1 ፕልስጼማ አሳቱ እስራኤልያ አሳቱዋና ኦለቴድኖ፤ እስራኤልያ አሳቱ ፕልስጼማ አሳቱዋ ስንꬃፐ ባቃቴድኖ፤ ዳሮ እስራኤላቱ ግልቦአ ደርያን ሀይቄድኖ። 2 ፕልስጼማ አሳቱ ሳኦላነ አ አቱማዋ ናና የደርስ ጋኪደ፥ ሳኦላ ናና ዮናታና፥ አብናዳባነ ማልክሹአ ዎꬌድኖ። 3 ኦላይ ሳኦላ ዩይ አꬊደ ኡንኤꬄዳ፤ ዎንዳፍያ አሳቱ አ ደሜዳ ዎደ፥ ዙቢያን አ ጫዲደ፥ ሎይꬅ ማይትሴድኖ።

4 ሳኦል ባረ ኦላ ሚሻ ቶክያዋ፥ “ሀ ቃጻረትቤናዋንቱ ዪደ፥ ታና ጫዲደ ካኤናዳን፥ ነ ማሻን ጫዳደ፥ ታና ኔን ዎꬋ” ያጌዳ።

ሽን አ ኦላ ሚሻ ቶክያዌ ሎይꬅ ያዬዳ ድራዉ እጼዳ፤ ሳኦል ባረ ማሻ ሳኣን ኤሲደ፥ አ ቦላ ኩንዴዳ። 5 አ ኦላ ሚሻ ቶክያዌ ሳኦል ሀይቄዳዋ በኢደ፥ እካ ባረ ማሻ ሳኣን ኤሲደ፥ አ ቦላ ኩንዲደ፥ ሳኦላና ሀይቂ አጌዳ። 6 ሀዋዳን ሀኒደ፥ ሳኦልነ አ ናናይ ሄዛቱ፥ አ ኦላ ሚሻ ቶክያዌነ አ አሳቱ ኡባይ ሄ ጋላሳ እትፐ ሀዬድኖ።

7 ዎምባፐነ ዮርዳኖሳ ሻፋፐ ሄፍንꬃ ባጋና ደእያ እስራኤልያ አሳቱ እስራኤልያ ኦላንቻቱ ባቃቴዳዋነ ሳኦልነ አ ናናይ ሀይቄዳዋ በኢደ፥ ኡንቱንቱካ ባረንቱ ካታማ አጊደ ባቃቴድኖ። ፕልስጼማ አሳቱ ዪደ፥ ሄ ካታማቱዋ ኦይቄድኖ።

8 ዎንተꬃ ጋላስ ፕልስጼማቱ አሃቱዋ ቦላፐ ኦላ ሚሻቱዋ ቃር አካናዉ ዪደ፥ ሳኦልነ አ ናናይ ሄዛቱ ግልቦአ ደርያን ሀይቂደ ግሴዳዋንታ ደሜድኖ። 9 ኡንቱንቱ ሳኦላ ቆꬍያ ሙጬድኖነ አ ኦላ ሚሻ ቃር አኬድኖ። ያቲደ ባረንቱ ꬋማሻቱዋ ጎለንነ ባረንቱ አሳ ግዶን ጾኑዋ አዋያና ማላ፥ ፕልስጼማ ቢታ ኡባዉ ኪታ የዴድኖ። 10 ሳኦላ ኦላ ሚሻ አስታሮታ ጌተትያ ኡንቱንቱ ጾሳት ጎልያ ግዶን ዎꬄድኖ፤ ሳኦላ አሃ ቤትሻና ጌተትያ ካታማ ግምቢያን ምስማርያን ꬍሺደ ሶቴድኖ።

11 ፕልስጼማ አሳቱ ሳኦላ ኦꬄዳዋ ጋላኣደን ደእያ ያቤሻ አሳቱ ስሴዳ ዎደ፥ 12 ኡንቱንቱ ምኖ አሳቱ ኡባይ ቃማን ደንድ ቢደ፥ ሳኦላ አሃነ አ ናናቱዋ አሃ ቤትሻና ካታማ ግምቢያፐ ዎꬅ አኪደ፥ ያቤሻ ካታማ አሂደ ያን ጹጌድኖ። 13 ሄዋፐ ጉይያን፥ ኡንቱንቱ መቀꬃ ማጽ አኪደ፥ ያቤሻን ደእያ ታማርስካ ጌተትያ ምꬃ ጋርሳን ሞጌድኖ፤ ያቲደ ላፑን ጋላሳ ጾሜድኖ።