1 ሶሎሞነ ዎሳ በꬄዳ ዎደ፥ ሳሉዋፐ ታማይ ዎꬊደ፥ ጹግያ ያርሹዋነ ሀራ ያርሹዋ ሜዳ። ያትና፥ መꬍና ጎዳ ቦንቹ ጌሻ ጎልያ ኩሜዳ። ዎጋ 9:23-24 2 መꬍና ጎዳ ቦንቹ ጌሻ ጎልያ ኩሜዳ ድራዉ፥ ቄሳቱ መꬍና ጎዳ ጌሻ ጎልያ ገላናዉ ዳንዳይበይክኖ። 3 እስራኤልያ አሳይ ኡባይ ታማይ ሳሉዋፐ ዎꬍሺናነ መꬍና ጎዳ ቦንቹ ጌሻ ጎልያ ኩምሽና በኤዳ ዎደ፥ ባረንቱ ዴሙዋ ቢታ ጋꬅ ጉፋኒደ ጎይኔድኖ፤ “መꬍና ጎዳይ ሎአ!

4 ሄዋፐ ጉይያን፥ ካቲነ አሳይ ኡባይ መꬍና ጎዳ ስንꬃን ያርሹዋ ያርሼድኖ። 5 ካቲ ሶሎሞነ ላታማነ ላኡ ሻአ ኮሩማቱዋነ ጼታነ ላታሙ ሻአ ዶርሳቱዋ ያርሼዳ። ሄዋዳን ኦꬂደ፥ ካቲነ አሳይ ኡባይ መꬍና ጎዳ ጌሻ ጎልያ አንጅሴድኖ። 6 ቄሳቱ ባረንቶ ጊጌዳ ሳኣን ኤቂና፥ ሌዋቱ ቃይ ካቲ ዳዊተ መꬍና ጎዳ ሳባናዉ ካሰ ኦꬄዳ፥ ማዝሙርያ የጽያ ሚሻ ኦይቂደ፥ ኡንቱንቱ ስንꬃን ኤቂደ፥ “አገና አ ሲቁ መꬍናዋ” ያጊደ የጺደ፥ መꬍና ጎዳ ጋላቴድኖ። ቄሳቱ ሌዋቱ ስንꬃን ኤቂደ፥ ጹሩምባቱዋ ፑኔድኖ፤ ፑንሽን እስራኤልያ አሳይ ኡባይ ኤቄዳ።

7 ሶሎሞነ መꬍና ጎዳ ጌሻ ጎልያ ስንꬃን ደእያ ግዶ ዳባባ ዱማዬዳ። ሄ ሳኣን ጹግያ ያርሹዋነ እትፐተꬃ ያርሹዋፐ ሞꬉዋ ያርሼዳ። እ ሄዋ ኦꬄዳዌ ጾሳ ስንꬃን ደእያ፥ ናሃስያ ጌተትያ ብራታፐ ኦሰቴዳ ያርሽያ ሳአይ ጹግያ ያርሹዋ፥ ካꬃ ያርሹዋነ እትፐተꬃ ያርሹዋፐ ሞꬉዋ ያርሻናዉ ጉጼዳ ድራሳ።

8 ሄ ዎደ ሶሎሞንነ እስራኤልያ አሳይ ኡባይ ዳስያ ባላ ላፑን ጋላሳዉ ቦንቼድኖ፤ እስራኤልያ ዛዋን ሀማታ ፕኑዋፐ ቢደ፥ ግብጼ ሻፋ ጋካናዉ ደእያ ጮራ አሳይ ሄ ሳኣ ሺቄዳ። 9 አሳይ ያርሽያ ሳኣ አንጅስያ ባላ ላፑን ጋላሳ፥ ቃይ ዳስያ ባላ ሀራ ላፑን ጋላሳ ቦንቼዳ። ሆስፑንꬃ ጋላሳን ጌሻ ያአዉ አሳይ ሺቄዳ። 10 ሄዋፐ ጉይያን፥ ሶሎሞነ ላፑንꬃ አግናን፥ ላታማነ ሄዘንꬆ ጋላስ አሳ ሞይዜዳ፤ መꬍና ጎዳይ ዳዊታዉ፥ ሶሎሞነዉነ ባረ አሳ እስራኤልያዉ ኦꬄዳ ኬካተꬃን አሳይ ናሸቲደነ ዎዛናፐ ፓሽኪደ፥ ባረ ሶ ባረ ሶ ቤዳ።

11 ሶሎሞነ መꬍና ጎዳ ጌሻ ጎልያነ ካትያ ጎልያ ኬጺደ ዉርሴዳ፤ ሶሎሞነ መꬍና ጎዳ ጌሻ ጎልያንነ ባረ ካትያ ጎለን ኦꬃናዉ ባረ ዎዛናን ቆፔዳዋ ኡባ ፖሌዳ። 12 መꬍና ጎዳይ ሶሎሞናዉ ቃማ ቤቲደ፥ ሀዋዳን ያጌዳ፤ “ታን ነ ዎሳ ስሳድ፤ ታን ሀ ሳኣ ታዉ ያርሹ ያርሸትያ ጌሻ ጎልያ ግዳናዳን ዶራድ። 13 ታን እራይ ቡከናዳን ሳሉዋ ጎርድና፥ ዎይ ሳኣ ካꬃ ማናዳን ቦልያ አዛዝና፥ ዎይ ታ አሳ ግዶን ኢታ ሀርግያ የድና፥ 14 ታ ሱንꬃን ጼሰቴዳ ታ አሳቱ ባረንቱ አሳተꬃ ካዉሺደ ዎሶፐ፥ ኡንቱንቱ ታና ኮዮፐነ ባረንቱ ኢታ ኦግያፐ ስሞፐ፥ ታን ሳሉዋን ኡንቱንቱ ዎሳ ስሳና። ኡንቱንቱ ናጋራ አቶ ጋና፤ ኡንቱንቱ ቢታካ ፓꬃና። 15 ሀእካ ሀ ሳኣን ዎሰትያ ዎሳ ታ አይፊ ጼላና፤ ታ ሀይꬃይካ ስሳና። 16 ሀእካ ሀ ጌሻ ጎሊ መꬍናዉ ታ ሱንꬃይ አን ደአና ማላ ኦꬃደ ታን ዶራድ፤ ዶራደካ ጌሻድ። ታ አይፊነ ታ ዎዛናይ ኡባ ዎደ ሀ ጌሻ ጎልያን ደአና።

17 “ኔና ግዶፐ፥ ኔን ነ አዉ ዳዊተ ሀመቴዳዋዳን ታ ስንꬃን ሀመቶፐ፥ ታን አዛዜዳዋ ኡባ ኦꬆፐነ ታ ዎጋነ ታ ህግያ ናጎፐ፥ 18 ታን ነ አዉዋ ዳዊታና፥ ‘እስራኤልያ ሞድያ አሳ ኔን ኡባካ ꬋያካ’ ያጋደ ጫቀቴዳዋዳን፥ ነ ካዉተꬃ አራታ ምንሳ ኤሳና። 1 ካታ. 2:4

19 “ሽን ህንተንቱ እስራኤልያ አሳቱ ዎራ ስሞፐ፥ ታን ህንተንታ አዛዜዳ ታ አዛዙዋነ ታ ዎጋ አግ ባሾፐነ ሀራ ጾሳቶ ኦꬃናዉነ ጎይናናዉ ቦፐ፥ 20 ያቶፐ፥ ታን ካሰ ህንተንቶ እሜዳ ጋድያፐ ህንተንታ ꬎቆላና፤ ታን ታ ሱንꬃዉ ጌሼዳ ሀ ጌሻ ጎልያካ አጋና። ታን ሀ ጌሻ ጎልያ አሳ ኡባ ግዶን ቶስያባነ ቅሊጭያባ ኦꬃና። 21 ሀእ ሎይꬅ ቦንቼቴዳ ሀ ጌሻ ጎልያ ማታና መንꬅያ አሳይ ኡባይ ዳጋሚደ፥ ‘መꬍና ጎዳይ ሀ ጋድያነ ሀ ጌሻ ጎልያ አያዉ ሀዋዳን ኦꬄዴ?’ ያጋና። 22 አሳይ፥ ኡንቱንታ ማይዛ አዎቱዋ ግብጼፐ ከሴዳ መꬍና ጎዳ ባረንቱ ጾሳ ኡንቱንቱ አጊደ፥ ሀራ ጾሳቱዋ ካሌዳ ድራዉነ ኡንቱንቶ ኦꬂደ ጎይኔዳ ድራዉ፥ ጾሳይ ኡንቱንቱ ቦላ ሀ ኢታባ ኡባ አሄዳ ያጊደ ዛራና” ያጌዳ።