1 እስራኤልያ አሳይ ኡባይ ሮብኣማ ካተያናዉ ሰኬማ ካታማ ቤዳ ድራዉ፥ እካ ያ ቤዳ። 2 ናባጻ ናአይ እዮርባም፥ ካትያ ሶሎሞነፐ ባቃቲደ ግብጼን ደእያዌ ሀዋ ስሴዳ ዎደ፥ ግብጼፐ ስሚደ ዬዳ። 3 እስራኤልያ አሳይ ኡባይ እዮርባማዉ ኪቲደ ጼስስና፥ እነ እስራኤልያ ያአይ ኡባይ ሮብኣማኮ ቤዳ፤ 4 “ነ አዉ ኑና ዴጾ ሞርገ ምꬃ ቶሴዳ፤ ሽን ሀእ ኔን እ ኑና ኦስስያ ዎልቃማ ኦሱዋነ ዴጾ ሞርገ ምꬃ ኑዉ ካዉሽሳርኪ። ያቶፐ፥ ኑን ነዉ ኦꬃና” ያጌድኖ።

5 ሮብኣመ ኡንቱንታ፥ “ቢተ፤ ሄዘንꬆ ጋላስ ስሚደ፥ ታኮ ዪተ” ያጌዳ። ሄዋፐ ጉየ አሳይ ስሚደ ቤዳ።

6 ሄዋፐ ጉይያን፥ ካቲ ሮብኣመ አ አዉ ሶሎሞነ ፓጻ ደእያ ዎደ፥ ሶሎሞነ ዞሬዳ ጭማቱዋ ዞረታ በሴዳ። እ ኡንቱንታ፥ “ሀ አሳዉ ዋጋደ ዛራ ጊቴ?” ያጊደ ኦቼዳ።

7 ሽን ጭማቱ ሮብኣማ፥ “ኔን ሀ አሳዉ ኬኮፐ፥ ኡንቱንታ ናሸቾፐነ ኡንቱንቶ ሎኦ ቃላ ዛሮፐ፥ ኡንቱንቱ ኡባ ገደ ነዉ ቆማ ግዳናዋንታ” ያጌድኖ።

8 ሽን ሮብኣመ ጭማቱ ዞሬዳ ዞርያ አጊደ፥ አናና ድጪደ፥ አዉ ኦꬅያ ያላጋ አሳቱዋ ዞረታ በሴዳ። 9 እ ኡንቱንታ፥ “ህንተንቱ ታና ዞርያዌ አዬ? ‘ነ አዉ ኑና ቶሴዳ ዴጾ ሞርገ ምꬃ ኑዉ ካዉሽሳርኪ’ ያግያ ሀ አሳዉ ዋጋደ ዛሮ?” ያጊደ ኦቼዳ።

10 ሽን አናና ድጬዳ ያላጋቱ፥ “ ‘ነ አዉ ኑና ዴጾ ሞርገ ምꬃ ቶሴዳ፤ ሽን ኔን ኑዉ ካዉሽሳርኪ’ ያግያ አሳዉ፥ ‘ታ ቄር ብራꬊ ታ አዉዋ ጼሳፐ ኦርዴ። 11 ታ አዉ ህንተንቱ ሞርገ ምꬃ ዴጸꬄዳ፤ ሽን ታን ሄዋፐካ አꬃደ ዴጸꬃና። ታ አዉ ህንተንታ ልሱዋን ዋꬌዳ፤ ሽን ታን ህንተንታ ማስማሱዋዳን ዱክያ ልሱዋን ዋꬋና’ ያጋደ ዛራ” ያጌድኖ።

12 ሄዋፐ ጉይያን፥ ካቲ ሮብኣመ፥ “ሄዛንꬆ ጋላስ ስሚደ፥ ታኮ ዪተ” ጌዳዋዳንካ፥ እዮርባምነ አሳይ ኡባይ ሄዘንꬆ ጋላስ ስሚደ ዬድኖ። 13 ካቲ ሮብኣመ ኡንቱንቶ ሀንቆ ዛሩዋ ዛሬዳ። ጭማቱዋ ዞርያ አግ ባሺደ፥ 14 ያላጋቱ ዞሬዳ ዞርያ ካሌዳ። ያቲደ ሀዋዳን ያጌዳ፤ “ታ አዉ ህንተንቱ ሞርገ ምꬃ ዴጸꬄዳ፤ ሽን ታን ሄዋፐካ አꬃደ ዴጸꬃና። ታ አዉ ህንተንታ ልሱዋን ዋꬌዳ፤ ሽን ታን ህንተንታ ማስማሱዋዳን ዱክያ ልሱዋን ዋꬋና” ያጊደ ዛሬዳ። 15 ካቲ አሳይ ግያዋ ስሰናን እጼዳ፤ አያዉ ጎፐ፥ መꬍና ጎዳይ ሴሎፐ ዬዳ አኪያ ባጋና ካሰ ናባጻ ናኣ እዮርባማዉ ኦዴዳ ቃላይ ፖለታናዳን ሀዌ ጾሳፐ ሀኔዳ።

16 እስራኤልያ አሳይ ኡባይ ካቲ ኡንቱንቱ ግያዋ ስሰናን እጼዳ። ያቲደ፥ ካትያ ሀዋዳን ያጌድኖ፦ “ዳዊተዋፐ ኑና ጋክያባይ አዬ? እሰያ ናኣፐ ኑን ላታናዌ ባዋ! እስራኤልያ አሳዉ፥ ህንተንቱ ሶ ህንተንቱ ሶ ቢተ! ስም ሮብኣመ ባረዉ ናገቶ!” ያጌድኖ። ሄዋ ድራዉ፥ እስራኤልያ አሳይ ኡባይ ባረንቱ ሶ ባረንቱ ሶ ቤድኖ። 2 ሳሜላ 20:1 17 ሽን ሮብኣመ ይሁዳ ቢታን ደእያ እስራኤልያ አሳ ቦላ ካተቴዳ።

18 ሄዋፐ ጉይያን፥ ካቲ ሮብኣመ ባረ አይለቱዋ ካፑዋ አዶንራማ እስራኤልያ አሳኮ ኪቴዳ፤ ኡንቱንቱ አ ሹቻን ጫዲደ ዎꬌድኖ። ያትና፥ ካቲ ሮብኣመ ባረ ፓራ ጋርያን ኤለካ ከስ ኡቲደ፥ የሩሳላመ ባቃቴዳ። 19 ሄደፐ ዶሚደ፥ ሀቼ ጋካናዉ፥ እስራኤልያ ዛራቱ ታማቱ ዳዊታ ዛርያፐ ካተቴዳ ካተቱዋ ቦላ ማካሌድኖ።