1 ፕልስጼማ አሳቱ ባረንቱ ኦላንቻቱዋ ይሁዳን ደእያ ሶኮ ጌተትያ ሳኣ ኦላዉ ሺሼድኖ፤ ሶኮፐነ አዜቃፐ ግዱዋን ደእያ ኤፈስጻሚማ ጌተትያ እት ሳኣን ሺቅ ኡቴድኖ። 2 ሳኦልነ እስራኤላቱ ኤላ ጌተትያ ዛንጋራን ሺቅ ኡቴድኖ፤ ፕልስጼማ አሳቱዋና ኦለታናዉ ሳልፕያን ከሴድኖ። 3 ፕልስጼማ ኦላንቻቱ እት ደርያን ሳልፕና፥ እስራኤላቱካ ሀራ ደርያን ሳልፔድኖ፤ ኡንቱንቱ ላኡዋ ዛንጋራይ ሻኬ።

4 ጋተ ካታማን ደእያ፥ ጎልያዳ ጌተትያ እት ቶራ ቃራ ብታኒ ፕልስጼማቱ ሺቄዳ ሳኣፐ ዬዳ፤ አ ጌሳይ ኡሱፑን ዋꬋነ ታካ። 5 እ እሻታማነ ላፑን ኪሎ ግራመ ዴጽያ ናሃስያ ብራታ ኮትያ ማዬዳ፤ ቃይ ናሃስያ ብራታ ቆጲያ ባረ ሁጲያን ዎꬄዳ። 6 ናሃስያ ብራታ ጋምባልያ ባረ ገድያን አꬄዳ፤ ባረ ሀሽያን ናሃስያ ብራታፐ ቆጸቴዳ ጽንቃ ቶኬዳ። 7 አ ቦድያ ቶማይ ሸማይንያ ዎንዳራሽያ ኬሻ፤ ቦድያ አይፊ ላፑን ኪሎ ግራመ ዴጼ፤ ጎንዳልያ ቶኬዳ እት ብታኒ አ ስንꬃን ሀመቴ።

8 ጎልያደ ኤቂደ፥ ቃላ ꬎቁ ኦꬂደ፥ እስራኤልያ ኦላንቻቶ ሀዋዳን ያጊደ ጬቄዳ፤ “ህንተንቱ ዋናና ጊደ ኦላዉ ሳልፔድቴ? ታን ፕልስጼማ አሳ ግድክታ? ቃይ ህንተንቱ ሳኦላ ቆማቱዋ ግድክቴ? አነ ህንተንቱ ግዶፐ እት አሳ ዶርተ፤ ሄ ብታኒ ታኮ ዎꬎ። 9 ሄ ብታኒ ታናና ኦለቲደ ታና ዎꬎፐ፥ ኑን ህንተንቱ ቆማቱዋ ግዳና፤ ሽን ታን አ ጾናደ ዎꬎፐ ህንተንቱ ኑ ቆማቱዋ ግዳናነ ኑዉ ሞደታና” ያጌዳ። 10 ቃይካ ሄ ፕልስጼመ ብታኒ፥ “ታን ሀቼ እስራኤልያ ኦላንቻቱዋ ናሳይ፤ ታዉ እት አሳ እምተ፤ አነ ላኡ ኦለቴቶ!” ያጌዳ። 11 ሳኦልነ እስራኤላቱ ፕልስጼምያ ቃላ ስሲደ፥ ዬላቴድኖነ ዳሮፐ ያዬድኖ።

12 ዳዊተ ይሁዳ ጋድያን ቤታልሄመን ደእያ ኤፍራታ እሰያ ናኣ። እሰያዉ ሆስፑን አቱማ ናናይ ደኢኖ፤ ሳኦል ካትያ ግዲደ ደእያ ዎደ፥ እሰይ ሎይꬅ ጭሜዳነ ዳሮ ደኤዳ አሳ። 13 እሰያ አቱማ ናናይ ባይራትያዋንቱ ሄዛቱ ሳኦላ ካሊደ ኦላ ቤድኖ፤ ኦላ ቤዳ አ ሄዙ ናናቱዋ ሱንꬃይ ሀዋ፤ ባይራይ ኤልኣባ፤ ቴፋይ አምናዳባ፤ ሄዘንꬁ ሻማ። 14 ዳዊተ ናናቱዋ ኡባፐ ቴፋ። ባይራ ሄዙ ናናይ ሳኦላ ካሌድኖ፤ 15 ሽን ዳዊተ ባረ አዉዋ ዶርሳቱዋ ሄማናዉ ሳኦላ ማታፐ ቤተሌመ ስመረቴ።

16 ሄ ፕልስጼም ኦይታሙ ጋላሳ ጉራነ ኦማርስ ዪደ፥ እስራኤላቱዋ ናሴ።

17 እት ጋላስ እሰይ ባረ ናኣ ዳዊታዉ ሀዋዳን ያጌዳ፤ “ሀ ጺጸቴዳ ትሻፐ ታሙ ኪሎ ግራምያነ ሀ ታሙ ኡክꬃቱዋ አካደ፥ ነ እሻቶ አፋደ ነ እሻቱ ሺቄዳ ሳኣ ኤለካ ጋꬃ። 18 ሀ ታሙ ኑካ ፕላቱዋካ ኡንቱንቱ ሻላቃዉ አፋ፤ ነ እሻቱ ዋን ደእንቶ በኣደ፥ ኡንቱንቱ ሳሮ ደእያዎ ማላታ ኡንቱቱፐ አካደ ያ። 19 ካትያ ሳኦል፥ ነ እሻቱዋነ እስራኤልያ አሳይ ኡባይ፥ ፕልስጼማ አሳቱዋና ኦለቲደ፥ ኤላ ዛንጋራን ደኢኖ” ያጌዳ።

20 ዳዊተ ወንታ ጉራና ደንዲደ ዶርሳ ዉድያ ሀራ አሳ ሄንꬂደ፥ እሰይ አዛዜዳዋ ጫን አኪደ ቤዳ። እስራኤልያ ኦላንቻቱ ባረንቱ ቃላ ꬎቁ ኦꬂደ ጋርማሚደ ኦላዉ ሳልፕሽን፥ ዳዊተ ጋኬዳ። 21 እስራኤልያ አሳቱነ ፕልስጼማ አሳቱ እቱ እቱዋኮ ጼሊደ ሳልፔድኖ። 22 ዳዊተ ባረ አሄዳ ሚሻ ሽንቃ ናግያዋ ኩሽያን ዎꬂደ፥ ኦላ ሳልፕያ ዎጽ ቢደ፥ ባረ እሻቱዋ ሳሮቴዳ። 23 ዳዊተ ባረ እሻቱዋና ሃሳይሽን፥ ጋተፐ ዬዳ ቶራ ቃራይ፥ ፕልስጼምያ ጎልያደ ባረ ሳልፕያፐ ጋጻ ከሲደ፥ ሀሮደዋዳንካ እስራኤላቱዋ ናሴዳ፤ እ ናስያዋ ዳዊተ ስሴዳ። 24 እስራኤልያ አሳይ ኡባይ ሄ ብታንያ በኤዳ ዎደ፥ ሎይꬅ ያዪደ አፐ ባቃቴድኖ።

25 እስራኤልያ አሳይ እቱ እቱዋ፥ “ሀ ከስያ ብታንያ በኤድቴ? እ ቱሙዋፐ እስራኤልያ ናሳናዉ ከሴዳ! ሀ ብታንያ ዎꬍያ ኡራዉ ካትያ ሳኦል ዳሮ አቁዋ እማና፤ ቃይ ባረ ናቶካ አዉ እማና፤ አ አዉዋ ጎልያ አሳይ እስራኤላን ካትያ ጊራካ ጊረና” ያጌድኖ።

26 ዳዊተ ባረ ማታን ኤቄዳ አሳ፥ “ሀ ፕልስጼምያ ዎꬊደ፥ ሀ ዬላ እስራኤልያፐ ቁጭያ ኡራዉ አያይ ኦሰታኔ? ሀ ቃጻረትቤና ፕልስጼም፥ ደኡዋ ጾሳ ኦላንቻቱዋ ናስያዌ እ ኦኔ?” ያጊደ ኦቼዳ።

27 ሽን ኡንቱንቱ አ፥ “ሀ ብታንያ ዎꬍያ ኡራዉ ሀዌ ሀዌ ኦሰታና” ያጊደ ካሰዋዳንካ አዉ ዛሬድኖ።

28 ዳዊተ አሳና ሃሳይያዋ አ እሻይ ኡባፐ ባይራይ ኤልኣብ ስሲደ፥ ዳዊታ ቦላ ሀንቁዋ ኤጽ ከሴዳ፤ “ኔን ሀ ሳኣ አያዉ ያድ? ሄ አማሬዳ ዶርሳቱዋ ዎራን ኦናና የጋድ? ነ ኦቶሩዋነ ነ ዎዛና እታተꬃ ታን ኤራይ፤ ኔን ኦላ በአናዉ ያዳ” ያጌዳ።

29 ዳዊተ፥ “ታን ሀእ አይ ኦꬃድታ? ሀራይ አቶፐ ሃሳያናዉካ ዳንዳይክታ?” ያጌዳ። 30 ዳዊተ ባረ እሻ አጊደ፥ ሀራ አሳኮ ስሚደ፥ ካሰዋዳንካ ኦቼዳ፤ አሳይ አዉ ካሰዋዳንካ ዛሬዳ።

31 ዳዊተ ሃሳዬዳዋ ስሴዳ አሳቱ ሳኦላዉ ኦዴድኖ፤ ሳኦል ዳዊታ ጼስሴዳ። 32 ዳዊተ ሳኦላ፥ “ሀ ብታንያ ጋሱዋን ኦ ዎዛናይካ ያዮፖ፤ ታን ነ ቆማይ ባደ፥ ሀ ፕልስጼምያና ኦለታና” ያጌዳ።

33 ሳኦል ዳዊታ፥ “ሀ ፕልስጼምያና ኔን ኦለታናዉ ዳንዳያካ፤ አያዉ ጎፐ፥ ኔን ናኣ፤ ሽን ናአተꬃፐ ዶሚደ፥ እ ኦለቲደ ድጬዳ አሳ” ያጌዳ።

34 ሽን ዳዊተ ሳኦላ፥ “ታን ነ ቆማይ ታ አዉዋ ዶርሳቱዋ ሄማይ፤ ጋሙ ዎይ ባባንꬃ ማላትያ ዶአይ ዪደ ዉድያፐ ዶርሳ ኦይቂያ ዎደ፥ 35 አ ካላደ ታን ባደ አ ዶናፐ ዎꬃ አካይ፤ ታኮ ስምያ ዎደ፥ ቡቻ ኦይቃደ፥ ሾጫ ዎꬋይ። 36 ታን ነ ቆማይ ጋሙዋነ ባባንꬃ ዎꬋድ፤ ሀ ቃጻረትቤና ፕልስጼም ደኡዋ ጾሳ ኦላንቻቱዋ ናሴዳ ድራዉ፥ እካ ኡንቱንቱፐ እቱዋዳን ሀናና። 37 ጋሙዋነ ባባንꬃ ጹጉንꬃፐ ታና አሼዳ መꬍና ጎዳይ ሀ ፕልስጼምያ ኩሽያፐካ አሻናዋ” ያጌዳ።

ሳኦል ዳዊታ፥ “ባ፤ መꬍና ጎዳይ ኔናና ግዶ” ያጌዳ።

38 ሄዋፐ ጉይያን፥ ሳኦል ባረ ማዩዋ ዳዊታ ማይዜዳ፤ ዳዊታ ሁጲያን ናሃስያ ብራታ ቆጲያ ዎꬄዳ፤ ናሃስያ ብራታ ኮትያካ ዳዊታ ማይዜዳ። 39 ዳዊተ ባረ ኦላ ማዩዋ ቦላ ማሻ ዳንጬዳ፤ ሀመት በኤዳ፤ ሽን ዳንዳይቤና፤ አያዉ ጎፐ፥ ሄዋ ማላ ማዩዋ ማይ ኤረና።

ሄዋፐ ጉይያን፥ ዳዊተ ሳኦላ፥ “ታን ሀዋ ማላ ማዩዋ ማያደ ሜዘታቤና ድራዉ፥ ሀዋና ባናዉ ዳንዳይከ” ያጊደ ኦላ ማዩዋ ኡባና ቃሬዳ። 40 ዳዊተ ባረ ሄንꬃ ጋትማ ኦይቂደ፥ ሻፋፐ ሙይላ ሹቻ እቼሻቱዋ ማጽ አኪደ፥ ባረ ቃርጪቱዋን የጌዳ፤ ባረ ያምባርሻ ኦይቂደ፥ ጎልያደኮ ማቴዳ።

41 ጎልያደካ ዳዊታኮ ሺቅ ሺቂደ ማታተዳ፤ ጎንዳልያ ቶክያ ብታኒ አ ስንꬃን ደኤ። 42 እ ዳዊታ ትሽ ኦꬅ ጼሊደ፥ ዳዊተ ናኣ ግዴዳዋነ ማላ ሎአነ አርሳ ግዴዳዋ በኢደ ካꬌዳ። 43 ዳዊታ፥ “ኔን ጋትማ ኦይቃደ ታ ቦላ ያናዉ፥ ታና ካና ጋድየ?” ያጌዳ፤ ባረ ጾሳቱዋ ሱንꬃን ዳዊታ ሸቄዳ። 44 እ ቃይካ ዳዊታ፥ “ሃያ፤ ታን ነ አሹዋ ሳሉዋ ካፎቶነ ሳኣ ዶአቶ እማና” ያጌዳ።

45 ዳዊተ ፕልስጼምያ፥ “ኔን ማሻ፥ ቦድያነ ጽንቃ ኦይቃደ ታ ቦላ ያሳ፤ ሽን ታን ኡባፐ ዎልቃማ መꬍና ጎዳ ሱንꬃን፥ ኔን ናሴዳ እስራኤልያ ኦላንቻቱ ጾሳ ሱንꬃን ነ ቦላ ያይ። 46 ሀቼ መꬍና ጎዳይ ኔና ታ ኩሽያን አꬅ እማና፤ ታን ኔና ሾጫና፤ ነ ቆꬍያካ ሙጫ ኦላና። ፕልስጼማ ኦላንቻቱዋ አሃ ሳሉዋ ካፎቱዋዉነ ሳኣ ዶአቶ ታን ሀቼ እማና፤ ያትና፥ እስራኤላን ጾሳይ ደእያዋ ሳኣን ደእያ አሳይ ኡባይ ኤራና። 47 መꬍና ጎዳይ ባረ አሳ አሻናዉ ቶራ ዎይ ማሻ ኮየናዋ ሀዋን ሺቄዳ አሳይ ኡባይ ኤራና፤ አያዉ ጎፐ፥ ኦላይ መꬍና ጎዳዋ። እ ህንተንታ ኡባ ኑ ኩሽያን አꬅ እማና” ያጌዳ። 48 ፕልስጼም ደንዲደ ቢደ፥ ዳዊታና ኦላ ጋከታናዉ ሺቄዳ ዎደ፥ ዳዊተ ኦለትያ ኦላዉ ኤለካ ዎጼዳ። 49 ዳዊተ ባረ ቃርጪትያ ግዶ ኩሽያ የዲደ፥ እት ሹቻ አኪደ ያምባርሻን ዎꬂደ ያምባሪደ፥ ፕልስጼምያ ዴሙዋ ጫዴዳ። ሹቻይ ብታንያዉ ዴሙዋ ግዶ ገሌዳ፤ ያትና፥ ብታኒ ቢታን ጉፋኒደ ኩንዴዳ።

50 ያቲደ ዳዊተ ፕልስጼምያ ያምባርሻንነ ሹቻን ጾኔዳ። ዳዊተ ባረ ኩሽያን ማሻይ ባይናን ፕልስጼምያ ጫዲደ ዎꬌዳ።2 ሳሜላ 21:19 51 ዳዊተ ዎጺደ ቢደ፥ አ ቦላ ከስ ኤቂደ፥ ፕልስጼምያ ማሻ ኦይቂደ ሾኩዋ ግዶፐ ሾድ አኪደ፥ አ ቆꬍያ ሙጨዳ። 1 ሳሜላ 21:9

ፕልስጼማ አሳቱ ባረንቱ ቶራ ቃራይ ሀይቄዳዋ በኤዳ ዎደ ባቃቴድኖ። 52 እስራኤልያ አሳይነ ይሁዳ አሳይ ደንዲደ ዋሲደ፥ ፕልስጼማ አሳቱዋ ጋተነ ኤቅሮና ካታማቱዋ ፐንገቱዋ ጋꬃናሽን የደርሴድኖ፤ ፕልስጼማ አሳ አሃይ ጋተነ ኤቅሮና ጋካናዉ፥ ሻእራይማ አፍያ ኦግያን ኡባን ኩንዴዳ። 53 እስራኤልያ አሳይ ፕልስጼማ አሳቱዋ የደርስ ስሚደ፥ ኡንቱንቱ ሺቄዳ ሳኣ ቦንቄድኖ። 54 ዳዊተ ፕልስጼምያ ቆꬍያ የሩሳላመ አሄዳ፤ ሽን ፕልስጼምያ ኦላ ሚሻ ባረ ዱንካንያ ግዶን ዎꬄዳ።

55 ዳዊተ ፕልስጼምያኮ ቢሽን፥ ሳኦል በኤዳ ዎደ፥ ኦላንቻቱ ካፑዋ አባኔራ፥ “አባኔራ፥ ሀ ዎዳላይ ኦ ናኤ?” ያጊደ ኦቼዳ።

አባኔር ሳኦላ፥ “ካዎ፥ ነ ሸምፑ ኤሮ ታን አ ኤርከ” ያጊደ ዛሬዳ።

56 ካት ዛሪደ፥ “ያቶፐ ሀ ዎዳላይ ኦ ናኤንቶነ አነ ኦቻደ ጋካ” ያጌዳ።

57 ዳዊተ ፕልስጼምያ ዎꬊደ ስሜዳዋፐ ጉይያን፥ ሙጬዳ ፕልስጼምያ ሁጲያ ኦይቄዳ ሳና፥ አባኔር አ ሳኦላ ስንꬃ አኪደ አፌዳ። 58 ሳኦል አ፥ “ዎዳላዉ፥ ኔን ኦ ናኤ?” ያጊደ ኦቼዳ።

ሽን ዳዊተ፥ “ታን ቤታልሄምያ ነ ቆማ እሰያ ናኣ” ያጊደ ዛሬዳ።