1 ሄዋፐ ጉይያን፥ ዳዊተ ራማን ደእያ ናዮታፐ ባቃቲደ፥ ዮናታናኮ ቤዳ፤ ዮናታና፥ “ታን አይ ኦꬃድታ? ታ ባይዙ አዬ? ነ አዉ ታና ዎꬋናዉ ኮይያዌ፥ ታን አ ዋታ ቆሂኔ?” ያጊደ ኦቼዳ።

2 ዮናታን፥ “ሄዌ ኔፐ ሃኮ! ኔን ሀይቃካ። በአ፥ ጉꬃባ ግዲና፥ ግታባ ግዲና፥ ታ አዉ ታዉ ኦደናን ደኢደ አያነ ኦና። ታ አዉ ሀ የዉዋ ታፐ አያዉ ቆስ? ሄዋዳን ግደና!” ያጊደ ዛሬዳ።

3 ሽን ዳዊተ ዮናታና፥ “ኔን ታና ሲቅያዋ ነ አዉ ሎይꬅ ኤሬዳ፤ ነ አዉ ባረዉ፥ ‘ዮናታን ሀ የዉዋ ኤሮፐ እ ካዮታና!’ ያጌዳ። ሽን መꬍና ጎዳይ ኤሮ፤ ነ ሸምፑ ኤሮ፤ ታፐነ ሀይቁዋፐ ግዱዋን መጽ እት ታንጉ አቴዳ” ያጊደ ጫቄዳ።

4 ዮናታን፥ “ኔን ኪተታ ጌዳዋ አያነ ታን ነዉ ኦꬃና” ያጌዳ።

5 ሄዋፐ ጉየ ዳዊተ ሀዋዳን ያጌዳ፤ “ስሳ፥ ዎንት አግና ጼሩዋ ቦንችያ ጋላሳ፤ ታን ካትያና ቁማ ማና ኮሼ። ሽን ታን ባደ ዎንት ፔሽና ኦማርስ ጋካናዉ፥ ጋደን ቆሰታና። ፓይ. 28:11 6 ነ አዉ ታና ኮዮፐ፥ ኔን አ፥ ‘ዳዊተንቱ ሶ አሳይ ኡባይ ላይꬃ ያርሹዋ ያርሽያ ዎደ ግድያ ድራዉ፥ ቤተሌመ ባረ ካታማ ኤለካ ባና ጊደ፥ ታና ኦቺደ ቤዳ’ ያጋ። 7 ሄዋፐ ጉየ እ፥ ‘ያኖፐ ሎአ’ ያጎፐ፥ ታዉ ነ ቆማዉ ሳሮ፤ ሽን እ ሀንቀቶፐ፥ እ ታና ቆሀናዉ ባረ ቆፋ ቃቼዳዋ ሄዋን ኤራ። 8 ኔና ግዶፐ፥ ኔን ታዉ ነ ቆማዉ ሎኦባ ኪተታ፤ አያዉ ጎፐ፥ ኔን ታናና ነ ቆማና መꬍና ጎዳ ስንꬃን ጫቀታዳ። ሽን ታናን ባይዙ ደኦፐ፥ ታና ኔን ዎꬋ! ነ አዎ ታና አꬃ እሞፓ” ያጌዳ።

9 ዮናታን፥ “ሄዌ ኔፐ ሃኮ! ታ አዉ ኔና ቆሀናዉ ባረ ቆፋ ቃቼዳዋ ታን ኤሬደንቶ፥ ነዉ ኦድክታየ?” ያጊደ ዛሬዳ።

10 ሄዋፐ ጉየ ዳዊተ፥ “ነ አዉ ነዉ ኢታ ዛሩዋ ዛሮፐ፥ ታዉ ኦዳናዌ ኦኔ?” ያጊደ ኦቼዳ።

11 ዮናታን፥ “ሃያ፤ ጋደ ቦይተ” ያጌዳ፤ ያትና፥ ላአቱካ ጋደ ቤድኖ።

12 ዮናታን ዳዊታ ሀዋዳን ያጌዳ፤ “መꬍና ጎዳይ እስራኤልያ ጾሳይ ኤሮ፥ ታን ዎንት ፔሽና ታ አዉዋ ቆራና። እ ነዉ ሎኡዋ ቆፖፐ፥ ታን ኪታደ ኔና ኤርሳና። 13 ሽን ታ አዉ ኔና ቆሀናዉ ኮዬዳዋ ግዶፐ፥ ቃይ ሄዋ ታን ኔና ኤርሰናን አጎፐነ ኔና ሳሩዋን ሞይዛ የደናን አጎፐ፥ መꬍና ጎዳይ ታዉ ኢቶ! መꬍና ጎዳይ ታ አቡና እትፐ ግዴዳዋዳን ኔናናካ እትፐ ግዶ። 14 ታና አሳይ ዎናዳን ታ ደኡዋ ላይꬃ ኡባን አገና ሲቁዋ፥ መꬍና ጎዳዋ ማላ ታዉ ኪተታ። 15 ቃይ ጎዳይ ዳዊታ ሞርከቱዋ ኡባ ጋድያፐ ꬎቆሌዳ ዎደካ፥ ታ ጎልያ አሳፐ ነ ሲቁዋ ሃሶፓ” ያጌዳ። 2 ሳሜላ 9:1

16 ሄዋ ድራዉ፥ ዮናታን፥ “መꬍና ጎዳይ ዳዊታ ሞርከቱዋ ኦቾ” ያጊደ ዳዊታ ጎልያ አሳና ቃላ ጫቁዋ ጫቀቴዳ። 17 ዮናታን ዳዊታ ባረ ሁጲያዳን ሲቄዳ ድራዉ፥ “ኔን ታና ቱሙ ሲቅያዋ ቆንጭሳናዉ አነ ታዉ ላኤንꬁዋ ጫቃ” ያጊደ ጫቂሴዳ።

18 ሄዋፐ ጉይያን፥ ዮናታን ዳዊታ፥ “ዎንታ አግና ጼሩዋ ቦንችያ ጋላሳ፤ ኔን ኡትያ ሳአይ መላ ደኦፐ፥ ኔን ባይናዌ ኤረታናዋ። 19 ዎንት ፔሽና ኦማርስ ባደ፥ ሀ መቱ ዶሜዳ ጋላስ ኔን ቆሰቴዳ ሳኣን ቆሰታ፤ ቆሰታደ ኤጸላ ግያ ዛላፐ ጉየና ታካሻ። 20 ታን አየንቶ ጾንግያዋ ማላታደ፥ አ ምይያና ሄዙ ፖꬃቱዋ ዎንዳፍያን ዱካና። 21 ሄዋፐ ጉይያን፥ ታ ቆማ፥ ‘ባደ ዙበቱዋ ኮያ’ ያጋደ ኪታና፤ ታን አ ኪታደ፥ ‘በአ፤ ዙበቱ ኔፐ ሀ ባጋና ደኢኖ፤ ታኮ አካደ ያ’ ያግያዋ ግዶፐ፥ ሃያ፤ አያዉ ጎፐ፥ መꬍና ጎዳይ ኤሮ፥ ነዉ ሳእ ሳሮ፤ ኔና አያይነ ቦቼና። 22 ሽን ታን ታ ቆማ፥ ‘በአ፤ ዙበቱ ኔፐ ህን ባጋና ደኢኖ’ ያግያዋ ግዶፐ፥ ኔን አጋደ ባ፤ አያዉ ጎፐ፥ መꬍና ጎዳይ ኔና ዎራ የዴዳ። 23 ኔንነ ታን ሃሳዬዳ ቃላ ጫቁዋ ግዶፐ፥ ሄዎ ኔፐነ ታፐ ግዱዋን መꬍና ጎዳይ መꬍናዉ ማርካ” ያጌዳ።

24 ሄዋ ድራዉ፥ ዳዊተ ጋደን ቆሰቴዳ። አግና ጼሩዋ ቦንችያ ጋላሳይ ጋኬዳ ዎደ፥ ካትያ ሳኦል ቁማ ማናዉ ዬዳ። 25 ሀሮደ ባረ ኡትያ ሳኣን ጎዳ ላንቂያን ኡቴዳ፤ ዮናታን አፐ ስንꬃ ባዙዋን ኡቴዳ፤ አባኔር ሳኦላ ላንቂያን ኡቴዳ፤ ሽን ዳዊታ ሳአይ መላ ደኤ። 26 ሳኦል ሄ ጋላሳ አይነ ግቤና፤ አያዉ ጎፐ፥ ሳኦል፥ “ዳዊተ አየንቶ ሀኔዳ፤ ሄ ጋላሳ ቦንቼናዳን ቱኔዳ፤ ቱማ እ ቱኔዳ” ያጊደ ቆፔዳ። 27 ሽን ዎንተꬃ ጋላስካ፥ አግናዉ ላኤንꬆ ጋላስ ዳዊታ ሳአይ መላ ደኤ። ሳኦል ባረ ናኣ ዮናታና፥ “እሰያ ናአይ ዝኖካ ሀችካ ቁማ ማናዉ አያዉ ይቤኔ?” ያጊደ ኦቼዳ።

28 ዮናታን፥ “ዳዊተ ቤተሌመ ባና ጊደ ታና ኦቼዳ፤ 29 እ ታንካ፥ ‘ኑ ጎልያ አሳይ ካታማን ያርሹዋ ያርሽያ ድራዉነ ታ እሻይካ ታና አዛዜዳ ድራዉ፥ ሀይ ታና የዳርኪ፤ ኔን ታና ሲቅያዋ ግዶፐ፥ አነ ታን ታ እሻቱዋ በአናዉ ባይ’ ያጌዳ። ካትያ ማዳፐ ማናዉ እ ይቤናዌ ሄዋ ግሻሳ” ያጊደ ዛሬዳ።

30 ሳኦል ዮናታና ቦላ ሀንቁዋ ኤጽ ከሲደ ሀዋዳን ያጌዳ፤ “ላ ጌላነ ማካላንቻ ምሽራት ናአዉ፥ ኔን ነ ሁጲያዉ ካዉሻናዉነ ኔና የሌዳ ነ ዳዮ ካዉሻናዉ ኔን እሰያ ናኣ ባጋ ግዴዳዋ ታን ኤርክታየ? 31 እሰያ ናአይ ሀ ሳኣ ቦላን ደኤዳ ፔሻን ኡባን ኔን ዎይ ነ ካዉተꬃይ ኤቀና። ሀእ ኪታደ ታዉ አ አሂሳ፤ አያዉ ጎፐ፥ እ ሀይቃናዉ በሰ” ያጌዳ።

32 ሄዋፐ ጉየ ዮናታን ባረ አዉዋ ሳኦላ፥ “እ አያዉ ሀይቂ? እ ኦꬄዳባይ አዬ?” ያጊደ ኦቼዳ።

33 ሽን ሳኦል ዮናታና ዎꬋናዉ ቶራ አ ቦላ ጾንጌዳ። ሄዋ ድራዉ፥ ዮናታን ባረ አዉ ዳዊታ ዎꬋናዉ ቆፋ ቃቼዳዋ ኤሬዳ። 34 ሀንቁዋ ኤጸቲደ ማዳፐ ደንዴ ኤቄዳ፤ ባረ አዉ ዳዊታ ካዉሼዳ ድራዉ ዮናታን ካዮቲደ፥ ሄ አግናዉ ላኤንꬆ ጋላሳ ምቤና።

35 ዎንታ ዮናታን ዳዊታና ጋከታናዉ ጋደ ቢደ ባረናና እት ያላጋ ናኣ አኪደ ቤዳ። 36 ዮናታን ናኣ፥ “ታን ዎንዳፍያን ዱክያ ዙበቱዋ ዎጻደ ኮያ” ያጌዳ፤ ሄዋፐ ጉይያን ናአይ ዎጽያ ዎደ፥ ዙቢያ ሄፍንꬃ ዱኬዳ። 37 ናአይ ዮናታና ዙቢ ዎꬌዳ ሳኣ ጋኬዳ ዎደ፥ ዮናታን ናኣ ጼሲደ፥ “ዙቢ ኔፐ ህን ባጋና ደኤኔ?” ያጌዳ። 38 ቃይካ ዮናታን ናኣ፥ “ኤሌላ፤ ኤሌላደ ባ፤ ኤቆፓ!” ያጊደ ባረ ቃላ ꬎቁ ኦꬂደ ኦዴዳ። ሄ ናአይ ዙቢያ ማጺደ አኪደ፥ ባረ ጎዳኮ አሄዳ። 39 ናአይ ሀ የዉዋ አይነ ኤረና፤ ዮናታናነ ዳዊታ ጻላላይ ኤሪኖ። 40 ዮናታን ባረ ኦላ ሚሻ ናአዉ እሚደ፥ “ቶካ አካደ ካታማ አፋ” ያጌዳ።

41 ናአይ ቤዳዋፐ ጉይያን፥ ዳዊተ ሄ ዛላ ጉየፐ ከሴዳ፤ ዮናታና ስንꬃን ጉልባቲደ፥ ባረ ዴሙዋ ቢታ ቦሽሲደ ሄዙ ገደ ጎይኔዳ። ሄዋፐ ጉይያን፥ እቱ እቱዋና የረቲደ ዬኬድኖ፤ ሽን ዳዊተ ዮናታናፐ አꬉዋ ዬኬዳ።

42 ዮናታን ዳዊታ፥ “ሳሮ ባ፤ ‘ነ ግዶንነ ታ ግዶን፥ ነ ዘረꬃ ግዶንነ ታ ዘረꬃ ግዶን፥ መꬍና ጎዳይ መꬍናዉ ማርካ ግዶ’ ያጊደ ኑን ላኡ መꬍና ጎዳ ሱንꬃን ጫቀዶ” ያጌዳ። ሄዋፐ ጉይያን፥ ዳዊተ ደንዲደ ቤዳ፤ ዮናታንካ ካታማ ጉየ ስሜዳ።