1 ሄ ዎደ ፕልስጼማ አሳቱ እስራኤላቱዋ ኦላናዉ ባረንቱ ኦላንቻቱዋ ሺሼድኖ። አኪሽ ዳዊታ፥ “ኔንነ ነ አሳቱ ታናና ኦላ ባናዋ ቱሙ ኤራ ኡታ” ያጌዳ።

2 ዳዊተ፥ “ሄዋ ግዶፐ፥ ታን ነ ቆማይ ኦꬃናባ ኔን በአና” ያጌዳ።

አኪሽ፥ “ዳሮ ሎአ፤ ታን ኔና ታ ደኤዳ ላይꬃ ኡባን ታና ናግያዋ ከሳና” ያጌዳ።

3 ሀዋፐ ካሰ ባጋን ሳመል ሀይቂና፥ እስራኤልያ አሳቱ ኡባቱ አዉ ዬኪደ፥ አ ካታማን ራማን አ ሞጌድኖ። ሳኦል ሞይትልያ ጼስያዋንታነ ሻሬቻቱዋ እስራኤልያ ቢታፐ የደርሲደ ከስ ድጌዳ። ዎጋ 20:27፤ ዛረ. 18:10-11፤ 1 ሳሜላ 25:1

4 ፕልስጼማ ኦላንቻቱ ሺቂደ ዪደ፥ ሹኔማ ካታማን ኡቴድኖ፤ ሳኦለካ እስራኤልያ አሳ ኡባ ሺሺደ፥ ግልቦአ ደርያን ኡቴዳ። 5 ሳኦል ፕልስጼማ ኦላንቻቱዋ በኢደ ያዬዳ፤ አ ዎዛናይካ ሎይꬅ ዳጋሜዳ። 6 ሄዋ ድራዉ፥ እ አይ ኦꬃነንቶነ መꬍና ጎዳ ኦቼዳ፤ ሽን መꬍና ጎዳይ አኩሙዋን ግዲና፥ ዎይ ኡሪምያን ግዲና፥ ዎይ ትምቢትያ ኦድያዋንቱ ባጋና ግዲና፥ አዉ ኦድቤና። ፓይ. 27:21 7 ሄዋፐ ጉይያን፥ ሳኦል ባረ ቆማቱዋ፥ “ሞይትልያ ጼስያ ሻሬቻቱዋ ታዉ ኮይተ፤ ታን ኢኮ ባደ እዞ ኦቻና” ያጊደ አዛዜዳ።

ሳኦላ ቆማቱ፥ “ሞይትልያ ጼስያ እት ሻሬቻታ ኤንዶረን ደአዉ” ያጌድኖ።

8 ሳኦል ባረና ኤርሰና ማላ ሀራ ማዩዋ ማዪደ፥ ላኡ አሳቱዋ አኪደ፥ ቃማ ሄ ሻሬቻትኮ ቤዳ፤ ምሽራቶ፥ “ሀያና ታዉ እት ሞይትልያ ጼሳርኪ፤ ታን ሱንꬃ ኦድያ አሳ ታዉ ደንꬃርኪ” ያጌዳ።

9 ሄዋፐ ጉየ ምሽራታ፥ “ሞይትልያ ጼስያዋንታነ ሻሬቻቱዋ እስራኤልያ ቢታፐ ሳኦል ዎት የደርስ ከሴደንቶ፥ ቱማ ኔን ኤራሳ። ታና ዎꬍሳናዉ ኔን ታዉ አያዉ ጲርያ የጋይ?” ያጋዱ።

10 ሳኦል ምሽራቶ፥ “መꬍና ጎዳይ ኤሮ! ኔን ሀዋ ድራዉ ሙሬታካ” ያጊደ መꬍና ጎዳን ጫቄዳ።

11 ያትና፥ ምሽራታ፥ “ታን ነዉ ኦና ደንꬆ?” ያጋደ ኦቻዱ።

ሳኦል፥ “ሳመላ ታዉ ደንꬃ” ያጌዳ።

12 ሻሬቻታ ሳመላ በኣደ፥ ዋሱዋ ጹላዱ፤ ሳኦላ፥ “ኔን ታና አያዉ ጭማድ? ኔን ሳኦላ ግድኪ!” ያጋዱ።

13 ካቲ፥ “አይነ ባዋ፤ ያዮፓ! ነዉ አዬ ቤትያዌ?” ያጌዳ።

ምሽራታ፥ “እት ሞይትሊ ቢታ ግዶፐ ከስያዌ ቤቴ” ያጋዱ።

14 ሳኦል ምሽራቶ፥ “እ አይ ማላቲ?” ያጌዳ።

ምሽራታ፥ “አፍላ ማዬዳ እት ጭማ ብታኒ ከሴዳ” ያጋዱ።

ሳኦል ሄ ብታኒ ሳመላ ግዴዳዋ ኤሪደ፥ አ ስንꬃን ሳኣን ግሲደ ጉፋኔዳ።

15 ሳመል ሳኦላ፥ “ታና ዱፉዋፐ ደንꬃደ አያዉ ሻባራይ?” ያጌዳ።

ሄዋፐ ጉየ ሳኦል፥ “ታን ዳሮፐ ኡንኤታድ፤ አያዉ ጎፐ፥ ፕልስጼማ አሳቱ ታና ኦሊኖ፤ ጾሳይካ ታፐ ሻከቴዳ፤ ትምቢትያ ኦድያዋንቱ ባጋና ግዲና ዎይ አኩሙዋን ግድና፥ እ ታን ኦችያዋ ኦደና። ሄዋ ድራዉ፥ ታን ኦꬃናባ ኔን ታዉ ኦዳናዳን ኔና ጼሳድ” ያጌዳ።

16 ሳመል፥ “መꬍና ጎዳይ ሻከቲደ ነ ሞርክያ ግድክቾዋፐ አትና፥ ታና አያዉ ዞረታ በሳይ? 17 መꬍና ጎዳይ ታ ባጋና ካሰት ኦዴዳዋ ኦꬅ ክቼዳ፤ መꬍና ጎዳይ ካዉተꬃ ኔፐ ቦንቂ አኪደ፥ ነ ሾሮ ዳዊታዉ እም ድጌዳ። 1 ሳሜላ 15:28 18 ኔን መꬍና ጎዳዉ አዛዘታቤና ድራዉነ አ ሀንቁዋ ሱልያዋ አማሌቃ አሳቱዋ ቦላ ፖላቤና ድራዉ፥ መꬍና ጎዳይ ሀቼ ሀ የዉዋ ነ ቦላ ኦꬄ።1 ሳሜላ 15:3-9 19 ኔናነ እስራኤልያ፥ መꬍና ጎዳይ ፕልስጼማ አሳቶ አꬅ እማና፤ ኔንነ ነ ናናይ ዎንት ታናን ጋከታናዉ፤ መꬍና ጎዳይ እስራኤልያ ኦላንቻቱዋ ፕልስጼማ አሳቶ አꬅ እማና” ያጌዳ።

20 ሳኦል ሳመላ ኦዱዋ ስሲደ ያዬዳ ድራዉ፥ ኤለካ ቢታን ዶልጩ ጊደ ኩንድ አጌዳ። ሳኦል ሄ ጋላሳ ኩመንꬃነ ቃማ ኩመንꬃ ቁማ ምቤና ድራዉ፥ አ ዎልቃይ እጼዳ። 21 ሄ ምሽራታ ሳኦላኮ ያደ፥ እ ሎይꬅ ኮኮርያዋ በኣደ፥ “ታን ነ ቆማታ ነዉ አዛዘታድ፤ ኔን ታና ኦቼዳዋ ታ ሸምፑዋ አጋደ ኦꬃድ። 22 ሀእ ታን ነ ቆማታ ግያዋ ሀያና ስሳ፤ ኔን ማደ፥ ምናደ ነ ኦግያ ባና ማላ፥ ታን ነዉ ጉꬃ ቁማ አꬃይ” ያጋዱ።

23 ሄዋፐ ጉየ ሳኦል፥ “ሚከ” ያጊደ እጼዳ። ሽን አ አሳቱ ሄ ምሽራትናካ ግዲደ ሾቤድኖ፤ ሳኦል ሾበቲደ ቢታፐ ደንዲደ፥ ግሱዋን ኡቴዳ። 24 ሄ ምሽራታ ኤለካ ባረ ሶን ደእያ ቦልትቦልታ ማራ ሹካ ባሻዱ፤ ꬊልያ አካ ሙናቃደ፥ እርሹዋ የገናን ኡክꬃ ኡካዱ። 25 ያታደ ሳኦላዉነ አ አሳቶ አꬅና፥ ኡንቱንቱ ሜድኖ። ሄ ጋላስ ቃማ ደንዲደ ቤድኖ።