1 ሳመል ሀይቂና እስራኤልያ አሳቱ ኡባይ ሺቂደ፥ አዉ ዬኬድኖ፤ ራማ ካታማን ደእያ አ ሶን ሞጌድኖ።

ሄዋፐ ጉይያን፥ ዳዊተ ፓራና ባዙዋ ቤዳ። 2 ማኦናን እት ብታኒ ደኤ፤ ሄ ብታንያዉ አቁ ቃርመሎሳን ደኤ፤ እ ዳሮ ዱረ፤ እት ሻአ ዴሻቱነ ሄዙ ሻአ ዶርሳቱ አዉ ደኢኖ። እ ኡንቱንቱ እስክያ ቃርመሎሳ ካታማን ሜዴ። 3 ሄ ብታንያ ሱንꬃይ ናባላ፤ አ ማቻት ሱንꬃይ አብጋሎ። እዛ ኤራንቻነ ማላ ሎአ ማቻቶ፤ ሽን እ አስናይ መቀꬅ ባይና ኢታ አሳ። እ ካሌባ ያራ።

4 ዳዊተ ዎራን ደኢደ፥ ዶርሳ እስክያ ናባል ሜድያዋ ስሴዳ። 5 ዳዊተ ታሙ ዎዳላቱዋ ሀዋዳን ያጊደ ኪቴዳ፤ “ናባላኮ ቃርመሎሳ ካታማ ቢደ፥ ታ ሱንꬃን አ ሳሮትተ፤ 6 ሳሮ ደአይ! ኔንካ ነ ጎልያ አሳይካ ሳሬ! ነዉ ጌዳዌ ኡባይ ሳሮ ደኢ!

7 “ኔን ዶርሳ እስክያ ሜድያዋ ታን ስሳድ፤ ነ ዶርሳ ሄምያዋንቱ ኑናና እትፐ ደኤዳ ዎደ፥ ኑን ኡንቱንታ ገንበይኮ፤ ኡንቱንቱ ቃርመሎሳ ካታማን ኡቴዳ ዎደ ኡባን ኡንቱንቱባፐ አያይነ ፓጭቤና። 8 ሄዋ ኔን ነ ቆማቱዋ ኦቾፐ፥ ኡንቱንቱ ነዉ ኦዳና። ኑን ሀቼ ሾብያ ጋላስ ኔኮ ዬዳ ድራዉ፥ ታ ዎዳላ አሳቶ ሀያና ሎአ፤ ነ ኩሽያን ደእያባፐ ነ ቆማቶነ ነ ናኣ ዳዊታዉ ሀያና እማ ያግተ” ያጊደ አዛዜዳ።

9 ዳዊታ አሳቱ ናባላኮ ጋኪደ፥ ዳዊታ ኪታ አዉ ኦዴድኖ፤ ሄዋን ናጌድኖ።

10 ናባል ዳዊታ ቆማቱዋ፥ “ዳዊተ ኦኔ? እሰያ ናአይ ኦኔ? ሀ ዎድያን ዳሮ ቆማቱ ባረንቱ ጎዳቱዋፐ ባቃቲኖ። 11 ታ ኡክꬃ፥ ታ ሃꬃነ ታ ዶርሳ ሜድያዋንቶ ሹከቴዳ አሹዋ ደንꬃደ፥ ሀ ኦነንቶነ ዬዳ ሳአይ ኤረተና አሳቶ አያዉ እሞ?” ያጌዳ።

12 ዳዊታ አሳቱ ስሚደ ጉየ ቤድኖ። ብ ጋኪደ ናባል ጌዳዋ ኡባ ዳዊታዉ ኦዴድኖ። 13 ዳዊተ ባረ አሳቱዋ፥ “ህንተንቱ ማሻ ማሻ ዳንጭተ” ያጌዳ፤ ሄዋፐ ጉይያን ኡባቱካ ባረንቱ ማሻ ማሻ ዳንጬድኖ፤ ዳዊተካ ባረ ማሻ ዳንጬዳ። ዳዊተ ኦይዱ ጼቱዋ ግድያ አሳቱዋና ፑደ ቤዳ፤ ላኡ ጼቱ አሳይ ኡንቱንቱዋ ናጊደ አቴዳ።

14 ቆማቱዋፐ እቱ ናባላ ማቻቶ አብጋሎ ሀዋዳን ያጌዳ፤ “ዳዊተ ዎራን ደኢደ ኑ ጎዳ፥ ‘ሳሮ’ ጋናዉ አሳ ኪቴዳ፤ ሽን እ ኡንቱንታ ቦሬዳ። 15 ግዶፐካ፥ ሀ አሳቱ ኑዉ ሎይꬅ ሎአ፤ ኡንቱንቱ ኑና ገንበይክኖ፤ ኑን ኡንቱንቱና እትፐ ደምባን ፔሼዳ ዎደ ኡባን ኑባፐ አያይነ ፓጭቤና። 16 ኑን ኑ ዶርሳ ዉድያ ኡንቱንቱ ማታን ሄምያ ዎደ፥ ቃማነ ጋላስ ኡንቱንቱ ኑዉ ድርሳ ግዴድኖ። 17 ሀያና ሀ የዉዋ ዋታነንቶነ ቆፓ፤ አያዉ ጎፐ፥ ኑ ጎዳ ቦላነ አ ሶ አሳ ቦላ ኮባባይ ከሳና ሀኔ። ኑ ጎዳይ ሄዋ ማላ መቀꬅ ባይና ኢታ አሳ ግዴዳ ድራዉ፥ ኦንነ አዉ ሃሳያናዉ ዳንዳየና” ያጌዳ።

18 አብጋላ ኤለካ ላኡ ጼቱ ኮምፖ ኡክꬃነ ላኡ ኦጎሩዋ ዎይንያ ኤሳ፥ ጺጸቴዳ ዶርሳቱዋ እቼሻቱዋ፥ ታማነ ላፑን ኪሎ ግራመ ትሻ ጺጻ፥ እት ጼቱ ዉርጮ ዎይንያ ቴራነ ባላስያ ባቀꬃ መላፐ ላኡ ጼቱዋ አካደ፥ ሀርያን ጫናዱ። 19 ያታደ ቆማቱዋ፥ “ህንተንቱ ታፐ ስንꬃዉ አꬊደ ቢተ፤ ታን ህንተንቱ ጌዱዋ ካላና” ያጋዱ፤ ሽን ባረ አስና ናባላዉ አይነ ኦዳበይኩ። 20 ባረ ሀርያ ቶጋደ ደርያና ዱገ ዛንጋራ ዎꬍያ ዎደ፥ ዳዊተነ አ አሳይ ኢኮ ስሚደ ዱገ ዎꬊኖ፤ እዛ ኡንቱንቱና ጋከታዱ።

21 ዳዊተ ባረ ዎዛናን፥ “አባፐ አያይነ ፓጨናዳን ታን ሀ ብታንያ አቁዋ ኡባ ናጌዳዌ ጮ መላ፤ ታን ሎኤዳዋ ኩሽያ እ ታዉ ኢታ ዛሬዳ። 22 ዎንታ ጉራ ጋካናዉ፥ ታን አባ ግዴዳ ኡባፐ እት አቱማዋነ ፓጻ አጎፐ፥ ጾስ ታና ፓጻ አጎፖ” ያጌዳ።

23 አብጋላ ዳዊታ በኤዳ ዎደ፥ ሀርያፐ ኤለካ ዎꬋአደ፥ ዳዊታ ስንꬃን ቢታን ጉፋናደ አዉ ዉትሻዱ። 24 እዛ አ ገድያን ኩንዳደ፥ “ሀይ ታ ጎዳዉ፥ ሀ ባይዙ ታ ጻላላሳ ግዶ! ታና ነ ቆማቶ ሃሳይሳርኪ፤ ታን ነ ቆማታ ሃሳይያዋ ስሳርኪ። 25 ሀ መቀꬅ ባይና ኢታ ብታንያባ፥ ናባላባ ስሶፓ፤ ‘ናባላ’ ጉሳይ ‘ኤያ’ ግያዋ፤ እ ባረ ሱንꬃዳንካ ኤያ። ታ ጎዳዉ፥ ኔን ኪቴዳ አሳቱዋ ታን ነ ቆማታ በአበይከ።

26 “መꬍና ጎዳይ ኤሮ! ነ ሸምፑ ኤሮ! ኔን ሱꬃ ጉሰናዳንነ ነ ኩሽያን ነ ሀሉዋ ከሰናዳን፥ ኔና ታ ጎዳ ተኤዳዌ መꬍና ጎዳ። ነ ሞርከቱነ ኔና ታ ጎዳ ቆሀናዉ ኮይያዋንቱ ናባላዳን ሀንኖ። 27 ሀ እሞታይ ታን ነ ቆማታ ነዉ ታ ጎዳዉ አሄዳዌ ኔና ካልያ አሳቶ እመቶ። 28 ሀይ ታ ጎዳዉ፥ ታን ነ ቆማታ ባሌዳ ባላ አቶ ያጋ! ኔን መꬍና ጎዳ ኦላ ኦለትያ ድራዉ፥ መꬍና ጎዳይ ኔናነ ነ ዘረꬃ ካተያና። ኔን ደኤዳ ላይꬃ ኡባን ኢታተꬃይ ነ ቦላ ቤቶፖ።

29 “አያ አሳይነ ኔና ዎꬋናዉ ኮዮፐ፥ እት ኡራይ ባረ አልኦ ሚሻ ናግያዋዳን፥ መꬍና ጎዳይ ነ ጾሳይ ኔና ሳሮ ናጋና። ሽን ሹቻ ያምባርሻን ኦልያዋዳን፥ እ ነ ሞርከቱዋ ደኡዋ ኦላና። 30 መꬍና ጎዳይ ታ ጎዳዉ ኦꬃናዉ ሃሳዬዳ ኬካተꬃ ኡባ ኦꬅያ ዎደነ እስራኤልያ ቦላ ካተይያ ዎደ፥ 31 ጋሱ ባይናን ሱꬃ ጉሴዳዋን ዎይ ባረ ሀሉዋ ከሴዳዋን ታ ጎዳ ዎዛናይ ዳጋመናነ ህርገና። መꬍና ጎዳይ ነዉ ኬኬዳ ዎደ፥ ታና ነ ቆማቶ ዶጎፓ” ያጋዱ።

32 ዳዊተ አብጋሎ፥ “ኔና ታናና ጋከታናዉ ሀቼ ኪቴዳ መꬍና ጎዳይ፥ እስራኤልያ ጾሳይ ጋላተቶ። 33 ኔን ሎኦ ቆፔዳ ድራዉነ ታን አሳ ሱꬃ ጉሰናዳን ታ ኩሽያ ጭገተናዳን ድጌዳ ድራዉ፥ አንጀታ። 34 ሄዌ ባይናዋ ግዶፐ፥ ታን ኔና ቆሄናዳን ተኤዳ ደኡዋ መꬍና ጎዳይ፥ እስራኤልያ ጾሳይ ኤሮ! ኔን ታናና ጋከታናዉ ኤሌላደ ዬነንቶ፥ ሳአይ ዎንታና ጋካናዉ፥ ናባላባ ግድያ እት አቱማ አስነ ፓጻ አተና” ያጌዳ። 35 አብጋላ አዉ አሄዳዋ እ ኩሽያፐ ዳዊተ አኪደ፥ “ነ ሶ ሳሮ ጋካ። ታን ነ ቃላ ስሳድ፤ ነ ኦሻካ አካድ” ያጌዳ።

36 አብጋላ ስማደ ናባላኮ ይያ ዎደ፥ ካትያ ሶን ጊግያ ባላ ማላ ባላ ምዚደ ሶን ኡቴዳ፤ ናባል ሎይꬅ ማꬆቲደ፥ ባረ ዎዛናን ናሸቴ። ሄዋ ድራዉ፥ ሳአይ ዎንታናዉ፥ አብጋላ አዉ አያነ ቃታበይኩ። 37 ዎንታ ናባል ማꬁዋ ዛሬዳዋፐ ጉይያን፥ አ ማቻታነ ሀ የዉዋ ኡባ አዉ ኦዳዱ፤ ናባላ ዎዛናይ ዳቡርና እ ጆሉ ጌዳ። 38 ታሙ ጋላሳፐ ስምና፥ መꬍና ጎዳይ ናባላ ሾጭና፥ እ ሀይቄዳ።

39 ናባል ሀይቄዳዋ ዳዊተ ስሴዳ ዎደ፥ “መꬍና ጎዳይ ጋላተቶ! ናባል ታና ሸቄዳዋ ሀሉዋ እ ከሴዳ፤ ታን አ ቆማይ ኢታባ ኦናዳን ተኤዳ፤ ናባል ኦꬄዳ እታተꬃ መꬍና ጎዳይ አ ሁጲያን ዛሬዳ” ያጌዳ።

ሄዋፐ ጉይያን፥ ዳዊተ አብጋሎ አካናዉ ኪታ የዲደ ኦሽሴዳ። 40 ዳዊታ ቆማቱ ቃርመሎሳ ካታማ አብጋልኮ ቢደ፥ “ኔን ዳዊታ ገላናዳን ኔና አኪደ ባናዉ እ ኑና ኔኮ ኪቴዳ” ያጌድኖ።

41 አብጋላ ቢታን ጉፋና ዉቱሻደ፥ “ታን ነ ቆማታ ነዉ ኪተታናዉነ ነ ቆማቱዋ ገድያ ሜጫናዉ ጊጋ ኡታድ” ያጋዱ። 42 አብጋላ ኤለካ ደንዳደ ባረ ሀርያ ቶጋዱ፤ እ ዳንጋጽረቱ እቼሻቱ እዞ ካሊደ ቤድኖ፤ ዳዊታ ቆማታ ባደ፥ ዳዊታ ገላዱ።

43 ዳዊተ ሀዋፐ ካሰ እዝራኤልያ አህኖኣሞካ አኬዳ፤ ኡንቱንቱ ላአቱካ አ ማቻቱዋ። 44 ሳኦል ዳዊታ ማቻቶ፥ ባረ ናቶ ሚካሎ ጋሊማ ካታማን የለቴዳ ላውሻ ናኣ ፓልጽኤላዉ እሜዳ። 2 ሳሜላ 3:14-16