9
ሳባ ካታቶ
(1 ካታ. 10:1-13)
1 ሳባ ካታታ ሶሎሞነ ዋርያ ስሳደ፥ ዴጾ ኦሻቱዋ አካደ፥ አ ፓጫናዉ ደንዳዱ። ደንዳደ ሳዉዋ፥ ሎይꬅ ዳሮ ዎርቃነ አልኦ ሹቻ ጫነቴዳ ዳሮ ጋሎቱዋ ጩጉዋና ሎይꬅ ዳሮ አጃባና የሩሳላመ ጋካደ፥ ሶሎሞነ ስንꬃ አꬋአዱ። ባረ ዎዛናን ደእያዋ ኡባ ሶሎሞናዉ ኦዳዱ። ማቶሳ 12:42፤ ሉቃሳ 11:31 2 ሶሎሞነ እዛ ኦቼዳዋ ኡባ ኦዴዳ፤ እ እዝዉ ብርሸናን አፐ ጌም አቴዳባይ አያይነ ባዋ። 3 ሳባ ካታታ ሶሎሞነ አꬌዳ ኤራ፥ እ ኬጼዳ ካትያ ጎልያ፥ 4 አ ማዳን ሺቅያ ቁማ፥ አ ኦሳንቻቱ ኡትያ ኡተꬃ፥ አ ካልያዋንቱ ኦꬅያ ኦሱዋነ ማይያ ማዩዋ፥ አ ኤሳ ትግያዋንቱ ማይያ ማዩዋነ መꬍና ጎዳ ጌሻ ጎልያን እ ጹግያ ያርሹዋ በኤዳ ዎደ፥ እ ዎዛናይ ጋገቴዳ።
5 ሄዋፐ ጉይያን፥ አ ካትያ፥ “ነዋነ ነ አꬌዳ ኤራተꬃባ ታን ታ ጋደን ደኣደ ስሴዳዌ ቱማ። 6 ሽን ታን ያደ ታ አይፍያ ብራናን በአና ጋካናዉ፥ ኡንቱንቱ ታዉ ኦዴዳዋ አማናበይከ። ነ አꬌዳ ኤራ ግታተꬃዉ ባካነ ታዉ ኦድበይክኖ፤ ታን ስሴዳዋፐ ኔን ሎይꬃ ꬎቃሳ። 7 ኡባ ዎደ ነ ስንꬃን ኤቂደ፥ ነ አꬌዳ ኤራ ስስያ ነ አሳቱነ ነ ኦሳንቻቱ አያ ቃደተድኖሻ! 8 ኔናን ናሸቲደ፥ ኔና ባረ ካዉተꬃ አራታን ኡትሴዳ መꬍና ጎዳይ ነ ጾሳይ ጋላተቶ! ነ መꬍና ጎዳይ እስራኤልያ አሳ ሲቄዳ ድራዉነ መꬍናዉ ሎይꬅ ኤሳናዉ ኮዮዋ ድራዉ፥ ኔን ሱረ ፕርዳነ ጽሎተꬃ ኦꬃና ማላ፥ እ ኔና ኡንቱንቱ ቦላ ካተዬዳ” ያጋዱ።
9 ያጋደ ካታታ 4,000 ኪሎ ግራመ ዴጽያ ዎርቃ፥ ሎይꬅ ዳሮ ሳዉዋነ አልኦ ሹቻ ካትያዉ እማዱ፤ ሳባ ካታታ ካትያ ሶሎሞናዉ እሜዳ ሳዉዋ ማላትያ ሳዉ ኡባካ ባዋ።
10 (ኦፊራፐ ዎርቃ አሄዳ፥ ኪራማ አሳቱነ ሶሎሞነ አሳቱ ያፐካ ሳንዳለ ግያ ምꬃነ አልኦ ሹቻ አሄድኖ። 11 ካቲ ሶሎሞነ ሄ ሳንዳልያፐ መꬍና ጎዳ ጌሻ ጎልያ፥ ካትያ ጎልያ ገልያ ሳአዉ ድꬃቱዋነ ማዝሙርያ የጽያዋንቶ ማስንቁዋነ ዲꬃ መꬍሴዳ። ሄዋ ማላትያባይ ይሁዳ ቢታን ካሰ ቤት ኤረና።)
12 ካቲ ሶሎሞነ ሳባ ካታታ አሞታደ አ ኦቼዳዋ ኡባ እዝዉ እሜዳ። አ አዉ አሄዳዋፐ ዳሩዋ እ እዝዉ እሜዳ። ሄዋፐ ጉይያን፥ ሳባ ካታታ ባረ አጃባና ደንዳደ፥ ባረ ጋድያ ስማዱ።
ሶሎሞነ ዱረታ
(1 ካታ. 10:14-25)
13 ሶሎሞነ ላይꬃን ላይꬃን አክያ ዎርቃይ ላታማነ ሄዙ ሻአ ኪሎ ግራመ ዴጽያዋ። 14 ሄዌ ዛልአንቻቱዋፐ አኬዳ ቃራጻነ አራባ ጋድያ ካተቱዋ ኡባፐነ እስራኤልያ ጋድያ ሞድያዋንቱፐ አኬዳ ዎርቃነ ብራ ጉጀናና። 15 ካቲ ሶሎሞነ ላኡ ጼቱ ዎጋ ጎንዳለቱዋ ቆጼዳ ዎርቃፐ መꬍሴዳ፤ እት እት ጎንዳልያን ላፑን ኪሎ ግራመ ግድያ ዎርቃይ ገሌዳ። 16 ቃይካ እ ሄዙ ጼቱ ቄር ጎንዳለቱዋ ቆጼዳ ዎርቃፐ መꬍሴዳ፤ እት እት ቄር ጎንዳልያን ላኡ ኪሎ ግራመ ግድያ ዎርቃይ ገሌዳ። ካቲ ሄ ጎንዳለቱዋ ሊባኖሳ ዎራ ጎልያ ጌተትያ ጎለን ዎꬄዳ።
17 ቃይካ ካቲ ዳንጋርሳ ዛልያፐ እት ዎልቃማ ካዉተꬃ አራታ መꬍሴዳ፥ ጌሻ ዎርቃን ሼሼዳ። 18 ካዉታ አራታይ ደእያ ሳኣ ፑደ ከሳናዉ የꬍያ ኡሱፑን ድꬃቱ ደኢኖ። ገድያን የꬋናዉ ካዉተꬃ አራታና ጋꬂደ፥ ዎርቃፐ ኦꬄዳ ኦይዲ ደኤ። አራታዉ ላኡ ባጋናካ ቀስያ ዘምፕስያ ሳአቱ ደኢኖ፤ ሄ ላኡ ሳአቱ ላንቂያንካ ያ ባጋናነ ሀ ባጋና ኤቄዳ እት እት ጋሙዋ ምስሊ ደኤ። 19 ሄ አራታ ፑደ ከስያ ኡሱፑን ደꬃቱዋን ያ ባጋናነ ሀ ባጋና እት እት ጋሙዋ ምስሊ፥ ኡባና ታማነ ላኡ ምስለቱ ደኢኖ። ሀዋ ማላ ካዉተꬃ አራታይ ሀራ ካዉተꬃን ሀቃንነ ኦሰትቤና።
20 ካቲ ሶሎሞነ ኡሻ ኡሽያ ሚሻ ኡባይ ዎርቃፐ ኦሰቴዳ፤ ሊባኖሳ ዎራ ጎለን ደእያ ሻሉዋ ኡባይካ ሙሩታ ዎርቃፐ ኦሰቴዳ። ሶሎሞነ ዎደ ብራይ ኡባካ ጎእያባዳን ፓይደት ኤረና። 21 ካትያዉ ኪራማ ማርካባቱዋና ዛልእያ ዎልቃማ ማርካባቱ አባን ደኢኖ። ሄ ማርካባቱ ዎርቃነ ብራ፥ ዳንጋርሳ አቻ፥ ቃረቱዋነ ገለሾቱዋ ጫን አኪደ፥ ሄዙ ላይꬃፐ እት ገደ ስሚኖ።
22 ካቲ ሶሎሞነ ዱረተꬃንነ አꬌዳ ኤራተꬃን ሳኣን ደእያ ካተቱዋ ኡባፐ ዳሬ። 23 ሳኣን ደእያ ካተቱ ኡባይ አ ስንꬃ አꬋናዉነ ጾሳይ አ ዎዛናን ዎꬄዳ አꬌዳ ኤራ ስሳናዉ ኮይኖ። 24 ላይꬃፐ ላይꬃን ይያ ኡባይ አዉ እማናዉ ዎርቃነ ብራ ሚሻቱዋ፥ ማዮቱዋ፥ ኦላ ሚሻቱዋነ ሳዉዋ፥ ፓራቱዋነ ባቁሎቱዋ አኪደ ዬ።
25 ሶሎሞናዉ ፓራቶነ ጋረቶ 4,000 ጋጻታይ ደኤ፤ ቃይ 12,000 ፓራቱ አዉ ደኢኖ። ሶሎሞነ ሄዋንታ ፓራ ጋረቱዋ ካታማቱዋንነ ባረናና የሩሳላመን ዎꬄዳ።1 ካታ. 4:26 26 ሶሎሞነ ኤፍራጺሳ ሻፋፐ ዶሚደ፥ ፕልስጼማ ጋድያነ ግብጼ ዛዋ ጋካናዉ ደእያ ካተቱዋ ኡባ ሞዴዳ። ዶመꬃ 15:18፤ 1 ካታ. 4:21 27 ካቲ የሩሳላመን ብራይ ሹቻዳን ኬለታናዳን፥ ዝጋይካ ጋꬋን ድጭያ ኤꬃዳን ጮራታናዳን ኦꬄዳ። 28 ሶሎሞናዉ ፓራቱዋ ግብጼፐነ ሀራ ቢታ ኡባፐ አሂኖ። ዛረ. 17:16
ሶሎሞነ ሀይቁዋ
(1 ካታ. 11:41-43)
29 ኮይሮፐ ዉርሰꬃ ጋካናዉ ሶሎሞነ ሀኔዳ ሀራባይ ትምቢትያ ኦድያ ናታና ታርክያ ማጻፋን፥ ሴሎፐ ዬዳ አኪይ ትምቢትያ ኦዴዳ ማጻፋንነ ናባጻ ናኣ እዮርባማዋ ትምቢትያ ኦዴዳ እዱ በኤዳ ሳፃ ማጻፋን ጻፈት ኡቴዳ። 30 ሶሎሞነ እስራኤልያ ኡባ ቦላ የሩሳላመን ኦይታሙ ላይꬃ ካተቴዳ። 31 ሄዋፐ ጉይያን፥ ሶሎሞነ ሀይቂደ፥ ባረ ማይዛን ጋከቴዳ፤ ባረ አዉዋ ዳዊታ ካታማን ሞገቴዳ። አ ናአይ ሮብኣመ አ ኮታን ካተቴዳ።