1 ሶሎሞነ መꬍና ጎዳ ሱንꬃዉ ጌሻ ጎልያነ ባረዉ ካትያ ጎልያ ኬጻናዉ ሀልቼዳ። 2 ሄዋ ድራዉ፥ ሶሎሞነ ቶክያዋ ቶሳናዉ ላፑን ታሙ ሻአ አሳቱዋነ ገዝያን ሹቻ ቆአናዉ ሆስፑን ታሙ ሻአ አሳቱዋ ዶሬዳ፤ ቃይ ኡንቱንታ ዎችያ ሄዙ ሻአነ ኡሱፑን ጼቱ አሳቱዋ ኡንቱንቱ ቦላ ሱንꬄዳ።

3 ሄዋፐ ጉይያን፥ ሶሎሞነ ጺሮሳ ካትያ ኪራማዉ ኪታ ኪቲደ፥ “ታ አዉ ዳዊተ ባረዉ ካትያ ጎልያ ኬጻናዉ ኔን ዝጋ የዴዳዋዳን፥ ታዉካ የዳ። 4 ሀእ ታን መꬍና ጎዳ ታ ጾሳ ሱንꬃዉ ጌሻ ጎልያ ኬጻናዉ ሀናይ። ታን ሳዉዋ ቶሽኩ ግያ እጻና ጩዋያናዉ፥ ኡባ ዎደ ጾሳ ስንꬃን ኡክꬃ ዎꬃናዉነ ኡባ ገደ ጉራነ ኦማርሳ፥ ሳምባታ ጋላሳቱዋን፥ አግናይ ጼርያ ዎደቱዋንነ ጾሳ ኑ ጾሳ ባላ ጋላሳቱዋን ጹግያ ያርሹዋ ያርሻናዉ፥ ሄ ጌሻ ጎልያ ዱማያና። እስራኤልያ አሳይ መꬍናዉ ኦꬃናዳን አዛዘቴዳ ኦሶቱ ሀዋንታ።

5 “ኑ ጾሳይ ሀራ ጾሳቱዋ ኡባፐ ዎልቃማ ግድያ ድራዉ፥ ታን ኬጻናዉ ሀንያ ጌሻ ጎሊ ዎልቃማ። 6 ሽን አዉ ጌሻ ጎልያ ኬጻናዉ ዳንዳይያዌ ኦኔ? አያዉ ጎፐ፥ ሳሉዋፐ ꬎቃ ሳሉካ አዉ ግዳናዉ ዳንዳየና! ያትና፥ ታን አ ስንꬃን ያርሹዋ ያርሻናፐ አትና፥ ታን አዉ ጌሻ ጎልያ ኬጻናዉ ኦኔ?1 ካታ. 8:27፤ 2 ኦዱዋ 6:18

7 “ሀእካ አሌቂያዋንታ ከስያ ኪታ፥ ዎርቃ፥ ብራ፥ ናሃስያነ ብራታ ሲልሲደ ትግያ ኦሱዋነ ዞኦ ማዩዋ፥ ኦቻ ቴራ ማላትያ ማዩዋነ ሳሉዋ ማላትያ ማዩዋ ጊግስያ ኪታ ኤራተꬃይ ደእያ አሳ ታዉ የዳ። ታ አዉ ዳዊተ ይሁዳንነ የሩሳላመን ደእያ ኩሽያ ሂላ ኤርያዋንታ ዶር ዎꬄዳ፤ እ ኡንቱንቱና እትፐ ኦꬃና። 8 ሊባኖሳን ደእያ ነ አሳቱ ምꬃ ዎት ቃንጽንቶ ኤርያዋ ታን ኤራይ። ሄዋ ድራዉ፥ ኔን ታዉ ሊባኖሳፐ ዝጋ፥ ጽድያነ ሳንዳልያ የዳ። ታ አሳቱ ነ አሳቱዋና ግዲደ፥ 9 ታዉ ዳሮ ምꬃ ጊግሳና። አያዉ ጎፐ፥ ታን ከጽያ ጌሻ ጎሊ ግታነ ማላልስያዋ። 10 ምꬃ ቃንጽያ ነ ቆማቶ ታን ላታሙ ሻአ ኮንታለ ዛርጋነ ላታሙ ሻአ ኮንታለ ባንጋ፥ ቃይ ኦይዱ ጼቱ ሻአ ሊትሮ ዎይንያ ኤሳነ ኦይዱ ጼቱ ሻአ ሊትሮ ዎጋራ ዛይትያ እማና” ያጌዳ።

11 ጺሮሳ ካትያ ኪራም ሶሎሞናዉ ዳብዳቢያ ኪቲደ፥ “መꬍና ጎዳይ ባረ አሳ ሲቅያ ድራዉ፥ እ ኔና ኡንቱንቱ ቦላ ካተዬዳ” ያጌዳ። 12 ኪራም ቃይካ፥ “መꬍና ጎዳዉ ጌሻ ጎልያነ ባረዉ ካትያ ጎልያ ኬጻናዳን አꬌዳ ኤራንቻ፥ አኬካንቻነ ጭንጫ ናኣ ካትያ ዳዊታዉ እሜዳ፥ ሳሉዋ ሳኣ መꬌዳ መꬍና ጎዳይ፥ እስራኤልያ ጾሳይ ጋላተቶ።

13 “ሀእካ ታን ነዉ ሁራማ ጌተትያ ሂላንቻነ አኬካንቻ ብታንያ የዳድ። 14 አ አታ ዳና ዛርያ፤ ቃይ አ አዉ ጺሮሳ ጋድያ አሳ። እ ዎርቃ፥ ብራ፥ ናሃስያ፥ ብራታ፥ ሹቻነ ምꬃ ኦꬅያ አሳ፤ ቃይ ኦቻ ቴራ ማላትያ ማዩዋ፥ ሳሉዋ ማላትያ ማዩዋ፥ ዞኦ ማዩዋነ ሱፍያ ጌተትያ ማዩዋ ጊግስያ ኪታ ኤሬዳ። ቃይካ እ ዱማ ዱማ አሌቂያዋንታ ከሲደ፥ ኦዴዳዋዳን ኡባባ ኦꬃናዉ ዳንዳዬ። ሄዋ ድራዉ፥ ኩሽያ ሂላን ሎሄዳ ነ አሳቱዋናነ ካሰ ነ አዎ፥ ዳዊታዉ ኦꬄዳ አሳቱዋና አ ኦስሳ።

15 “ሀእካ ኔን ታ ጎዳይ እማና ጌዳ ዛርጋነ ባንጋ፥ ዛይትያነ ዎይንያ ኤሳ ታ ቆማቶ የዳ። 16 ኔን ሊባኖሳፐ ኮዮ ምꬃ ኬሻ ኑን ቃንጺደ ቃሽሲደ፥ አባ ቦላና ቶከቲደ፥ ኔኮ ዮጰ ባናዳን ኦꬃና። ያቶፐ ኔን ያፐ የሩሳላመ ጋካናዉ አፍሳና” ያጌዳ።

17 አ አዉ ዳዊተ ካሰ ፓይዴዳዋዳን፥ ሶሎሞነ እስራኤልያ ቢታን ደእያ ካረ ቢታ አሳ ኡባ ፓይዴዳ፤ ኡንቱንቱ 153,600 ግዴድኖ። 18 ሶሎሞነ ሄ አሳፐ 70,000 ቶክያዋ ቶሳናዉ፥ 80,000 ገዝያን ሹቻ ቆአናዉ ዶሬዳ፤ ቃይ ኡንቱንታ ዎቻናዉ 3,600 አሳቱዋ ሱንꬄዳ።