1 ሄዋፐ ጉይያን፥ ካቲ ዮሳፌጸ ባረ ሶ የሩሳላመ ሳሮ ስሜዳ። 2 ትምቢትያ ኦድያ ሀናና ናአይ ዬሁ አናና ጋከታናዉ ከሲደ፥ ካትያ ዮሳፌጻ፥ “ኔን ኢታቱዋ ማዳናዉ ዎይ መꬍና ጎዳ እጽያዋንታ ሲቃናዉ በሲ? ሄዋ ድራዉ፥ መꬍና ጎዳ ሀንቁ ነ ቦላ ዬዳ። 3 ግዶፐነ፥ አሼሮ ግያ ኤቃት ምስለቱዋ ጋድያፐ ድጌዳ ድራዉነ ጾሳ ኮያናዉ ነ ዎዛና ጊግሴዳ ድራዉ፥ ኔን ሎኦባ ኦꬃዳ” ያጌዳ።

4 ዮሳፌጸ የሩሳላመን ደኤዳ። ቃይ ዮሳፌጸ በርሳበሄፐ ዶሚደ፥ ኤፍሬማ ገዝያ ጋካናዉ፥ አሳ ግዶን ዩዪደ፥ መꬍና ጎዳ፥ ኡንቱንቱ አዎቱዋ ጾሳኮ፥ ኡንቱንታ ዛሬዳ። 5 ይሁዳ ቢታን ደእያ ግምበቴዳ ካታማቱዋ ኡባን ዳናቱዋ ሱንꬄዳ። 6 እ ዳናቶ፥ “ህንተንቱ ኦꬅያባን ህንተንታ ኤርተ። አያዉ ጎፐ፥ ህንተንቱ አሳዉ ፕርድክታ፤ መꬍና ጎዳዉ ፕርዲታ። ህንተንቱ ፕርድያ ዎደ፥ እ ህንተናና ደኤ። 7 ሀእካ ህንተንቱ መꬍና ጎዳዉ ያይተ፤ ህንተንቱ ኦꬅያባን ህንተንታ ኤርተ። አያዉ ጎፐ፥ መꬍና ጎዳ ኑ ጾሳ ማታን ናቁ፥ አሳ ስንꬃ ጼሊደ ማድያዌነ ማጋንጻ ምያዌ ባዋ” ያጌዳ።

8 መꬍና ጎዳ ህግያ አꬍያዋነ አሳ ግዶን ደንድያ የዉዋ ፕርዳናዳን ሌዋቱዋፐ፥ ቄሳቱ ዋፐነ እስራኤልያ አሳ አዎቱዋ ጎልያ ካፓቱዋፐ አማሬዳ አሳቱዋ ዮሳፌጸ የሩሳላመን ሱንꬄዳ። 9 ሄዋፐ ጉይያን፥ ዮሳፌጸ ኡንቱንታ ሀዋዳን ያጊደ አዛዜዳ፤ “መꬍና ጎዳዉ ያዪደ፥ አማነትያዋንነ ኩመንꬃ ዎዛናን ኦꬅተ። 10 ባረንቱ ካታማን ደእያ ህንተንቱ እሻቱ ሸምፑ የዉዋ፥ ዎይ ህግያዋ፥ ዎይ አዛዙዋ፥ ዎይ አዋዩዋባ፥ ዎይ ፕርዳባ ህንተንቱኮ አሆፐ፥ ኡንቱንቱ መꬍና ጎዳ ስንꬃን ባይዛንቻ ግደናዳንነ አ ሀንቁ ህንተንቱ ቦላነ ህንተንቱ እሻቱዋ ቦላ ዬናዳን ኡንቱንታ ሴርተ። ህንተንቱ ኡንቱንታ ሴሮፐ፥ ህንተንቱ ህንተንቱ ሁጲያዉ ባይዛንቻ ግድክታ። 11 መꬍና ጎዳ ባጋ የዉዋ ኡባዉ አዎትያዌ ቄሳቱዋ ካፑዋ አማርያ፤ ቃይ ካትያ ባጋ የዉዋ ኡባዉ አዎትያዌ ይሁዳ ዛራቱዋ ካፑዋ እስማኤላ ናኣ ዛባድያ። ሌዋቱ ህንተንቱ ስንꬃን ካፑዋ ግዳናዋ። ህንተንቱ ምኒደ ኦꬅተ። ሱረባ ሀንያዋንቱና መꬍና ጎዳይ እትፐ ግዶ” ያጌዳ።