1 ሄዋፐ ጉይያን፥ ሶሎሞነ ጌሳይ ላታሙ ዋꬋ፥ ጎምፓይ ላታሙ ዋꬋ፥ ጌሳይ ታሙ ዋꬋ ግድያ ያርሽያ ሳኣ ናሃስያ ብራታፐ ኦስሴዳ። ከሳ 27:1-2

2 ቃይ ናሃስያ ብራታ ሲልሲደ፥ ዶናይ ያ ጋጻፐ ሀ ጋጻ ጋካናዉ ታሙ ዋꬋ፥ ጌሳይ እቼሹ ዋꬋነ ዩሹ ሀታሙ ዋꬋ ግድያ አባ ግያ ሳኒያ መꬍሴዳ። 3 አባ ሳኒያ ዶናን ካረ ባጋና ዝቂ ጊደ፥ አናና ኦይቀቲደ መቴዳ ምስለቱ ደኢኖ፤ ሄ ምስለቱ ላኡ ማራን ደእያ ቦራቱዋ ምስለቱዋ።

4 ሄ አባ ሳኒ ናሃስያ ብራታፐ መቴዳ ታማነ ላኡ ቦራቱዋ ምስለቱ ዞክያን ኡቴዳ። ቦራቱዋፐ ሄዛቱ ሁጲሳ ባጋ፥ ሄዛቱ አዋይ ዉልያ ባጋ፥ ሄዛቱ ገድሳ ባጋ፥ ሄዛቱ ቃይ አዋይ ዶልያ ባጋ ስሚደ ጼልያዋ ማላትኖ። አባ ሳኒ ኡንቱንቱ ቦላ ኡቴዳ፤ ኡንቱንቶ ጉየ ባጋይ ግዱዋኮ ስም ኡቴዳ። 5 አባ ሳኒ እት ታካ ኬሻ ኦርዱዋ፤ አ ዶናይ ዋንጫ ዶና ማላ፤ ቃይ ጪሻይ ጪሼዳዋካ ማላቴ። ሄ አባ ሳኒ ኡሱፑን ታሙ ሻአ ሊትሮ ግድያ ሃꬃ ኦይቂያዋ።

6 ሶሎሞነ ቃይካ ሜጨትያ ታሙ ከረቱዋ መꬍሴዳ፤ መꬍሴዳ እቼሻቱዋ ገድሳ ባጋና፥ ቃይ እቼሻቱዋ ሁጲሳ ባጋና ዎꬄዳ። ኡንቱንቱን ጹግያ ያርሹዋ አሹ ሜጨቴ፤ ሽን አባ ሳኒያ ሃꬃን ቄሳቱ ሜጨትኖ። ከሳ 30:17-21

7 ሄዋፐ ጉይያን፥ ሶሎሞነ ኡንቱንቶ እመቴዳ ሀልቹዋዳን ጾምፕያ ዎꬅያ ባላቱዋ ታማቱዋ ዎርቃፐ ኦስሲደ፥ እቼሻቱዋ ኡሸቻ ባጋና፥ እቼሻቱዋ ሀድርሳ ባጋና ጌሻ ጎልያ ግዶን ዎꬄዳ።ከሳ 25:31-40 8 ቃይካ እ ታሙ ጻርጴዛቱዋ ኦꬂደ፥ እቼሻቱዋ ኡሸቻ ባጋና፥ እቼሻቱዋ ሀድርሳ ባጋና ጌሻ ጎልያ ግዶን ዎꬄዳ። ቃይ ጼቱ ኩይጻሮቱዋካ ዎርቃፐ መꬍሴዳ።ከሳ 25:23-30

9 ሶሎሞነ ቄሳቶ ግዶ ዳባባነ ካረ ባጋ ዎልቃማ ዳባባ ጊግሴዳ፤ ዳባባዉ ፐንገቱዋ ጊግሲደ፥ ፐንገቱዋ ናሃስያ ብራታን ሼሼዳ። 10 አባ ሳኒያ ጌሻ ጎልያፐ ገድሳ አዋይ ዶልያ ባጋ ዎꬄዳ።

11 ሁራም ከረቱዋ፥ አካፋቱዋነ ኩይጻሮቱዋ መꬌዳ፤ ያቲደ ሁራም ካትያ ሶሎሞናዉ ጾሳ ጌሻ ጎልያን ኪታ ኦꬂደ ፖሌዳ። 12 እ ኦꬄዳ ኦሶቱካ ላኡ ቱሳቱዋ፥ ቱሳቱዋ ሁጲያን ዎꬅያ ሳአይነ ማላ ላኡ ጉምቦቱዋ፥ ቱሳቱዋ ቦላይ ደእያ ላኡ ጉምቦቱዋ አሌቂስያ ላኡ ግተ ማላ ሳንሳላታቱዋ፥ 13 እት እት ጉምቡዋ ቦላ ላኡ ማራን ናሃስያፐ መቴዳ እት እት ጼቱ ሮማነ ቴራ ምስለቱዋ፥ ኡባና ኦይዱ ጼቱ ሮማነ ቴራ ምስለቱዋ፥ 14 ታሙ ጋረቱዋ፥ ጋረቱዋ ቦላን ዎꬍያ፥ ሜጨትያ ታሙ ከረቱዋ፥ 15 አባ ሳኒያነ አፐ ጋርሳን ደእያ ታማነ ላኡ ቦራቱዋ ምስለቱዋ፥ 16 ከረቱዋ፥ አካፋቱዋ፥ ዛምቤልያነ ሀራ ሚሻቱዋ ኡባ።

ሁራም ካትያ ሶሎሞናዉ መꬍና ጎዳ ጌሻ ጎልያ ኦሶ መꬌዳ ሀ ሚሻቱዋ ኡባ ቁጨቴዳ ናሃስያፐ መꬌዳ። 17 ካቲ ሶሎሞነ ሱኮታፐነ ጻሬዳፐ ግዱዋን፥ ዮርዳኖሳ ደምባን ደእያ ናሃስያ ብራታ ሲልስያ ሳኣን ሀዋንታ ኡባ ኦስሴዳ። 18 ናሃስያ ብራታፐ መቴዳ ሀ ሚሻይ ኡባይ ሎይꬅ ዳሮ ግዴዳ ድራዉ፥ ዎይሳ ዴጽንቶ፥ ልኪ ኤረትቤና።

19 ቃይካ ሶሎሞነ ጾሳ ጌሻ ጎልያ ደእያ ሚሻቱዋ ዎርቃፐ ኡባ መꬍሴዳ። ሄዋንቱካ ዎርቃፐ ኦꬄዳ ያርሽያ ሳኣ፥ ጾሳ ስንꬃን ዎꬅያ ኡክꬃይ ኡትያ ጻራጴዛ፥ 20 ኡንቱንቶ ዎꬄዳ ዎጋዳን ኡባፐ አꬍያ ጌሻ ሳኣ ስንꬃን ፖአናዳን ጾምፕያ ዎꬅያ ዎርቃ ባላቱዋ፥ ኡንቱንቱ ዎርቃ ጾምፐቱዋ፥ 21 ጌሻ ዎርቃፐ ኦꬄዳ ጪሻ ምስለቱዋ፥ ጾምፕያ ቶይስያ ቃጰቱዋ። 22 ጾምፕያ ቶይስያ ቃጰቱዋ፥ ኩይጻሮቱዋ፥ እጻና ጩዋይያባቱዋነ ታማ አክያ ሚሻቱዋ። ሀ ሚሻቱ ኡባይ ጌሻ ዎርቃፐ ኦሰቴድኖ። ጌሻ ጎልያዉ ካረ ባጋ ፐንገቱዋነ ኡባፐ አꬍያ ጌሻ ሳኣ ገልያ ፐንገቱዋ ዎርቃን ሼሼዳ።