1 ዳዊተ ሳኦላና ሃሳይያዋ ዉርሴዳዋፐ ጉይያን፥ ሳኦላ ናኣ ዮናታን ዳዊታና ዳሮ ማታ ዳቦተꬃ መꬌዳ፤ ዮናታን ዳዊታ ባረ ሁጲያዳን ሲቄዳ። 2 ሄ ጋላሳፐ ዶሚደ፥ ሳኦል ዳዊታ ባረናና ዎꬄዳ፤ ባረ አዉዋ ሶ ጉየ ስመናዳን ድጌዳ። 3 ዮናታን ዳዊታ ባረ ሁጲያዳን ሲቅያ ድራዉ፥ አናና ቃላ ጫቁዋ ጫቀቴዳ። 4 ዮናታን ባረ ማዬዳ ካባ ቃሪደ፥ ባረ ኦላ ማዩዋና፥ ባረ ማሻና፥ ባረ ዎንዳፍያናነ ባረ ሳቂያና እትፐ ዳዊታዉ እሜዳ።

5 ሳኦል ኪቴዳ ኡባባ ዳዊተ ፖሊደ ኦꬅያ ድራዉ፥ ሳኦል ዳዊታ ባረ ኦላንቻቱ ግዶን ጋዳዋ ሱንꬄዳ፤ ሄዌ አሳ ኡባካ አ ኦላንቻቱዋካ ናሸቼዳ።

6 ዳዊተ ፕልስጼምያ ጎልያዳ ዎꬍና አሳይ ሶ ስምያ ዎደ፥ ማጫ አሳይ ናሸቻ የꬃ የጺድነ ዱሪደ፥ ካባሩዋ ባቂደነ ዲꬃ ዲጺደ፥ ካትያ ሳኦላ ሞካናዉ እስራኤልያ ካታማቱዋ ኡባቱዋፐ ከሴዳ። 7 ማጫዋንቱ ዱሪደ፥

8 ሳኦል ሀ የꬃይ ኢትና፥ ሎይꬅ ሀንቀቴዳ፤ ሳኦል ባረ ቆፋን፥ “ዳዊታ፥ ‘ታሙ ሻኣ ዎꬌዳ’ ጊደ፥ ታና፥ ‘እት ሻኣ ዎꬌዳ’ ጌድኖ፤ ያትና፥ ካዉተꬃፐ አትና አዉ አዬ አቴዳዌ?” ያጌዳ። 9 ሄ ጋላሳፐ ዶሚደ፥ ሳኦል ዳዊታ ቃናተ አይፍያን ጼሌዳ።

10 ዎንተꬃ ጋላሳ ኢታ አያናይ ጾሳፐ ኪተቲደ፥ ሳኦላ ኦይቄዳ፤ ሳኦል ባረ ሶን ኤሉመቴዳ። ዳዊተ ሀሮደዋዳን ዲꬃ ዲጼዳ፤ ሳኦል ቶራ ባረ ኩሽያን ኦይቂ ኡቴዳዌ፥ 11 “ዳዊታ ጎዳና ጋꬃደ ስካድ” ጊደ ቶራ ጾንጌዳ። ሽን ዳዊተ ላኡ ጌደ አፐ ሀሌዳ።

12 መꬍና ጎዳይ ሳኦላ አጊደ ዳዊታና ደእያ ድራዉ፥ ሳኦል ዳዊታዉ ያዬዳ። 13 ሄዋ ድራዉ፥ ሳኦል ዳዊታ ባረ ስንꬃፐ ሃሲደ፥ ሻአ ኦላንቻቶ ካፑዋ ከሴዳ። ያትና፥ ዳዊተ ባረ ጭታ ኦላን ካለꬄዳ። 14 መꬍና ጎዳይ ዳዊታና እትፐ ደእያ ድራዉ፥ እ ኦꬅያባይ ኡባይ አዉ እንጀቴዳ። 15 ዳዊተ ኦꬅያባይ ኡባይ ሎይꬅ እንጀትያዋ ሳኦል በኢደ፥ አዉ ሎይꬅ ያዬዳ። 16 ሽን ዳዊተ ኡንቱንታ ኦላን ካለꬅያ ድራዉ፥ እስራኤላነ ይሁዳ አሳይ ኡባይ አ ሲቄድኖ።

17 ሄዋፐ ጉይያን፥ ሳኦል ዳዊታ፥ “ታ ናታ ባይራታ መራባ ሀናሽ፤ ታን ኦ ነዉ ማቸ ኦꬃደ እማና፤ ኔን ምኖ አሳ ግዳ፤ ያታደ መꬍና ጎዳ ኦላ ኦለታ” ያጌዳ። ሳኦል ባረ ዎዛናን፥ “ታን አ ቦችከ፤ ፕልስጼማ አሳቱ አ ዎꬋና” ያጊደ ቆፔዳ። 18 ሽን ዳዊተ ሳኦላ፥ “ካትያና ቦሎታናዉ ታን ኦኔ? ታ ሶ አሳይካ አዬ? ዎይ ታ አዉዋ ያራይካ እስራኤልያ አሳ ግዶን አዬ?” ያጌዳ። 19 ሽን ሳኦላ ናታ መራባ ዳዊታው እመትያ ዎዲ ጋክና፥ ማሆላ ካታማፐ ዬዳ፥ አድሪኤላ ጌተትያ እት ብታንያዉ እመታዱ።

20 ግዶፐነ፥ ሳኦላ ናታ ሚካላ ዳዊታ ሲቃዱ፤ ሳኦል ሄዋ ስሲደ ናሸቴዳ። 21 እ ባረ ዎዛናን፥ “አዉ ጲረ ግዳና ማላነ ፕልስጼማ አሳቱ አ ዎꬋና ማላ፥ ታን ሚካሎ ዳዊታዉ እማና” ያጊደ ቆፔዳ። ሄዋ ድራዉ፥ ሳኦል ዳዊታ፥ “ኔን ታናና ቦሎታናዉ ሀዌ ነዉ ላኤንꬆ ካጫ” ያጌዳ።

22 ቃይካ ሳኦል ባረ ቆማቱዋ ጼሲደ፥ “ካቲ ኔናን ናሸቴዳ፤ አ ቆማቱ ኡባይካ ኔና ዶሲኖ፤ ሀእ ኔን ካትያና ቦሎታ ያጊደ ጹራን ዳዊታዉ ኦድተ” ያጊደ አዛዜዳ።

23 ኡንቱንቱ እ ጌዳዋዳንካ ዳዊታዉ ኦዴድኖ፤ ሽን ዳዊተ ኡንቱንቶ፥ “ካትያና ቦሎታናዌ ህንተንቶ ላፋባ ማላቲየ? ታን ህዬሳነ ኤረተና አሳ” ያጊደ ዛሬዳ።

24 ሳኦላ ቆማቱ ዳዊተ ጌዳዋ ሳኦላዉ ኦዴድኖ። 25 ሳኦል ባረ ቆማቱዋ፥ “ዳዊታው ሀዋዳን ያጊደ ኦድተ፤ ‘ካቲ ባረ ሞርከቱዋ ሀሉዋ ከሳናዉ ጼቱ ፕልስጼማ አሳቱዋ ቃራቱዋፐ አትና፥ ኔፐ ሀራ ጭሎሻ ኮየና’ ያግተ” ያጌዳ። ሳኦል ሄዋ ጌዳዌ፥ “ዳዊተ ፕልስጼማቱዋ ኩሽያን ሀይቆ” ጊደ ቆፔዳ ድራሳ።

26 ሳኦላ ቆማቱ ሳኦል ጌዳዋ ዳዊታዉ ኦዴድኖ፤ ካትያና ቦሎትያዌ ዳዊታ ናሸቼዳ። ሄዋ ድራዉ፥ ቡላቻ ጋላሳይ ጋካናፐ ካሰቲደ፥ 27 ዳዊተነ አ አሳይ ደንዲደ ቤድኖ፤ ፕልስጼማቱዋፐ ላኡ ጼቱ አሳ ዎꬌድኖ። ዳዊተ ካትያና ቦሎታናዉ ሄ አሳቱዋ ቃራቱዋ አሂደ፥ ካዎ ኩመንꬃ ፓይዲደ ሼዳ። ሄዋ ድራዉ፥ ሳኦል ባረ ናቶ ሚካሎ ዳዊታዉ እሜዳ።

28 ሳኦል መꬍና ጎዳይ ዳዊታና እትፐ ደእያዋነ አ ናታ ሚካላ ዳዊታ ሲቅያዋ ኤሬዳ። 29 ሄዋ ድራዉ፥ ሳኦል ዳዊታዉ ካሰዋፐ አꬂደ ያዬዳ። ሳኦል ባረ ደኡዋ ላይꬃ ኡባን ዳዊታዉ ሞርከ ግዴዳ።

30 ፕልስጼመ ካፓቱ ኦለታናዉ ከስያዋ አግበይክኖ፤ ሽን ኦላዉ ከሴዳ ፓይዱዋ ኡባን ሳኦላ ጋዳዋቱ ኡባፐ ጾኑ ሀንያዌ ዳዊተሳ፤ ሄዋ ድራዉ፥ እ ኤረቴዳ አሳ ግዴዳ።