1 ዳዊተነ አ አሳቱ ሄዘንꬆ ጋላስ ጽቅላጋ ካታማ ጋኬድኖ። አማሌቃ አሳቱ ኔጌባ ባዙዋነ ጽቅላጋ ካታማ ማዬድኖ፤ ጽቅላጋ ካታማ ታማን ጹጌድኖ። 2 ጽቅላጋ ካታማን ደእያ ማቻቱዋነ ናናቱዋፐ ጭማ ጋካናዉ ደእያ ኡባቱዋ ኦሞዴድኖ፤ ኡንቱንታ ኡባ አኪደ አፌድኖፐ አትና፥ እት አሳነ ዎꬍበይክኖ።

3 ዳዊተነ አ አሳቱ ጽቅላጋ ካታማ ጋክያ ዎደ፥ ካታማይ ታማን ጹገትክቼዳዋነ ቃይ ኡንቱንቱ ማጫ አሳቱ፥ ኡንቱንቱ አቱማ ናናይነ ኡንቱንቱ ማጫ ናናይ ኦሞደትክቼዳዋ በኤድኖ። 4 ያትና፥ ዳዊተነ አናና እትፐ ደእያ አሳይ ባረንቱ ዎልቃይ እጻና ጋካናዉ ዋሲደ ዬኬድኖ። 5 ዳዊታ ማጫ አሳቱ ላአቱ፥ እዝራኤልያ አህኖኣሞነ ቃርመሎስያ ናባላ አምአት አብጋላ ኦሞደቴድኖ። 1 ሳሜላ 25:42-43

6 አሳይ ዳዊታ ሹቻን ጫዳናዉ ሃሳዬዳ ድራዉ፥ ዳዊተ ሎይꬅ ቱጋቴዳ፤ አያዉ ጎፐ፥ አ አሳይ ኡባይ ባረ አቱማዋ ናናይነ ማጫ ናናቱዋ ድራዉ፥ ሎይꬅ ይሎቴዳ፤ ሽን ዳዊተ መꬍና ጎዳን ባረ ጾሳን ምነቴዳ።

7 ዳዊተ አብመሌካ ናኣ ቄስያ አብያታራ፥ “ኤፉድያ ሃ አካደ ያ” ያጌዳ፤ አብያታረ ኤፉድያ ዳዊታዉ አሄዳ። 1 ሳሜላ 22:20-23 8 ዳዊተ መꬍና ጎዳ፥ “ታን ሀ ማዬዳዋንቱ ጌዱዋ ካላደ ቦ? ቦፐ ታን ኡንቱንታ ጋካኔ?” ያጊደ ኦቼዳ።

ጾሳይ፥ “ኤ፤ ኡንቱንታ ካላደ ባ፤ ኡንቱንታ ኔን ጋካናሳ፤ ኦሞደቴዳዋንታካ ዛራና” ያጌዳ።

9 ዳዊተነ አናና ደእያ ኡሱፑን ጼቱ አሳቱ ደንዲደ ብሶራ ሻፋ ጋክና፥ አሳፐ አማሬዳዋንቱ ያን አቴድኖ። 10 አያዉ ጎፐ፥ ላኡ ጼቱ አሳቱ ሻፋ ፕናናዉ ሎይꬅ ዳቡሬድኖ። ሽን ዳዊተነ ኦይዱ ጼቱ አሳቱ ፓና ካሌድኖ።

11 ሄዋፐ ጉይያን፥ አሳቱ እት ግብጻዊያ ደምባን ደሚደ፥ ዳዊታኮ አሄድኖ፤ አዉ ኡሻናዉ ሃꬃ፥ ማናዉካ ቁማ እምና ሜዳ። 12 ቃይ ባላስያ አይፍያ መላፐ ባካነ ላኡ ዉርጮ ዎይንያ ቴራ አዉ እሜድኖ፤ እ ሚደ ምኔዳ፤ አያዉ ጎፐ፥ እ ሄዙ ጋላስነ ሄዙ ቃማ ቁማ ምቤና ሃꬃካ ኡሽቤና። 13 ዳዊተ ሄ ብታንያ፥ “ኔን ኦሴ? ሀቃፐ ያድ?” ያጊደ ኦቼዳ።

ሽን ብታኒ፥ “ታን አማሌቃ ብታንያዉ አይለቴዳ ግብጼ አሳ፤ ሄዙ ጋላሳፐ ካሰ ታን ሳከቴዳ ድራዉ፥ ታ ጎዳይ ታና የግ ባሼዳ። 14 ኑን ይሁዳ አሳቱዋ ቦላ፥ ካሪታ አሳቱዋ ቦላነ ካሌባ ያራቱዋ ቦላ ኔጌባ ዎራን ሺቄዶ፤ ጽቅላጋ ካታማካ ታማን ጹጌዳ” ያጌዳ።

15 ዳዊተ፥ “ኔን ታና ሄ ሺቄዳ ጭታኮ ካለꬃና ዳንዳያይ?” ያጊደ ኦቼዳ።

እ፥ “ኔን ታና ዎናዳንነ ታ ጎዳዉ አꬃደ እመናዳን ታዉ ጾሳን ጫቃ፤ ያቶፐ፥ ታን ኔና ኡንቱንቱኮ ዱገ ካለꬃና” ያጌዳ።

16 ሄዋፐ ጉይያን፥ ብታኒ ዳዊታ ኡንቱንቱኮ ካለꬂደ ጋꬄዳ። ኡንቱንቱ ፕልስጼመ ቢታፐነ ይሁዳ ጋድያፐ ኦሞዴዳባይ ሎይꬅ ዳሮ ግዴዳ ድራዉ፥ ናሸቲደ ሚድነ ኡሺደ ቢታ ኡባን ላለት ኡቴድኖ። 17 ሄ ጋላስ ኦማርሳፐ ቢደ ዎንተꬃ ጋላሳ ኦማርሳይ ጋካናዉ፥ ዳዊተ ኡንቱንታ ሾጬዳ፤ ጋሉዋ ቶጊደ ባቃቴዳ ኦይዱ ጼቱ ያላጋቱዋፐ አትና፥ ሀራይ እት አሳይነ አቲደ ብቤና። 18 አማሌቃ አሳቱ አፌዳ ኡባባ፥ ባረ ላኡ ማጫ አሳቱዋናካ ጉጂደ፥ ዳዊተ ዎꬅ አኬዳ። 19 አሳቱ ኦሞድ አፌዳዋፐ አያይነ ፓጭቤና፤ ናናይ ዎይ ጭማይ፥ አቱማ ናናይ ዎይ ማጫ ናናይ፥ ኡንቱንቱ ኦሞድ አፌዳ ሀራባይ ኡባባይካ ፓጨናን ደኤ፤ ዳዊተ ኡባካ ዛሬዳ። 20 ቃይ ዳዊተ ዶርሳነ ምያ ዉድያ ኡባ ኦሞዴዳ፤ ዳዊታ አሳይ እ ኦሞዴዳ ዉድያ ህንኮ መህያፐ ስንꬃና ላጊደ፥ “ሀዌ ዳዊታ ኦሞዱዋ” ያጌዳ።

21 ሄዋፐ ጉይያን፥ ዳዊተ ባረና ካላናዉ ዳቡሪደ፥ ብሶራ ሻፋ ማታን አቴዳ ላኡ ጼቱ አሳቱዋኮ ዬዳ። ኡንቱንቱ ዳዊታነ አናና እትፐ ደእያ አሳቱዋ ሞካናዉ ከሴድኖ፤ ዳዊተነ አ አሳይ ኡንቱንቱኮ ሺቅና፥ ዳዊተ ኡንቱንታ ሳሮቴዳ። 22 ሽን ዳዊታና ቤዳዋንቱ ግዶፐ እት እት ፓꬄና ኢታ አሳቱ፥ “ኡንቱንቱ ኑናና ብቤና ድራዉ፥ ኑን ዛሪደ አሄዳዋፐ አያነ ኡንቱንቱና ሻኮኮ፤ ኡንቱንቱ ባረንቱ ናናነ ባረንቱ ማቻቱዋ አኪደ ቢኖ” ያጌድኖ።

23 ዳዊተ ኡንቱንታ፥ “ቱይት፤ ታ እሻቶ! መꬍና ጎዳይ ኑዉ እሜዳባን ህንተንቱ ሀዋዳን ኦꬃናዉ በሰና። እ ኑና ናጊደ፥ ኑ ቦላ ሺቄዳ ጭታ ኑዉ አꬂደ እሜዳ። 24 ህንተንቱ ግያዋ ኦንነ ማየና። ኦለታናዉ ቤዳዋንቱነ ኑባ ናጊደ ሀዋን ጋምኤዳዋንቱ እት ላገꬃ ሻካና፤ ኡባዌካ እት ማላ ግዳና” ያጌዳ። 25 ሄ ጋላሳፐ ዶሚደ፥ ሀቼ ጋካናዉ፥ ዳዊተ እስራኤልያ ቢታዉ ሄዋ ዎጋነ አዋዩዋ ኦꬂደ ዎꬄዳ።

26 ዳዊተ ጽቅላጋ ካታማ ጋኬዳ ዎደ፥ ባረ ዳቦ ይሁዳ ጭማቱዋ፥ “መꬍና ጎዳ ሞርከቱዋፐ ኦሞደቴዳዋፐ ታን ህንተንቶ እምያዋ ሄይተ” ያጊደ ኦሞዱዋፐ አማሬዳዋ የዴዳ። 27 እ ሄዋ ቤቴለ፥ ኔጌባን ደእያ ራሞታነ ያትራ ካታማቱዋን ደእያዋንቶ፥ 28 አሮኤራ፥ ስፍሞታ፥ ኤሽታሞአነ 29 ራካላ ካታማቱዋን ደእያዋንቶ፥ ይራህማኤላ ካታማቱዋን ደእያዋንቶ፥ ቄና ካታማቱዋን ደእያዋንቶነ፥ 30 ሆርማ፥ ቦርአሻና፥ አታካነ 31 ከብሮና ካታማቱዋን ደእያዋንቶ የዴዳ፤ እነ አ አሳቱ ዩዬዳ ሳአቱ ኡባዉ የዴዳ።