1 ካቲ እዮርባም ካተቴዳ ታማነ ሆስፑንꬃ ላይꬃን አቢይ ይሁዳን ካተቴዳ። 2 አቢይ የሩሳላመን ሄዙ ላይꬃ ካተቴዳ። አ ዳይ ሱንꬃይ ምካዮ፤ *ምካዮ፦ ምካዮ ዎይ ማእኮ ጌተታዉ። 2 ኦድ። 11:20 ጼላ። ምካያ ግብአፐ ዬዳ ኡርኤላ ናቶ።

አቢይነ እዮርባም ኦለቲደ ደኤድኖ። 3 አቢይ ዶረቴዳ 400,000 ምኖ ኦላንቻቱዋ አኪደ፥ ኦላናዉ ከሴዳ፤ እዮርባምካ ዶረቴዳ 800,000 ምኖ ኦላንቻቱዋ አኪደ፥ አቢያና ኦለታናዉ ከሴዳ።

4 ሄዋፐ ጉይያን፥ አቢይ ኤፍሬማ ገዝያን ደእያ ጻማራይማ ጌተትያ ደርያ ሁጲያን ኤቂደ፥ ሀዋዳን ያጌዳ፤ “ህንተንቶ፥ እዮርባማነ እስራኤልያ አሳቶ፥ ኡባይካ ታን ግያዋ ስስተ! 5 መꬍና ጎዳይ እስራኤልያ ጾሳይ ዳዊተነ አ ዘረꬃይ እስራኤልያ ቦላ መꬍናዉ ካተታናዳን፥ ዳዊታና እ ላመተና ቃላ ጫቁዋ ጫቀቴዳዋ ህንተንቱ ኤርክቴየ? 6 ሽን ዳዊታ ናኣ ሶሎሞነ ቆማይ፥ ናባጻ ናአይ እዮርባም ደንዲደ፥ ባረ ጎዳ ቦላ ማካሌዳ። 7 ሮብኣመ ያላጋነ ዳቡራንቻ ግዲደ፥ ኡንቱንቱና ኤቀታናዉ ዳንዳየና ዎደ፥ ፓꬄና ሹፉሮ አሳቱ እዮርባመኮ ሺቂደ፥ ሶሎሞነ ናኣ ሮብኣማ ቦላ ምኔድኖ።

8 “ሀእካ መꬍና ጎዳይ ዳዊታ ዘረꬃቶ እሜዳ ካዉተꬃና ህንተንቱ ጋዳታናዉ ቆፒታ። ህንተንቱ ሄዋ ቆፔዳዌ ህንተንቱ ሎይꬅ ጮራ አሳ ግድያ ድራሳነ ህንተንቶ ጾሳቱዋ ግዳና ማላ፥ እዮርባም ዎርቃፐ መꬍሴዳ ማራቱ ህንተናና ደእያ ድራሳ። 9 አሮና ዛርያ ግዲደ፥ መꬍና ጎዳዉ ኦꬅያ ቄሳቱ ዋነ ሌዋቱዋ ህንተንቱ የደርሴድታ። ያትና ሀራ ጋድያ አሳይ ኦꬅያዋዳን ህንተንቶ ሀራ ቄሳቱ ዋ ሱንꬄድታ። ባረና ዱማያናዉ እት ኮሩማ ላፑን ዶርሳ ኦርገቱዋ አኪደ ይያ ኦንነ ዎርዱዋ ጾሳቶ ቄሰ ግዳና።

10 “ሽን ኑና ግዶፐ፥ መꬍና ጎዳይ ኑ ጾሳ፤ ኑን አ አግበይኮ። አሮና ዛርያ ግዲደ መꬍና ጎዳዉ ኦꬅያ ቄሳቱ ኑዉ ደኢኖ፤ ቃይ ሌዋቱ ኡንቱንታ ማድኖ። 11 ኡንቱንቱ ኡባ ጋላስ ዎንታነ ኦማርስ መꬍና ጎዳዉ ጹግያ ያርሹዋ ያርሺኖነ ሳዊያ እጻና ጩዋዪኖ። መꬍና ጎዳ ስንꬃን ዎꬅያ ኡክꬃ ጌሻ ጻርጴዛን ዎꬂኖ። ኦማርስ ኦማርስ ፖእሳናዳን ዎርቃፐ ኦꬄዳ ጾምፐቱዋ ዎꬅያ ባላን ዎꬂደ ጊግሲኖ። አያዉ ጎፐ፥ ኑን ጾሳ ኑ ጾሳ አዛዙዋ ናጌቶ፤ ሽን ህንተንቱ አ አጌድታ። 12 በእተ፥ ጾሳይ ኑናና ደኤ፤ እ ኑና ካለꬅያዋ። ኦላ ጹሩምባ ፑንያ አ ቄሳቱ ካ ኑናና ደኢኖ፤ ኑን ህንተናና ኦላ ዶማናዉ ጹሩምባካ ኡንቱንቱ ፑናና። እስራኤልያ አሳዉ፥ መꬍና ጎዳና ህንተንቱ አዎቱዋ ጾሳና ኦለቶፕተ! አያዉ ጎፐ፥ ህንተንቱ አ ጾናናዉ ዳንዳይክታ” ያጌዳ።

13 እ ሃሳይሽን፥ እዮርባም ባረ ኦላንቻቱዋፐ እት ጩጉዋ ህንቱቱፐ ጉየና ዙጊደ ናጋና ማላ የዴዳ። እስራኤልያ ኦላንቻቱ ይሁዳ ኦላንቻቱ ስንꬃን ደእያ ዎደ፥ ዙጊደ ናግያ ኦላንቻቱ ህንቱቱፐ ጉየና ደኢኖ። 14 ይሁዳ ኦላንቻቱ ጉየ ስም ጼልያ ዎደ፥ ኡንቱንታ ኦላናዉ ዬዳዋንቱ ጉየናነ ስንꬃና ደእያዋ በኤድኖ። መꬍና ጎዳዉ ዋሴድኖ፤ ቄሳቱ ካ ጹሩምባ ፑኔድኖ። 15 ሄዋፐ ጉይያን፥ ይሁዳ ኦላንቻቱ ኦላ ዋሱዋ ዋሴድኖ። ኡንቱንቱ ኦላ ዋሱዋ ዋሴዳ ዎደ፥ ጾሳይ እዮርባማነ እስራኤልያ አሳ ኡባ አቢያ ስንꬃንነ ይሁዳ ስንꬃን ጾኔዳ። 16 እስራኤልያ ኦላንቻቱ ይሁዳ ኦላንቻቱ ስንꬃፐ ባቃትና፥ ጾሳይ ኡንቱንቱ ይሁዳ ኦላንቻቱ ኩሽያን አꬂደ እሜዳ። 17 አቢይነ አ ኦላንቻቱ ኡንቱንታ ሱፑ ኦꬂደ ዉርሴድኖ፤ ያትና፥ እቼሹ ጼቱ ሻአ ዶረቴዳ እስራኤልያ ኦላንቻቱ ሀይቄድኖ። 18 እስራኤልያ አሳይ ሄ ዎደ ጾነቴዳ፤ ይሁዳ አሳይ መꬍና ጎዳን፥ ባረንቱ አዎቱዋ ጾሳን አማነቴዳ ድራዉ፥ ኡንቱንታ ጾኔድኖ።

19 አቢይ እዮርባማ የደርሲደ፥ አፐ ቤቴለ ካታማ፥ ይሻና ካታማነ ኤፍሮና ካታማ ኡንቱንቱ ሞꬃቱዋና ኦይቄዳ። 20 አቢይ ደኤዳ ላይꬃን ኡባን እዮርባም ስሚደ ምንቤና። መꬍና ጎዳይ እዮርባማ ደችና ሀይቄዳ።

21 ሽን አቢይ ምን ምን ቤዳ። አቢይ ታማነ ኦይዱ ማጫ አሳ አኪደ፥ ላታማነ ላኡ አቱማ ናናነ ታማነ ኡሱፑን ማጫ ናና የሌዳ። 22 አቢይ ኦꬄዳ ሀራባይ፥ እ ሀኔዳባይነ እ ጌዳዌ ኡባይ ትምቢትያ ኦድያ እዶ ታርክያ ማጻፋን ጻፈት ኡቴዳ።