1 ሄዋፐ ጉይያን፥ ሶሎሞነ ሀዋዳን ያጌዳ፤ “አቤት መꬍና ጎዳዉ፥ ኔን፥ ‘ታን ꬉማ ሻርያን ደአና’ ያጋ ዎꬃዳ። 2 ሽን ታን ነዉ ሎኦ ጌሻ ጎልያ፥ ኔን አን መꬍናዉ ደአና ሳኣ ኬጻድ” ያጌዳ።

3 እስራኤልያ ያአይ ኩመንꬃይ ኤቂደእሽን፥ ካቲ ኡንቱንቱኮ ስሚደ፥ ኡንቱንታ ሀዋዳን ያጊደ አንጄዳ፤ 4 “መꬍና ጎዳይ እስራኤልያ ጾሳይ ጋላተቶ! ታ አዉዋ ዳዊታዉ ባረ ዶናን ኦዴዳ ህዶታ ባረ ኩሽያን ፖሌዳ። ሄ እ ኦዴዳ ናሸቻይ፥ 2 ሳሜላ 7:1-13፤ 1 ኦዱዋ 17:1-12 5 ‘ታን ታ አሳ እስራኤልያ ግብጼፐ ከሳደ አሄዳ ጋላሳፐ ዶምና፥ ታ ሱንꬃይ አን ጼሰታናዋ ማላ፥ ጌሻ ጎልያ ኬጻናዉ እስራኤልያ ዛራቱዋ ግዶን አያ ካታማነ ዶራበይከ፤ ዎይ እ ታ አሳ እስራኤልያ ካለꬃና ማላ፥ ኦናነ ዶራበይከ። 6 ሽን ሀእ ታ ሱንꬃይ የሩሳላመን ጼሰታና ማላ፥ ታን የሩሳላመ ዶራድ፤ ቃይ ታ አሳ እስራኤልያ ካለꬃና ማላ፥ ዳዊታ ዶራድ’ ያጌዳ።

7 “ታ አዉ ዳዊተ መꬍና ጎዳዉ እስራኤልያ ጾሳ ሱንꬃዉ ጌሻ ጎልያ ኬጻናዉ ባረ ዎዛናን ቆፔዳ። 8 ሽን መꬍና ጎዳይ ታ አዉዋ ዳዊታ፥ ‘ኔን ታ ሱንꬃዉ ጌሻ ጎልያ ኬጻናዉ ነ ዎዛናን ቆፔዳ ድራዉ፥ ሎኦባ ኦꬃዳ። 9 ግዶፐነ፥ ጌሻ ጎልያ ኬጻናዌ ኔና ግዳካ፤ ታ ሱንꬃዉ ጌሻ ጎልያ ኬጻናዌ ነ ጉልባታፐ የለታና ነ ናኣ’ ያጌዳ።

10 “ሀእካ መꬍና ጎዳይ ባረ ጌዳ ህዶታ ቃላ ፖሌዳ። መꬍና ጎዳይ ካሰ እሜዳ ናሸቻዳንካ፥ ታን ታ አዉዋ ዳዊታ ሳኣን ካተታናዉነ ሀእ እስራኤልያ ካዉተꬃ አራታን ኡታድ። ቃይ መꬍና ጎዳ እስራኤልያ ጾሳ ሱንꬃዉ ጌሻ ጎልያ ኬጻድ። 11 መꬍና ጎዳይ እስራኤልያ አሳና ጫቀቴዳ ጫቁ ጻፈቴዳ ማሰቴዳ ሹቻቱ ደእያ ታቦታካ አ ግዶን ዎꬃድ” ያጌዳ።

12-13 ሶሎሞነ አኮተꬃይ እቼሹ ዋꬋ፥ ጎምፓይ እቼሹ ዋꬋነ ቃይ ጌሳይ ሄዙ ዋꬋ ግዴዳ ማድራክያ ናሃስያ ብራታፐ ጊግሲደ፥ ካረ ዳባባ ግዶን ኤስ ዎꬄዳ። ሄዋፐ ጉይያን፥ ሶሎሞነ መꬍና ጎዳዉ ያርሽያ ሳኣ ስንꬃን፥ እስራኤልያ ያአይ ኩመንꬃይ ደእያ ሳኣን ኤቂደ፥ ባረ ኩሽያ ሳሉዋ ዛሪደ ምጬዳ፤ እስራኤልያ ሽቁዋ ኩመንꬃ ስንꬃን ጉልባቴዳ። 14 ያቲደ ሀዋዳን ያጊደ ዎሴዳ፤ “አቤት መꬍና ጎዳዉ፥ እስራኤልያ ጾሳዉ፥ ሳሉዋን ዎይ ሳኣን ነ ማላ ጾስ ባዋ። ኔን ነ ቃላ ጫቁዋ ናጋሳ፤ ባረንቱ ኩመንꬃ ዎዛናፐ ነ ስንꬃን ሀመቴዳ ነ ቆማቱዋ አገና ሲቁዋን ሲቃሳ። 15 ነ ቆማዉ፥ ታ አዉዋ ዳዊታዉ ኔን ኦꬃና ጋደ ሃሳዬዳ ቃላ ናጋዳ፤ ኔን ካሰ ነ ዶናን ሃሳዬዳዋ ነ ኩሽያን ሀቼ ፖላዳ።

16 “ሀእካ አቤት መꬍና ጎዳዉ፥ እስራኤልያ ጾሳዉ፥ ኔን ነ ቆማዉ፥ ታ አዉዋ ዳዊታዉ፥ ‘ኔን ታ ስንꬃን ሀመቴዳዋዳን ነ ናናይካ ታ ህግያን ሀመታናዉ ባረንቱ ኦግያ ናጎፐ፥ እስራኤልያ ካዉተꬃ አራታን ኡትያ አሳ ኔን ኡባካ ꬋያካ’ ያጌዳ ቃላ ፖላ። 1 ካታ. 2:4 17 አቤት መꬍና ጎዳዉ፥ እስራኤልያ ጾሳዉ፥ ኔን ነ ቆማ ዳዊታዉ ሃሳዬዳ ነ ቃላይ ሀእካ ፖለቶ።

18 “ሽን ጾሳይ ቱሙ፥ አሳና እትፐ ሀ ሳኣን ደአኔየ? በአ፥ ሳሎቱ፥ ኡባፐ ꬎቃን ደእያ ሳሎቱካ ነዉ ግዳናዉ ዳንዳይክኖ። ያትና፥ ሀ ታን ኬጼዳ ጌሻ ጎሊ ነዉ አያ ኬሻ ጉጻንዴሻ!2 ኦዱዋ 2:6 19 ግዶፐነ፥ አቤት መꬍና ጎዳዉ፥ ታ ጾሳዉ፥ ታ ዎሳ፥ ነ ቆማ ዎሳነ ዋትዋቱዋ ኔን ሀይዛ። ታን ነ ቆማይ ነ ስንꬃን ዎስያ ዎሳነ ዋሱዋ ኔን ስሳ። 20 ኔን ‘ታ ሱንꬃይ ሄ ሳኣን ጼሰታና’ ጌዳ ሀ ጌሻ ጎልያኮ፥ ነ አይፊ ቃማነ ጋላስ ጼሎ። ታን ነ ቆማይ ሀ ጌሻ ጎልያኮ ስማደ፥ ዎስያ ዎሳ ኔን ስሳ። ዛረ. 12:11 21 ታን ነ ቆማይነ ነ አሳይ እስራኤሊ ሀ ጌሻ ጎልያኮ ስሚደ፥ ዎትዋትያ ዋትዋቱዋ ኔን ስሳ። ኔን ደእያ ሳኣን ሳሉዋን ስሳደ፥ ኑዉ አቶ ያጋ።

22 “እት አሳይ ባረ ሾሩዋ የዲደ ጰ ጊና፥ አ ጫቀꬃናዉ ሀ ጌሻ ጎልያ አህና፥ አ ግዶን ደእያ ያርሽያ ሳኣ ስንꬃን እ ጫቆፐ፥ 23 ኔን ሳሉዋን ስሳደ ኪተታ። ነ ቆማቱዋ ግዱዋን ፕርዳ። ባይዛንችቱዋ ቦላ ፕርዳደ፥ እ ኦꬄዳዋ አ ቦላ ዛራ፤ ጽሉዋ ሻትንꬃደ፥ አዉ አ ጽሎተꬃዳን ዛራ።

24 “ነ አሳይ እስራኤሊ ነ ቦላ ናጋራ ኦꬄዳ ጋሱዋን ሞርክያን ጾነቲደ፥ ኡንቱንቱ ኔኮ ስሚደ፥ ነ ሱንꬃ ጼሲደ፥ ሀ ጌሻ ጎልያን ኔና ዎሶፐነ ነዉ ዋትዋቶፐ፥ 25 ኔን ሳሉዋን ስሳ። ስሳደ ነ አሳ እስራኤልያ ናጋራ አቶ ያጋ፤ ያታደ ኔን ካሰ ኡንቱንቱዉነ ኡንቱንቱ ማይዛ አዋቶ እሜዳ ቢታዉ ኡንቱንቱ ጉየ ዛራ።

26 “ነ አሳይ ነ ቦላ ናጋራ ኦꬄዳ ጋሱዋን ሳሉ ጎርደትናነ እራይ ቡከናን እጽና፥ ኡንቱንቱ ሀ ሳኣ ስሚደ፥ ዎሶፐነ ኔን ኡንቱንቱ ዎሳን ኡንኤꬄዳ ድራዉ፥ ነ ሱንꬃ ጼሲደ፥ ባረንቱ ናጋራፐ ስሞፐ፥ 27 ኔን ሳሉዋን ስሳ። ነ ቆማቱዋ ናጋራ፥ ነ አሳ እስራኤልያ ናጋራ አቶ ያጋ። ኡንቱንቱ ሀመታናዉ በስያ ሎኦ ኦግያ ኡንቱንታ ታማርሳ፤ ያታደ ኔን ነ አሳ ላትሴዳ ጋድያን እራ ቡክሳ።

28 “ቢታ ቦላን ኮሻይ ዎይ ኢታ ሀርጊ ዪና፥ ዎይ ካꬃ ሌጊ፥ ዎይ ሌሹ፥ ዎይ ቦሊ፥ ዎይ ቡምቡረꬃይ ባይዝና፥ ዎይ ሞርኪ ኡንቱንቱ ካታማቱዋ ዶድና፥ ዎይ አያ ማላ ባሻይ ዎይ ሀርጊ ዪና፥ 29 ነ አሳ እስራኤልያፐ ኦንነ ዎይ ነ አሳይ ኡባይ ኔና ዎሶፐነ ነዉ ዋትዋቶፐ፥ ቃይ አያ አሳይነ ባረ ዎዛናን ኡንኤትያባነ ካዮትያባ ኤሪደ፥ ሀ ጌሻ ጎልያኮ ስሚደ፥ ባረ ኩሽያ ምጮፐ፥ 30 ኔን ደእያ ሳኣን ሳሉዋን ስሳ። ኡንቱንቱ ናጋራ አቶ ያጋ፤ ያታደ ኡንቱንቶ ኪተታ። ኔን አሳ ዎዛና ኤርያዋዳንካ አሳ ኡባዉ አ ኦሱዋዳን ኦሱዋዳን እማ። አያዉ ጎፐ፥ አሳ ኡባ ዎዛና ኤርያዌ ነ ጻላላ። 31 ያቶፐ፥ ኔን ኑ ማይዛ አዋቶ እሜዳ ጋድያን ባረንቱ ደእያ ዎደ ኡባን፥ ኡንቱንቱ ነዉ ያዪደ፥ ነ ኦግያን ሀመታና።

32 “ሄዋዳንካ፥ ነ አሳ እስራኤልያ ግደና ካረ ቢታ አሳይ ነ ዎልቃማ ሱንꬃ ድራዉነ ኔን ነ አሳዉ ኦꬄዳ ማላልስያ ኦሶቱ ድራዉ፥ ሃኮ ጋድያፐ ዪደ፥ ሀ ጌሻ ጎልያኮ ስሚደ ዎሶፐ፥ 33 ኔን ደእያ ሳኣን ሳሉዋን ስሳ። ሄ ካረ ጋድያ አሳይ ኦችያዋ ኡባ ኪተታ። ሀ ሳኣ አሳይ ኡባይ ነ ሱንꬃ ኤራናዳን፥ ነ አሳ እስራኤልያዳን ነዉ ያያናዳንነ ታን ኬጼዳ ሀ ጌሻ ጎሊ ነዉ ጎይንያ ሳኣ ግድያዋ ኡንቱንቱ ኤራናዳን ካረ ጋድያ አሳይ ኔና ዎስያዋ ኡባ ፖላ።

34 “ነ አሳቱ ባረንቱ ሞርከቱዋ ኦላና ማላ፥ ኔን ኪቴዳ ሳኣ ሀቃነ ቢደ፥ ኡንቱንቱ ኔን ዶሬዳ ሀ ካታማኮነ ታን ነ ሱንꬃዉ ኬጼዳ ጌሻ ጎልያኮ ስሚደ፥ ኔና ዎሶፐ፥ 35 ኡንቱንቱ ዎሳነ ዋትዋቱዋ ሳሉዋን ኔን ስሳ፤ ኡንቱንቶ ጾኑዋ እማ።

36 “ናጋራ ኦና አሳይ ባይናዋዳንካ፥ ኡንቱንቱ ነ ቦላ ናጋራ ኦꬅና፥ ኔን ኡንቱንቶ ሀንቀታደ ሞርከቶ አꬃ እምና፥ ሞርከቱካ ኡንቱንታ ኦሞዲደ፥ ሃክና ማትናካ ባረንቱ ጋድያ አኪደ አፍና፥ 37 ኡንቱንቱ ሄ ኦሞደቴዳ ቢታን ደኢደ፥ ባረንቱ ዎዛናን ናጋራፐ ስሞፐ፥ ቃይ ሄ ኦሞደቴዳ ጋድያን ደኢደ፥ ‘ኑን ናጋራ ኦꬄዳ፤ ኑን ባይዜዶ፤ ኑን ኢታባ ሀኔዶ’ ያጊደ ነዉ ዋትዋቶፐ፥ 38 ባረንታ ኦሞዲደ አፌዳ ሞርከቱዋ ቢታን ደኢደ፥ ኡንቱንቱ ባረንቱ ኩመንꬃ ዎዛናፐነ ባረንቱ ኩመንꬃ ቆፋፐ ኔኮ ስሞፐ፥ ኔን ኡንቱንቱ ማይዛ አዋቶ እሜዳ ኡንቱንቱ ቢታኮ፥ ኔን ዶሬዳ ካታማኮነ ታን ነ ሱንꬃዉ ኬጼዳ ጌሻ ጎልያኮ ስሚደ፥ ኔና ዎሶፐ፥ 39 ያቶፐ፥ ኡንቱንቱ ዎሳነ ዋትዋቱዋ ኔን ደእያ ሳኣን ሳሉዋን ስሳ። ስሳደ ኡንቱንቶ ፕርዳ፤ ነ ቦላ ናጋራ ኦꬄዳ ነ አሳዉ አቶ ያጋ።

40 “ሀእካ አቤት ታ ጾሳዉ፥ ሀ ሳኣን ዎስያ ዎሳ ነ አይፊ ጼሎ፤ ነ ሀይꬃይካ ስሶ። 41 ሄዋ ድራዉ፥ አቤት መꬍና ጎዳዉ፥ ጾሳዉ፥ ደንዳ! ነ ዎልቃዉ ማላታ ግዴዳ ነ ታቦታና ነ ሸምፕያ ሳኣ ገላ። አቤት መꬍና ጎዳዉ፥ ጾሳዉ፥ ነ ቄሳቱ አቶተꬃ ማዪኖ፤ ነ ጌሻ አሳቱካ ነ ኬካተꬃን ናሸትኖ። ማዝ. 132:8-10 42 አቤት መꬍና ጎዳዉ፥ ጾሳዉ፥ ኔን ኦኬዳ ካትያ አጎፓ። ነ ቆማ ዳዊታዉ አገና ነ ሲቁዋ ሀሳያ” ያጌዳ።