1 ዳዊተ ባረ ዎዛናን፥ “እት ጋላስ ታን ሳኦላ ኩሽያን ዳባታና፤ ታን ፕልስጼማ ጋድያ ባቃታናፐ አትና፥ ሀራባይ ታዉ ሎኤና። ያትና፥ ሳኦል እስራኤልያ ቢታ ኡባን ታና ኮይያዋ አጋና፤ ያቶፐ ታን አ ኩሽያፐ ከሳ አካና” ያጊደ ቆፔዳ።

2 ሄዋ ድራዉ፥ ዳዊተነ አናና ደእያ ኡሱፑን ጼቱ አሳቱ ደንዲደ፥ ጋተ ካትያ ማኦካ ናኣ አኪሻኮ ቤድኖ። 3 ዳዊተነ አ አሳይ አኪሻራ ጋተን ኡቴድኖ። አሳይ ኡባይ ባረ ሶ አሳ አሳ አኪደ ቤዳ፤ ዳዊተካ ባረ ማቻቱዋ፥ እዝራኤልያ አህኖኣሞነ ናባላ አምአታ፥ ቃርመሎስያ አብጋሎ አኪደ ቤዳ። 4 “ዳዊተ ጋተ ባቃቴዳ” ግያዋ ስሲደ፥ ሳኦል ላኤንꬁዋ አ ኮይያዋ አግ ባሼዳ።

5 ዳዊተ ካትያ አኪሻ፥ “ኔን ታናን ናሸቶፐ፥ ታን ያን ደአና ማላ፥ ነ ካዉተꬃን ደእያ ካታማቱዋፐ እትኖ ታዉ እማ። ታን ነ ቆማይ ካቲ ደእያ ካታማን ኔናና እትፐ አያዉ ኡታኔ?” ያጌዳ።

6 ሄ ጋላስ አኪሽ ጽቅላጋ ካታማ ዳዊታዉ እሜዳ፤ ሀቼ ጋካናዉካ ጽቅላጋ ካታማይ ይሁዳ ካተቱዋሳ ግዲደ አቴዳ። 7 ዳዊተ ፕልስጼማ ቢታን እት ላይꬃነ ኦይዱ አግና ደኤዳ።

8 ዳዊተነ አ አሳቱ ፑደ ቢደ፥ ጋሹራቱዋ፥ ግርዘቱዋነ አማሌቃቱዋ ኦሊኖ። በኒደፐ ዶሚደ፥ ሄ አሳቱ ሹራፐ ቢደ ግብጼ ጋካናዉ ደእያ ቢታን ደኤድኖ። 9 ዳዊተ ሄ ቢታ ኦልያ ዎደ አዉደነ ሄ ቢታን ደእያ ማጫዋ ግዲና፥ አቱማዋ ግዲና፥ ፓጻ አግቤና፤ ዶርሳነ ሚዛ፥ ሀርያነ ጋሉዋ፥ ማዩዋካ አኬዳ፤ ያቲደ አኪሻኮ ስሜ። 10 አኪሽ፥ “ሀቼ ሀቃን ሺቄድቴ?” ያጊደ ዳዊታ ኦቼ።

ዳዊተ፥ “ኔጌባ ዎራን ደእያ ይሁዳ አሳቱ ቦላ፥ ዎይ ይራህማኤላ አሳቱ ቦላ፥ ዎይ ቄና አሳቱዋ ቦላ ሺቄዶ” ያጌ።

11 ኡንቱንቱፐ እት አሳይነ ጋተ ካታማ ዪደ፥ “ዳዊተ ሀዋ ኦꬄዳ” ጊደ ኦደና ማላ፥ ዳዊተነ አ አሳቱ ማጫዋ አቱማዋ አሸናን ዉርስ ዎꬊኖ። ዳዊተ ፕልስጼማ ቢታን ደኤዳ ዎደ ኡባን ሄዋዳን ኦꬄዳ። 12 አኪሽ ዳዊታን አማነቲደ፥ “ዳዊተ ባረ አሳን፥ እስራኤላን ሎይꬅ እጸቴዳ፤ ሄዋ ድራዉ፥ እ ታዉ መꬍናዉ ቆማ ግዳና” ያጊደ ቆፔዳ።