1 ሳኦል ፕልስጼማ አሳቱዋ የደርስያ ሳፐ ስምና፥ “ዳዊተ ኤንጋዳ ካታማ ማታን ደእያ ዎራን ደኤ” ጊደ አዉ ኦዴድኖ። 2 እስራኤልያ ኡባ ግዶፐ ዶረቴዳ ሄዙ ሻአ አሳ ሳኦል አኪደ፥ ዳዊታነ አ አሳ ኮያናዉ፥ “ዎራ ዴሻቱ ጌስያ ዛላ” ግያ ሳኣ ማታ ቤዳ።

3 ሳኦል ኦግያ ዶናን ዶርሳ አቁዋ ማታን ደእያ ጎንጎሉዋኮ ዬዳ፤ ሼሻዉ ኡታናዉ ጎንጎሉዋ ግዶ ገሌዳ። ዳዊተነ አ አሳይ ጎንጎሎ ግዱዋኮ ሺቂደ ኡቴድኖ። ማዝ. 57 (ሁጲያ)፤ ማዝ. 142 (ሁጲያ) 4 ዳዊታ አሳይ አ፥ “ሄኮ ታን ነ ሞርክያ ነ ኩሽያን አꬃ እማና፤ ኔን አ ነ ኮዬዳዋዳን ኦꬃና ያጊደ መꬍና ጎዳይ ነዉ ኦዴዳ ጋላሳይ ሀቻ” ያጌድኖ። ዳዊተ ሳኦላ ኤርሰናን ሺቂደ፥ ሳኦላ ማዩዋ ጼራፐ ቃንጽ አኬዳ።

5 ቃንጼዳዋፐ ጉይያን፥ ዳዊተ ባረ ዎዛናን ካዮቴዳ። 6 ዳዊተ ባረ አሳቱዋ፥ “መꬍና ጎዳይ ኦኪደ ካተዬዳ ታ ጎዳዉ ታን ሄዋ ኦꬃናዋ ዎይ አ ቦላ ታ ኩሽያ ደንꬃናዋ ጾሳይ ታፐ ሃሶ፤ አያዉ ጎፐ፥ ጾሳይ ኦኪደ ካተዬዳዌ አ” ያጌዳ። 1 ሳሜላ 26:11 7 ዳዊተ ሀዋዳን ሴሪደ፥ ሳኦላ ባረ አሳን ቦሽሰናን ድጌዳ። ሳኦል ጎንጎሉዋ ግዶፐ ከሲደ፥ ባረ ኦግያን ገሌዳ።

8 ሳኦል ቤዳዋፐ ጉይያን፥ ዳዊተ ጎንጎሉዋ ግዶፐ ከሲደ፥ ሳኦላ፥ “ታ ጎዳዉ፥ ካትያዉ!” ያጊደ ጼሴዳ፤ ሳኦል ጉየ ዛሪደ ጼሌዳ፤ ዳዊተ ቢታን ዱገ ጉፋኒደ፥ ሳኦላዉ ጎይኔዳ። 9 ያቲደ ዳዊተ ሳኦላ፥ “ዳዊተ ኔና ቆሀናዉ ኮዬ ግያ አሳቱዋ ቃላ ኔን አያዉ ስሳይ? 10 ሀ ጎንጎሉዋ ግዶን መꬍና ጎዳይ ኔና ሀቼ ታዉ አꬅ እሜዳዋ ኔን ነ አይፍያን በኣዳ፤ ታን ኔና ዎꬋናዳን አማሬዳዋንቱ ታና ደንꬄድኖ፤ ሽን ታን፥ መꬍና ጎዳይ ኦኪደ ካተዬዳዋ እ ግድያ ድራዉ፥ ታን ታ ጎዳ ቦላ ታ ኩሽያ ደንꬅከ ያጋደ ኔና አሻድ። 11 ታ አዎ፥ በአ፤ ታ ኩሽያን ደእያ ነ ማዩዋ ጼራ ሀዋ ጼላ! ነ ማዩዋ ጼራፐ ቃንጻ አካድ፤ ሽን ኔና ዎꬋበይከ፤ ታን ኔና ቆሀቤናዋነ ማካላቤናዋ አኬካደ ኤራ፤ ታን ኔና ቆሀበይከ፤ ሽን ኔን ታና ዎꬋናዉ ሻንካታሳ። 12 ነዋነ ታዋ መꬍና ጎዳይ ፕርዶ፤ መꬍና ጎዳይ ኔን ታና ቆሄዳዋ ሀሉዋ ከሶ፤ ሽን ታን ነ ቦላ ታ ኩሽያ ደንꬅከ። 13 በን ዎደ፥ ኢታ ኦꬅያዋንቱፐ ኢታባይ ከሴ ያግያ ሌምሱ ደኤ፤ ሄዋ ድራዉ፥ ታን ኔና ኩሽያንነ ቦችከ። 14 እስራኤልያ ካቲ ኦ ቦላ ከሴዴ? ኔን ኦና ኦይቃናዉ ኮያይ? ሀይቄዳ ካና ዎይ ካቶልያ ኮያይ?1 ሳሜላ 26:20 15 መꬍና ጎዳይ ኑ ግዶን ዳናቶ፤ ነዋነ ታዋ እ ፕርዶ፤ ታ የዉዋ ጼሊደ፥ ታ ድራዉ እ ሞተቶ፤ ነ ኩሽያፐ ታና እ አሾ” ያጌዳ።

16 ዳዊተ ሳኦላዉ ሃሳይያዋ ዉርሴዳ ዎደ፥ ሳኦል ዳዊታ፥ “ታ ናአዉ ዳዊታ፥ ሄዌ ነ ቃሌ?” ያጌዳ፤ ሳኦል ባረ ቃላ ꬎቂሲደ ዬኬዳ። 17 ቃይካ ዳዊታ፥ “ኔን ታፐ አꬌዳ ጽሉዋ፤ አያዉ ጎፐ፥ ታን ነዉ ኢታባ ኦꬅና፥ ኔና ታዉ ሎኦባ ኦꬃዳ። 18 መꬍና ጎዳይ ታና ሀቼ ነዉ አꬅ እምናካ ኔን ታና ዎꬋቤና ድራዉ፥ ታዉ ኔን ኦꬄዳ ሎኦባ ታና በሳዳ። 19 አሳይ ባረ ሞርክያ ደሚደ ቆሄናን የዲየ? ኔን ታዉ ሀቼ ኦꬄዳ ኬካተꬃ ድራዉ፥ መꬍና ጎዳይ ኔና አንጆ። 20 ሀእካ ኔን እስራኤልያዉ ካትያ ግዳናዋነ እስራኤልያ ካዉተꬃይ ነ ማታ ጋርሳን ኤቃናዋ ታን ኤራይ። 21 ሀእ ስም ታፐ ጉይያን፥ ታ ዘረꬃ ኔን ዱናዳንነ ታ ሱንꬃካ ታ አዉዋ ጎልያፐ ቁጨናዳን መꬍና ጎዳ ሱንꬃን ታዉ ጫቃ” ያጌዳ።

22 ዳዊተ ሳኦላዉ ጫቄዳ። ሄዋፐ ጉይያን፥ ሳኦል ባረ ሶ ስሚደ ቤዳ፤ ዳዊተነ አ አሳይ ፑደ ጌሱዋ ቤድኖ።