1 ዳዊተ ቄስያ አብመሌካኮ ኖባ ካታማ ቤዳ፤ አብመሌክ ዳዊታና ጋከታናዉ ኮኮሪደ ዪደ፥ “ኔን አያዉ ኔረካ ደአይ? አያዉ ሀራ አሳይ ኔናና ደኤኔ?” ያጊደ ኦቼዳ። ማቶሳ 12:3-4፤ ማር. 2:25-26፤ ሉቃሳ 6:3

2 ሽን ዳዊተ ቄስያ አብመሌካ፥ “ካቲ ታና፥ ‘ታን ኔና ኪቴዳ የዉዋነ አዛዜዳ አዛዙዋ ኦንነ ኤሮፖ’ ያጊደ ታና እትባ አዛዜዳ። ታ አሳቱ እት ሳኣን ታናና ጋከታናዳን ኦዳድ። 3 ሀእ ነ ኩሽያን አያይ ደኢ? እቼሹ ባሸ ኡክꬃ ዎይ ደኤዳዋ አያነ ታዉ እማርኪ” ያጌዳ።

4 ሄዋፐ ጉየ ቄሲ ዳዊታ፥ “አሳይ ኡባይ ምያ ኡክꬃይ ታዉ ባዋ፤ ሽን ጌሻ ኡክꬃይ ደኤ፤ ሄ አሳቱ ባረና ማጫ አሳፐ ናጌዳዋ ግዶፐ፥ ኡንቱንቱ ማናዉ ዳንዳዪኖ” ያጌዳ።

5 ሄዋፐ ጉየ ዳዊተ ቄስያ፥ “ቱማ ኑን ሀ ኪታው ከሶ ሳፐ ዶሚደ፥ ማጫ አሳፐ ናገቴዶ፤ ሀራይ አቶ ጌሻ ግደና ኪታ ዎደካ ኡንቱንቱ አሳተꬃይ ጌሻ፤ ሀቼ ኡባ አꬊደ ጌያናዉ ኮሸኔ!” ያጌዳ። 6 ሄዋ ድራዉ፥ ቄሲ ዳዊታዉ ጌሻ ኡክꬃ እሜዳ፤ አያዉ ጎፐ፥ ቄስያዉ ደእያዌ ሆእያ ኡክꬃ አ ሳኣን ዎꬃናዉ መꬍና ጎዳ ስንꬃፐ ደንꬄዳ ጌሻ ኡክꬃ ጻላላ። ዎጋ 24:5-9

7 ሳኦላ ቆማቱዋፐ እት ብታኒ ሄ ጋላሳ መꬍና ጎዳ ስንꬃን ናጊደ ደኤ፤ አ ሱንꬃይ ዶይቃ፤ እ ኤዶማ ቢታ አሳ፤ ሳኦላ መህያ ሄምያዋንቶ እ ካፑዋ።

8 ዳዊተ አብመሌካ፥ “ቶራይ ዎይ ማሻይ ነዉ ደአንዴሻ? ካትያ ኪታይ ኤሌልሶ ድራዉ፥ ታን ታ ማሻ ዎይ ሀራ ኦላ ሚሻ አሀበይከ” ያጊደ ኦቼዳ።

9 ሽን አብመሌክ፥ “ኔን ኤላ ዛንጋራን ዎꬌዳ ፕልስጼምያ ጎልያዳ ማሻይ ሀዋን ደኤ፤ ጩርቃን እ ጻጸቲደ፥ ኤፉድያ ጌተትያ ማዩዋፐ ጉየ ባጋና ደኤ። ኔን ኮይያዋ ግዶፐ አ አካ፤ አፐ አትና፥ ሀራ ማሻይ ሀዋን ባዋ” ያጊደ ዛሬዳ።

ሄዋፐ ጉየ ዳዊተ፥ “ሄዋ ማላ ሀራ ማሻይ ባዋ፤ አ ታዉ ሀማ” ያጌዳ። 1 ሳሜላ 17:51

10 ሄ ጋላስ ዳዊተ ደንዲደ፥ ሳኦላፐ ባቃቲደ፥ ጋተ ካታማ ካትያ አኪሻኮ ቤዳ። 11 ሽን አኪሻ ኦሳንቻቱ፥ “ሀዌ ዳዊተ ባረ ቢታን ካትያ ግደኔየ? ቃይ ማጫ አሳቱ የጺድነ ዱሪደ፥ ‘ሳኦል ሻኣ ዎꬌዳ፤ ዳዊተ ታሙ ሻኣ ዎꬌዳ’ ያጊደ ሳቤዳ ብታንያ ግደኔየ?” ያጌድኖ። 1 ሳሜላ 18:7፤ 29:5

12 ዳዊተ ኡንቱንቱ ሃሳያ ባረ ዎዛናን ኦይቂደ፥ ጋተ ካትያ አኪሻ ሎይꬅ ያዬዳ። ማዝ. 56 (ሁጲያ) 13 ሄዋ ድራዉ፥ ዳዊተ ኡንቱንቱ ስንꬃን ዎዛናይ ቦሸቴዳ አሳ ማላቴዳ፤ ኡንቱንቱ አ ኦይቃና ሀንያ ዎደ፥ ጎይያዋዳን ካረ ፐንግያ እፍꬃ ቃጨረꬄነ ቡቻና ዱገ ዛሪደ ሳሱዋ ሎካዬ። ማዝ. 34 (ሁጲያ) 14 አኪሽ ባረ ኦሳንቻቶ፥ “በእተ፤ ሀዌ ብታኒ ጎዬ። ህንተንቱ አያዉ አ ታኮ አሄድቴ? 15 ሀ ብታኒ ታ ስንꬃን ጎያናዳን ህንተንቱ አሄዳዌ፥ ታ ማታን ሀራይ ጎይያዌ ꬋይነየ? ሀ ብታኒ ታ ሶ ገላናዉ በሲየ?” ያጌዳ።