ላኤንꬆ ሳሜላ ማጻፋ
ገሉዋ
ሳመላ ማጻፋ ላኤንꬆ ክፍሊ፥ ሳመላ ማጻፋ ኮይሮ ክፍልያ ካልያዋ ግዶደ፥ ዳዊተ ኮይሮ ገድሳ ባጋ ይሁዳ ካትያ (1-4) ግዲደ፥ ታኪደ ቃይ ሁጲሳ ባጋ ክፍልያ ግዴዳ እስራኤልያ ጉጂደ፥ ኩመንꬃ ቢታዉ ካትያ ግዲደ ሞዴዳዋ ኦድያ ታርክያ ኦይቄዳዋ (5-24)። ማጻፋይ ዳዊተ ባረ ካዉተꬃ አሳናዉነ ባረ ማታ ምንሳናዉ፥ ሶናነ ካረና ደእያ ሞርከቱዋና ኦለቴዳ ምኖ ኦላዋ ሎይꬂደ ቆንጭሴዳ። ቃይ ዳዊተ ምኖ አማኑ ደእያነ ጾሳ ሲቅያ አሳ ግድያዋነ አሳይካ አዉ አማነትያ አሳ ግድያዋ ኦዴ። ሄዋ ቦላንካ ቃይ እት እት መቀꬅ ባይና ኦሶቱዋካ እ ኦꬄዳዋነ ባረ አሹዋ አሙዋ አላናዉ ፓላ ዎልቃማ ናጋራቱዋ እ ኦꬄዳዋካ ቆንጭሴዳ። ግዶፐነ ጾሳ አይል፥ ትምቢትያ ኦድያ ናታን አኮ ሺቂደ፥ አ ናጋራ አ ሀሳይሴዳ ዎደ፥ እ ባረ ናጋራ ፓጺደ ጾሳ ሙሩዋ አኬዳ።
ዳዊታ ደኡነ እ ኦꬄዳ ኦሶቱ እስራኤልያ አሳ ሎይꬅ ናሸቼዳ ድራዉ፥ አፐ ስምና ደኤዳ ላይꬃቱዋን ኡንቱንቱ ቢታ ቦላ መቱ ጋክያ ዎደ ኡባን፥ ኡንቱንቱ ሀራ ካቲያ ኮዪደ፥ ዳዊታ ናአይ፥ ዎይ ዳዊታ ዛርያ ግዲደ፥ ዳዊታዋዳን ኡንቱንታ አይስያ አሳ ደማናዉ አሞቲኖ።
ሸምፓቱዋ ኡባቶ እመቴዳ ቃንꬃ ቆፋቱዋ
ዳዊተ ይሁዳን ካተቱሳ 1:1—4:12
እስራኤልያ ኡባ ቦላ ዳዊተ ካተቱሳ 5:1—24:25
ሀ. ኮይሮ ላይꬃቱዋ 5:1—10:19
ለ. ዳዊታነ በርሳቤሆ 11:1—12:25
ሐ. ዳዊታ መቱዋነ ቱጋ 12:26—20:26
መ. ዉርሰꬃ ላይꬃቱዋ 21:1—24:25
ዳዊተ ይሁዳን ካተቱሳ
1
(1:1—4:12)
ዳዊተ ሳኦል ሀይቄዳዋ ስሴዳ
1 ሳኦል ሀይቄዳዋፐ ጉይያን፥ ዳዊተ አማሌቃ አሳቱዋ ጾኔዳ ሳፐ ስሜዳ፤ ጽቅላጋ ካታማን ላኡ ጋላሳ ታኬዳ። 2 ሄዛንꬆ ጋላስ እት ብታኒ ካዮ ባረ ማዩዋ ፔꬊደ፥ ባረ ሁጲያን ባና ላሊደ፥ ሳኦላ ሄራፐ ዬዳ። ዳዊተኮ እ ዬዳ ዎደ፥ ሳኣን ግሲደ ጎይኔዳ። 3 ዳዊተ አ፥ “ኔን ሀቃፐ ያድ?” ያጊደ ኦቼዳ።
ሽን እ፥ “ታን እስራኤለቱዋ ሄራፐ ከሳ አካደ ያድ” ያጌዳ።
4 ዳዊተ አ፥ “አያይ ከሴደንቶ አነ ታዉ ኦዳ” ያጌዳ።
እ ዳዊታ፥ “ኑ ኦላንቻቱ ኦላፐ ባቃቴድኖ፤ ኑ አሳፐ ዳራቱ ሀይቄድኖ፤ ቃይ ሳኦልነ አ ናአይ ዮናታን ሀይቄድኖ” ያጌዳ።
5 ኦዱዋ አሄዳ ዎዳላ ዳዊተ፥ “ሳኦልነ አ ናኣ ዮናታን ሀይቄዳዋ ኔን አያን ኤራይ?” ያጊደ ኦቼዳ።
6 ዎዳላይ፥ “ካጫዳን ታን ግልቦአ ደርያን ደእሽን፥ ሳኦል ባረ ቶራ ጉፈቲደ ኤቄዳዋ በኣድ፤ ፓራ ጋረቱነ ፓራ አሳቱ ሳኦላኮ ማታቴድኖ። 1 ሳሜላ 31:1-6፤ 1 ኦዱዋ 10:1-6 7 ሄ ዎደ ሳኦል ዩሽ ጼሊደ ታና በኤዳ፤ ታና ጼስና ታን፥ ‘አቤ!’ ያጋድ። 8 ሳኦል ታና፥ ‘ኔን ኦኔ?’ ያጊደ ኦቼዳ፤ ታን አዉ፥ ‘አማሌቃ አሳ’ ያጋደ ዛራድ። 9 ሄዋፐ ጉይያን ሳኦል ታና፥ ‘ታን ሎይꬅ ማዱንጻደ፥ ሀይቆ ማታ ኡታድ፤ ኔን ታ ቦላ ከሳ ኤቃደ ታና ዎꬋ’ ያጌዳ። 10 እ ኩንዴዳዋፐ ጉይያን፥ ሀይቁዋፐ አተናዋ ኤሬዳ ድራዉ፥ ታን አ ቦላ ከሳ ኤቃደ አ ዎꬋድ፤ አ ሁጲያን ደእያ ካላቻነ አ ቀስያን ደእያ ሳጋይያ አካደ ኔኮ ታ ጎዳኮ አሃድ” ያጌዳ።
11 ሄዋፐ ጉይያን፥ ዳዊተነ ዳዊታ አሳይ ካዮቲደ፥ ባረንቱ ማዩዋ ዳፊደ ፔꬌድኖ። 12 ኡንቱንቱ ሳኦል፥ ዮናታን፥ መꬍና ጎዳ ኦላንቻቱነ እስራኤልያ አሳይ ኦላን ዉሬዳ ድራዉ፥ ኦማርስ ጋካናዉ ካዮቴድኖ፥ ዬኬድኖነ ጾሜድኖ።
13 ኦዱዋ አሄዳ ዎዳላ ዳዊተ፥ “ኔን ሀቃ አሴ?” ያጊደ ኦቼዳ።
ሽን እ ዳዊታ፥ “ታን በትያ አማሌቃ ብታንያ ናኣ” ያጌዳ።
14 ዳዊተ አ፥ “መꬍና ጎዳይ ኦኬዳ ካትያ ዎꬋናዉ ነ ኩሽያ ደንꬃደ፥ አያዉ ያያበይኪ?” ያጌዳ። 15 ዳዊተ ባረ አሳቱዋፐ እቱዋ ጼሲደ፥ “ባ፤ አ ዎꬋ!” ያጌዳ፤ እ አማሌቅያ ደቺደ ዎꬌዳ። 16 ዳዊተ አማሌቅያ፥ “መꬍና ጎዳይ ኦኬዳ ካትያ ታን ዎꬋድ ያጋደ ኔን ነ ዶናን ማርካቴዳ ድራዉ፥ ነ ሱꬃ ጎሚ ኔና ኦይቆ” ያጌዳ።
ዳዊተ ሳኦላዉነ ዮናታናዉ ዝላሌዳ ዝላሳ
17 ዳዊተ ሳኦላዉነ አ ናኣ ዮናታናዉ ሀዋዳን ያግ ዝላሌዳ። 18 ይሁዳ አሳይካ “ዎንዳፍያ” ጌተትያ ሀ ዝላሳ ታማራና ማላ ዳዊተ አዛዜዳ፤ ሀ ዝላሳይ ያሻራ ማጻፋን ጻፈቴዳ። ኢያሳ 10:13
19 “ኔኖ እስራኤለዉ፥
ነ ካፓቱ ነ ꬎቃ ግሹዋን ሀይቄድኖ።
ዎልቃማቱ ዋን ኩንዴድኖሻ!
20 ሀዋ ጋተ ካታማን ኦዶፕተ፤
አስቃሎና ኦገቱዋንካ አዋዮፕተ።
ሄዋ ስሶፐ፥ ፕልስጼማቱዋ ማጫ ናናይ ናሸታና፤
ሻማቱዋ ማጫ ናናይ ‘ሀሹ ጋና!’
21 “ህንተንቶ ግልቦአ ደረቶ፥
ህንተንቱ ቦላን እራይ ቡኮፖ፤
ከተርሳይካ ዎꬎፖ።
ሄ ቢታ ጎሻይካ ካꬃ ሞኮፖ፤
አያዉ ጎፐ፥ ያን ዎልቃማ ጎንዳሊ ቱናባ ከሴዳ፤
ሳኦላ ጎንዳሊካ ዛይትያን ቁጨትያዋ አጌዳ።
22 ጎራኤቴዳዋንቱ ሱꬃፐነ፥
ዎልቃማቱዋ አሹዋፐ፥
ዮናታና ዎንዳፊ ጉየ ግቤና።
ቃይ ሳኦላ ማሻይ ካለናን ስምቤና።
23 “ሳኦልነ ዮናታን
አሳይ ሲቅያዋንታነ ሎእያዋንታ፤
ባረንቱ ሀይቁዋንካ ባረንቱ ፓጻንካ ሻከትበይክኖ።
ኡንቱንቱ አርጋንꬃፐካ አꬊደ ኤሌልያዋንታ፤
ጋሙዋፐካ አꬊደ ምንያዋንታ።
24 “እስራኤልያ ማጫ አሳቶ፥
ሳኦላዉ፥ ህንተንታ ዞኦነ አሌቆ ማዩዋ ማይዜዳዋዎነ፥
ዎርቃን ህንተንቱ ማዩዋ አሌቂሴዳዎነ ዬክተ።
25 “ዎልቃማቱ ኦላን ዋን ኩንዴድኖሻ!
ዮናታን ነ ꬎቃ ግሹዋን ጎራኤት ግሴዳ።
26 ታ እሻ ዮናታና፥
ታን ነዉ ካዮታይ፤
ነ ታዉ ዳሮፐ አልኡዋ።
ኔን ታና ሲቅያ ሲቁ ማላልስያዋ፥
ማጫ አሳ ሲቁዋፐካ አꬊደ ማላልስያዋ።
27 “ዎልቃማቱ ዋን ኩንዴድኖሻ!
ኦላ ሚሻይካ ዋን ድፕ ጌደ!”
ያጊደ ዳዊተ ዝላሌዳ።