1 ሮብኣመ የሩሳላመ ካታማ ጋኬዳ ዎደ፥ እስራኤልያ ቢታ አሳና ኦለቲደ፥ ካዉተꬃ ባረዉ ዛራና ማላ፥ ይሁዳ ዛርያፐነ ቢንያማ ዛርያፐ ዶረቴዳ እት ጼታነ ሆስፑን ታሙ ሻአ ኦላንቻቱዋ ሺሼዳ። 2 ሽን መꬍና ጎዳ ቃላይ ጾሳ አሳ ግድያ ሻማእያኮ ዬዳ፤ 3 “ሶሎሞና ናኣ ይሁዳ ካትያ ሮብኣማዉነ ይሁዳንነ ቢንያማን ደእያ እስራኤልያ አሳ ኡባዉ ሀዋዳን ያጋ፤ 4 ‘መꬍና ጎዳይ ህንተንታ፥ “ህንተንቱ እሻቱዋና፥ እስራኤላቱዋና ኦለታናዉ ቦፕተ። ሀዋ ታን ኦꬄዳ ድራዉ፥ ህንተንቱ ኡባይካ ህንተንቱ ሶ ህንተንቱ ሶ ስምተ” ያጌ’ ያጋደ ኦዳ” ያጌዳ። ኡንቱንቱ መꬍና ጎዳ ቃላ ስሲደ፥ እዮርባማ ኦላናዉ ብያዋ አጊደ ስሜድኖ።

5 ሮብኣመ የሩሳላመን ኡቲደ፥ ሀዋፐ ካሊደ ጻፈቴዳ ይሁዳነ ቢንያማ ካታማቶ ጌሱዋ ግምቤዳ። 6 ሄ ካታማቱካ ቤተሌመ፥ ኤጻማ፥ ታቆአ፥ 7 ቤትጹራ፥ ሶኮ፥ አዱላማ፥ 8 ጋተ፥ ማሬሻ፥ ዚፋ፥ 9 አዶራይማ፥ ላክሻ፥ አዜቃ፥ 10 ጾርአ፥ አያሎናነ ከብሮና። 11 ሮብኣመ ካታማቱዋ ጌሱዋ ምንሲደ፥ ካፓቱዋ ኡንቱንቱን ዎꬄዳ፤ ቃይ ቁማ፥ ዛይትያነ ዎይንያ ኤሳ ኡንቱንቱን ዎꬄዳ። 12 ሄ ግምበቴዳ ካታማቱዋ ኡባን ጎንዳለቱዋነ ቶራቱዋ ዎꬄዳ፤ ያቲደ ኡንቱንታ ሎይꬅ ምንሴዳ። ሄዋዳን ኦꬂደ፥ ይሁዳነ ቢንያማ ቢታቱዋ ሞዲደ ደኤዳ።

13 እስራኤልያ ኡባን ደእያ ቄሳቱ ነ ሌዋቱ ኡባይ ባረንቱ ደእያ ሳኣፐ ሮብኣማኮ ዬድኖ። 14 ሌዋቱ ባረንቱ ሄንꬃ ጋድያነ ባረንቱ ሳኣ አጊደ፥ ይሁዳነ የሩሳላመ ዬድኖ። አያዉ ጎፐ፥ ኡንቱንቱ ቄሰ ግዲደ መꬍና ጎዳዉ ኦናዳን፥ እዮርባምነ አ ናናይ ድጌድኖ። 15 እዮርባም ጎይንያ ꬎቃ ግሹዋን ሀራ ቄሳቱ ዋ ሱንꬄዳ፤ ኡንቱንቱ ጻላሄቶነ እ መꬌዳ ማራቱዋ ምስለቶ ቄሰ ግዲደ ኦꬄድኖ።1 ካታ. 12:31 16 ሌዋቱ ዬዳዋፐ ጉይያን፥ እስራኤልያ ዛራቱዋ ኡባፐ መꬍና ጎዳዉ፥ እስራኤልያ ጾሳዉ ባረንቱ ዎዛናፐ ጎይናናዉ ኮይያዋንቱ መꬍና ጎዳዉ፥ ባረንቱ አዎቱዋ ጾሳዉ ያርሹዋ ያርሻናዉ ኡንቱንቱ ጌዱዋ ካሊደ፥ የሩሳላመ ዬድኖ። 17 ኡንቱንቱ ዩሳይ ይሁዳ ካዉተꬃ ምንሴዳ፤ ኡንቱንቱ ሄዙ ላይꬃ ኩመንꬃ ሶሎሞነ ናኣ ሮብኣማ ማዴድኖ። ኡንቱንቱ ካትያ ዳዊታ ኦግያነ ካትያ ሶሎሞነ ኦግያ ካሊደ፥ ሄዙ ላይꬃ ሳሮ ደኤድኖ።

18 ሮብኣመ ማህላቶ ግያ ምሽራቶ አኬዳ። ማህላት አዉ ዳዊታ ናኣ ያርሞታ፤ እ ዳያ እሰያ ናኣ ኤልኣባ ናቶ አብሀይሎ። 19 ማህላታ ሮብኣማዉ ይኡሻ፥ ሻማርያነ ዛሃማ ጌተትያ አቱማ ናና የላዱ። 20 ሄዋፐ ጉይያን፥ አበሰሎማ ናት ናቶ ማእኮ አኬዳ፤ ማእካ ሮብኣማዉ አቢያ፥ አታያ፥ ዚዛነ ሻሎሚታ የላዱ። 21 ሮብኣመ ባረ ማቼቱዋፐነ ባረ ባኮቱዋ ኡባፐ አበሰሎማ ናት ናቶ ማእኮ አꬎ ሲቄ። አዉ ታማነ ሆስፑን ማጫ አሳቱነ ኡሱፑን ታሙ ባኮቱ ደኢኖ። እ ላታማነ ሆስፑን አቱማ ናናነ ኡሱፑን ታሙ ማጫ ናና የሌዳ። 22 ሮብኣመ ማእክ ናኣ አቢያ ባረፐ ጉይያን ካተያናዉ ቆፔዳ ድራዉ፥ አ እሻቱዋ ቦላ ካፑዋ ኦꬂደ ሱንꬄዳ። 23 ሮብኣመ ጭንጪደ፥ ባረ አቱማ ናና ይሁዳነ ቢንያማ ቢታቱዋ ኡባን ደእያ ግምበቴዳ ካታማቱዋ ኡባን ሻክ ሻክ ዎꬄዳ፤ ኡንቱንቶ ዳሮ ካꬃ እሜዳ። ቃይ ኡንቱንቶ ጮራ ማጫ አሳ እሜዳ።