1 ሶሎሞነ መꬍና ጎዳ ጌሻ ጎልያ ኪታ ኡባ ፖሌዳዋፐ ጉይያን፥ አ አዉ ዳዊተ ጾሳዉ ዱማይ ዎꬄዳ ብራ፥ ዎርቃነ ሀራ ሚሻቱዋ ኡባ አሂደ፥ ጾሳ ጌሻ ጎልያ ሚሻ ምንጅያሳን ዎꬄዳ።2 ሳሜላ 8:11፤ 1 ኦዱዋ 18:11

2 ሄዋፐ ጉይያን፥ ካቲ ሶሎሞነ መꬍና ጎዳ ቃላ ጫቁዋ ታቦታ ዳዊታ ካታማፐ፥ ጽዮነፐ አሀናዳን እስራኤልያ ጭማቱዋ፥ ዛራቱዋ ኡባ ካፓቱዋነ እስራኤልያ ጎልያ አሳቱዋ ካለꬅያዋንታ የሩሳላመ ካታማ ሺሼዳ። 2 ሳሜላ 6:12-15፤ 1 ኦዱዋ 15:25-28 3 እስራኤልያ አሳይ ኡባይ ላፑንꬃ አግናን፥ ዳስያ ባላይ ቦንቼትያ ዎደ፥ ካትያኮ ሺቄዳ። 4 እስራኤልያ ጭማቱ ኡባይ ጋካናዉ፥ ሌዋቱ ታቦታ ደንꬄድኖ። 5 ሌዋቱነ ቄሳቱ ታቦታ፥ ጾሳ ጋከትያ ዱንካንያነ ዱንካንያ ግዶን ደእያ ጌሻ ሚሻቱዋ ኡባ ቶኪደ አሄድኖ። 6 ካቲ ሶሎሞንነ አናና እትፐ ደእያ እስራኤልያ ያአይ ኩመንꬃይ ታቦታ ስንꬃን ሺቂደ፥ ፓይዳናዉ ዳንዳየተና፥ ጮራ ዶርሳነ መህያ ያርሼድኖ።

7 ሄዋፐ ጉይያን፥ ቄሳቱ መꬍና ጎዳ ቃላ ጫቁዋ ታቦታ ጌሻ ጎልያዉ ግዶ ጌሻ ቆልኡዋ፥ ኡባፐ አꬍያ ጌሻ ሳኣ ግያ ሳኣ አሂደ፥ ክሩበቱዋ ምስለቱ ቀፈቱዋፐ ጋርሳ ባጋና ዎꬄድኖ። 8 ምጨት ኡቴዳ ክሩበቱዋ ቀፈቱ ታቦታነ ታቦታ ቶክያ ካሱዋ ካሜድኖ። 9 ካሶቱ ሎይꬅ አዱሳ ግድያ ድራዉ፥ ኡንቱንቱ ጼራይ ኡባፐ አꬍያ ጌሻ ሳኣ ስንꬃን ደእያ ጌሻ ሳኣን ቤታናዉ ዳንዳዬ፤ ሽን ጌሻ ሳኣፐ ካረና ቤተና። ኡንቱንቱ ሀቼ ጋካናዉ፥ ሄ ሳኣን ደኢኖ። 10 እስራኤልያ አሳይ ግብጼ ጋድያፐ ከሴዳ ዎደ፥ መꬍና ጎዳይ ኡንቱንቱና ቃላ ጫቁዋ ጫቀቴዳ ሲና ደርያን ሙሴ ዎꬄዳ ላኡ ማሰቴዳ ሹቻቱዋፐ አትና፥ ታቦታ ግዶን ሀራባይ አያይነ ባዋ። ዛረ. 10:5

11-14 ሄ ሳኣን ደእያ ቄሳቱ ኡባቱ ባረንቱ ኦꬅያ ሳኣን ሳኣን ሻከተናን፥ እትፐ ባረንታ መꬍና ጎዳዉ ዱማይ ዎꬄድኖ። ማዝሙርያ የጽያ ሌዋቱ ኡባቱ፥ አሳፈ፥ ሄማንነ ይዱቱን፥ ኡንቱንቱ ናናይነ ኡንቱንቱ ዳቦቱ ሱፍያ ግያ ማዩዋ ማዬድኖ። ሄ ማዩዋ ማዪደ፥ ዳላቱዋ፥ ዲꬃቱዋነ ማስንቆቱዋ ኦይቂደ፥ ያርሽያ ሳፐ አዋይ ዶልያ ባጋና ኤቄድኖ፤ ጼታነ ላታሙ ቄሳቱ ጹሩምባቱዋ ፑናናዉ ኡንቱንቱና እትፐ ኤቄድኖ። ኡንቱንቱ ኡባይ ጹሩምባቱዋ ፑኒደ፥ ዳላቱዋ ቃꬂደ፥ ዲꬃቱዋ ዲጺደነ ሀራ ካእያ ሚሻቱዋን ካኢደ፥

ቄሳቱ ጌሻ ጎልያፐ ከስያ ዎደ፥ ሻሪ ጾሳ ጌሻ ጎልያ ኩሜዳ፤ ሄ ሻርያ ጋሱዋን ቄሳቱ ባረንቱ ኦሱዋ ኦꬃናዉ ዳንዳይበይክኖ፤ አያዉ ጎፐ፥ ጾሳ ቦንቹ ጾሳ ጌሻ ጎልያ ኩም ኡቴዳ። ከሳ 40:34-35