1 ኦዴዳ ናኣ አዛርያሳ ቦላ ጾሳ አያናይ ዎꬌዳ፤ 2 አሳና ጋከታናዉ ቢደ፥ ሀዋዳን ያጌዳ፤ “አሳ፥ ኔን፥ ይሁዳ አሳይነ ቢንያማ አሳይ ኡባይ ስስተ! ህንተንቱ መꬍና ጎዳና እትፐ ደእያ ዎደ ኡባን እካ ህንተናና ደኤ። ህንተንቱ አ ኮዮፐ፥ እ ህንተንቶ ቤታና፤ ሽን ህንተንቱ አ አጎፐ፥ እካ ህንተንታ አጋና። 3 እስራኤልያ አሳይ ቱሙ ጾሳይ፥ ታማርስያ ቄሲነ ህጊ ባይናን ዳሮ ዎድያ ደኤዳ። 4 ሽን ባረንታ መቱ ጋኬዳ ዎደ፥ ኡንቱንቱ መꬍና ጎዳኮ፥ እስራኤልያ ጾሳኮ ስሚደ፥ አ ኮዬድኖ፤ እ ኡንቱንቶ ቤቴዳ። 5 ሄ ዎድያን ካረ ከስያዎነ ሶ ገልያዎ ሳሮተꬃይ ባዋ፤ አያዉ ጎፐ፥ ጋድያ ኡባ ቦላን ደእያ አሳይ ዳሮ ሻባረቴ። 6 ጾሳይ ኡንቱንታ ዱማ ዱማ መቱዋን የጌዳ ድራዉ፥ ደሪ ደርያ፥ ካታማይካ ካታማ ኡንኤꬄ። 7 ሽን ህንተንቱ ምንተ፤ ላፎፕተ! አያዉ ጎፐ፥ ህንተንቱ ኦꬄዳ ኦሶ ጋቲ ደኤ” ያጌዳ።

8 ኦዴዳ ናአይ ትምቢትያ ኦድያ አዛርያስ ኦዴዳ ቃላ ስሴዳ ዎደ፥ አሳይ ምኔዳ። አሳይ ይሁዳነ ቢንያማ ቢታቱዋ ኡባፐነ ኤፍሬማ ገዝያን እ ኦሞዲደ ኦይቄዳ ካታማቱዋፐ ሸነይያ ኤቃ ምስለቱዋ ꬋይሴዳ። ሄዋፐ ጉይያን፥ መꬍና ጎዳ ጌሻ ጎልያ ስንꬃን ደእያ መꬍና ጎዳዉ ያርሽያ ሳካ ኦራꬄዳ።

9 መꬍና ጎዳይ አ ጾሳይ አናና ደእያዋ በኤዳ ድራዉ፥ ዳሮ አሳይ እስራኤልያፐ አኮ ዬዳ፤ ይሁዳ አሳነ ቢንያማ አሳ ኡባ፥ ኡንቱንቱና ደእያ ኤፍሬማ ዘረꬃ፥ ምናሰ ዛራቱዋነ ስሞና ዘረꬃ አሳይ ሺሼዳ። 10 አሳይ ካተቴዳ ታማነ እቼሻንꬆ ላይꬃን፥ ሄዘንꬆ አግናን ሄ አሳይ የሩሳላመን ሺቄዳ። 11 ሄ ጋላስ ኦሞድ አሄዳዋፐ ላፑን ጼቱ ኮሩማቱዋነ ላፑን ሻአ ዶርሳቱዋ መꬍና ጎዳዉ ያርሼድኖ። 12 መꬍና ጎዳ ባረንቱ አዎቱዋ ጾሳ ባረንቱ ኩመንꬃ ዎዛናንነ ባረንቱ ኩመንꬃ ሸምፑዋን ኮያናዉ ቃላ ገሌድኖ። 13 “መꬍና ጎዳ እስራኤልያ ጾሳ ኮየና አሳይ፥ ጉꬃ ግድና ዎልቃማ ግድና፥ አቱማ ግድና ማጫ ግድና፥ ሀይቆ” ጊደ ጫቀቴድኖ። 14 ሄዋ ቦላንካ ማላካታነ ጹሩምባ ፑኒደ፥ ባረንቱ ቃላ ꬎቁ ኦꬂደ፥ መꬍና ጎዳዉ ጫቄድኖ። 15 ይሁዳ አሳይ ኡባይ ባረንቱ ኩመንꬃ ዎዛናን ሀ ጫቁዋ ጫቄዳ ድራዉ፥ ናሸቴድኖ። አያዉ ጎፐ፥ ጾሳ ኡንቱንቱ ላሞቲደ ኮይና፥ እ ኡንቱንቶ ቤቴዳ። መꬍና ጎዳይ ኡንቱንቶ ኡባ ባጋናካ ዎፓ እሜዳ።

16 ካቲ አሳይ ባረ አዉዋ ዳያ ማእካ አሼሮ ግያ ጾሳትዉ ሸነይያ ኤቃ ምስልያ መꬌዳ ድራዉ፥ ካትያ አቶ አ ጌተትያ ቦንቹዋፐ እዞ ድጌዳ። አሳይ ሄ ኤቃ ምስልያ ቃንጸሬꬅ ሱፓዪደ፥ ቀድሮና ዛንጋራን ጹጌዳ። 17 ጎይንያ ꬎቃ ሳኣ አሳይ እስራኤልያ ጋድያፐ ꬋይሰናን አጎፐነ፥ እ ባረ ደኤዳ ላይꬃ ኡባን መꬍና ጎዳዉ ዎዛናፐ አማነትያ አሳ ግዲደ ደኤዳ። 18 እነ አ አዉ ጾሳዉ ዱማይ ዎꬄዳ ብራነ ዎርቃ ሀራ ሚሻቱዋ አሂደ፥ ጾሳ ጌሻ ጎልያ ግዶን ዎꬄዳ። 19 አሳይ ካተቴዳ ሀታማነ እቼሻንꬆ ላይꬃይ ጋካናዉ ኦላይ ባዋ።