1 መꬍና ጎዳይ ሳመላ፥ “እስራኤልያ ቦላ እ ካትያ ግደና ማላ፥ ታን እጻክቼዳ ሳኦላ ድራዉ፥ ኔን አዉደ ጋካናዉ ዬካይ? አነ ካጭያን ዛይትያ ኩንꬃደ ከሳ፤ ታን ኔና ቤታልሄምያ እሰያኮ ኪታይ፤ ካትያ ግዳና ማላ፥ ታን አ ናናቱዋ ግዶፐ እቱዋ ዶራ ዎꬃድ” ያጌዳ።

2 ሳመል፥ “ታን ዋናደ ቦ? ሳኦል ስሲደ ታና ዎꬋና” ያጌዳ።

መꬍና ጎዳይ ሳመላ፥ “ኡሳቶ እትኖ አካ ባደ፥ ‘ታን መꬍና ጎዳዉ ያርሻናዉ ያድ’ ያጋ። 3 እሰያካ ያርሹዋ ሳኣ ጼሳ። ኔን ኦꬃናባ ታን ኔና በሳና፤ ታን ነዉ ኦድያዋ ታዉ ኦካ” ያጌዳ።

4 ሳመል መꬍና ጎዳይ ኦዴዳዋ ኦꬄዳ፤ ቤተሌመ ቤዳ። ቤተሌመ ካታማ ጭማቱ ኮኮሪደ አናና ጋከቴድኖ። ኡንቱንቱ አ፥ “ኔን ሳሮተꬃዉ ያድ?” ያጊደ ኦቼድኖ።

5 ሳመል፥ “ኤ፤ ሳሮተꬃዉ ያድ፤ ታን መꬍና ጎዳዉ ያርሻናዉ ያድ፤ ህንተንቱካ ጌይተ፤ ያቲደ ታናና ያርሹዋ ሳኣ ደንድተ” ያጌዳ፤ ቃይ እሰያነ አ ናና ጌሺደ፥ ያርሹዋ ሳኣ ኡንቱንታ ጼሴዳ።

6 ኡንቱንቱ ያርሹዋ ሳኣ ጋክያ ዎደ፥ ሳመል እሰያ ናኣ ኤልኣባ በኢደ፥ “ቱሙፐ መꬍና ጎዳይ ኦክያዌ ሀዋን መꬍና ጎዳ ስንꬃን ኤቄዳ” ያጊደ ቆፔዳ።

7 ሽን መꬍና ጎዳይ ሳመላ፥ “አ ማላ ዎይ አ ጌሳ አዱሳተꬃ ጼሎፓ፤ ታን አ እጻድ። አያዉ ጎፐ፥ ታን መꬍና ጎዳይ አሳይ ጼልያዋዳን ጼልከ፤ አሳይ ዴሙዋ ጼሌ፤ ሽን መꬍና ጎዳይ ዎዛና ጼሌ” ያጌዳ።

8 እሰይ አብናዳባ ጼሲደ፥ ሳመላ ስንꬃ አꬄዳ፤ ሳመል፥ “ቱይት፤ መꬍና ጎዳይ ሀዋካ ዶርቤና” ያጌዳ። 9 ያትና፥ እሰይ ሻማ አꬄዳ፤ ሳመል፥ “ቱይት፤ መꬍና ጎዳይ ሀዋካ ዶርቤና” ያጌዳ። 10 ሄዋዳን ኦꬂደ፥ እሰይ ባረ ናና ላፑኑዋ ሳመላ ስንꬃ አꬄዳ፤ ሽን ሳመል እሰያ፥ “መꬍና ጎዳይ ሀዋንታ ዶርቤና” ያጌዳ። 11 ሄዋ ድራዉ፥ እ እሰያ፥ “ነዉ ደእያ ናናይ ሀዋንቱ ጻላሌየ?” ያጊደ ኦቼዳ።

እሰይ፥ “ኡባፐ ቴፋ ናአይ አቴዳ፤ ሽን እ ዶርሳቱዋ ሄሜ” ያጌዳ።

ሳመል፥ “ኪታደ አ አህሳ፤ እ ያና ጋካናዉ ኑን ያርሾኮ” ያጌዳ። 12 እሰይ ኪቲደ፥ ናኣ አህሴዳ፤ ሄ ናአይ አርሳ፤ አይፍያና ሎእያ ማላ ሎአ።

መꬍና ጎዳይ ሳመላ፥ “ደንዳ ኤቃደ ኦካ፤ ሀዌ አ” ያጌዳ። 13 ሳመል ካጭያ ዛይትያ አኪደ፥ አ እሻቱ ስንꬃን ዳዊታ ኦኬዳ። ሄ ጋላሳፐ ዶሚደ፥ መꬍና ጎዳ አያናይ ዳዊታ ቦላን ዎልቃፐ ዎꬌዳ። ሄዋፐ ጉይያን፥ ሳመል ደንዲደ፥ ራማ ካታማ ቤዳ።

14 መꬍና ጎዳ አያናይ ሳኦላፐ ሻከቴዳ፤ መꬍና ጎዳፐ ኪተቴዳ ኢታ አያናይ ሳኦላ ኡንኤꬄዳ። 15 ሳኦላ ቆማቱ አ፥ “ጾሳፐ ኪተቴዳ ኢታ አያናይ ኔና ኡንኤꬄ። 16 ኑ ጎዳይ ዲꬃ ሎይꬅ ዲጽያ አሳ ኮያና ማላ፥ ባረ ቆማቱዋ፥ ሀዋን ደእያዋንታ አዛዞ። ጾሳፐ ኪተቴዳ ኢታ አያናይ ኔና ኦይቂያ ዎደ፥ ሄ ብታን ዲꬃ ዲጻና፤ እ ዲጽና ነዉ ኬካና” ያጌድኖ።

17 ሳኦል ባረ ቆማቱዋ፥ “ዲꬃ ሎይꬂደ ዲጽያ አሳ ኮዪደ፥ ታዉ አኪደ ዪተ” ያጌዳ።

18 ቆማቱዋፐ እቱ ሳኦላ፥ “በአ፤ ቤታልሄምያ እሰያዉ ዲꬃ ሎይꬂደ ዲጽያ እት ናአይ ደኤ። ሄ ናአይ ጻላነ ቶራንቻ አሳ፤ ሃሳያዉ ጭንጫነ ማላ ሎአ አሳ፤ ቃይ መꬍና ጎዳይ አናና እትፐ ደኤ” ያጌዳ።

19 ያትና፥ ሳኦል እሰያኮ ኪቲደ፥ “ነ ዶርሳ ሄምያ ነ ናኣ ዳዊታ ታዉ የዳ” ያጌዳ። 20 ሄዋፐ ጉየ እሰይ ኡክꬃ፥ ኦጎሩዋ ዎይንያ ኤሳነ ጋሎ ዶርሳ ማራ እቱዋ ሀርያን ጫኒደ፥ ባረ ናኣ ዳዊታና ሳኦላዉ የዴዳ።

21 ዳዊተ ሳኦላኮ ዬዳ፤ አ ኪታን ገሌዳ። ሳኦል ዳዊታ ሎይꬅ ዶሴዳ፤ ዳዊተ ሳኦላዉ ኦላ ሚሻ ኦይቂያዋ ግዴዳ። 22 ያትና፥ ሳኦል እሰያዉ፥ “ዳዊተ ታዉ ኦꬂደ ጋምእሾ፤ ታን አ ዶሳድ” ያጊደ ኪቴዳ።

23 ሄዋፐ ስምና፥ ጾሳፐ ኪተቴዳ ኢታ አያናይ ሳኦላ ኦይቂያ ዎደ ኡባን፥ ዳዊተ ዲꬃ አኪደ ባረ ኩሽያን ዲጸ፤ ኢታ አያናይ አ የድያ ድራዉ፥ ሳኦላዉ ኬኬነ እ ፓጼ።