ኑዉ ማላታ ግዳና’ ” ያጌዳ።

11 ያትና፥ ላአቱካ ፕልስጼማቱዋ ጌሶቱዋ ባረንታ በሴድኖ። ፕልስጼማቱ፥ “በእተ! እብራዌቱ ባረንቱ ቆሰቴዳ ኦላፐ ዙሚደ ከሲኖ” ያጌድኖ። 12 ሄዋፐ አሳቱ ዮናታናነ ኦላ ሚሻ ቶክያዋ ጼጊደ፥ “ሃ ኑኮ ፑደ ከስተ፤ ኑን ህንተንታ በሳና” ያጌድኖ።

ሄዋ ድራዉ፥ ዮናታን ባረ ኦላ ሚሻ ቶክያዋ፥ “ታና ካላደ ሀ ፑደꬃ ከሳ። መꬍና ጎዳይ ኡንቱንታ እስራኤልያ ኩሽያን አꬂደ እም ድጌዳ” ያጌዳ።

13 ዮናታን ባረ ኦላ ሚሻ ቶክያዋ ካለꬂደ፥ ገድያንነ ኩሽያን ሀምቡሩጪደ ፑደꬃ ከሴዳ። ፕልስጼማቱ ዮናታና ኩሽያን ኩንዴድኖ፤ አ ኦላ ሚሻ ቶክያዌ ካል ካሊደ ኡንቱንታ ዎꬌዳ። 14 ሄ ኮይሮ ዎራጁዋን ዮናታንነ አ ኦላ ሚሻ ቶክያዌ እት ጎሻ ጋደን ላታሙ ግድያ አሳ ዎꬌድኖ። 15 ሄዋፐ ጉይያን፥ ጋጻ ቢታን ደእያ ፕልስጼማ አሳቱ ዳጋሜድኖ፤ ቆፐናዋ ኦልያዋንቱነ ሄራን ደእያ ኦላንቻቱ ያሻዉ ኮኮሬድኖ። ቢታይካ ቃጼዳ፤ ሄዌነ፥ ጾሳፐ ኪተቴዳ ዳጋማ።

16 ሳኦል ቢንያማ ቢታን፥ ግብአን ዎꬄዳ ዎችያ አሳቱ ጼሊደ፥ ፕልስጼማ ኦላንቻቱ ያና ሃና ፕስክ ጊደ ላለትያዋንታ በኤድኖ። 17 ያትና፥ ሳኦል ባረናና ደእያ አሳቱዋ፥ “አነ ኦላንቻቱዋ ሺሽተ፤ ኑ ግዶፐ ኦን ቤድኖንቶ በእተ” ያጌዳ። ኡንቱንቱ ሺሺደ ፓይድያ ዎደ፥ ዮናታንነ አ ኦላ ሚሻ ቶክያዌ ባይናዋ ቤኤድኖ።

18 ሳኦል ቄስያ አክያ፥ “ጾሳ ኦቻናዉ አነ ኤፉድያ ሃ አካደ ያ” ያጌዳ። ሄ ዎደ አኪ እስራኤልያ አሳ ስንꬃን ኤፉድያ ማዬ። 19 ሳኦል ቄስያና ሃሳይሽን፥ ፕልስጼማቱዋ ሄራን ዋላሳይ ዳር ዳር ቤዳ። ሄዋ ድራዉ፥ ሳኦል ቄስያ፥ “ኤፉድያፐ ነ ኩሽያ ከሳ ድጋ” ያጌዳ።

20 ሄዋፐ ጉይያን፥ ሳኦልነ አ አሳይ ኡባይ ሺቂደ፥ ኦላ ቤድኖ። ፕልስጼማ አሳቱ ኡባይ ሻቢረቲደ፥ ባረንቱ ማሻን እቱ እቱዋ ቡሳኪደ ደእያዋንታ ደሜድኖ። 21 ካሰ ፕልስጼማ አሳቱዋና ደኢደ፥ ኡንቱንቱና ፑደ ኡንቱንቱ ሺቄዳ ሳኣ ቤዳ። እብራዋቱካ ኡንቱንታ አጊደ፥ ሳኦላናነ ዮናታናና ደእያ እስራኤልያ አሳን ጋከቴድኖ። 22 ኤፍሬማ ገዝያን ቆሰት ኡቴዳ ሀራ እስራኤላቱካ ፕልስጼማቱ ባቃቲደ ደእያዋ ስሴድኖ። ኡንቱንቱካ የደርሱዋ ኡክያ አሳን ጋከቴድኖ። 23 መꬍና ጎዳይ ሄ ጋላስ እስራኤልያ አሳ አሼዳ። ቤት-አዌና ካታማፐ ሄፍንꬃ ጋካናዉካ ኦላይ ኦለቴዳ።

24 ሄ ጋላስ እስራኤልያ አሳቱ ኮሻን ላባኔድኖ፤ አያዉ ጎፐ፥ ሳኦል አሳ፥ “ሳአይ ቃመናን ደእሺናነ ታን ታ ሞርከቶ ሀሉዋ ከሰናን ደእሽን፥ ቁማ ምያ ኡራይ ሸቀቴዳዋ ግዶ” ያጊደ አሳ ጫቁዋን ቃቼዳ። ሄዋ ድራዉ፥ ኦላንቻቱዋፐ ቁማ ዶናኮ ሺሼዳ አሳይ ኦንነ ባዋ።

25 ኦላንቻቱ ኡባይ ኡባና ዎራ ግዶ ገልያ ዎደ፥ ሳኣን ኤሳይ ደኤ። 26 ኡንቱንቱ ዎራ ግዶን ኤሳይ ጎግያዋ በኤድኖ፤ ሽን ጫቁዋ ያዬዳ ድራዉ፥ እት አሳይነ ባረ ኩሽያ ዶናኮ ሺሽቤና። 27 ሽን ዮናታን ባረ አዉ አሳ ጫቁዋን ቃቼዳዋ ስስቤና። ሄዋ ድራዉ፥ ባረ ኩሽያን ደእያ ጻምኣ ጼራ እልሉዋን የድ ከሲደ፥ ላጬዳ፤ አ አይፊ ዶየቴዳ። 28 ሄዋፐ ጉይያን፥ ኦላንቻቱዋፐ እቱ አ፥ “ነ አዉ ኦላንቻቱዋ ኡባ፥ ‘ሀች ቁማ ምያ ኡራይ ሸቀቴዳዋ ግዶ’ ያጊደ፥ ጫቁዋን ቃች ዎꬄዳ፤ አሳይ ኡባይ ላባኔዳዌ ሀዋሳ” ያጌዳ።

29 ሄዋፐ ጉየ ዮናታን ሀዋዳን ያጌዳ፤ “ታ አዉ ቢታዉ መቶ መꬌዳ። ታን ሀ ኤሳፐ ላፋ ላጭና ታ አይፊ አይ ኬሻ ዶየቴደንቶ በአ። 30 አሳይ ባረ ሞርከቱዋፐ ኦሞዴዳዋፐ ሀቼ ሜዳባ ግድንቶ፥ አይባ ሎኤ ሽን፤ ኡንቱንቱ ዎꬋና ፕልስጼማቱዋ ፓይዱካ አይ ኬሻ ዳራናዋ ሽን” ያጌዳ።

31 ሄ ጋላስ እስራኤልያ አሳቱ ምክማሳፐ አያሎና ጋካናዉ፥ ፕልስጼማቱዋ ሾጭ ስሚደ ዳቡሬድኖ። 32 ኡንቱንቱ ኦሞዱዋ ጋዉሀዪደ፥ ዶርሳቱዋ፥ ሚዛቱዋነ ማራቱዋ አኬድኖ፤ ቢታን ጮ ሹኪደ፥ ሱꬃናካ ሜድኖ። 33 ሄዋፐ ጉይያን፥ እት አሳይ ሳኦላ፥ “በአ፤ አሳይ ሱꬃና ደእያ አሹዋ ሚደ፥ መꬍና ጎዳ ቦላ ናጋራ ኦꬄ” ያጌዳ።

ሄዋፐ ጉየ እ ኡንቱንታ፥ “ህንተንቱ ናጋራ ኦꬄድታ፤ ዎጋ ሹቻ ኤለካ ሃ ታኮ ጎንዶርስተ” ያጌዳ። ዶመꬃ 9:4፤ ዎጋ 7:26-27፤ 17:10-14፤ 19:26፤ ዛረ. 12:16፣ 23፤ 15:23 34 ዛረꬂደካ፥ “ከሲደ አሳ ግዶ ቢተ፤ ኡንቱንታ ሀዋዳን ያግተ፤ ‘ሁጲያን ሁጲያን ህንተንቱ ቦራነ ዶርሳ ታዉ ሃ አኪደ ዪተ፤ ያቲደ ሀዋን ዎጋዳን ሹኪደ ሚተ። ሱꬃና ደእያ አሹዋ ሚደ፥ መꬍና ጎዳ ቦላ ናጋራ ኦꬆፕተ’ ያጋ” ያጌዳ።

ሄዋ ድራዉ፥ ሄ ጋላስ ቃማ አሳቱ ኡባይ ባረ ቦራ ቦራ አሂደ፥ ያን ሹኬድኖ። 35 ሳኦል ሄ ሳኣን መꬍና ጎዳዉ ያርሽያ ሳኣ ግምቤዳ፤ ጾሳዉ ያርሽያ ሳኣ እ ግምቢሽን፥ ሄዌ አዉ ኮይሩዋ።

36 ሳኦል፥ “ሀ ቃማና ዱገ ፕልስጼማቱዋ ካሊደ አነ ቦይተ፤ ሳአይ ዎንታና ጋካናዉ፥ ኡንቱንቱዋ ኡባ ቦንቆይተ፤ ኡንቱንታካ እቱዋነ አሸናን ዎꬎይተ” ያጌዳ።

ኡንቱንቱ፥ “ኤኖ፥ ኔና ሎኤዳባ ኡባ ኦꬃ” ያጊደ ዛሬድኖ።

ሽን ቄሲ፥ “አነ ሀዋን ጾሳ ኦቼቶ” ያጌዳ።

37 ሄዋ ድራዉ፥ ሳኦል ጾሳ፥ “ፕልስጼማ አሳቱዋ ካላደ ቦ? ኔን ኡንቱንታ እስራኤላቱ ኩሽያን አꬃደ እማኒ?” ያጊደ ኦቼዳ። ሽን ሄ ጋላስ ጾሳይ አዉ ኦድቤና።

38 ያትና ሳኦል፥ “ኦላንቻቱዋ ካፓቶ፥ ኡባይ ሃይተ፤ ሀቼ አይባ ናጋራይ ኦሰቴደንቶነ አነ ቆሪደ ደሞይተ። 39 እስራኤልያ አሽያ መꬍና ጎዳይ ኤሮ! ታ ናኣ ዮናታና ግዶፐነ፥ ሀይቃናዉ በሰ” ያጌዳ። ሽን አሳፐ እት ኡራይነ ቃላ ቃትቤና።

40 ሄዋፐ ጉይያን፥ ሳኦል እስራኤልያ አሳ ኡባ፥ “ህንተንቱ ኡባይካ ያ ባጋን ኤቂተ፤ ታንነ ታ ናኣ ዮናታን ሀ ባጋን ኤቃና” ያጌዳ።

ሄዋፐ ጉየ አሳቱ፥ “ኤኖ፥ ኔና ሎኦዋ ኦꬃ” ያጌድኖ።

41 ሄዋፐ ጉይያን፥ ሳኦል መꬍና ጎዳ እስራኤልያ ጾሳ፥ “ታዉ ልከ ዛሩዋ እማ” ያጊደ ዎሴዳ። ሳማይ ሳኦላ ቦላነ ዮናታና ቦላ ዎꬍና አሳይ ጌዬዳ። ፓይ. 27:21፤ 1 ሳሜላ 28:6 42 ቃይ ሳኦል፥ “ታ ቦላነ ታ ናኣ ዮናታና ቦላ የግተ” ያጌዳ። ሄዋፐ ጉየ ሳማይ ዮናታና ቦላ ዎꬌዳ።

43 ሳኦል ዮናታና፥ “አነ ኔን ኦꬄዳዋ ኦዳ” ያጌዳ።

ዮናታን፥ “ታን ጉꬃ ኤሳ እልሉዋ ታ ጻምኣ ጼራፐ ላጫድ። ሄኮ ታን ሀዋን ደአይ፤ ታን ሀይቃና” ያጌዳ።

44 ሳኦል ሀዋዳን ያጌዳ፤ “ዮናታና፥ ኔን ሀይቃና ꬋዮፐ፥ ጾሳይ ታና ዎꬎ!” ያጌዳ።

45 ሽን አሳይ ሳኦላ፥ “ዮናታን፥ እስራኤልያዉ ሀ ዎልቃማ ጾኑዋ አሄዳዌ ሀይቃኔ? ሄዌ ኡባካ ሀነና! ደኡዋ መꬍና ጎዳይ ኤሮ! አ ሁጲያፐ እት ብናናይነ ቢታን ዎና፤ አያዉ ጎፐ፥ እ ሀቼ ሀዋ ጾሳ ማዱዋን ኦꬄዳ” ያጌድኖ። ያቲደ አሳይ ዮናታና አሽና፥ እ ሀይቀናን አቴዳ።

46 ሄዋፐ ጉይያን፥ ሳኦል ፕልስጼማ አሳቱዋ የደርስያዋ አጌዳ፤ ኡንቱንቱ ባረንቱ ጋድያ ስሜድኖ።

47 ሳኦል እስራኤልያ ቦላ ካተ ግዶዋፐ ጉይያን፥ ኡባ ኤለካ ደእያ ባረ ሞርከቱዋ ኦሌዳ፤ ሄዋንቱካ: ሞኣባቱዋ፥ አሞናቱዋ፥ ኤዶማቱዋ፥ ጾባ ካተቱዋነ ፕልስጼማ አሳቱዋ። ባረ ቤዳ ሳኣን ኡባን ጾኔዳ። 48 እ ምኒደ ኦለቴዳ፤ አማሌቃ አሳቱዋ ጾኔዳ፤ እስራኤልያ አሳ ቦንቂያዋንቱ ኩሽያፐ አሼዳ።

49 ሳኦላ አቱማ ናናይ ዮናታና፥ ይሽዊነ ማልክሹአ፤ አዉ ባይራ ናት ሱንꬃይ መራቦ፤ ቴፋ ናት ሱንꬃይ ሚካሎ። 50 አ ማቻታ አህማኣጻ ናቶ አህኖኣሞ። አ ኦላንቻቱ ጋዳዋይ አ አዉዋ እሻ ኔራ ናኣ አባኔራ። 51 ሳኦላ አዉዋ ቂስነ አባኔራ አዉዋ ኔር አቢኤላ ናና።

52 ሳኦል ደኤዳ ላይꬃ ኡባን ፕልስጼማ አሳቱዋና ሱሎ ኦላ ኦለቲደ ደኤዳ። ምኖ አሳ ዎይ ጻላ አሳ ደሜዳ ዎደ ኡባን፥ እ ሄ ኡራ ባረ ኦላንቻቱዋን ጉጄ።