1 አቢይ ሀይቂደ፥ ባረ ማይዛን ጋከቴዳ፤ ዳዊታ ካታማን አ ሞጌድኖ። አ ኮታን አ ናአይ አሳይ ካተቴዳ። እ ካተቴዳ ዎደ ጋዲ ታሙ ላይꬃ ዎፓ ደሜዳ።

2 አስ መꬍና ጎዳ ባረ ጾሳ ስንꬃን ሎኦባነ ሱረባ ኦꬄዳ። 3 አስ አላጋ ጾሳቶ ያርሽያ ሳአቱዋነ ጎይንያ ꬎቃ ሳኣ ኮሌዳ። ጎይናናዉ ሹቻፐ ኦꬄዳ ቱሳቱዋካ መንሬꬄዳ፤ አሼሮ ጌተትያ ጾሳት ምስለቱዋካ ቃንጸሬꬅ ኦሌዳ። 4 ይሁዳ አሳይ መꬍና ጎዳ ባረንቱ አዎቱዋ ጾሳ ኮያናዳንነ አ ህግያነ አ አዛዙዋ ናጋናዳን አሳይ አዛዜዳ። 5 ቃይ ጎይንያ ꬎቃ ሳአቱዋነ እጻና ጩዋይያ ሳኣ ይሁዳ ካታማ ኡባፐ ꬋይሴዳ። አ ካዉተꬃ ላይꬃን ቢታይ ዎፓ ደሜዳ። 6 ካቲ አሳይ ይሁዳን ደእያ ካታማቶ ጌሶቱዋ መꬌዳ። መꬍና ጎዳይ አ ሸምፕሴዳ ድራዉ፥ ቢታይካ ሸምፔዳ፤ ሄ ላይꬃቱዋን አናና ኦንነ ኦለትቤና።

7 አሳይ ይሁዳ አሳ ሀዋዳን ያጌዳ፤ “አነ ኑን ሀ ካታማቱዋ ኬጾይተ፤ ኡንቱንቱ ዩሹዋን ሚጻቱዋ መꬎይተ። ኡንቱንቱ ቦላ አዱሳ ግምበቱዋ፥ ፐንገቱዋነ ፐንገቱዋ ጎርድያ ሽካላቱዋ ከሴቶ። ኑን መꬍና ጎዳ ኑ ጾሳ ኮዮዋ ድራዉ፥ ቢታይ ሀእካ ኑሳ። ኑን አ ኮዬዶ፤ እ ኑዉ ኡባ ባጋና ዎፓ እሜዳ” ያጌዳ። ሄዋ ድራዉ፥ ኡንቱንቱ ካታማቱዋ ኬጺደ ፖሌድኖ።

8 አሳዉ ዎጋ ጎንዳለቱዋነ ቶራቱዋ ኦይቂያ 300,000 ኦላንቻቱ ይሁዳ ዛርያፐ ደኢኖ፤ ቃይ ቄር ጎንዳለቱዋ ኦይቂያዋንቱነ ዎንዳፍያን ዱክያዋንቱ ላኡ ጼታነ ሆስፑን ታሙ ሻአ ኦላንቻቱ ቢንያማ ዛርያፐ ደኢኖ። ሀዋንቱ ኡባይካ ምኖ አሳቱዋ።

9 ዘራሀ ጌተትያ እት ቶጵያ አሳይ እት ሚሎነ ኦላንቻቱዋነ ሄዙ ጼቱ ፓራ ጋረቱዋ አኪደ፥ ይሁዳ ኦላናዉ ዪደ፥ ማሬሻ ጋኬዳ። 10 አስካ አናና ኦለታናዉ ከሴዳ፤ ከሲደ ባረ ኦላንቻቱዋ ማሬሻ ማታን ደእያ ጻፋታ ዎምባን ሳልፕሴዳ። 11 ሄዋፐ ጉይያን፥ አስ መꬍና ጎዳ ባረ ጾሳ ዎሲደ፥ “አቤት መꬍና ጎዳዉ፥ ዎልቃይ ባይና ኦላንቻቱ ዎልቃማ ኦላንቻቱዋ ጾናናዳን ማድያዌ ኔፐ አትና፥ ሀራይ ባዋ! አቤት መꬍና ጎዳዉ፥ ኑ ጾሳዉ፥ ኑን ኔናን አማነቲደ፥ ሀ ጮራ ኦላንቻቱዋና ነ ሱንꬃን ኦለታናዉ ዬዳ ድራዉ፥ ኔን ኑና ማዳ። አቤት መꬍና ጎዳዉ፥ ኔን ኑ ጾሳ፤ ኔና አሳይ ጾነና” ያጌዳ።

12 ሄዋ ድራዉ፥ መꬍና ጎዳይ አሳ ስንꬃንነ ይሁዳ ኦላንቻቱ ስንꬃን ቶጵያ ኦላንቻቱዋ ሾጬዳ፤ ቶጵያ ኦላንቻቱ ባቃቴድኖ። 13 አስነ አናና ደእያ አሳይ ኡንቱንታ ጋራራ ጋካናዉ የደርሴድኖ። ቶጵያ ኦላንቻቱዋፐ ዳሩ ሀይቄዳ ድራዉ፥ ኡንቱንቱ ስሚደ ምናናዉነ ኦለታናዉ ዳንዳይበይክኖ። ሄዋዳን ሀኒደ፥ ቶጵያ ኦላንቻቱ መꬍና ጎዳንነ አ ኦላንቻቱዋን ጾነቴድኖ። ካትያ አሳ ኦላንቻቱካ ዳሮባ ኦሞዴድኖ። 14 ሄዋ ሄራን ደእያ አሳይ መꬍና ጎዳይ ኦꬄዳዋ ያቲደ፥ ዳሮ ዳጋሜዳ። አሳ ኦላንቻቱካ ጋራራ ዩሹዋን ደእያ ካታማቱዋ ኡባ ቦንቂደ ꬋይሴድኖ። 15 ቃይ መህያ ሄምያዋንቱ ሞꬃቱዋ ኦለቲደ፥ ዳሮ ዶርሳ፥ ዴሻነ ጋሉዋ ድኢደ፥ የሩሳላመ ስሜድኖ።