21
1 ሄዋፐ ጉይያን፥ ዮሳፌጸ ሀይቂደ፥ ባረ ማይዛን ጋከቴዳ። ዳዊታ ካታማን ባረ ማይዛ አዎቱዋና ሞገቴዳ። አ ኮታን አ ናአይ ዮራመ ካተቴዳ።
ይሁዳ ካትያ ዮራማ
(2 ካታ. 8:17-24)
2 ዮራማ እሻቱ አዛርያሳ፥ ይህኤላ፥ ዛካራሳ፥ አዛርያሳ፥ ምካኤላነ ሻፋጽያ፤ ሀዋንቱ ኡባይ ይሁዳ ካትያ ዮሳፌጻ ናና። 3 ኡንቱንቱ አዉ ዮሳፌጸ ኡንቱንቶ ዳሮ ብራ፥ ዎርቃነ አልኦ ሻሉዋ እሜዳ፤ ቃይ ግምበቴዳ ይሁዳ ካታማቱዋካ እሜዳ። ሽን ዮራመ ባረ አዎ ባይራ ናኣ ግድያ ድራዉ፥ ካዉተꬃ አዉ እሜዳ። 4 ዮራመ ባረ አዉዋ ካዉተꬃ አኪደ ምኔዳ ዎደ፥ ባረ እሻቱዋ ኡባቱዋነ እት እት እስራኤልያ ካፓቱዋ ማሻን ዎꬌዳ።
5 ዮራመ ካተትያ ዎደ፥ ላይꬃይ አዉ ሀታማነ ላኡዋ፤ እ የሩሳላመን ሆስፑን ላይꬃ ካተቴዳ። 6 ዮራመ አካባ ናቶ አኬዳ ድራዉ፥ አካባ ሶይ አሳይ ሀመቴዳዋዳንካ ካሰ እስራኤልያ ካተቱዋ ኦግያን ሀመቴዳ፤ መꬍና ጎዳ ስንꬃንካ ኢታባ ኦꬄዳ። 7 ግዶፐነ፥ መꬍና ጎዳይ ካሰ ዳዊታና ጫቀቴዳ ጫቁዋ ድራዉ፥ ዳዊታ ዘረꬃ ꬋይሳናዉ ኮይቤና። ዳዊታ ዘረꬃይ መꬍናዉ ካተታናዉ መꬍና ጎዳይ ሂዶታ እም ዎꬄዳ።1 ካታ. 11:36
8 ዮራመ ካተቴዳ ዎደ፥ ኤዶማ አሳይ ይሁዳ ካትያ ቦላ ማካሊደ፥ ባረንቶ ካትያ ካተዬድኖ። ዶመꬃ 27:40 9 ሄዋ ድራዉ፥ ዮራመ ባረ ኦላ ጋዳዋቱዋናነ ባረ ፓራ ጋረቱዋ ኡባና እትፐ ኤዶማ ጋድያ ኦላናዉ ቤዳ፤ ኤዶማ አሳይ አነ አ ፓራ ጋረቱዋ ካፓቱዋ ዶዴድኖ። ሽን ዮራምነ አ አሳይ ቃማ ደንዲደ፥ ዶዳ አꬊደ ባቃቴድኖ። 10 ሄ ዎድያፐ ዶሚደ፥ ሀቼ ጋካናዉ፥ ኤዶማ አሳይ ይሁዳ አሳዉ ሞደትቤና። ዮራመ መꬍና ጎዳ ባረ አዎቱዋ ጾሳ አጌዳ ድራዉ፥ ሊብና አሳይ ቃይ ሄ ዎደ ይሁዳ ካትያ ቦላ ማካሌዳ።
11 ዮራመ ቃይ ይሁዳ ገዝያን ጎይንያ ꬎቃ ሳኣ ጊግሴዳ፤ የሩሳላመን ደእያ አሳይ ሻርሙጻናዳን ኦꬄዳ፤ ይሁዳ አሳካ ባለꬄዳ። 12 ሄዋፐ ጉይያን፥ ትምቢትያ ኦድያ ኤላስ ዮራማዉ ዳብዳቢያ ሀዋዳን ያጊደ ኪቴዳ፤ “መꬍና ጎዳይ፥ ነ ማይዛ አዉዋ ዳዊታ ጾሳይ፥ ‘ኔን ነ አዉዋ ዮሳፌጻ ኦግያን ዎይ ይሁዳ ካትያ አሳ ኦግያን ሀመትያዋ አጋደ፥ 13 እስራኤልያ ካተቱዋ ኦግያን ሀመታዳ። አካባ ሶይ አሳይ ኦꬄዳዋዳን፥ ይሁዳንነ የሩሳላመን ደእያዋንቱ ሻርሙጻናዳን ኦꬃዳ። ቃይካ ኔፐ ኬክያ፥ ነ አዉዋ ጎለን ደእያ ነ እሻቱዋ ዎꬋዳ። 14 ሄዋ ድራዉ፥ መꬍና ጎዳይ ነ አሳ፥ ነ ናና፥ ነ ማቻቱዋነ ነዉ ደእያ ኡባባ ዎልቃማ ቦሻን ሾጫና። 15 ኔና ማራጭያ ሀርጊ ኦይቂና፥ ነዉ ሳኩ ያ ጎብ ጎቢደ ባና’ ያጌ” ያጌዳ።
16 ሄዋፐ ጉይያን፥ መꬍና ጎዳይ ፕልስጼማቱዋነ ቶጵያ ማታን ደእያ አራባቱዋ ዮራማ ኦላናዳን ደንꬄዳ። 17 ያትና፥ ኡንቱንቱ ይሁዳ ቦላ ማዬድኖ፤ ካትያ ጎለን ደእያ ሚሻ ኡባ፥ ካትያ አቱማ ናናነ አ ማጫዋንታ ኦሞዴድኖ። አ ናና ኡባፐ ቴፋ አካዝያሳፐ አትና፥ ሀራ እት ናአይነ አዉ አትቤና።
18 ሄ ኡባፐ ጉይያን፥ ፓጻናዉ ዳንዳየና ማራጭያ ሀርግያን ዮራማ መꬍና ጎዳይ ሾጬዳ። 19 ላኡ ላይꬃ ግዶን ሀርጊ አ ቦላ ጎቤዳ፤ አ ማራጪ ካረ ከሴዳ፤ ያትና፥ ሎይꬅ ሳከቲደ ሀይቄዳ። አ ሞግያ ዎደ አሳይ ካሰ አ ማይዛ አዋቶ ኦꬄዳዋዳን፥ አ ቦንቾ ምꬃ ዶሪደ፥ ታማ ኤꬅቤና።
20 ዮራመ ካተትያ ዎደ፥ ላይꬃይ አዉ ሀታማነ ላኣ፤ እ የሩሳላመን ሆስፑን ላይꬃ ካተቴዳ። እ ሀይቂያ ዎደ ኦንነ ካዮትቤና። ዮራመ ዳዊታ ካታማን ሞገቴዳፐ አትና፥ ካተቱዋ ማካናን ሞገትቤና።