1 ዳዊተ ጋተ ካታማፐ ባቃቲደ፥ አዱላማ ካታማ ማታን ደእያ ጎንጎሉዋ ቤዳ፤ አ እሻቱዋነ አ አዉዋ ሶ አሳይ ኡባይ ሄዋ ስሴዳ ዎደ፥ ኡንቱንቱ ያ ዱገ አኮ ዎꬌድኖ።ማዝ. 57 (ሁጲያ)፤ ማዝ. 142 (ሁጲያ) 2 መቶቴዳዋንቱ፥ ዎይ አጩዋን ገሌዳዋንቱ፥ ዎይ ሳአይ ኢቴዳዋንቱ ኡባቱ ዳዊታኮ ሺቄድኖ፤ እ ኡንቱንቶ ካፑዋ ግዴዳ። እት ኦይዱ ጼቱዋ ግድያ አሳይ አናና ደኤ።

3 ዳዊተ ሄ ሳፐ ደንዲደ፥ ሞኣበን ደእያ ምጽጳ ቤዳ፤ ሞኣበ ካትያ፥ “ጾሳይ ታዉ ኦꬃናባ ታን ኤራና ጋካናዉ ታ አቶነ ታ አዉዋ ነ ማታን ዎꬅሳርኪ” ያጊደ ዎሴዳ። 4 ሄዋ ድራዉ፥ ዳዊተ ኡንቱንታ ሞኣበ ካትያ ማታን ዎꬄዳ፤ ጌሱዋ ግዶን ዳዊተ ቆሰት ኡቴዳ ዎደ ኡባን ኡንቱንቱ ካትያ ማታን ደኤድኖ።

5 ሄዋፐ ጉይያን፥ ትምቢትያ ኦድያ ጋድ ዳዊታኮ ዪደ፥ “ጌሱዋ ግዶን ጋምኦፓ፤ ሀ ሳፐ ደንዳደ ይሁዳ ጋድያ ባ” ያጌዳ፤ ዳዊተ ሄ ሳፐ ሄረታ ዎራ ቤዳ።

6 ዳዊተነ አ አሳይ ቤቴዳዋ ሳኦል ስሴዳ፤ ሳኦል ግብኣ ካታማ ማታን ደእያ ደርያን፥ ታማርስካ ጌተትያ ምꬃ ጋርሳን ቶራ ኦይቂደ ኡቴዳ፤ አ ኦሳንቻቱ አ ዶዲደ ኤቄድኖ። 7 ሳኦል ኡንቱንታ፥ “ህንተንቶ፥ ቢንያማ አሳቶ፥ ስስተ! እሰያ ናአይ ጎሻነ ዎይንያ ቶክያ ሳኣ ህንተንቱ ኡባዉ እማኔ? ሻላቃቱዋነ ጼቱዋ ካፓቱዋ ኦꬂደ ህንተንታ ሱንꬃኔ? 8 ህንተንቱ ኡባይ ታ ቦላ ማቀቴድታ፤ ታ ናአይ እሰያ ናኣና ቃላ ጫቁዋ ጫቀቴዳዋ ኦንነ ታዉ ኦድቤና። ህንተፐ እት አሳይነ ታዉ ቃረተና፤ ሀቼዋዳንካ ታ ናአይ ታ ቆማ ታና ዎꬍሳናዉ ደንꬄዳዋ ኦንነ ታዉ ኦድቤና” ያጌዳ።

9 ሳኦላ ኦሳንቻቱዋና ኤቄዳ ኤዶምያ ዶይቅ ሳኦላ፥ “እሰያ ናአይ አህጹባ ናኣ አብመሌካኮ ኖባ ካታማ ቤዳዋ ታን በኣድ። 1 ሳሜላ 21:7-9፤ ማዝ. 52 (ሁጲያ) 10 አብመሌክ ዳዊተ ኦꬃናባ መꬍና ጎዳ ኦቼዳ፤ ያቲደ ዳዊታዉ ሽንቃ እሜዳ፤ ቃይ ፕልስጼምያ ጎልያዳ ማሻካ አዉ እሜዳ” ያጌዳ።

11 ሄዋፐ ጉይያን፥ አህጹባ ናኣ ቄስያ አብመሌካነ ኖባ ካታማን ቄሳቱዋ ግዲደ ደእያ አ አዉዋ ሶ አሳ ኡባ ካቲ ጼስስና፥ ኡንቱንቱ ካትያኮ ዬድኖ። 12 ሳኦል አብመሌካ፥ “አህጹባ ናአዉ፥ ስሳ” ያጌዳ።

አብመሌክ፥ “ኤሮ ታ ጎዳዉ” ያጌዳ።

13 ሳኦል አ፥ “ኔንነ እሰያ ናአይ ታ ቦላ አያዉ ማቀቴድተ? ኔን አዉ ኡክꬃነ ማሻ እማደ፥ እ ታና ዎꬋናዉ ደንዳና ማላ፥ አዉ ጾሳ አያዉ ኦቻዲ?” ያጌዳ።

14 አብመሌክ ካትያ፥ “ነ ቆማቱዋ ኡባ ግዱዋን ዳዊተዳን አማነትያዌ፥ ካትያና ቦሎቴዳዌ፥ ኔና ናግያዋንታ አዛዝያዌነ ነ ሶ አሳ ግዶን ሎይꬅ ቦንቼትያዌ ሀራይ ኦኔ? 15 ታን አዉ ጾሳ ኦችሽን፥ ሀዌ ታዉ ኮይሮ? ግደና! ካትያዉ፥ ታና ነ ቆማ ዎይ ታ አዉዋ ሶ አሳ ኡባ አይነ ሞቶፓ፤ አያዉ ጎፐ፥ ታን ነ ቆማይ ሀ የዉዋ ጉꬃ ግድና ዎልቃማ ግድናካ ሙለ ኤርከ” ያጌዳ።

16 ካቲ፥ “አብመሌካ፥ ኔንነ ነ አዉዋ ጎልያ አሳይ ኡባይ ሀይቃና” ያጌዳ። 17 ሄዋፐ ጉይያን፥ ሳኦል ባረ ማታን ኤቂደ ናግያዋንታ፥ “መꬍና ጎዳ ቄሳቱ ዋ ዎꬍተ፤ አያዉ ጎፐ፥ ኡንቱንቱካ ዳዊታ ማዴድኖ፤ ዳዊተ ባቃቴዳዋ ኤሪደ፥ ታዉ ኦድበይክኖ” ያጌዳ። ሽን ካትያ ኦሳንቻቱ መꬍና ጎዳ ቄሳቱዋ ቦላ ባረንቱ ኩሽያ ዎናን እጼድኖ።

18 ያትና ካቲ ዶይቃ፥ “ቄሳቱ ዋ ኔን ዎꬋ” ያጊደ አዛዜዳ። ኤዶምያ ዶይቅ ቄሳቱ ዋ ሾጬዳ፤ ሄ ጋላስ ኤፉድያ ማዬዳ ሆስፑን ታማነ እቼሹ ቄሳቱ ዋ እ ዎꬌዳ። 19 ሄዋ ቦላካ ቄሳቱዋ ካታማ፥ ኖባ ቃራ ማሻን ቡሳኬዳ፤ ሄ ካታማን ደእያ አቱማዋ፥ ማጫዋ፥ ናና፥ ቄር ናና፥ መሄቱዋ፥ ሀረቱዋነ ዶርሳቱዋ ቃራ ማሻን ዶይቅ ሱፑ ኦꬄዳ።

20 ሽን አህጹባ ናኣ አብመሌካ ናናቱዋፐ አብያታራ ጌተትያ እት ናአይ ከስ አኪደ፥ ዳዊታኮ ባቃቴዳ። 21 ሳኦል መꬍና ጎዳ ቄሳቱ ዋ ዎꬌዳዋ ዳዊታዉ ኦዴዳ። 22 ዳዊተ አብያታራ፥ “ኤዶምያ ዶይቅ ሄ ሳኣን ደእያዋ ታን በኤዳ ዎደ፥ እ ሳኦላዉ ኦዳናዋ ሄ ጋላስ ኤራድ። ነ አዉዋ ሶ አሳ ኡባ ሀይቆ ኦሸትያዌ ታና። 23 ስም ኔን ታናና ደአ፤ ያዮፓ። ኔና ዎꬋናዉ ኮይያ ኡራይ ታና ዎꬋናዉ ኮይያዋ፤ ሽን ኔን ታ ማታን ሳሮ ደአና” ያጌዳ።