1 ሳመል ሳኦላ፥ “ባረ አሳ እስራኤልያ ቦላ ኔን ካተታናዳን ኦካናዉ መꬍና ጎዳይ ኪቴዳዌ ታና፤ መꬍና ጎዳ ቃላ ስሳ። 1 ሳሜላ 10:1 2 ኡባፐ ዎልቃማ መꬍና ጎዳይ ሀዋዳን ያጌ፤ ‘እስራኤላቱ ግብጼፐ ከሲደ ይያ ዎደ አማሌቃ አሳቱ ኦግያን ኡንቱንቱና ኤቀቴዳ ድራዉ፥ ታን አማሌቃ አሳቱዋ ሙራና። ከሳ 17:8-14፤ ዛረ. 25:17-19 3 ሀእ ባ፤ አማሌቃ አሳቱዋ ሾጫ፤ ኡንቱንቶ ደእያዋ ኡባ ኡባና ꬋይሳ፤ ኡንቱንታ አሾፓ፤ ኡንቱንታ ማጫዋ አቱማዋ፥ ꬋምያዋ ቁጭያዋ፥ ሚዛ ዶርሳ፥ ጋሉዋነ ሀርያ ዎꬋ’ ያጌ” ያጌዳ።

4 ሳኦል አሳ ጼጊደ፥ ጸሌማ ግያ ሳኣን ፓይድያ ዎደ እስራኤልያ ላኡ ጼቱ ሻአ፤ ይሁዳፐ ታሙ ሻአ አሳይ ደኤ። 5 ሳኦል አማሌቃቱዋ ካታማ ቢደ፥ እት ዛንጋራ ግዶን ጌመት ኡቴዳ። 6 ሳኦል ቄና አሳቱዋ፥ “ታን ህንተንታ አማሌቃ አሳቱዋና እትፐ ꬋይሰና ማላ፥ ደንድተ! ኡንቱንቱ ግዶፐ ከስተ! ሀዋፐ ክችተ! አያዉ ጎፐ፥ እስራኤላቱ ግብጼፐ ከስያ ዎደ፥ ህንተንቱ ኡንቱንታ ኡባዉ ሎይꬅ ዴጻ” ያጌዳ። ቄና አሳቱ አማሌቃ አሳቱዋ ግዶፐ ከሲደ ቤድኖ።

7 ሳኦል አማሌቃ አሳቱዋ ሀዊላፐ ዶሚደ፥ ግብጼ ስንꬃን ደእያ ሹራ ጋካናዉ ሾጬዳ። 8 አማሌቃቱዋ ካትያ አጋጋ ፓጻ ደእሽን፥ ሳኦል ኦሞዴዳ፤ አ አሳ ኡባ ቃራ ማሻን ዎꬍ ዉርሴዳ። 9 ሽን ሳኦልነ አ ኦላንቻቱ፥ አጋጋነ ኡባፐ ሎእያ ዶርሳቱዋ፥ ሚዛቱዋ፥ ቦልትቦልታ ማራቱዋ፥ ጋሎቱዋነ ሀራ ሎኦባቱዋ ኡባ አሸድኖ፤ ኡንቱንቱ ሀዋንታ ኡባና ዎꬍ ዉርሳናዉ ዶስበይክኖ፤ ሽን ኡንቱንቱ ላፋባነ ካቴዳዋ ኡባና ꬋይሴድኖ።

10 መꬍና ጎዳ ቃላይ ሳሜላኮ ሀዋዳን ያጊደ ዬዳ፤ 11 “ታን ሳኦላ ካትያ ከሴዳዎ ካዮታይ፤ አያዉ ጎፐ፥ ሳኦል ታና ካልያዋ አጌዳ፤ ታ አዛዙዋ ኦꬅቤና” ያጌዳ። ሄዋፐ ጉየ ሳመል መቶቴዳ፤ ሄ ቃማ ኩመንꬃ መꬍና ጎዳኮ ዋሴዳ።

12 ዎንታ ጉራን ሳመል ደንዲደ፥ ሳኦላና ጋከታናዉ ቤዳ፤ ሽን አሳይ አዉ፥ “ሳኦል ቃርመሎሳ ካታማ ቤዳ፤ ያን ባረና ሀሳይስያ ሀዉልትያ ኤሴዳ፤ ሄዋፐ ስሚደ፥ ገልጋላ ዎꬌዳ” ያጊደ ኦዴዳ።

13 ሳመል ሳኦላኮ ጋኬዳ፤ ሳኦል ሳመላ፥ “መꬍና ጎዳይ ኔና አንጆ፤ ታን መꬍና ጎዳ አዛዙዋ ኦꬃድ” ያጌዳ።

14 ሽን ሳመል ሳኦላ፥ “ሀ ታን ስስያ ዶርሳ ዋሱነ ሚዛ ዋሱ አዬ?” ያጌዳ።

15 ሳኦል፥ “ኦላንቻቱ ሀዋንታ አማሌቃቱዋፐ አሄድኖ፤ ኡንቱንቱ መꬍና ጎዳዉ፥ ነ ጾሳዉ ያርሻናዉ፥ ኡባፐ ሎእያ ዶርሳቱዋነ ሚዛቱዋ አሸድኖ፤ ሽን ሀራቱዋ ሙልያካ ꬋይሴዶ” ያጌዳ።

16 ሳመል ሳኦላ፥ “አነ ኤቃ፤ መꬍና ጎዳይ ዝኖ ቃማ ታዉ ኦዴዳዋ ታን ነዉ ኦዳይ” ያጌዳ።

ሄዋፐ ጉየ ሳኦል፥ “ኦዳ” ያጌዳ።

17 ሳመል ሳኦላ ያጌዳ፤ “ኔን ኔና ጼልና ጉꬃ ግዶፐነ፥ እስራኤልያ ዛረቶ ካትያ ግዳበይኪ? እስራኤልያ ቦላ ካተታና ማላ፥ መꬍና ጎዳይ ኔና ኦኬዳ። 18 ጾሳይ ኔና፥ ‘ባደ አማሌቃ አሳቱዋ ኢታቱዋ ኡባና ꬋይሳ፤ ኡንቱንቱ ዉራና ጋካናዉ ኡንቱንታ ኦላ’ ያጊደ ኪቴዳ። 19 ያትና፥ አያዉ መꬍና ጎዳዉ አዛዘታበይኪ? አያዉ ኦሞዶ ያረታደ መꬍና ጎዳ ጾሳ ስንꬃን ኢታባ ኦꬃዲ?” ያጌዳ።

20 ሳኦል፥ “ታን መꬍና ጎዳ ቃላዉ አዛዘታድ! መꬍና ጎዳይ ታና ኪቴዳዋዳን ባድ፤ አማሌቃ አሳቱዋ ዎꬋ ዉርሳድ፤ ኡንቱንቱ ካትያ አጋጋ አሃድ። 21 ሽን ኦላንቻቱ ኦሞዱዋፐ ዶርሳነ ሚዛ ኡባፐ ሎእያዋንታ፥ መꬍና ጎዳዉ፥ ነ ጾሳዉ፥ ገልጋላን ያርሻናዉ አኪደ ዬድኖ” ያጌዳ።

22 ሳመል ሳኦላ፥ “መꬍና ጎዳይ ባረ ቃላዉ አዛዘትያዋን ናሸትያዋ ኬሻ ጹግያ ያርሹዋንነ እሞታን ናሸቲ? በአ፤ አዛዘትያዌ ያርሽያዋፐ አꬌ፤ ቃይ ስስያዌ ዶርሳ ሞꬉዋፐ አꬌ። 23 አያዉ ጎፐ፥ ꬍብያዌ ሻሬችያ ናጋራ ማላ፤ ቃይ ኦቶረትያዌ ኤቃዉ ጎይንያ እታተꬃ ማላ። ኔን መꬍና ጎዳ ቃላ እጼዳ ድራዉ፥ እ ኔን ካትያ ግድያዋ እጼዳ” ያጌዳ።

24 ሳኦል ሳመላ፥ “ታን ናጋራ ኦꬃድ፤ መꬍና ጎዳ አዛዙዋነ ነ ቃላ ቶቻድ። ታን አሳዉ ያዬዳ ድራዉ፥ ኡንቱንቱ ጌዳዋ ኦꬃድ። 25 ሀይ ታ ናጋራ አቶ ጋርኪ፤ ታን መꬍና ጎዳዉ ጎይናና ማላ፥ ታናና ገልጋላ ደንዳርኪ” ያጌዳ።

26 ሳመል ሳኦላ፥ “ታን ኔናና ስማደ ቢከ! ኔን መꬍና ጎዳ ቃላ እጼዳ ድራዉ፥ ኔን እስራኤልያ ቦላ ካትያ ግድያዋ መꬍና ጎዳይ እጼዳ” ያጌዳ።

27 ሳመል ሳኦላ ማታፐ ባናዉ ደንድና፥ ሳኦል አ ማዩዋ ማጫራ ኦይቂና ማዩ ፔቴዳ። 28 ሳመል ሳኦላ፥ “መꬍና ጎዳይ ሀቼ እስራኤልያ ካዉተꬃ ኔፐ ፔꬊደ ኔፐ ሎእያ ነ ሾሮ እሜዳ። 1 ሳሜላ 28:17፤ 1 ካታ. 11:30-31 29 እስራኤልያ ቦንቹ ዎርዶተና፥ ዎይ ባረ ቆፋ ላመና፤ አያዉ ጎፐ፥ ባረ ቃላ ላማናዉ እ አሳ ግደና” ያጌዳ።

30 ሳኦል ሳመላ፥ “ታን ናጋራ ኦꬃድ፤ ሽን ታ ጋድያ ጭማቱዋ ስንꬃንነ እስራኤልያ አሳ ስንꬃን ሀይ ታና ካዉሾፓርኪ፤ ታን መꬍና ጎዳዉ፥ ነ ጾሳዉ ጎይናናዳን፥ ኔን ታናና ደንዳርኪ” ያጊደ ዛሬዳ።

31 ሄዋ ድራዉ፥ ሳመል ሳኦላና እትፐ ገልጋላ ቤዳ፤ ሳኦል መꬍና ጎዳዉ ጎይኔዳ።

32 ሄዋፐ ጉይያን ሳመል፥ “አማሌቃቱዋ ካትያ አጋጋ ታኮ አህተ” ያጊደ አዛዜዳ።

አጋግ ኮኮሪደ ሳሜላኮ ዬዳ፤ “ቱሙ ሀይቁ ሀዋዳን ጫሚ!” ያጌዳ።

33 ሳመል አጋጋ፥ “ነ ማሻይ ማጫዋንታ መላ አሾዋዳን፥ ነ ዳያካ ማጫዋንቱ ግዶን መላ አታና” ያጌዳ። ሳመል አጋጋ መꬍና ጎዳ ስንꬃን ገልጋላን ሲፌዳ።

34 ሄዋፐ ጉይያን፥ ሳመል ደንዲደ፥ ራማ ካታማ ቤዳ፤ ሳኦለካ ባረ ሶ ግብኣ ቤዳ። 35 ሳመል ሀይቃና ጋካናዉ፥ ሳኦላ በአናዉ ስሚደ ላኤንꬆ ብቤና፤ ግዶፐነ፥ ሳመል ሳኦላ ድራዉ ዬኬዳ። ሳኦላ እስራኤልያ ቦላ ካተዬዳዎ መꬍና ጎዳይ ካዮቴዳ።