1 ዚፋ አሳቱ ሳኦላኮ ግብኣ ካታማ ቢደ፥ “ዳዊተ ያሰሞና ስንꬃን ደእያ ሀኪላ ግያ ደርያን ቆሰት ኡቴዳ ግደኔ?” ያጌድኖ። ማዝ. 54 (ሁጲያ) 2 ሄዋፐ ጉየ ሳኦል ደንዲደ፥ እስራኤላቱዋፐ ዶረቴዳ ሄዙ ሻአ አሳቱዋ አኪደ፥ ዳዊታ ኮያናዉ ዚፋ ባዙዋ ቤዳ። 3 ሳኦል ያሰሞና ስንꬃን ደእያ ሀኪላ ደርያ ቦላ ኦግያ ጋጻን ዱንካኔዳ፤ ሽን ዳዊተ ሄ ዎራን ኡቴዳ። ሳኦል አ ካሊደ ያ ቤዳዋ ኤሪደ፥ 4 ጌድያዋንታ የዲደ፥ ሳኦል ቱሙካ ሄ ሳኣ ጋኬዳዋ ጌሼዳ። 5 ዳዊተ ደንዲደ፥ ሳኦል ዱንካኔዳ ሳኣ ቤዳ፤ ሳኦልነ ኦላ ጋዳዋይ ኔራ ናኣ አባኔር ግሴዳ ሳኣ በኤዳ። ሳኦል ጌሱዋ ግዶን ግሴዳ፤ ኦላንቻቱ አ ዩሹዋን ደኢኖ።

6 ዳዊተ ሂትያ አብመሌካነ ጻሩያ ናኣ ዮኣባ እሻ አብሻያ፥ “ሳኦል ሺቄዳ ሳኣ ታናና ባናዌ ኦኔ?” ያጊደ ኦቼዳ።

ሽን አብሻይ፥ “ታን ኔናና ባና” ያጌዳ።

7 ሄዋ ድራዉ፥ ዳዊተነ አብሻይ ሄ ጋላሳ ቃማ ኦላንቻቱዋኮ ይያ ዎደ፥ ሳኦል ባረ ቶራ ሁጲሳና ቢታን ኤሲደ፥ ጌሱዋ ግዶን ግሴዳዋ ደሜድኖ። አባኔርነ ኦላንቻቱ አ ዩይ አꬊደ ግሴድኖ።

8 አብሻይ ዳዊታ፥ “ጾሳይ ነ ሞርክያ ሀቼ ነ ኩሽያን አꬅ እሜዳ፤ ታን ታ ቶራን አ እት ገደ ቢታና ጋꬃደ ስካይ፤ ታን አ ላኡ ጌደ ጫዳናዉ ኮሸና” ያጌዳ።

9 ሽን ዳዊተ አብሻያ፥ “ኔን አ ዎꬎፓ፤ መꬍና ጎዳይ ኦኬዳ ካትያ ቦላ ባረ ኩሽያ ደንꬅያ ኦናነ ጾሳይ ሙራና” ያጌዳ። 10 ቃይካ እ አብሻያ፥ “መꬍና ጎዳይ ኤሮ! መꬍና ጎዳይ አ ሾጫናዋ ታን ኤራይ፤ ባረ ጋላሳይ ጋክና እ ሀይቃና፥ ዎይ ኦለታናዉ ቢደ እ ꬋያና። 11 መꬍና ጎዳይ ኦኬዳ ካትያ ቦላ ታን ኩሽያ ደንናዳን ታና መꬍና ጎዳይ ተኦ። አነ አ ሁጲሳን ደእያ ቶራነ ሃꬃ ኦቱዋ አካደ ደንዳ” ያጌዳ። 1 ሳሜላ 24:6

12 ሄዋፐ ጉየ ዳዊተ ሳኦላ ሁጲሳን ደእያ ቶራነ ሃꬃ ኦቱዋ አኬዳ፤ ኡንቱንቱ ቤድኖ። ሽን ኡንቱንታ ኦንነ በእቤና፥ ዎይ ኦንነ ኤርቤና፥ ዎይ ኦንነ ቤጎትቤና፤ መꬍና ጎዳይ ዎልቃማ ገምእሹዋ ኡንቱንቱ ቦላ የጌዳ ድራዉ፥ ኡባቱካ ገምእሹዋ ታይሮቴድኖ።

13 ዳዊተ ሄፍንꬃ ፕኒደ፥ ሀራ ደርያ ሁጲያን ኡንደና ሳኣን ሃኪደ ኤቄዳ። 14 ዳዊተ ሳኦላ ኦላንቻቱዋነ ኔራ ናኣ አባኔራ፥ “አባኔራ! አባኔራ! ታን ጼስያዋ ስስኪ?” ያጊደ ዋሴዳ።

አባኔር፥ “ሀ ጼሲደ ካትያ ገምእሹዋ ድግያዌ ኦኔ?” ያጌዳ።

15 ሄዋፐ ጉየ ዳዊተ፥ “ኔን ዎዛናማ አሳ ግድኪየ? እስራኤልያ ግዶን ነ ማል ኦን ደኢ? ያትና፥ ካትያ ነ ጎዳ አያዉ ናግኪ? አያዉ ጎፐ፥ እት አሳይ ካትያ ነ ጎዳ ዎꬋናዉ ያ ቤዳ። 16 ኔን ኦꬄዳባይ ሎአ ግደና። መꬍና ጎዳይ ኤሮ! ኔንነ ነ ኦላንቻቱ መꬍና ጎዳይ ኦኬዳ ህንተንቱ ጎዳ ናግቤና ድራዉ፥ ኡንቱንቱ ሀይቃናዉ በሰ። ካትያ ቶራነ አ ሁጲሳን ደእያ ሃꬃ ኦቱዋ በአይ?” ያጌዳ።

17 ሳኦል ዳዊታ ቃላ ግድያዋ ኤሪደ፥ “ታ ናአዉ ዳዊታ፥ ሄዌ ነ ቃሌ?” ያጌዳ።

ዳዊተ፥ “ኤ፤ ታ ጎዳዉ፥ ካትያዉ፥ ሄዌ ታ ቃላ” ያጌዳ። 18 ቃይካ እ ሳኦላ፥ “ታ ጎዳዉ፥ ታና ነ ቆማ ኔን አያዉ ካላይ? ታን አይ ኦꬃድታ? ታን አይ ባይዛድታ? 19 ሀእካ ታ ጎዳዉ፥ ካትያዉ፥ ኔን ታ ቃላ፥ ነ ቆማ ቃላ ስሳናዳን ታን ኔና ዎሳይ፤ መꬍና ጎዳይ ኔና ታ ቦላ ደንꬄዳዋ ግዶፐ፥ ያርሹዋ እ አኮ፤ ሽን አሳቱ ኔና ደንꬄዳዋ ግዶፐ፥ ኡንቱንቱ መꬍና ጎዳ ስንꬃን ሸቀቴዳዋንታ ግድኖ! አያዉ ጎፐ፥ ‘ባረ፤ ሀራ ጾሳቶ ጎይና’ ያጊደ፥ መꬍና ጎዳ ቢታን ታዉ ደእያ ኤጻፐ ኡንቱንቱ ታና ሀእ ከሴድኖ። 20 ሀእ ስም መꬍና ጎዳ ስንꬃፐ ሃኪደ ደእያ ቢታን ታ ሱꬃ ጉሶፓ፤ እት አሳይ አካ ሻንካታናዉ ደርያ ሁጲያ ከስያዋዳን፥ እስራኤልያ ካቲ እት ካቶልያ ኮያናዉ ከሴዳ” ያጌዳ።

21 ሳኦል ዳዊታ፥ “ታን ናጋራ ኦꬃድ። ታ ናአዉ ዳዊታ፥ ሃ ስማ! ሀቼ ቃማ ኔን ታና ሀይቁዋፐ አሼዳ ድራዉ፥ ታን ኔና ላኤንꬆ ገንከ። ቱሙፐ ታን ኤያባ ሀናድ፤ ዎልቃማ ባላ ባላድ” ያጌዳ።

22 ዳዊተ፥ “ካትያዉ፥ ነ ቶራይ ሀዌሽ፤ ነ አሳቱዋፐ እት አሳይ ዪደ አኮ። 23 አሳይ ሁጲያን ሁጲያን ጽሌዳባዉነ አማነቴዳባዉ መꬍና ጎዳይ አ ጋትያ ጭጌ። ኔና መꬍና ጎዳይ ሀቼ ታ ኩሽያን አꬂደ እሜዳ፤ ሽን መꬍና ጎዳይ ኦኬዳ ካትያ ቦላ ታን ታ ኩሽያ ደንꬃናዉ ዶሳበይከ። 24 ታን ቱሙ ሀቼ ኔና አሾዋዳን መꬍና ጎዳይ ታናካ አሾ፤ ቃይ መቱዋ ኡባፐ ታና ዎꬅ አኮ” ያጌዳ።

25 ሳኦል፥ “ታ ናአዉ ዳዊታ፥ ኔን አንጀታ። ኔን ግታባ ኦꬃና፤ ኔን ቱሙፐ ጾናና” ያጌዳ። ዳዊተ ባረ ኦግያ ቤዳ፤ ሳኦለካ ባረ ሶ ስሜዳ።