1 ሄዋፐ ጉይያን፥ ሞኣባቱነ አሞናቱ ቃይ ኡንቱንቱና እትፐ ማኡናቱ ዮሳፌጻ ቦላ ማዬድኖ። 2 ያትና፥ አማሬዳ አሳቱ ዪደ ዮሳፌጻዉ፥ “ማጽነ አባፐ ሄፍንꬃና ደእያ ሶርያፐ ዳሮ ኦላንቻቱ ኔና ኦላናዉ ዬድኖ። በአ፥ ኡንቱንቱ ሀጻጾን-ታማራን ደኢኖ” ያጊደ ኦዴድኖ። (ሀጻጾን-ታማር ኤንጋዳዉ ሀራ ሱንꬃ።)

3 ያትና፥ ዮሳፌጸ ያዪደ፥ መꬍና ጎዳ ኦቻናዉ ባረ ቆፋ ቃቼዳ፤ ይሁዳ ጋድያን ኡባን ጾማ አዋዬዳ። 4 ይሁዳ አሳይ ኡባይ መꬍና ጎዳፐ ማዱዋ ኮያናዉ እትፐ ሺቄዳ፤ ኡንቱንቱ መꬍና ጎዳፐ ማዱዋ ኮያናዉ ይሁዳ ካታማቱዋ ኡባፐ ዬድኖ።

5 ዮሳፌጸ ይሁዳነ የሩሳላመ ሽቁዋ ግዶን፥ መꬍና ጎዳ ጌሻ ጎልያን ደእያ ኦራꬃ ዳባባ ስንꬃን ኤቄዳ። 6 ሀዋዳን ያጌዳ፥ “አቤት መꬍና ጎዳዉ፥ ኑ አዎቱዋ ጾሳዉ፥ ሳሉዋን ደእያ ጾሳይ ኔና! ሳኣን ደእያ ካዉተꬃቱዋ ኡባ ሞድያዌ ኔና! ግታተꬃይነ ዎልቃይ ነ ኩሽያን ደእያ ድራዉ፥ ኔናና ኤቀታናዉ ዳንዳዬዳባይ ባዋ። 7 አቤት ኑ ጾሳዉ፥ ካሰ ሀ ቢታን ደእያዋንታ ነ አሳ እስራኤልያ ስንꬃፐ የደርሳደ፥ ነ ሲቁዋ አብራሃማ ዘረꬃቶ መꬍናዉ እሜዳዌ ኔና!ኢሳ. 41:8፤ ያቆባ 2:23 8 ኡንቱንቱ ሀ ጋድያን ደኤድኖ፤ ኡንቱንቱ ሀዋን ነ ሱንꬃዉ ጌሻ ጎልያ ኬጺደ፥ 9 ‘ኑ ቦላ ኢታባይ፥ ዎይ ኦላይ፥ ዎይ ኢታ ሀርጊ፥ ዎይ ኮሻይ ይንቶ፥ ኑን ነ ሱንꬃይ ደእያ ሀ ጌሻ ጎልያ ስንꬃንነ ነ ስንꬃን ኤቂደ፥ ኑ መቱዋን ኔኮ ዋሳና። ኔን ኑ ዋሱዋ ስሳደ፥ ኑና አሻና’ ያጌድኖ።

10 “ሀእካ አሞናቱ፥ ሞኣባቱነ ኤዶማቱ ኑ ቦላ ማዬድኖ። በን ኑ አዎቱ ግብጼፐ ከሴዳ ዎደ፥ ኔን ኡንቱንቱ ሄ ቢታቱዋ ገለናዳን ድጋዳ፤ ሄዋ ድራዉ፥ ኑ አዎቱ ሄ ቢታቱነ ዩዪደ አꬌድኖፐ አትና፥ ኡንቱንታ ꬋይስበይክኖ።ዛረ. 2:4-19 11 ኑን ኦꬄዳባዉ ኡንቱንቱ ኑዉ ዛሬዳባ በአ። ኔን ኑዉ እሜዳ ላታ ጋድያፐ ኡንቱንቱ ኑና የደርሳናዉ ዬድኖ። 12 አቤት ኑ ጾሳዉ፥ ኔን ኡንቱንቱ ቦላ ፕርድኪ? አያዉ ጎፐ፥ ኑና ኦላናዉ ዬዳ ሀ ዳሮ ኦላንቻቱዋና ኦለታናዉ ኑዉ ዎልቃይ ባዋ። ኑን ኦꬃናባካ ኤሮኮ፤ ሽን ኑ አይፈቱ ኔና ጼልኖ” ያጌዳ።

13 ይሁዳ አሳይ ኡባይ ባረንቱ ቄር ናናቱዋና፥ ባረንቱ ማጫ አሳቱዋናነ ባረንቱ ናናቱዋና እትፐ ግዲደ፥ መꬍና ጎዳ ስንꬃን ኤቄድኖ።

14 ሄዋፐ ጉይያን፥ ዛካራሳ ናአይ ያሃዝኤል ሽቁዋ ግዶን ኤቂደእሽን፥ መꬍና ጎዳ አያናይ አ ቦላ ዎꬌዳ። ዛካራስ ባናያ ናኣ፤ ባናይ ይእኤላ ናኣ፤ ይእኤል ማታንያ ናኣ፤ ማታኔ ሌዊያ ዛረነ አሳፋ ያራ። 15 ጾሳ አያናይ ያሃዝኤላ ቦላ ዎꬍና፥ ሀዋዳን ያጌዳ፤ “ካትያዉ ዮሳፌጻ፥ ይሁዳንነ የሩሳላመን ደእያ አሳዉ፥ ኡባይካ ስስተ! መꬍና ጎዳይ ህንተንታ ሀዋዳን ያጌ፤ ‘ሀ ዳሮ ኦላንቻቱ ጋሱዋን ያዮፕተነ ዳጋሞፕተ። አያዉ ጎፐ፥ ኦላይ ጾሳዋፐ አትና፥ ህንተንቱዋ ግደና። ዛረ. 20:1-4 16 ህንተንቱ ዎንት ኡንቱንታ ቦላ ከስተ። ጺጻ ግያ ፑደꬃን ይሩኤላ መላ ቢታን ደእያ ዛንጋራ ዉርሰꬃን ህንተንቱ ኡንቱንታ ደማና። 17 ሀ ኦላ ኦለትያዋንቱ ህንተንታ ግድክታ። ህንተንቱ ሳኣ ሳኣ ኦይቂ ኤቂደ፥ መꬍና ጎዳይ ህንተንታ አሽያዋ በኢታ’ ያጌ። ይሁዳ አሳዉ፥ የሩሳላመ አሳዉ፥ ያዮፕተነ ዳጋሞፕተ! ኡንቱንቱና ኦለታናዉ ዎንት ከስተ። መꬍና ጎዳይ ህንተናና ግዳናዋ” ያጌዳ። ከሳ 14:13-14

18 ዮሳፌጸ ዴሙዋ ሳኣ ጋꬂደ ጎይኔዳ፤ ሄዋዳንካ፥ ይሁዳ አሳይ ኡባይነ የሩሳላመን ደእያ አሳይ ኡባይ መꬍና ጎዳ ስንꬃን ኩንዲደ፥ እስራኤልያ ጾሳዉ ጎይኔድኖ። 19 ቃሃታ ያራፐነ ቆራሀ ያራፐ አማሬዳ ሌዋቱ ኤቂደ፥ ባረንቱ ቃላ ꬎቁ ኦꬂደ፥ መꬍና ጎዳ እስራኤልያ ጾሳ ጋላቴድኖ።

20 ኡንቱንቱ ጉራ ጉራን ደንዲደ፥ ታቆአ መላ ቢታ ባናዉ ከሴድኖ፤ ኡንቱንቱ ከሴዳ ዎደ ዮሳፌጸ ደንድ ኤቂደ፥ “ይሁዳንነ የሩሳላመን ደእያ አሳዉ፥ ታን ግያዋ ስስተ። መꬍና ጎዳን፥ ህንተንቱ ጾሳን፥ አማነትተ፤ ህንተንቱ ምናና። ቃይ ትምቢትያ ኦድያዋንቱንካ አማነትተ፤ የዉዋ ኡባይ ህንተንቶ እንጀታናዋ” ያጌዳ። 21 ዮሳፌጸ አሳና ዞረቴዳዋፐ ጉይያን፥ ማዝሙርያ የጽያዋንታነ መꬍና ጎዳ ጋላትያዋንታ ሱንꬄዳ። ኡንቱንቱ ባኣላ ጋላሳ ማዩዋ ማዪደ፥ ኦላንቻቱ ስንꬃና አꬊደ፥

22 ኡንቱንቱ ማዝሙርያ የጽያዋነ ጋላትያዋ ዶሜዳ ዎደ፥ ይሁዳ ኦላናዉ ዬዳ አሞናቱዋ ቦላ፥ ሞኣባቱዋ ቦላነ ኤዶማቱዋ ቦላ መꬍና ጎዳይ ሻቢርሳ የዴዳ። 23 አሞናቱነ ሞኣባቱ ኤዶማቱዋ ቦላ ደንዲደ፥ ኡንቱንታ ኡባና ꬋይሴድኖ። ኡንቱንቱ ኤዶማቱዋ ꬋይሴዳዋፐ ጉይያን፥ ባረንቱ ግዶን እቱ እቱዋ ꬋይሴድኖ። 24 ይሁዳ አሳይ መላ ቢታን ደእያ ዎችያ ሳኣ ዬዳ ዎደ፥ ባረንቱ ሞርከቱ ደእያ ሳኣ ጼሌድኖ፤ ኡንቱንቱ አሃይ ቢታን ግሴዳዋ በኤድኖ። ኡንቱንቱፐ እት አሳይነ ከስ አኪደ ብቤና።

25 ሄዋፐ ጉይያን፥ ዮሳፌጽነ አ አሳይ ኦሞዱዋ አካናዉ ቢደ፥ ዳሮ መሄቱዋ፥ ሽንቃቱዋ፥ ኦላ ሚሻቱዋ፥ ማዮቱዋነ ሀራ አልኦ ሚሻቱዋ ደሜድኖ። ሽን ኦሞዱዋ ኡባባ ቶክ አፋናዉ ዳንዳይበይክኖ። ኦሞደዳባይ ሎይꬅ ዳሮ ግዴዳ ድራዉ፥ ሄዋ ሺሻናዉ ሄዙ ጋላሳ አኬዳ። 26 ሄዋፐ ጉይያን፥ ኡንቱንቱ ኦይደንꬆ ጋላስ በራካ ዎምባ ግያ ሳን ሺቄድኖ፤ ሄ ሳኣን መꬍና ጎዳ ጋላቴድኖ። ሄዋ ድራዉ፥ ኡንቱንቱ ሄ ሳኣ ጋላታ ዎምባ ያጊደ ሱንꬄድኖ።

27 ሄዋፐ ጉይያን፥ ይሁዳ አሳይ ኡባይነ የሩሳላመ አሳይ ኡባይ፥ ዮሳፌጸ ካለꬅና፥ መꬍና ጎዳይ ሞርከቱዋ ቦላ ጾኑዋ እም ናሸችና የሩሳላመ ስሜዳ። 28 ኡንቱንቱ የሩሳላመ ጋኪደ፥ ዲꬃና፥ ማስንቁዋናነ ጹሩምባና መꬍና ጎዳ ጌሻ ጎልያ ገሌድኖ።

29 እስራኤልያ ሞርከቱዋ መꬍና ጎዳይ አላጋ ቢታን ደእያ ካዉተꬃቱ ኡባይ ስሴዳ ዎደ፥ ኡንቱንቱ ጾሳዉ ያዬድኖ። 30 ያቲደ ጾሳይ ዮሳፌጻዉ ኡባ ባጋና ሸምፑዋ እሜዳ ድራዉ፥ አ ካዉተꬃይ ሳሮተꬃ ደሜዳ።

31 ዮሳፌጸ ይሁዳን ካተትያ ዎደ፥ አ ላይꬃይ ሀታማነ እቼሻ፤ እ የሩሳላመን ላታማነ እቼሹ ላይꬃ ካተቴዳ። አ አታ ሺልሀ ናቶ አዙቦ ጌተታዉ። 32 ዮሳፌጸ ባረ አዉዋ አሳ ኦግያን ሀመቴዳ፤ እ ሄ ኦግያፐ ሸርእ ግቤና፤ መꬍና ጎዳ ስንꬃን እ ሱረባ ኦꬄዳ። 33 ግዶፐነ፥ ጎይንያ ꬎቃ ሳኣ ꬋይስቤና፤ አሳይ ብሮ ባረ ኩመንꬃ ዎዛናፐ ባረ ማይዛ አዎቱዋ ጾሳኮ ስምቤና።

34 ዮሳፌጸ ሀኔዳ ሀራባይ፥ ኮይሮፐ ዉርሰꬃ ጋካናዉ እስራኤልያ ካተቱ ታርክያ ማጻፋን፥ ሀናና ናኣ ዬሁ ታርክያ ግዶን ጻፈት ኡቴዳ።

35 እት ዎደ፥ ይሁዳ ካቲ ዮሳፌጸ ኢታባ ኦꬄዳ እስራኤልያ ካትያ አካዝያሳና እትፐተꬃ ኦꬄዳ። 36 ያቲደ ዮሳፌጸ አናና ዛልእያ ዎልቃማ ማርካባቱዋ መꬋናዉ ማየቴዳ። ሄ ማርካባቱዋ ኤጽዮን-ጋብራ ካታማን መꬍሴድኖ። 37 ሄዋፐ ጉይያን፥ ማሬሻፐ ዬዳ ዶዳዋ ናአይ ኤልኤዛር፥ “ኔን አካዝያሳና እትፐተꬃ ኦꬄዳ ድራዉ፥ ኔን ኦꬄዳ ኪታ መꬍና ጎዳይ ꬋይሳና” ያጊደ፥ ዮሳፌጻ ቦላ ትምቢትያ ኦዴዳ። ሄዋ ድራዉ፥ ማርካባቱ መኤድኖ፤ ኡንቱንቱ ሀቃነ ባናዉ ዳንዳይበይክኖ።