1 ሶሎሞነ መꬍና ጎዳ ጌሻ ጎልያነ ባረ ካትያ ጎልያ ኬጼዳ ላታማንꬃ ላይꬃ ዉርሰꬃን፥ 2 ካቲ ኪራም ዛሪደ እሜዳ ካታማቱዋ ሶሎሞነ ዎꬅ የጊደ ኬጼዳ፤ እስራኤልያ አሳ ሄ ካታማቱዋን ዎꬄዳ።

3 ሄዋፐ ጉይያን፥ ሶሎሞነ ሀማት-ጾባ ጌተትያ ቢታ ቢደ፥ ሄ ቢታ ኦሞዴዳ። 4 ያቲደ መላ ቢታን ደእያ ታጽሞራ ጌተትያ ካታማነ ሻሉዋ ኡባ ምንጅያ ካታማቱዋ ሀማታ ጋድያን ኬጼዳ። 5 ሄዋዳንካ፥ ሶሎሞነ ክል ቤት-ሆሮናነ ህርክ ቤት-ሆሮና ጌተትያ ካታማቱዋ ዛረꬂደ ኬጼዳ፤ ሄ ካታማቱ ድርሳይ፥ ፐንጊነ ጎርዳ ደእያ ድረት ኡቴዳ ካታማቱዋ። 6 ባእላታ ካታማ፥ ሻሉዋ ምንጅያ ካታማቱዋ ኡባ፥ ባረ ፓራቱዋነ ፓራ ጋረቱዋ ዎꬅያ ካታማቱዋ ኡባነ እ ኬጻናዉ አሞቴዳ ኡባ የሩሳላመን ልባኖሳንነ ባረ ሞድያ ቢታ ኡባን ኬጼዳ።

7 ሂተቱፐ፥ አሞራቱፐ፥ ፓርዘቱዋፐ፥ ሂዌቱዋፐነ ያቡሳቱዋፐ አቴዳ አሳቱ ኡባይ እስራኤልያ አሳ ግድክኖ፤ 8 ኡንቱንቱ እስራኤልያ አሳቱ ጋድያፐ ዉርስ ꬋይሰናን አግና፥ ሄ ጋድያን አቴዳ አሳቱዋ ዘረꬃቱዋ። ሶሎሞነ ኡንቱንቱ አይለተꬃን ኦስሴዳ፤ ኡንቱንቱ ሀቼ ጋካናስካ አይለተꬃን ኦꬅኖ። 9 ሽን ሶሎሞነ ባረ ኦሶ እስራኤልያ አሳፐ ኦናነ አይለይቤና፤ ኡንቱንቱ አዉ ኦላንቻቱዋ፥ ኦላ ጋዳዎቱዋ፥ ፓራ ጋረቱዋ ላግያዋንቱ ካፓቱዋነ ፓራ አሳቱዋ ግዲደ ኦꬄድኖ። 10 ሄዋዳንካ፥ ቃይ ኡንቱንቱ ካትያ ሶሎሞነ ኪታ ኦꬅያዋንቱ ካፓቱዋ። ኡንቱንቱፐ ላኡ ጼታነ እሻታማቱ ኪታ ኦꬅያ ኦሳንቻቱዋ ጼሊደ ኦስሴድኖ።

11 ሄዋፐ ጉይያን ሶሎሞነ “መꬍና ጎዳ ታቦታይ ገሌዳ ሳአይ ጌሻ ግድያ ድራዉ፥ ታ ማቻታነ እስራኤልያ ካትያ ዳዊታ ጎለን ደአናዉ በሱኩ” ያጌዳ፤ ግብጼ ካትያ ናቶ ዳዊታ ካታማፐ ደንꬂደ፥ እ እዝዉ ኬጽ ዎꬄዳ ካትያ ጎልያ አሄዳ።

12 ሶሎሞነ ሄ ዎደ ጌሻ ጎልያ ባራንዳ ስንꬃን መꬍና ጎዳዉ ኬጼዳ ያርሽያ ሳኣን ጹግያ ያርሹዋ መꬍና ጎዳዉ ያርሼ። 13 ሙሴ ህጊ አዛዝያዋዳን ሀቼ ሀቼስ በስያ ጹግያ ያርሹዋ ያርሼ። ሶሎሞነ ሳምባታን ሳምባታንነ አግናይ ጼርያ ዎድያን ዎድያን፥ ቃይ ላይꬃፐ ሄዙ ገደነ ቦንችያ ባላቱዋን (እርሹ ገልቤና ኡክꬃ ባላን፥ ሳምንታቱዋ ባላንነ ዳስያ ባላን) ጾሳዉ ያርሹዋ ያርሼ። ከሳ 23:14-17፤ 34:22-23፤ ፓይ. 28:9፤ 29:39፤ ዛረ. 16:16

14 አ አዉ ዳዊተ ካሰ አዛዜዳዋዳን፥ ቄሳቱ ዋ ኡንቱንቱ ኪታን ኪታን ሻክ ሱንꬄዳ፤ ቃይ ጋላስ ጋላስ ማዝሙርያን ሳባናዉነ ቄሳቱ ዋ ማዳናዉ ሌዋቱዋ ሻክ ሱንꬄዳ። ቃይካ ጾሳ አሳ ግዴዳ ዳዊተ አዛዜዳዋዳን፥ ፐንገ ኡባ ካላን ካላን ናጋናዳን ፐንግያ ናግያዋንታ ሻክ ሱንꬄዳ። 15 ሄዋዳንካ፥ ካሰ ዳዊተ ሚሻ ምንጅያ ሳኣባነ ሀራ አላለቱዋ ቄሳቱ ዋነ ሌዋቱዋ አዛዜዳዋዳን፥ እቱነ አተናን ኡባይካ ፖለቴዳ።

16 ሶሎሞነ ሀልቼዳ ኦሱዋ ኡባይ ኦሰቲደ ዉሬዳ፤ መꬍና ጎዳ ጌሻ ጎሊ ባሰቴዳ ዎድያፐ ዶሚደ፥ መꬍና ጎዳ ጌሻ ጎሊ ፖለታና ጋካናዉካ ኦሱዋ ኡባይ ሎኦ ኦሰቴዳ።

17 ሄዋፐ ጉይያን፥ ካቲ ሶሎሞነ ኤዶማ ቢታን ዞኦ አባ ዶናን ደእያ ኤጽዮን-ጋብራነ ኤላታ ጌተትያ ካታማቱዋ ቤዳ። 18 ካትያ ኪራም ማርካበቱዋነ ማርካብያ ላጉዋን ሎሄዳ ባረ አሳቱዋ ሶሎሞናዉ የዴዳ፤ ኡንቱንቱ ሶሎሞነ አሳቱዋና እትፐ ኦፊራ ጋድያ ቤድኖ፤ ያፐ ታማነ እቼሹ ሻአ ኪሎ ግራመ ዴጽያ ዎርቃ ካትያ ሶሎሞናዉ አኪደ ዬድኖ።